Yeesu kaawosya owa ebhigenge
8
1 Yeesu ejire aasooka ku‑chiima, ebhise bhyafu bhya bhaanu nibhimuruubha. 2 Ringira, omuunu umwi unu aariga arwaye ebhigenge ˆnaaja, ˆneefukama imbere yaaye, ˆnaamubhwira ati, “Raatabhugenyi, nimenyere ati, uri na obhuturo bhwa okummosya korereki neere. Ukeenda, enisabhwa ummosye!” 3 Yeesu ˆneenamusya okubhoko, ˆnaamukuunʼya‑ko, ˆnaamubhwira ati, “Eneenda, uwore!” Awoawo, ˆnaawora ebhigenge bhyaye. 4 Neeya Yeesu, ˆnaamubhwira ati, “Waasiga okubhwira omuunu woonewoone inguru ya omusango gunu! Tari nuugende ku‑mugabhisi akurore, usoosye echoogoa rwa kutyo ebhiraagiro bhya Muusa ꞉bhyaragiriiye,b korereki bhubhe obhubhambaasi ku‑bhaanu ati, weesibhwa.”Eriikirisya rya omukuru wa abhasirikare
5 Omwanya gunu Yeesu ꞉eengiiye mu‑musi gwa Kaperinaawumu, omwangarisi umwi wa abhasirikare bha Echiruumi ˆnaamujaa‑ko. 6 Omuunu oyo, ˆnaamwirembeeresya, ˆnaayikaga ati, “Raatabhugenyi, iika ewaani eyo, omugaya waani amaamire era, afuuwe omubhiri, kaasibhwa muno.” 7 Yeesu, ˆnaamusubhya ati, “Enija okuuja okumuwosya.” 8 Omwangarisi oyo, ˆnaamusubhya ati, “Raatabhugenyi, anye niteeyire awe okwingira mu‑nju yaani. Nawe yayika omusango era, omugaya waani kaja okuwora. 9 Noorwo anye wone, niri emwaro ya obhuturo bhwa abhaanu abhandi, niri na abhasirikare bhanu bhari emwaro ya obhuturo bhwani. Nikabhwira owumwi ati, ‘Nuugende,’ awoawo kaagenda. Ka wone, nikabhwira owundi ati, ‘Iija,’ wone awoawo kaaja. Omugaya waani wone, nikamubhwira ati, ‘Kora omurimu gunu,’ nyabhuriko kaakora.”
10 Yeesu ejire oongwa emisango ejo, ˆnaaruguura muno. ˆNaabhwira abhaanu bhanu bhaamuruubhaga ati, “Ni chimari enibhabhwira ati, nichaariga okurora omuunu woonewoone owa eriikirisya enene rwa rinu, mu‑Bhayisirayeeri bhoone! 11 Enibhabhwira ati, abhaanu bhaafu bhariija okusooka ebhuwuruka esuubha na ebhugwa esuubha, okwingira mu‑bhukama bhwa mu‑rwire. Bhariija okurya aamwi mu‑chikukuru irya na bhasaaja weeswe Bhurayimu, Isaaka na Yakobho. 12 Nawe Abhayisirayeeri abharebhe bhanu bhaariga nibheeyikanya okwingira mu‑bhukama obhwo, bharyeswa anja mu‑chisuute, omwo nimwo bhaririraga na okuguguna ameeno.”
13 Mbe, Yeesu ˆnaabhwira omwangarisi oyo ati, “Genda era iika. Ejija okubha rwa kutyo weekirisya.” Omugaya waaye ˆnaawora omwanya ogwoogwo.
Yeesu kaawosya abharwaye bhaafu
14 Neeya Yeesu ˆnaakinga ewa Peetero. Ejire eengira mu‑nju, ˆnaasongʼana nyaabhuko Peetero amaamire ku‑bhuriri, ari na omuswija mwafu. 15 Yeesu ˆnaamukuunʼya ku‑kubhoko, awoawo ˆnaawora. Niwo ˆneemuka, ˆnaamba okufurubhendera Yeesu.
