Emisango ja Ekisi ja Yeesu Kirisito
rwa kutyo jikaamirwe na
Yowana
Musango ꞉eejire ku‑chaaro ari muunu
1
1 Ku‑bhwambiro awo, aariga ari‑wo Musango. Musango oyo aariga ari aamwi na Nyamuwanga. Ka wone, Musango aariga ari Nyamuwanga. 2 Okusookerera ku‑bhwambiro, Musango oyo, aariga ari aamwi na Nyamuwanga. 3 Nyamuwanga ꞉aabhumbire ebhiinu bhyone okutura ku‑Musango oyo. Chitari‑wo noorwo echiinu chimwi chinu ꞉chaabhumbirwe chitaturire ku‑mwene wuri. 4 Musango oyo niwe obhusimukwa bhwa obhuwanga bhwone, na obhuwanga obhwo obhureeta obhweru ku‑bhaanu. 5 Obhweru obhwo obhumirika mu‑chisuute, na echisuute chitakubhuyiga.6 ꞉Eejire omuunu umwi unu ꞉aatumirwe na Nyamuwanga. Omuunu oyo aariga ˆnaatogwa Yowana.a 7 Yowana ꞉eejire okusoosya obhubhambaasi inguru ya obhweru obhwo, korereki abhaanu bhoone bhature okubhwikirisya okutura ku‑bhubhambaasi bhwaye. 8 Yowana omwene aariga atari bhweru obhwo, tari ꞉eejire okubhusoosisya obhubhambaasi. 9 Obhweru bhwa echimari obhwo, bhunu obhumirikira bhuri muunu, bhwariga nibhuuja ku‑chaaro kunu.
10 Omwene oyo aariga ari mu‑chaaro munu, ka wone Nyamuwanga ꞉aabhumbire echaaro okutura ku‑mwene. Nawe, abhaanu bha ku‑chaaro kunu ꞉bhataamusombookeeywe. 11 ꞉Eejire ku‑bhaanu bhaaye, nawe abhaanu bhaaye ꞉bhataamuramiiye. 12 Nawe abhaanu bhoone bhanu ꞉bhaamuramiiye na okumwikirisya, ꞉aabhayaaye obhuturo bhwa okubha abhaana bha Nyamuwanga. 13 Abho nibho abhaana bha Nyamuwanga, bhanu ꞉bheebhuuywe kutari ku‑sagama, amwi mu‑kwenda kwa omubhiri, amwi mu‑kwenda kwa omuunu, tari Nyamuwanga omwene ꞉aabhakorere okubha abhaana bhaaye.
14 Mbe, Musango oyo ˆnaabha omuunu, ˆneekara agati yeeswe. Eswe bhoone nichirora rikusyo ryaye, rikusyo rya Omwana eenyere wa Raata Nyamuwanga, eejuuywe obhwitiriranya bhwafu na echimari choone.
15 Yowana ˆnaasoosisya omuunu oyo obhubhambaasi, ˆnaamura obhuraka, ˆnaayikaga ati, “Unu niwe naabhabhwiraga ati, ‘Kaaja omuunu inyuma yaani, ni mukuru okunkira, kwa okubha omwene aariga ari‑wo ku‑bhwambiro, kara anye nichaari kwibhurwa.’”
16 Okuruubhana na obhukuumiiye bhwa omuunu oyo, chiyaaywe obhwitiriranya obhundi ku‑bhundi. 17 Okubha, Nyamuwanga ꞉aasoosiisye ebhiraagiro bhyaye okutura ku‑Muusa, na woori asoosiisye obhwitiriranya bhwaye na echimari chaaye okutura ku‑Yeesu Kirisito. 18 Atari‑wo omuunu woonewoone unu ararorere Nyamuwanga noorwo na akatyari. Tari Mwana waaye eenyere, unu wone ari Nyamuwanga, ka wone ari yeeyi na Raata Nyamuwanga, oyo niwe asweruuye Nyamuwanga kw‑iswe.
