Tomwatar ror Petrus ma Yohanes far mangtetak agamar
1 Noak ma Petrus ma Yohanes ratanuk ror tomwat ngayadin, metryat e mangsompar ulnir ma mangajakar na Ratu Ni Das Silai nir ulun numur tomwat Sadukyara rti rakmat sir. 2 Tomwatar a ne rares desar fali Petrus ma Yohanes rafwibar ber tomwat ngayadin feti Yesus nmorip a nbali lo. Ma iane nfatnyot feti mangmwate keta nmorip a nbali. 3 Mpa romat sir ror mangamlukut a ne ma rnau sir na sel. Ramin iane terik bobole fali nronnram lo. 4 Nempa tomwatar ma rdengar safe ma raftutu ne yadin a rtafal ma ralele Yesus, terik ma tomwate ribun lim sir. 5 Ni bobole ne mangfaret Yahudyar ror nir makenar, mla mangaftutu Musa ni faretar rabut sir a na Yerusalem ma rsidang. 6 Mangsomp silai Hanas ma Kayafas, Yohanes, Aleksander, ma tomwatar monuk ma rof dasdalam mangsomp silai ramin a ne nbal. 7 Ne rluan ma tomwatar ror ratel a ne far sonir lury. Ma renrat sir feti, “Ise ma nal kuase ber a kmi, ma myal ise ngarany ma mifngamone tomwate ne?” 8 Ne Petrus nfen ber Ratu Smwangtany ma nfalak, “Hei mangfaretar ma makenar, 9 msyidang kam lere ye fali mose ngamone mangamlukut a ne. Ma myenrat a mbyal feti safema bise ma nangamon. 10 Nempa kfwalak ber tomwat Israelar monuk a kmi, ka mifai feti, Yesus Kristus tomwat Nazaret ma msyangwalu I a ne, Ratu nafmorip a nbali I. Ma lere ye tomwate ye nangamon ma namdir soumir lury fali Yesus Ni kuase. 11 Na Kitap Lelerap dalam rarengi feti ‘Yesus ye, bati ma tuknar a kmi myebas, nempa lere ye neluk bat fakoran lo.’ 12 To tomwate fen lese na saryamprene ye ma Ratu nal kuase ber i ma nfair tomwatar rof nir salar, lan Yesus ma bise nfair kit.” 13 Tomwatar monuk ma ramin sidang a ne rampriang ma rsalan Petrus ma Yohanes rbaran ma ratanuk, safo radu a ne tomwat biase motak ma to raskol. Betno rafai feti radu a ne ma biase ror Yesus. 14 Nempa to rbangal ral mangsidkwar a ne fali tomwate ma rafngamone i a ne, namdir nor sir. 15 Ne rfalak ber mangsidkwar du a ne ma rti burit, ma sir raale a ndaun. 16 Ne rfalak, “Keta tose farpe sir? Tomwatar monuk ma ramin Yerusalem rafai feti radu ye rose kabain mpasalan silai, mpa to tulak tal. 17 Kit tose teri motak sir ma kete ral Yesus ngarany la ratanuk ber tomwatar. Nema ibar ye kete ntafal ma nsor tomwatar.” 18 Mpene rtar a rbali mangsidkwar a ne ma rti dalam ma rfalak, “Kete mitanuk nre miftutu tomwatar myor Yesus ngarany.” 19 Nempa Petrus ma Yohanes rfalak, “Koko kmi a mfyalak mpe ma diat ber Ratu, mlarat kmi nre mlarat Ratu? 20 Fali to bise ma mtatutuk ma mafwibar safe ma msalan ma mdengar.” 21 Mpe to ain ma rukun sir mpa rtafal ma rkanre sir ma famudi e rtate sir fali ramtaut tomwatar monuk ma rdangin Ratu na kabain mpasalan a ne. 22 Ma tomwate ma rafngamone i ror kabain mpasalan a ne, ni ngarak buty fat resnir lo.
Tomwat anlelar nir sampayang
23 Lama rtate Petrus ma Yohanes e, radu a rbali sir far mangsiduk walyetar. Ne rasaur safe-safe monuk ma mangsompar ulnir numur maken Yahudyar a rfalak ber sir. 24 Noak ma tbwarnir rdengar ngrie ne, sir raktem a rsampayang ber Ratu farye, “Tuhan, lan Ko ma nim kuase ma mose langit, saryamprene, tasik numur safe-safe monuk ma ramin dalam a ne. 25 Luryain e Smwangtam nkuase empyamar nusmyamar rai Daud Nim mangkryae ne ma mfwalak feti:
‘Fali safema tomwatar ma to Yahudi sir rares;
ma safema rose rerengyar ma to ubnir sasaf.
26 Rayar ma mangfaretar na saryamprene ye rafburat sir ma rose ma rbangal Tuhan mla Rai Mangtebus.’
27 Safe ma Daud nafbotin lere ye rafdiat fali ni botuan e Herodes ma Pontius Pilatus numur tomwatar ma to Yahudi sir mla tomwat Yahudyar, rabut sir a na Yerusalem ye ma rbangal Yesus. Yesus ye nim mangkarya lelerap ma mfwair I ma neluk Rai Mangtebus. 28 Tomwatar a ne rose safe-safe monuk farlan ma Ko mtetak mof luryain nlarat Nim kuase ma mpempeang. 29 Ma Tuhan, mswalan ma lere ye sir rkanre kam. Mpa mose ma Nim mangkaryayar kam ye mbaran ma mafwibar Nim Ngribatnir. 30 Ma mal Nim kuase la mafngamone mangafansar, ma mose ngrimpasalnar mor Yesus ngarany, Nim mangkarya lelerap a ne.” 31 Lama rsampayang monuk e, ain ma rafburat sir a ne nawawan. Ma sir rfen ber Ratu Smwangtany, ma rbaran ma rafwibar Ratu Ni ngribatnir.
Tomwat anlelar nir wewelmpampane
32 Tomwat anlelar monuk a ne dalmir lese. Ma to fen lese nfalak feti safe kabain ma i nie e, koko i, i ni e, nempa safe-safe monuk ma ramin sir a ne sir nire monuk. 33 Ma Ratu nal kuase silai ber mangsidkwar a ne ma rafwibar feti Yesus nmorip a nbali lo. Mpe Ratu nal nimet silai ber sir monuk. 34 To tomwate fen lese nof sir ma rawatan, fali rfenri nir ompkar ma dasar, ma ronr dotyar a ne, 35 ber mangsidkwar. Ne rasaman mpane dotyar a ne ber tomwatar rlarat nir perluar. 36 Tomwatar sa nof sir a ne ngarany Yusuf. I nof dasdalam Lewi nof Siprus ma mangsidkwar rtar i a nbal feti Barnabas ma isiny feti kanak mangafsenange. 37 I nfenri ni ompak, betno nal dotyar a ne ber mangsidkwar.