Yeesu kaasoosya amasambwa ku‑muunu
5
1 Yeesu na abheeyigisibhwa bhaaye nibhaambuka inyanja, nibhakinga ku‑chaaro cha Abhageraasi. 2 Yeesu ejire aasyoka mu‑ngama, ˆnaabhugana na omuunu unu aariga awungirwe risambwa. Omuunu oyo aariga ˆnaasooka mu‑bhituuro,a 3 munu eekaraga. Aariga ari na amanaga maafu, aariga atari‑wo omuunu woonewoone unu aariga ˆnaatura okumubhoya noorwo na amaseega. 4 Abhaanu bhaamubhoyaga amaseega kwiya kaafu ku‑maguru na jinyoro ku‑mabhoko, nawe aariga ˆnaajibhuturabhutura joone. Aariga atari‑wo omuunu owa amanaga unu aaturaga okumuyiga. 5 Omwanya gwone mu‑ngeta na mu‑mwisi aagendaga mu‑bhituuro na mu‑bhiima, ˆnaakungaga na okwitematema na amabhuyi.6 Ejire aarora Yeesu ari kura‑wo kutooto, omuunu oyo, ˆnaamubhirimira, ˆnaamuramya. 7 ˆNaamura obhuraka ˆnaayika ati, “Yeesu Omwana wa Nyamuwanga unu ari Inguru ya Bhyone, owunyenja‑ko ki? Enikurayisya ku‑Nyamuwanga, waasiga okunnyaasya!” 8 ꞉Aayikire kutyo kwa okubha Yeesu aariga aribhwiriiye ati, “Awe risambwa, sooka mu‑muunu unu!”
9 Yeesu ˆnaaribhuusya ati, “Risiina ryawo niga?” Eryene nirimusubhya ati, “Risiina ryani ni Chise, kwa okubha eswe chiri bhaafu munu.” 10 Risambwa eryo niriirembeeresya Yeesu muno ati, aasiga okugabhirimya okusooka mu‑chaaro chirya.
11 Mbe ku‑chooromoko arya ryariga riri‑wo riyijo enene rya jimbiiji, nirireebhaga. 12 Niwo amasambwa ago nigeerembeeresya Yeesu ati, “Echikusabhwa uchiragirire chiingire mu‑mbiiji jirya.” 13 Yeesu ˆnaageekirisisya. Mbe amasambwa ago nigasooka mu‑muunu wurya, nigeengira mu‑mbiiji ejo. Riyijo ryone rya jimbiiji niryoromoka ku‑chooromoko, joone nijisingaarika mu‑nyanja omwo. Jimbiiji ejo jaariga nijikinga bhiwumbi ebhibhiri.
14 Abhareefi bha jimbiiji abho nibhabhirima nibhagenda mu‑musi na mu‑nguuyo ja ayeeyi, nibharaasisya abhaanu emisango joone jinu ꞉jaakorekeene. Abhaanu nibhaaja, korereki bheerorere abheene jinu jaakorekana. 15 Abhaanu abho bhejire bhaakinga ku‑Yeesu, nibhoobhaya muno okurora omuunu unu aariga awungirwe amasambwa maafu eenyanjire, afwaye emyenda na obhwenge bhwaye bhwone bhumuri‑mo. 16 Abhaanu bhanu ꞉bhaarorere emisango jinu ꞉jaabhwene owa amasambwa oyo na jimbiiji, nibhajitonderaga abhaanu abhandi. 17 Niwo abhaanu nibhaamba okwirembeeresya Yeesu asooke mu‑chaaro cheebhwe.
18 Omwanya gunu Yeesu aariga ˆneengira mu‑ngama, omuunu unu amasambwa gaariga gamusookere‑ko ˆneerembeeresya Yeesu ati amwikirisisye agende aamwi nage. 19 Nawe Yeesu ˆnaarema okumwikirisisya, ˆnaamubhwira ati, “Genda ewaanyu, ubharaasisye emisango ja echigongo jinu Raatabhugenyi aakukorera.” 20 Awoawo omuunu oyo ˆnaagenda, ˆnaamba okuraasya emisango ejo mu‑misi ja Dekapoori,b emisango emikomeeye jinu Yeesu aamukorera. Abhaanu bhoone nibharuguura.
Yeesu kaasuurura omuyarakaji na okuwosya omugasi owa echisiiro
21 Yeesu na abheeyigisibhwa bhaaye nibhariinya mu‑ngama nibhaambuka inyanja nibhasubha ku‑ngego. Bhejire bhaakinga, echise echinene cha abhaanu nichiikofyanya anu Yeesu aariga ari ku‑njekekera ya inyanja. 22 ˆNaaja omuunu umwi mu‑bhakuru bha inju ya eriikofyanyo, risiina ryaye aatogwaga Yaayiro. Ejire aarora Yeesu, ˆneefukama imbere yaaye, 23 ˆnaamwirembeeresya muno ˆnaayikaga ati, “Omuyaasya waani ni murwaye, ari yeeyi okufwa. Enikusabhwa chigende, umuteere‑ko amabhoko gaawo, korereki awosibhwe na abhe muwanga.” 24 Yeesu ˆnaagenda na omukuru oyo. Echise echinene cha abhaanu chinu chaariga nichimuruubha, nichimuyiganyaga muno.