16 Yejire yaakinga keegoro, Yeesu ˆnaareterwa abhaanu bhaafu bhanu bhaariga bhawungirwe amasambwa. ˆNaasoosya amasambwa ago okusooka ku‑bhaanu mu‑kwayika omusango era. Ka wone, ˆnaawosya abharwaye bhoone. 17 Ejo ꞉jaakorekeene korereki gukuumire omusango gunu ꞉gwayikirwe na omuragi Iisaya ati,
“Omwene ꞉aagegere obhwasibhwa bhweswe,
꞉aawosiisye amarwara geeswe.”c
Bhanu bheeyire okuruubha Yeesu
18 Yeesu ejire aarora ati, abhaanu bhaafu bhamwiyindire, ˆnaaragirira abheeyigisibhwa bhaaye, bhaambuke inyanja, bhaje ku‑ngego eyindi. 19 Mbe, omwiyigisya umwi wa ebhiraagiro bhya Muusa ˆnaaja ku‑Yeesu, ˆnaamubhwira ati, “Omwiyigisya, woonewoone anu owuja, anye wone enija okukuruubha!” 20 Yeesu ˆnaamusubhya ati, “Ganyamubhwe gari na jisenga, na jinyonyi jiri na amooswi, nawe anye Omwana wa Omuunu,d nitari na omusi anu enitura okumaama!”
21 Mbe, omuunu owundi, owumwi wa abheeyigisibhwa bha Yeesu, ˆnaayika ati, “Raatabhugenyi, nuunyikirisisye nigende okwamba okusiika raata.” 22 Yeesu ˆnaamusubhya ati, “Awe nuunduubhe, siga bhanu bhafuuwe echinyamwoyo bhasiike abhafuuwe bheebhwe.”
Yeesu kaagonya omuyaga gwa echiiwure mu‑nyanja
23 Mbe, Yeesu ˆnaariinya mu‑ngama, abheeyigisibhwa bhaaye wone nibhamuruubha omwo. 24 Ringira, bhejire bhaakinga mu‑bhusibha, nigutiimuka omuyaga gwa echiiwure, amakonjo nigabhuma ingama niyamba okusika. Nawe Yeesu omwene aariga awongeeye. 25 Abheeyigisibhwa bhaaye nibhamuuja‑ko, nibhamurafya, nibhaayikaga ati, “Raatabhugenyi, nuucheerure! Echisingaarika!”
26 Yeesu ˆnaabhabhwira ati, “Ni kurwa ki omuubhaya, emwe abha eriikirisya ritooto?” Niwo ˆneemuka, ˆnaagonya omuyaga na amakonjo. Awoawo, inyanja niibha etore chimwi. 27 Abheeyigisibhwa bhaaye nibharuguura, nibhaayikaga ati, “Ni muunu wa mbaga ki unu? Noorwo omuyaga na amakonjo ebhimugayuka!”
Yeesu kaasoosya‑ko amasambwa ku‑Bhagadara
28 Yeesu ejire aambuka inyanja, ˆnaakinga ku‑ngego ya echaaro cha Abhagadara. ˆNaabhugana na abhaanu bhabhiri bhanu bhaariga bhawungirwe amasambwa, nibhasookaga mu‑bhituuro, munu bhaariga bheekaaye.e Bhoone ku‑bhubhiri bhwebhwe, bhaariga bhari bharuru muno, na abhaanu bhoobhayaga okutura ku‑njira okwo.
29 Mbe, amasambwa ago, nigaamura obhuraka nigaayika ati, “Yeesu, Omwana wa Nyamuwanga awe, owuchiyenja‑ko ki? Angu, waaja okuchinyaasya omwanya gweswe guchaari okukinga?” 30 Kura‑wo kutooto, okusooka anu bhaariga bhari, ryariga riri‑wo riyijo enene rya jimbiiji nirireebhaga. 31 Niwo amasambwa ago nigeerembeeresya Yeesu, nigaayikaga ati, “Araabha ukachisoosya mu‑bhaanu bhanu, nuuchiikirisisye, chigende chiingire mu‑mbiiji jirya.” 32 ˆNaagabhwira ati, “Mugende!” Mbe, amasambwa ago, nigasooka mu‑bhaanu abho, nigagenda, nigeengira mu‑mbiiji ejo. Awoawo, jimbiiji ejo, nijooromoka ku‑chooromoko, nijifwa joone mu‑manji omwo.
33 Omwanya gunu abhareefi bha jimbiiji ꞉bhaarorere ejo, nibhabhirima nibhagenda mu‑musi. Nibharaasisya abhaanu emisango joone jinu ꞉jaakorekeene na chinu ꞉chaakorekeene ku‑bha amasambwa bharya. 34 Abhaanu bhoone bha mu‑musi ogwo, nibhagenda okurora Yeesu. Bhejire bhaamurora, nibhamwirembeeresya muno asooke mu‑chaaro cheebhwe.