Rfil tomwatar itw ma rtulung tomwatar ma rawatan
1 Na noak a ne, Yesus Ni manglartar rtafal ma yadin sir. Ne tomwat Yahudyar ma ral Yunani lirin nroke nraki sir ber tomwat Yahudyar ma ral Ibrani lirin, fali rsaman dotyar ma tnyamar ber nir bat somara e to feleles. 2 Ne Yesus Ni mangsiduk buti resiny du a ne rafburat monuk manglartar ma rfalak ber sir, “Farlan msalan lan ma msaman dotyar ma tnyamar, iane to nangafel fali to lety ber kam ma mafwibar Ratu Ni ngribatnir. 3 Mpa, ningafele e mfyil tomwatar itw nof a kmi. Sir a ne ma ka tomwatar ralang sir, nir anfai silai ma Ratu Smwangtany norang sir, ma mal karyae ne ber sir, 4 nema mal mate lan ma msampayang ma mafwibar Ratu Ni ngibatnir.”
5 Tomwatar monuk a ne ryoding nir tatakar a ne. Ne sir rfil Stefanus, fali nalele desar Yesus ma nfen ber Ratu Smwangtany. Rfil a nbal, Filipus, Prokhorus, Nikanor, Timon, Parmenas, ma Nikolaus nof Antiokhia ma npafe agame Yahudi. 6 Sir ror tomwatar itw a ne ber mangsidkwar nema rsampayang ma rsaup limnir a na sir.
7 Mpene ibar nof Ratu ntafal ma namelir. Ma manglartar a na Yerusalem rtafal ma yadin sir, ma mangsompar yadin a nbal ma rlarat Yesus.
Tomwatar romat Stefanus
8 Ratu nal nimet ma kuase silai ber Stefanus mpa bise nose kabain mpasalnar ber tomwat ngayadin. 9 Nempa tomwatar ketnir rof agame Yahudi rabangal ror i. Sir a ne soranyar na das sampayang ma rtar feti tomwat anlelar Libertinib, tomwatar a ne rof Kirene ma Aleksandria. Sir raktem tomwat Yahudyar rof Kilikia ma Asia. 10 Nempa sir to rbangal ral safe ma Stefanus a nfalak, fali Ratu Smwangtany nal anfai silai ber i ma natanuk. 11 Ne rsewe tomwatar ketnir ma rfalak “Kam mdengar feti tomwate ne nafbwere Musa ma Ratu!” 12 Sir rose farane la rfule tomwatar, ma mangfaret Yahudyar, numur mangaftutu Musa ni faretar. Nema romat i ma ror i ber mangtetak agame. 13 Ne mangtungan lepuskwar a ne rfalak, “Tomwate ye dedesar ma nafbwere Ratu Ni Das Silai ma Musa ni tetetkar. 14 Kam mdengar ma nfalak feti, ‘Yesus tomwat Nazaret a ne, keta nsose Ratu Ni Das Silai ye, ma nkes monuk ninr wewelmpampanar ma Musa nau ber kit.’” 15 Tomwatar monuk ma ramin sidang a ne rfon dedesar Stefanus. Sir rsalan souny e farlan malaekat.