25 Mu‑chise echo, aariga ari‑mo omugasi unu aariga arwaye echisiiro emiguuga ekumi na ebhiri. 26 Omugasi oyo aariga aanyaakire muno okuja ku‑bhafumu bhaafu. Aariga aamarire ribhona ryaye ryone ˆnaabhasiriraga, nawe ꞉ataaworere noorwo kutooto, tari bhweyongesyaga. 27 Omugasi oyo ejire oongwa jinu Yeesu aariga ˆnaakora, ˆnaafurumita mu‑chise cha abhaanu ˆnaaja inyuma, ˆnaakuunʼya ku‑mwenda gwa Yeesu. 28 Mu‑mwoyo gwaye aariga ˆneeyayikira ati, “Araabha nikakuunʼya ku‑mwenda gwaye era, enija okuwora.” 29 Ejire aamukuunʼya‑ko era, awoawo echisiiro nichitemekera, ˆneeyungwa mu‑mubhiri gwaye ati aawora.
30 Awoawo Yeesu ˆneeyungwa ati obhuturo bhwaye bhwa okuwosya bhwakora emirimu. ˆNeekebhuukira, ˆnaabhuusya abhaanu bha echise ati, “Niga unu aankuunʼya ku‑mwenda gwani?” 31 Abheeyigisibhwa bhaaye nibhamubhwira ati, “Awe omwene owurora kutyo echise chinu echikuyiganyayiganya! Mbawo owubhuusya ati, ‘Niga unu aankuunʼya‑ko?’”
32 Nawe ˆnaamagamaga enu na enu, korereki arore unu aamukuunʼya‑ko. 33 Niwo omugasi wurya ˆnoobhaya,c ˆnaaja ku‑Yeesu, enu ˆnaayararaga bhugubhugu, ˆneefukama kwa okubha ꞉aamenyere jinu ꞉jaakorekeene ku‑mwene. ˆNaamubhwira echimari choone. 34 Yeesu ˆnaamubhwira ati, “Muyaasya waani, waawosibhwa ku‑songa ya eriikirisya ryawo. Nuugende na omurembe, obhurwaye bhusige okukusubha‑ko rindi.”
35 Omwanya gunu Yeesu aariga achaasimura na omugasi oyo, abhaanu nibhaaja okusooka ewa Yaayiro, omukuru wa inju ya eriikofyanyo, nibhabhwira Yaayiro ati, “Siga okunyaasya Omwiyigisya, omuyaasya waawo aafuuwe.”
36 Nawe omwanya gunu Yeesu ꞉oonguuwe emisango jeebhwe, ˆnaabhwira Yaayiro ati, “Nuusige okuubhaya, nuubhe na eriikirisya era.” 37 Yeesu ˆnaagaanya abhaanu abhandi bhoone ati bhaasiga okuruubhana nage okuja ewa Yaayiro. Tari ˆnaagenda na Peetero, Yakobho na Yowana omumura waabho Yakobho.
38 Bhejire bhaakinga ewa Yaayiro, Yeesu ˆnaasongʼana abhaanu nibhayogana na okurira enu bhasurumbaayega muno. 39 ˆNeengira mu‑nju, ˆnaayika ati, “Ni kurwa ki omuyogana na okurira? Omuyarakaji unu achaari okufwa, tari awongeeye era.” 40 Abhaanu abho nibhamuseka muno nibhamusiijaakaga, nawe omwene ˆnaabhawurusya bhoone anja. ˆNaagega esemwene na nyira omuyarakaji, na abheeyigisibhwa bhaaye bhasatu bharya, nibheengira mu‑chisago chinu bhaariga bhamaamiisye‑mo omuyarakaji oyo. 41 ˆNaagwata omuyarakaji oyo okubhoko, ˆnaamubhwira ati, “Tariisa, koomu!” Obhugajuro bhwa emisango ejo ni ati, “Awe omuyarakaji, enikubhwira, iimuka!” 42 Omuyarakaji oyo aariga ari na emiguuga ekumi na ebhiri. Awoawo, ˆneemereeguru, ˆnaamba okuribhata. Abhaanu nibharuguura muno. 43 Yeesu ˆnaabhagaanya muno ati bhaasiga okubhwira omuunu woonewoone jinu ꞉jaakorekeene. ˆNaabhwira abheebhusi bha omuyarakaji oyo ati, “Mumuyaane ebhiryo.”