Obhubhambaasi bhwa Yowana Omubhatiija
19 Rusuku rumwi, abhatangasya bha Abhayawudi ꞉bhaatumire abhagabhisib na Abharaawi okusooka Yerusareemu, okuja ku‑Yowana. Bhejire bhaakinga nibhamubhuusya ati, “Naawe ga?” Yowana ˆnaasoosya obhubhambaasi, 20 ˆnaayika abhwerubhweru ati, “Anye nitari Kirisito.”c 21 Nibhamubhuusya rindi ati, “Woori naawe ga? Angu, naawe omuragi Yeeriya?” Omwene ˆnaabhasubhya rindi ati, “Wuri, anye nitari muragi Yeeriya.” Abheene nibhamubhuusya rindi ati, “Angu, naawe omuragi unu echirindirira okusooka ku‑Nyamuwanga?”d Yowana ˆnaabhasubhya ati, “Wuri, nitari anye.” 22 Nibhamubhuusya rindi ati, “Mbe woori, naawe ga? Nuuchibhwire korereki chigende chibhwire bhanu bhaachituma. Woori, owiyayikira kutiki?” 23 Yowana ˆnaabhasubhya okuruubhana na emisango jinu omuragi Iisaya ꞉aayikire ati, “Anye niri
‘muunu urya kaamura obhuraka mw‑ibhara ati,
“Mwimye injira anu kaja okutura Raatabhugenyi!”’e”
24 Mu‑bhaanu bhanu ꞉bhaatumirwe okuja ku‑Yowana, bhaariga bhari‑mo na Abhafarisaayo wone.f 25 Nibhamubhuusya ati, “Araabha awe utari Kirisito, noorwo omuragi Yeeriya, noorwo omuragi unu echirindirira okusooka ku‑Nyamuwanga, ni kurwa ki owubhatiija abhaanu?” 26 Yowana ˆnaabhasubhya ati, “Anye enibhatiija mu‑manji, nawe agati yeemwe anu, ari‑wo omuunu unu emwe mutakumumenya. 27 Oyo niwe unu kaaja inyuma yaani. Anye niteeyire noorwo okusuruumura jingoye ja ebhiraato bhyaye.”g
28 Emisango ejo joone ꞉jaakorekeene mu‑ruguuyo rwa Bheetaniya, orubhaara rwa ebhuwuruka esuubha rwa omusima gwa Yorodaani. Awo niwo Yowana aariga ˆnaabhatiija abhaanu.
Yeesu ni Mwana wa Inaama wa Nyamuwanga
29 Mwejo yende‑ko, Yowana ˆnaarora Yeesu ˆnaamuuja‑ko. ˆNaabhwira abhaanu bhanu bhaariga bhari awo ati, “Ringira, oyo niwe Omwana wa Inaama wa Nyamuwanga,h unu kaasoosya‑wo ebhibhiibhi bhya abhaanu bhoone bha echaaro chinu! 30 Unu niwe naabhabhwiraga ati, ‘Kaaja omuunu inyuma yaani, ni mukuru okunkira, kwa okubha omwene aariga ari‑wo ku‑bhwambiro, kara anye nichaari kwibhurwa.’ 31 Noorwo anye ꞉nitaamumenyere ati niga, nawe niijire okubhatiija abhaanu mu‑manji korereki aswerurirwe ku‑Bhayisirayeeri.” 32 Niwo Yowana ˆnaasoosya obhubhambaasi ˆnaayikaga ati, “Naarora Mwoyo Mweru ˆneekaga okusooka mu‑rwire rwa echiguuti, ˆnaagwa inguru yaaye. 33 Nawe ꞉nitaamumenyere ati niga, tari Nyamuwanga unu ꞉aantumire okubhatiija abhaanu mu‑manji aariga aambwiriiye ati, ‘Omuunu unu owuja okurora Mwoyo waani ˆneekaga na okugwa inguru yaaye, oyo niwe unu aribhatiija abhaanu kwa Mwoyo Mweru.’” 34 Niwo Yowana ˆnaayika ati, “Anye naarora emisango ejo, na enisoosya obhubhambaasi ati, oyo niwe Omwana wa Nyamuwanga.”i
Yeesu kaasora abheeyigisibhwa bhaaye bha okwamba
35 Mwejo yende‑ko, Yowana aariga eemereeguuyu awo rindi, ari na abheeyigisibhwa bhabhiri mu‑bheeyigisibhwa bhaaye. 36 ˆNaarora Yeesu ˆnaaribhataga ayeeyi nabho. ˆNaabhabhwira ati, “Ringira, oyo niwe Omwana wa Inaama wa Nyamuwanga!” 37 Abheeyigisibhwa bhabhiri abho bhejire bhoongwa emisango ejo, nibharuubha Yeesu. 38 Yeesu ˆneekebhuukira, ˆnaarora nibhamuruubhaga. ˆNaabhabhuusya ati, “Omwenda ki?” Abheene nibhamubhuusya ati, “Awe Raabhi, wikaaye aaki?” Obhugajuro bhwa omusango “Raabhi” ni “Omwiyigisya.” 39 Yeesu ˆnaayika ati, “Muuje murore‑wo.” Niwo nibhamuruubha, nibhagenda anu aariga eekaaye. Omwanya gunu ꞉bhaakingire awo, yaariga iri wuti saa ekumi ja keegoro, nibhabha nage orusuku orwo.
