Jesús peliwaisi pejumexaniataewi muxujiobatsi, bepexaniajailiwaisi itajara pepaebiwi pejumexaniataeyaniwa
2
¡Xania baja tsane! Daxita pamonae jinawanapa beDioso pejumeliwaisi pepaebiwi, jane itsiata, daxita bajarapamonae apopacatsipaebi tsane pexaniajailiwaisi. Bajarapacuenia itsi Israel nacuapijiwijawa. Bajayata itsamonae tsipaebapona penajumetsënëtsiliwaisi Dioso pewënëta bajarapamonaejawa, beDioso peliwaisi pepaebiwi petaenexatsi.a Bajara-icatsia aeconoxae-ata itsi tsane paxamëjawa. Itsamonae paxamëtuatuajëta pacatsipaebiana penajumetsënëtsiliwaisianë,b papecayamaxë-itojorobinexa. Bepexaniajailiwaisi itajara pepaebiwi tsane. Nexata, bajarapanajumetsënëtsiliwaisianëta, pacatobijianaena Dioso peliwaisi, pexaniajailiwaisi panejumexaniataejawami, tsipaji bajarapamonae jume-aebiana Wajatuxanenë Jesucristo pesiwatëpaejawatsi pecapanepaenexatsi pijaperujujamatabëcuenemiwecua. Nexata, cujarubiana itsamonae pejume-aebinexa bajaraxua. Bajarapacuenia bajarapamonae pecujarubixae tsane, nexata ayaineconi natsixainaponaena. Nexata, bepijia Dioso werebiabiana.
2 Nexata, neconi penatsi-exanaponaenexa bajarapamonae jitsipaena pewitota pibisiacuene pexanawanapaenexa, najamatabëcuenecataitsinejewa. Xuacujinae, bajaraxua yabara jumaitsi tsane: «Apo-itsacuene itsiata, bajaraxua exanae-atatsi», jai tsane bajarapamonae. Nexata belia, ayaibitsaëto paxamëyajuwënëwi jumexaniataena bajarapapenajumetsënëtsiliwaisi, pena-exanaenexa pibisiacuene bajarapamonaeta. Nexata, bajarapacuenia paxamëyajuwënëwi pibisiacuene petsita-exanaexae tsane, pamonae apopejumexaniataewi Jesús peliwaisi pibisiacuenia baracuaicuaijai tsane pexanialiwaisi, Dioso peliwaisi.
3 Orijibia, bepexaniajailiwaisi itajara pecujarubiwi, bitso jitsipaena palata. Bajaraxuata, pijacuata papecatsipaebiliwaisianë, bepexaniajailiwaisicuenia papecatsipaebijamatabëcuene pacawecuanotsiana panijapalata, pexainaewi penaexanaenexa. Itsiata baitsi jane, Dioso tajëwelia najamatabëcuenewereta bajarapamonae penaneconitsia-exanaenexa. Nexata, bajarapamonae bajarapitsipibisiacuenejawanë pexanaexae tsane, pepacuene jemata Dioso naneconitsia-exanaenatsi.
4 Yapëtanetsi pepacuene bajarapamonae Dioso penaneconitsia-exanaejawanexa, tsipaji bajayata ángelewi-ata, itsa naneconita Diosojawabelia, naneconitsia-exanaenejewa apocopatsi. Biji rajane, Dioso penereca apopewerewerecae-isotojawareca. Nexata, bajarapa-ángelewic pecëbicujinaetsi, naneconitsiaya jinawanapa pitaquirinacuata, pecopiapatsijawabelia pamatacabi Dioso naneconitsia-exanaejitsia daxita pijaneconi pexainaewi pepo-isotopucaxanetojawabelia.d
5 Bajarapacuenia-ata Dioso cajena naneconitsia-exanaenejewa apocopatsi bajayatami-ata, pamonae pibisiacuene exanawanapa Noé peponaponaematacabita. Biji rajane, ira bubutsia-exana, bajarapamonaemi penaxuabinexa. Itsiata baitsi jane, caenë, Noépijinë, Dioso barëcapanepatsi ëpijamonaematabëxëyo, siete pajiwiyobeje. Noépijinë picani tsipaebabiaba, jiwi penajamatabëcuenepënëyorotsinexa Diosojawabelia, pibisiacuene pexanaejawa pecopabinexa, tsipaji Dioso yapëtaeya-exanatsi penaneconitsiaya-exanaenexa pibisiacuene pexanaewi.
