Emisango ja Ekisi ja Yeesu Kirisito
rwa kutyo jikaamirwe na
Maariko
Yowana kaachumachumira Yeesu injira
1
1 Bhunu nibhwo obhwambiro bhwa Emisango ja Ekisi ja Yeesu Kirisito,a Omwana wa Nyamuwanga.b 2 ꞉Bhwaambire rwa kutyo jikaamirwe mu‑chitabho cha omuragi Iisaya ati,“Ringira, enituma itumwa yaani imbere yaawo, akutangatire na okukwiraabhira injira.c
3 Itumwa eyo niwe aryamura obhuraka mw‑ibhara ati,
‘Muchumachumire Raatabhugenyi injira,
mwimye anu kaja okutura!’d”
4 Itumwa eyo aariga naatogwa Yowana Omubhatiija. Yaariga iri mw‑ibhara niiraasisyaga abhaanu ati, “Mute ebhibhiibhi bhyemwe ku‑Nyamuwanga mubhatiijibhwe, korereki abhafwire echigongo ebhibhiibhi bhyemwe!” 5 Abhaanu bhaafu bhaariga nibhamuuja‑ko okusooka mu‑musi gwa Yerusareemu na mu‑mukoowa gwone gwa Yuudeya. Abhaanu abho, bhaariga nibhegamba ebhibhiibhi bhyebhwe, na omwene ˆnaabhabhatiija mu‑musima gwa Yorodaani.
6 Yowana aafwaraga emyenda jinu jaariga jirukirwe na obhusinga bhwa jingamiya, na eebhoyaga omuchipi gwa orukobha mu‑chibhunu chaaye. Ebhiryo bhyaye bhyariga bhiri jiisige na obhuuki.
7 Yowana aaraasyaga ˆnaayika ati, “Gutari mwanya omureera kaja okuuja omuunu owundi owa obhuturo okunkira. Anye niteeyire noorwo okwinama na okusuruumura jingoye ja ebhiraato bhyaye.e 8 Anye enibhabhatiija mu‑manji, nawe omwene aribhabhatiija kwa Mwoyo Mweru.”
Yeesu kaabhatiijibhwa na okuregeejwa mw‑ibhara
9 Mbe, omwanya ogwo, Yeesu ˆnaaja okusooka mu‑musi gwa Najareeti, mu‑mukoowa gwa Gariraaya, ˆnaagenda ku‑Yowana. Niwo Yowana ˆnaamubhatiija mu‑musima gwa Yorodaani. 10 Omwanya gunu Yeesu aariinyaga okusooka mu‑manji, awoawo ˆnaarora orwire nirwiguka, na Mwoyo Mweru ˆneeka inguru yaaye rwa echiguuti. 11 Obhuraka okusooka mu‑rwire nibhwayika ati, “Awe naawe Omwana waani omwendwa! Naawe owunkondisya!”
12 Awoawo Mwoyo Mweru ˆnaatangasya Yeesu okuja mw‑ibhara. 13 ˆNaabha eyo masuubha makumi gana, ˆnaaregeejibhwaga na Syetaani.f Aariga ari aamwi na jityanyi ja mw‑ibhara, wone bhamaraayikag bha Nyamuwanga bhaariga nibhamusakira.
Yeesu kaasora abheeyigisibhwa
14 Nijitura siku nyafu, Yowana ˆnaabhoywa mw‑ibhoyero.h Omwanya gunu aariga ari mw‑ibhoyero, Yeesu ˆnaagenda mu‑mukoowa gwa Gariraaya, ˆnaaraasyaga Emisango ja Ekisi ja Nyamuwanga. 15 Aaraasyaga, ˆnaayikaga ati, “Omwanya gunu ꞉gwaragirwe, gwakinga, obhukama bhwa Nyamuwangai bhuri yeeyi. Mbe, mute ebhibhiibhi bhyemwe ku‑Nyamuwanga na okwikirisya Emisango ja Ekisi ejo.”
16 Rusuku rumwi, omwanya gunu Yeesu aaturaga ku‑njekekera ya inyanja ya Gariraaya, ˆnaarora abhaanu bhabhiri, Simooni aamwi na Andereya omumura waabho. Bhaariga nibheesa rigoobhe, kwa okubha bhaariga bhari bhakokoosi. 17 Yeesu ˆnaabhabhwira ati, “Muuje, munduubhe! Enija okubhakora mubhe abhategi bha abhaanu.”j 18 Awoawo, nibhasiga amagoobhe geebhwe, nibhamuruubha.
19 Omwanya gunu ꞉aafogeeye‑wo imbere kutooto aamwi na abheeyigisibhwa bhaaye bhabhiri bharya, ˆnaarora Yakobho na Yowana omumura waabho, abhaana bha Jebhedaayo bhari mu‑ngama, nibhasobhooraga amagoobhe geebhwe. 20 Awoawo, ˆnaabhabhwira ati bhamuruubhe, bhabhe abheeyigisibhwa bhaaye. Nibhasiga esemwene aamwi na abhakosi bhaaye mu‑ngama, nibhamuruubha.
Yeesu keeresya amanaga gaaye
21 Niwo Yeesu na abheeyigisibhwa bhaaye abhana abho nibhagenda mu‑musi gwa Kaperinaawumu. Orusuku rwa Isabhaatok rwejire rwakinga, nibheengira mu‑nju ya eriikofyanyo rya Abhayawudi,l Yeesu ˆnaamba okwiyigisya. 22 Abhaanu bhoone bhanu bhaariga nibhamutegeresya, nibharuguurira muno ameeyigisyo gaaye. Okubha eeyigisyaga rwa omuunu owa obhuturo, aariga atakwiyigisya rwa kutyo abheeyigisya bheebhwe bha ebhiraagiro bhya Muusam bheeyigisyaga.