40 Omwiyigisibhwa owumwi ku‑bheeyigisibhwa abhabhiri bhanu ꞉bhoonguuwe emisango ja Yowana na okuruubha Yeesu, aariga ˆnaatogwa Andereya, omumura waabho Simooni Peetero. 41 Awoawo Andereya ˆnaagenda okuyenja Simooni, omumura waabho. Ejire aamubhona, ˆnaamubhwira ati, “Eswe chaarora Masiya!”j Obhugajuro bhwa omusango Masiya ni “Kirisito.” 42 Niwo Andereya ˆnaasira Simooni ku‑Yeesu. Yeesu ˆnaaringira Simooni, ˆnaamubhwira ati, “Awe naawe Simooni, omwana wa Yowana. Nawe okwambira woori, risiina ryawo eribha Keefa.” Risiina eryo mu‑Chiyunaani ni Peetero, obhugajuro bhwaryo ni “Rutare.”
Yeesu kaasora abheeyigisibhwa abhandi bhabhiri
43 Mwejo yende‑ko, Yeesu ˆnaaramura okugenda mu‑mukoowa gwa Gariraaya. Niwo ˆnaasongʼana Firipo, ˆnaamubhwira ati, “Nuunduubhe.” 44 Firipo aariga ari mwinengo wa mu‑musi gwa Bhetisaayida, omusi gunu Andereya na Peetero bhaariga bhasookereeye.
45 Mbe, Firipo ˆnaabhona Natanayeri, ˆnaamubhwira ati, “Eswe chaarora omuunu unu Muusa ꞉aakaamire emisango jaaye mu‑chitabho cha ebhiraagiro. Abharagi wone ꞉bhaakaamire emisango inguru ya omuunu oyo. Risiina ryaye ni Yeesu wa Najareeti, omwana wa Jejefu.” 46 Omwene ˆnaabhuusya Firipo ati, “Echiinu choonechoone cha ekisi echitura okusooka mu‑musi omutooto gwa Najareeti?” Firipo ˆnaamusubhya ati, “Iija, urore.”
47 Yeesu ejire aarora Natanayeri ˆnaamuujaga‑ko, ˆnaayika ati, “Ringira, oyo niwe Omuyisirayeeri wa echimari, unu atari‑mo bhurigerige bhwonebhwone.” 48 Natanayeri ˆnaamubhuusya ati, “Waammenya kutiki?” Yeesu ˆnaamusubhya ati, “Naari naakurorere omwanya gunu wari winyanjire emwaro ya riiti rya ritiini arya, noorwo Firipo achaari kukubhirikira.” 49 Natanayeri ˆnaamusubhya ati, “Omwiyigisya, awe uri Mwana wa Nyamuwanga! Ka wone uri mukama wa Abhayisirayeeri!” 50 Yeesu ˆnaamubhuusya ati, “Angu, weekirisya kwa okubha naakubhwira ati naakurora winyanjire emwaro ya ritiini? Urirora emisango ejindi emisito okukira jinu!” 51 Yeesu ˆnaagenderera okwayika ati, “Ni chimari enibhabhwira ati, murirora orwire rwigukire, ka wone murirora bhamaraayikak bha Nyamuwanga nibhariinyaga na okwika inguru yaani, anye Omwana wa Omuunu.”l