6 Bajarapacuenia-ata bajayata Dioso werebiaba isotota Sodoma, Gomorra tomarapijiwimibeje, bitso pibisiacuene pexanawanapaexae. Nexata, nacopata ë-ipumana bajarapatomaramibeje. Bajarapacuenia Dioso werebiaba bajarapamonaemi, pamonae cotocaewi jinawanapa, peyapëtaenexa xua tocopiapatsijitsiatsi pamonae pibisiacuene exanawanapa.
7 Itsiata baitsi jane, bajarapacuenia apotocopiapatsitsi Lot-pijinë, pamatacabi Dioso werebiaba bajarapatomaramibejepijiwi. Dioso capanepa caenë, Lot-pijinë, pexaniacuene pexanabiabixae. Bajaraponëmi itsa cuenetaeyabiaba bajarapamonaemi bitso pibisiacuene pexanaejawa, nexata bitso siwanajamatabëxainabiaba.
8 Lot-pijinë, caenë, pexaniacuene pexanaenë, naponapona bajarapamonaemituatuajëta. Nexata, caematacabi canacujitsia bajaraponë bitso siwanajamatabëxainabiaba, itsa tane, itsa wënëliwaisitanenua bajarapamonaemi pibisiacuene pexanaejawa.
9 Bajarapacuenia Dioso pexanaexae, yapëtanetsi Petuxanenë Dioso pecuenecaëjëpaejawatsi, pamonae itaxutuajamatejema bajaraPonëjawabelia wecuacapanepaena piayapëbejejamatabëcuene, tocopiapatsi-atatsi pejamatabëcuene-ëjëtsinexatsi. Yapëtanetsinua Dioso pecuenecaëjëpaejawatsi, nabejiobitsiaya pejinawanapaeya-exanaenexa pibisiacuene pexanaewi, piasaëtsawanapae-epato mapanacuataje, petëpaecujinae-ata, pecopiapatsijawabelia pamatacabi bajaraPonë caëjëta, penaneconitsia-exanaenexa daxita pijaneconi pexainaewi isotopucaxanetojawabelia.
10 Bajarapacuenia bitso ayaicuenia Dioso naneconitsia-exanaena itsamonaewecua, pamonae bitso casaë tsawanapae pibisiacuene pewitota pexanaejawa penatojitsipaecuenia, pamonae-ata, apopejumeyaiyataewi, Petuxanenë Dioso pitorobicueniatsi.
Pamonae, bepexaniajailiwaisi itajara pecujarubiwi, bajarapitsipibisiacuenejawanë exanaena. Bajarapamonae apopeyaiyataewi itsamonae-ata. Piajamatabëcuenetajawi. Apopejumejunawiwinua, pibisiacuenia pebaracuaicuaijainexa waja-itaxutota apowajataecapanepaewi, ayaijamatabëcuenewi.e
11 Ángelewi biji picani, bitso piajamatabëcuenesaëwi bepexaniajailiwaisi pecujarubiwiwecua. Itsiata, ángelewi pibisiacuenia apobaracuaicuaijai bajarapa-ayaijamatabëcuenewi Dioso pitabarata, pacuenia exana bepexaniajailiwaisi itajara pecujarubiwi.
12 Pamonae, bepexaniajailiwaisi itajara pecujarubiwi, aponajamatabëxainae pexanialiwaisi. Beweliajamatabëcuenewi saya, tsipaji pibisiacuenia baracuaicuaijai tsabiabi xua yabara xaniawaetsia apoyapëtae. Pacuenia dajubi, natsiwajënaecana-ëjëtsinejewa ajamatabëcuenecowëbia ba-exana, bajarasaya jamatabëcuene-itsi bajarapamonae, pexanaenexa penatojitsipaecuenia. Be-unupijidujuaijamatabëcuene pexainaewi cajena. Jiwitonë itsa tane unupijidujuainë jamatejema peponaponaejawata, tsiyajemata pebeyaxuabinexa, natsiwajënaecanaëjëtsia apopeponaponaexae. Bajarapacuenia pijinia, jemata Dioso werebiabiana pamonae, bepexaniajailiwaisi itajara pecujarubiwi.
