1 Juan
Mapabaxutoje apóstolnë Juan copiaya toyaquina daxita Jesús peliwaisi pejumexaniataewijawabelia
Cristo peliwaisi wajanacajamatabëcuene-asaëya-exanaeliwaisi
1
1-2 Xanë, Juannë, pacatoyaquinatsi Dioso pexënato peliwaisi, Ponë athëbëtatsia ponapona, mapanacuaje Dioso pexanaewajënaeya. Paxanë pa-apóstolewinë pacayapëtaeya-exanatsi pacuenia bajaraponë naitajëta mapanacuayabetsicaje, pepaebinexa jiwi pejamatabëcuene-asaëya-exanaeliwaisi. Nexata, abaxë itsa ponapona Dioso pexënato mapanacuataje, paxanë, pajumetaniji patanetsipaebiliwaisianë. Pata-itaxutota pataniji. Pajayabajënua patacobeta. BajaraPonë, caenë, pejamatabëcueneta jiwi xainaena matacabi apopewerewerecaejawa.
3 Pacatsipaebatsi baja bajarapacuenia, tsipaji pacatojitsipatsi caejamatabëcueneliwaisi panexainaenexa paxanëjawaberena, asiwaya namata-enetsia wajanacopiapitabiabinexa. Bajarapacuenia daxitatsi caejamatabëcueneliwaisi xainaenatsi Diosojawabelia, pexënato Jesucristojawabelia-ata.
4 Nexata, pacuenia pataniji, pacuenia-ata pajumetaniji bajaraponë patanetsipaebiliwaisianë, pacatoyaquinatsi mapabaxutotaje, ayaicuenia wajanajuasiwajamatabëcuenebarëyanexa.
Bejinawanapatsi wajanacajamatabëcuene-itayotsiliwaisi wajanacayapëtaeya-exanaecuenia
5 Paliwaisianë pajumetaniji Jesucristo patanetsipaebijawa, bajarapaliwaisianë juya paxamëjawabelia pacatsipaebatsi. Dioso raja pitayotsicotia pexainaenë, tsipaji itsaneconi-ata apopexainaenë. Pitaquirijamatabëcuene-ata apopexainaenë, tsipaji caeto-ata aponajamatabëxainae pibisiacuene pexanaenexa.
6 Bajaraxuata, waxaitsi jumaitsi-atatsi: «Xanë caejamatabëcuene xainajë Diosojawabelia», jai-atatsi, itsiata itsa exanawanapatsi pitaquirijamatabëcuene wajanaca-itorobicuenia, najamatabëcuenecapaebatsi apowajaxaniajaijawa. Najumetsënëtatsi saya. Apo-exanawanapaetsi pexaniacuene, Dioso wajanacajamatabëcuene-itayotsiliwaisicuenia.
7 Itsiata, Dioso wajanacajamatabëcuene-itayotsiliwaisicuenia itsa exanawanapaenatsi, pacuenia Dioso exanaponapona, nexata Dioso pexitsi asiwaya najuajinawanapaenatsi najamatabëcuenejëpaeya. Natoyapëtaenatsinua Jesucristo, Dioso pexënato, wajanacawecua-ajibia-exanaejawa daxita wajapibisiajamatabëcuenemi, pejanarunaexae wajanacasiwatëpaejawata.
8 Waxaitsi itsa jumaitsitsi tsipae: «Xanë raja aneconijibinë, tsipaji pibisiacuene apo-exanaenë», itsa jaitsi tsipae, nexata saya nayamaxë-itojorobatsi. Pexaniajailiwaisi, Dioso pejumeliwaisi cajena aponacatsijamatabë-ecaea.a
9 Itsiata, itsa nawajunupaebatsi Diosojawabelia papibisiacuene exanatsi, nexata bajaraPonë nacawecua-ajibia-exanaenab pibisiacuene waja-exanaeneconimi. Orijibia, nacawecua-ajibia-exanaena daxita wajapibisiajamatabëcuenemi. Bajarapacuenia nacato-exana, tsipaji bajaraPonë pianeconijibinë, pejumaitsicuenia pexanaenënua.
10 Bajaraxuata, waxaitsi itsiata itsa jumaitsitsi: «Xanë caeto-ata pibisiacuene apo-exanaenë», itsa jaitsi, nexata saya Dioso exanatsi bepenajumetsënëtsinë. Bajarapacuenia najamatabëcuene-itajëtatsi Dioso peliwaisi apowajanacatsijamatabëcuene-ecaejawa.