Pacuenia icatsia Jesucristo patsijitsiatsica, yabara peliwaisi
3
Tajamonae, bitso pataca-asiwawi, pacuenia copiaya baja cajena pacatoyaquinatsi itsabaxutota, icatsia mapabaxutoje cotocaewi pacatoyaquinatsi, patacanajamatabënapitsia-exanaenexa papecacujarubiliwaisianë, patacamuxujiobinexanua, xaniawaetsia panenajamatabëxainaenexa bajarapaliwaisianë yabara.
2 ¡Nexata, panajamatabënapire pacuenia profetanë, bajayata tajëwelia jumaitsi, Wajatuxanenë Jesucristo icatsia pepatsijawanexatsica yabara! Panajamatabënapirenua pacuenia baja cajena paxanë pa-apóstolewinë pacatsipaebatsi Wajatuxanenë Cristo peliwaisi, ponë wajanacacapanepaenënexa. Bajarapaliwaisi copiaya panetsipaeba pa-apóstolewinëjawaberena, paxanë juya patacatsipaebinexa.
3 ¡Tajamonae, xaniawaetsia panamuxuna-ewere, daxitacuenewecua paneyapëtaenexa mapacueneje, panejamatabëcuenefaefaenaeyaniwa! Nacua imoxoyo pecopiarucaewajënaeya, najetarubenaena itsamonae pecapocaponaewinexa pexaniajailiwaisi. Bajarapamonae exanawanapaena pibisiacuene, pacuenia pijacuata natojitsipa.
4 Bajarapamonae Cristo icatsia pepatsijawanexatsica apopejumexaniataexae, najume-itacanitsiaya saya jumaitsi tsane: «¿Jica, detsa baja itsi Cristo icatsia pepatsijawanexatsica, pacuenia baja tajëwelia najumecapanepaeya jumaitsi? Bajarapacuenia pejumaitsixae, bajayata wajawajënaeyapijiwimi wajënae-ewetawanapa picani Cristo pepatsijawanexatsica. Belia baja bajarapamonaemi tëpa Cristo patsinejewatsica. Orijibia, daxitanacua abaxë tsitecanuca Dioso pexanaecujinae», jai tsane, apopejumexaniataexae Cristo icatsia pepatsijawanexatsica.
5 Yapëtanetsi baja cajena Dioso apopejumenaxuabinë,a tsipaji xua jumaitsi bajayatami, copiapata baja. Bajarapamonae bajarapacuenia jumaitsi tsane Cristo icatsia pepatsijawanexatsica yabara, pejume-aebixae Dioso pexanaecuenemi. Bajarapamonae yapëtae-ata Dioso bajayatami pexanaejawa pejumeta itaboxo, mapanacua yajawaje, pepitsapaeya-exanaejawatsinanua mapa-iranexaje, manuamenetuatuajëatsina, jume-aeba bajarapaliwaisi.
6 Jume-aebanua Dioso pejumeta pebubutsia-exanaejawa merata mapanacuaje, daxitajiwi pewerebiabinexa penaneconitsixae.
7 Bajarapacuenia mapanacuaje bijianae-ata, yajawawerebiabi-ata bajayata pejinawanapaewimi, itsiata pa-itaboxo, pa-ira yajawa, taewanapatsi maparucaeje, Dioso pejumeta abaxë xaniawaetsia tsitecanuca. BajaraPonë abaxë xaniawaetaponapona bajaraxuanë, itsamatacabi juya isotota peweriapaenexa, pamatacabi pejumeta naneconitsia-exanaena daxita pijaneconi pexainaewi. Nexata, pamatacabi Dioso naneconitsia-exanaena pibisiacuene pexanaewi, werebiabiananua daxitacuene pejumeta.
8 ¡Tajamonae, bitso pataca-asiwawi, pëtsa panacofënëtame mapacueneje!: Petuxanenë Dioso raja apotsitabajayajebitsi matacabianë yabara. Caematacabi betsitamil pawaitsibeje. Mil pawaibeje-ata pijinia betsitacaematacabitsi.
9 Nexata, yapëtanetsi petuxanenë Dioso apopecuenenajematsijawa, najumecapanepaeya pejumaitsicuenia pexanaenexa, pacuenia itsamonae canaëjëta pecuenenajematsijawa Jesucristo icatsia pepatsijawanexatsica yabara. Biji rajane, abaxë Dioso jamatabëcuene-eweta jiwi penajamatabëcuenepënëyorotsijawa bajaraPonëjawabelia, pibisiacuene pexanaejawawecua, tsipaji apojitsipae itsajiwi-ata pewecuanaxuabijawatsi.
10 Bajarapacuenia baja petuxanenë Dioso jamatabëcuene-ewetsi-ata, jemata baja cajena Jesucristo icatsia patsianica pejumaitsicuenia, penaneconitsia-exanaenexab pibisiacuene pexanaewi. Patsianica pamatacabi jiwi jamatejema jinawanapaena, pijaneconi yabara siwabëjainejewa, pacuenia penacobetoxotsinënexac jemata bapata, paepatota apojamatabënajinaetsi. Nexata jane baja, bajarapamatacabita ayaicuenia penajumetsijawata,d itaboxo copiarucaena. Daxita athëbëpijicuene, mapanacuamije yajawa, werewerecaena isotota. Daxita xua irajawata xaina mapanacuaje, yajawatajuena isotota. Dioso bajarapacuenia jiwi naneconitsia-exanaena, pijaneconi pejamatabëcuene.