13 Nexata, cuenecanawiatsiaya Dioso bajarapamonaemi juya bejiobia-exanaenatsi, itsamonae pebejiobia-exanabiabijamatabëcuene. Bajarapamonae pibisiacuene itsa exanabiaba, barëya tsabiabi. Daxitajiwi pitabëta, pibisiacuene pia-urajawanë petsita-exanabiabijawata, pacatobijianaena panenajuaxaefiestajawanë Dioso pewënëta, papecayajawanacaetuatsixae. Pacuenia peniojaipana itsawiriabarëmenejawata itsa cajayatsijitsipa, nexata bajarapabarëmene apo-iquipae tsipae, bajarapacuenia pijinia, bajarapamonae pexanaecuenejawata pacacuenebijianaena,f daxita paneyaiyataecuenemi. Bajarapamonae nabarëyaya-exanaena pibisiacuene pexanabiabijawata, papibisiacuene jiwi ba-exana merawi pia-urajamatabëcuene.
14 Bajarapamonae itsa tane petiriwa, pibisiacuene jamatabë-exanabiaba pewitota bajarapowajawabelia. Apoyabaracueranae pibisiacuene pexanaejawa. Nexata, penajumetsënëtsiliwaisi pecujarubijawata, jitsipaeya-exanaena itsamonae pibisiacuene pexanabiabinexa, pamonae abaxë apo-ajamatabëcuenesaë Dioso pejumecowënëtsijawa. Bajarapamonae bitso jitsipa daxitacuene pexainaejawa ëpamonaenexa. Nexata, bitso tsiyapëtanenua pepitsinexa xua jitsipa. Bajaraxuata, bajarapamonae Dioso bitso ayaicuenia naneconitsia-exanaena.
15 Bajarapamonae copaba baja pexaniacuene pexanaejawami, pexaniajailiwaisi pewecuaponaexae, pibisiacuene pexanaenexa pacuenia Balaam-pijinëmi. Pacuenia Profetanë Balaam-pijinëmi,g Beor-pijinëmi pexënato, jitsipabiaba palata pepitsinexa, pibisiacuene pexanaejawata, bajarapacuenia pijinia, exana bepexaniajailiwaisi itajara pecujarubiwi. Balaam-pijinëmi bajayata itsamonae tsipaebatsi picani palata perajutsinexatsi, pibisiacuene pexanaenexa. Nexata baja, picani jejai, bitso pejitsipaexae bajarapamatamo. Bajarapacuenia pijinia, pamonae, bepexaniajailiwaisi itajara pecujarubiwi, pibisiacuene exanabiaba, bitso palata pejitsipaexae.
16 Itsiata baitsi jane, Balaam-pijinë Dioso itawetatsi bajarapapibisiacuene bitso pexanaeyaniwa Dioso pitabarata. Balaam-pijinë pijaburrota peyanajetarucaejawata, Dioso cuaicuaijaiya-exana jiwitonëcuenia. Bajarajota, pijaburro pebarëcuaicuaijaijawatatsi, itawetatsi pibisiacuene pexanaeyaniwa. Nexata, picani xua Balaam-pijinë jamatabë-exana, copatah baja.
17 Orijibia, bepexaniajailiwaisi itajara pecujarubiwi, apojumenamatamotsi. Nexata, pepaebiliwaisi apojamatabëcueneyawenonae pejumetaewitsijawabelia. Pacuenia irawetsina pepitsaparucaemerami itsa tseweca, apojamatabëcueneyawenonae mera pejitsipaejiwiyo pejamatabëcuene-asaëya-exanaenexa mera pejitsipaejawata, bajaraliwaisi-itsi bajarapamonae. Pacuenia-ata itarërëbo, jowibota xaniawaetsia caecowëta aporucae, ema runaenejewa, bajarajamatabëcuene-itsi bajarapamonae. Caejamatabëcuene apoxainae. Petsipaebiliwaisi apojamatabëcueneyawenonae caejawayo-ata, itsamonae pejamatabëcuenewitsabaponaenexa Diosojawabelia. Nexata, Dioso bitso ayaicuenia naneconitsia-exanaenatsi, pepopitaquirinacuata naneconitsiaya pejinawanapaenexa daxitamatacabijawabelianexa.
