Emirimu ja Yowana Omubhatiija
3
1 Jejire jaatura emiguuga myafu, ˆneebhuka omuunu umwi unu aatogwaga Yowana Omubhatiija. Yowana oyo aariga ˆnaaraasya mw‑ibhara rya Yuudeya, ˆnaayikaga ati, 2 “Mute ebhibhiibhi bhyemwe ku‑Nyamuwanga, kwa okubha obhukama bhwa mu‑rwirea bhuri yeeyi!” 3 Yowana niwe ꞉aayikirwe na omuragi Iisaya ati,“Obhuraka bhwa omuunu unu kaabhirikira mw‑ibhara ati,
‘Muchumachumire Raatabhugenyi injira,
mwimye anu kaja okutura.’”b
4 Yowana aafwaraga emyenda jinu jaariga jirukirwe na obhusinga bhwa jingamiya na eebhoyaga omuchipi gwa orukobha mu‑chibhunu chaaye.c Ebhiryo bhyaye bhyariga bhiri jiisige na obhuuki. 5 Abhaanu bhaafu bhaariga nibhamuuja‑ko okusooka mu‑musi gwa Yerusareemu, okusooka mu‑mukoowa gwone gwa Yuudeya na mu‑mbaara joone ja omusima gwa Yorodaani. 6 Abhaanu abho, bhaariga nibhegamba ebhibhiibhi bhyebhwe na omwene ˆnaabhabhatiija mu‑musima gwa Yorodaani.
7 Nawe Yowana ejire aarora Abhafarisaayo na Abhasadukaayod bhaafu nibhamuuja‑ko, korereki abhabhatiije, ˆnaabhabhwira ati, “Emwe orwibhuro rwa jinjoka! Niga unu ꞉aabhabhwiriiye ati, omutura okwikenga indamu ya Nyamuwanga inu iriija, kwa okubhatiijibhwa era? 8 Mbe, mukore ebhikorwa bhinu ebhyeresya ati, chimari mwata ebhibhiibhi bhyemwe ku‑Nyamuwanga. 9 Mwasiga okwitogera ati, Nyamuwanga aribheekirisya, kwa okubha omwikumangya ati, ‘Chiri rwibhuro rwa Bhurayimu!’ Enibhabhwira ati, Nyamuwanga kaatura okuyindura amabhuyi ganu okubha abhaana bha Bhurayimu! 10 Woori indamu ya Nyamuwanga iri inguru yeemwe rwa imbasa inu iteeywe ku‑masina ga amati. Abhaanu bhanu bhatakukora ebhikorwa bhya ekisi bhariramurwa, rwa kutyo bhuri riiti rinu ritakutwasya amatwasyo ga ekisi eritemwa na okweswa mu‑muriro.
11 “Anye enibhabhatiija mu‑manji okweresya ati, muyindukiiye Nyamuwanga. Nawe kaja okuuja omuunu owundi owa obhuturo okunkira. Anye niteeyire noorwo okusuruumura jingoye ja ebhiraato bhyaye.e Omwene aribhabhatiija kwa Mwoyo Mweru na kwa omuriro okwesya emitima jeemwe rwa kutyo omuriro ogwesya ebhyuma. 12 Agwatiriiye oruwungo mu‑ngaro jaaye korereki awungure obhuro. Obhuro bhwa ekisi aribhubhiika mu‑chitara chaaye, nawe amakumbi arigoocha mu‑muriro gunu gutarisima.”
Yowana kaabhatiija Yeesu
13 Mbe, omwanya ogwo, Yeesu ˆnaaja okusooka mu‑mukoowa gwa Gariraaya, ˆnaagenda mu‑musima gwa Yorodaani korereki Yowana amubhatiije. 14 Nawe Yowana ˆnaaregeeja okumuyingirira, ˆnaamubhwira ati, “Owuuja kutiki kw‑anye nikubhatiije? Anye naanye enikena umbatiije.” 15 Yeesu ˆnaamusubhya ati, “Awe ikirisya era umbatiije woori, kwa okubha echikenwa okukuumisya obhurengeresi bhwone.” Mbe, Yowana ˆneekirisya, ˆnaamubhatiija.