11 Paneyapëtaexae daxita bajarapacuene Dioso pewerewerecaeya-exanaejawanexa, nexata matatoxenetsia bitso xaniawaetsia bepajinawanapame Dioso papecatojitsipaecuenia.
12 Bajaraxuata, bepacopia-ewetawanapame jamatabëcuene-aitatsacaeya, Wajatuxanenë Jesucristo icatsia pepatsijawanexatsica, pejananacuata wajajinawanapaenexa. ¡Nexata, bepijiayo Wajatuxanenë Jesucristo pepatsinexatsica,e cuenebitsojinaeya pijacuene patonacuenebawanapare, panenacueneweretsinexa! Bajarapamatacabi, petuxanenë Dioso itaboxo werewerecaeya-exanaena isotota. Nexata, daxita xuanë bajaraPonë canacueneba pexanaenexa daxitacuene,f peporanë naexanaena petajuta bajarapa-isotota.
13 Itsiata baitsi jane, waxaitsi ewetawanapatsi, wajataenexa pejana-itaboxo, pejana-iranua, pacuenia Dioso tajëwelia najumecapanepaeya exanaeyapaeba, itsajota daxitajiwi ëpexaniacuene exanawanapaena,g Dioso petojitsipaecueniatsi.
14 Tajamonae, bitso pataca-asiwawi, panecopia-ewetawanapaexae, panetaenexa pejana-itaboxo, pejana-iranua, panecopia-ewetawanapae-epato abaxë xaniawaetsia pajinawanapaenameh Dioso pejitsipaecuenia, Wajatuxanenë papecasiwabarëyanexa pepatsimatacabitsica icatsia. Bajarapacuenia pacasiwabarëya tsane, itsa pacacaxitajarabiana jamatabëcuenexanepanaeya aneconijibia panejinawanapaejawata.
15 ¡Itsiata, pacanaëjëre xua yabara abaxë Wajatuxanenë Jesucristo cuenenajemata pepatsijawanexatsica! Abaxë raja apopatsitsica daxitajiwi apopesiwanajamatabëcuenecopabixae bajaraPonëjawabelia, tsipaji daxitajiwi Wajatuxanenë jamatabëcapanepai pijanacuayabetsia. Bajarapacuenia pijinia, waja-asiwanë, wajabananë Pablo, pacatoyaquina bajaraxuanë yabara, Dioso peyapëtaeya-exanaecueniatsi.
16 Pablo baja cajena daxita papecatoyaquinaebaxutonëta, pacatoyaquina bajarapitsiliwaisianë yabara, xua xanë pacatoyaquinatsinua mabaxutoyotaje. Yapëtanetsi pacuenia Pablo peyaquinaeliwaisianë, itsaliwaisianë ajumeyapëbeje tsabiabi itsamonae pejumeyapëtaenexa, pajamatabëcuene xaina xua yabara Pablo yaquina. Nexata, pamonae xaniawaetsia apopejumeyapëtaewij Dioso peliwaisi, caejamatabëcuene apopexainaexae pejumexaniataejawa Jesús peliwaisi, bajarapamonae juya liwaisi itothianabiaba, petsipaebabiabijawata itsamonaejawabelia Pablo peyaquinaeliwaisianë, pacuenia itothianabiaba itsaliwaisianë, Dioso Pejumeliwaisibaxutota perubenaeliwaisiyajuwënëjawanë. Bajarapacuenia saicayacuenia petsipaebabiabixae Dioso pejumeliwaisiwecua, bajarapamonae pijacuata neconi natsi-exana Diosojawabelia.k
17 Tajamonae, bitso pataca-asiwawi, bajaraxuata paxamë baja cajena tajëwelia payapëtaneme bajaraxua yabara. ¡Nexata, panayajiwitaema bajarapapitothianaeliwaisi pecujarubiwi, papecayamaxë-itojorobiyaniwa! Belia pajume-aebijitsipame paliwaisi asaëyata picani pajumexaniataewanapame, juya panejumexaniataenexa bajarapapitothianaeliwaisi Dioso peliwaisiwecua.
18 Bajaraxuata, pacatojitsipatsi, panewajënaeyabelia paneyapëtaeponaenexa Wajatuxanenë Jesucristo, wajanacacapanepaenë, pacuenia jamatabëcuene-itsi. Pacatojitsipatsinua paneyapëtaeponaenexa asiwaya papeca-itaxutotsoniataejawa.
Bajaraxuata, daxitajiwi Jesucristojawabelia jumaitsi tsabiabi tsane: «Xamë Jesucristomë, bitso cajena ayaijamatabëcuenenëmë», jai tsabiabi tsane daxitamatacabijawabelianexa. Bajara-itsi tsane.