23 Mu‑nju omwo, aariga ari‑mo omuunu umwi awungirwe risambwa. ˆNaamura obhuraka, 24 ˆnaayikaga ati, “Awe Yeesu wa Najareeti, owuchiyenja‑ko ki! Angu, wiijire okuchisingaarisya? Anye nikumenyere ati naawe ga, awe naawe Omweru wa Nyamuwanga.”
25 Yeesu ˆnaagonya risambwa eryo ˆnaaribhwira ati, “Jibhira! Sooka mu‑muunu unu!” 26 Risambwa eryo, ˆnirimugwisya aasi rwa omuunu unu aguuye echitwe, ˆnirikunga na okumusooka‑ko. 27 Abhaanu bhoone nibharuguura muno, nibhabhuusyanya ati, “Niki chinu? Ameeyigisyo amayaaya ago, gari na obhuturo! Ka wone, muringire, ari na amanaga noorwo ga okugonya amasambwa,n wone agamugayuka.” 28 ꞉Gutaaturire omwanya omureera, abhaanu okusooka mu‑mukoowa gwone gwa Gariraaya nibhabha bhoonguuwe emisango inguru ya Yeesu.
Yeesu kaawosya abhaanu
29 Yeesu na abheeyigisibhwa bhaaye abho, bhejire bhaasooka mu‑nju ya eriikofyanyo rya Abhayawudi, nibhagenda wa Simooni na Andereya. 30 Bhejire bhaakinga era, Yeesu ˆnaabhwirwa ati, nyaabhuko Simooni amaamire ku‑bhuriri, ari na omuswija mwafu. 31 Niwo Yeesu ˆnaamujaa‑ko, ˆnaamugwata okubhoko, ˆnaamwinamusya. Awoawo omugasi oyo ˆnaawora omuswija ogwo, ˆnaamba okubhafurubhendera.
32 Orusuku orwo keegoro, Isabhaato yejire yaatura,o abhaanu bha mu‑musi omwo nibhareetera Yeesu abharwaye bhaafu, na bhanu bhaariga bhawungirwe amasambwa. 33 Abhaanu bhaafu okusooka mu‑musi omwo nibhabhugana ku‑rubhuga rwa inju ya Simooni na Andereya. 34 Yeesu ˆnaawosya abhaanu bhaafu bhanu bhaariga bhari na amarwara ga bhuri mbaga. Ka wone, ˆnaabhasoosya‑ko amasambwa maafu, nawe ꞉ateekirisisiisye amasambwa gaayike, kwa okubha gaariga gamumenyere ati ni Mwana wa Nyamuwanga.
Yeesu kaagenda okusabhwa bhumbise
35 Mwejo yende‑ko mu‑ruguru Yeesu ˆneemuka, ˆnaagenda orubhaara runu abhaanu bhaariga bhatari, ˆnaamba okusabhwa. 36 Simooni na abheejaabho bhejire bhaasongʼana atari‑mo mu‑nju, nibhagenda okumuyenja. 37 Bhejire bhaamubhona, nibhamubhwira ati, “Abhaanu bhaafu muno eyo abhakuyenja!”
38 Yeesu ˆnaabhabhwira ati, “Chigende mu‑misi ejindi jinu jisiijeene na gunu, korereki niraasye eyo wone, kwa okubha emirimu ejo, nijo niijire okukora.” 39 Niwo ˆneeyinda mu‑mukoowa gwone gwa Gariraaya na okuraasya mu‑nju ja ameekofyanyo geebhwe, enu ˆnaasoosyaga amasambwa mu‑bhaanu.
Yeesu kaawosya owa ebhigenge
40 Rusuku rumwi, omuunu umwi unu aariga arwaye ebhigengep ˆnaaja ku‑Yeesu. ˆNaamwifukamira, ˆnaamwirembeeresya ati, “Nimenyere ati uri na obhuturo bhwa okummosya korereki neere. Ukeenda, enisabhwa ummosye!” 41 Yeesu ˆnaamufwira echigongo, ˆneenamusya okubhoko, ˆnaamukuunʼya‑ko, ˆnaamubhwira ati, “Eneenda, uwore!” 42 Awoawo, ˆnaawora ebhigenge bhyaye, ˆneera. 43 Neeya Yeesu ˆnaamubhwira ati, “Sooka anu bhwangwe,” 44 ˆnaamukomeeresya ati, “Waasiga okubhwira omuunu woonewoone inguru ya omusango gunu! Tari nuugende ku‑mugabhisi akurore,q usoosye echoogor rwa kutyo ebhiraagiro bhya Muusa ꞉bhyaragiriiye, korereki bhubhe obhubhambaasi ku‑bhaanu ati, weesibhwa.” 45 Nawe, omwanya gunu omuunu oyo ꞉aasookere awo, ˆnaamba okuraasya abhwerubhweru bhuri rubhaara emisango ja okuwosibhwa kwaye. Okuruubhana na ejo, Yeesu ˆnaataamibhwa okwingira abhwerubhweru mu‑musi gwonegwone gurya. ˆNeenyanja eenyere anja ya emisi anu abhaanu bhaariga bhatari, noorwo kutyo abhaanu bhaamujaaga‑ko okusooka bhuri rubhaara.