18 Yapëtanetsi Dioso penaneconitsia-exanaenexa, tsipaji bajarapamonae ayaijamatabëcuenewi nataeya cuaicuaijai tsabiabi natsiquejemaliwaisianë, bepexanialiwaisianë itajara. Bajarapanatsiquejemaliwaisianë petsipaebijawata, jitsipaeya- exana icatsia caewëalia pibisiacuene pexanaenexa, pijaperujujamatabëcuene pejitsipaecuenia, pamonae ajena jumexaniatanei Jesús peliwaisi, pa̱monae picani copaba pibisiacuene pexanaejawa. Nexata, bajarapamonae yamaxë-itojorobiaya jumaitsi tsabiabi: «Apo-itsacuene raja petiriwa apopayaiyatae-atamë. ¡Pibisiacuenej itsa jamatabëpa-exaname panewitota petiriwajawabelia, pa-exanare saya!», jai tsabiabi.
19 Baitsi, bajarapamonae yamaxë-itojorobiaya jumaitsi tsabiabi: «Itsa panejumecowënëtsianame patacatsipaebiliwaisi, nexata pacato-ajibi tsane papeca-itawetsiliwaisi. Panijacuata panejitsipaecuenia pajinawanapaename», jai tsabiabi bajarapamonae. Bajarapacuenia jumaitsi tsabiabi-ata, itsiata bajarapamonae xaina pijaperujujamatabëcuene pijatuxanenëcuenia, pibisiacuene pexanabiabinexa pacuenia itorobatsi. Baitsi, xua jamatabëcuenenamatacaitorobatsi jiwi, bajaraxua raja tonaexanatsi bepijatuxanenë, pijajiwitonëcuenia peto-exanaenexa pejitsipaecuenia.
20 Bajarapamonae pepobejiobi. Yapëtae-ata Dioso pewecua-ajibia-exanaejawanexatsi Wajatuxanenë Jesucristo pejamatabëcueneta, pibisiacuene pexanaeneconimi, pajamatabëcuenemi-ata jitsipaeya-exanabiabatsi pibisiacuene pexanaenexa, caewëalia pibisiacuene exanapona. Nexata, bepejamatabëcuenecëbiwitsi pibisiacuenejawata, bepejamatabëcuene-amoneyabiwitsinua. Nexata, bajarapamonae jinawanapaena bitso bepejamatabëcuenejiobicuenetak copiaya pejinawanapaejawamiwecua. Naneconitsiananua Diosojawabelia copiaya pexainaeneconimi matatoxenetsia.
21 Bajarapacuenia pibisiacuene caewëarena pexanawanapaexae, juya xanepanaejitsipa itsa apotsipaebi tsipaetsi bajarapapexaniajailiwaisi,l bewelianeconi penatsixainaenexa Diosojawabelia. Nexata baja, peyapëtaexae bajarapaliwaisi, apopejumexaniataexaenua, pexanaenexa pacuenia yapëtaeya-exanatsi, bajarapamonae bitso naneconita Diosojawabelia.
22 Bajarapitsicuene pexanaewi yabara, bajayatapijiliwaisi jumaitsi mapacueniaje: «Awiri peyacabicujinae, icatsia nayacabixane. Marrano pijinia tsorobota pebocaecujinae, pexaniamerata, pematawaecujinaetsi, icatsia caewëalia natsorobuata», jai bajayatapijiliwaisi. Xaniajai baja cajena bajarapaliwaisi. Bajarapijinia jamatabëcuene-itsi pamonae icatsia caewëalia pibisiacuene exana, peyapëtaecujinae Dioso pewecua-ajibia-exanaejawatsi pibisiacuene pexanabiabijawami.