Cristo raja wajanacayapijiwicuaicuaijainë Diosojawabelia
2
Tajamonae, pacatoyaquinatsi mapaliwaisije patacamuxujiobinexa, pibisiacuene pane-exanaeyaniwa. Itsiata baitsi jane, itsajiwi pibisiacuene itsa exana, xainatsi Jesucristo, wajanacayapijiwicuaicuaijainë Diosojawabelia. BajaraPonë cajena caeto-ata pibisiacuene apopexanaenë.
2 BajaraPonë nacaeweta wajanacasiwatëpaenexa, Dioso wajanacawecua-ajibia-exanaenexa baja daxita pibisiacuene waja-exanaeneconimi. Itsiata, ëwaxaitsi wajaneconi yabara aponacasiwatëpae. Siwatëpanua daxita mapanacuapijiwije, pibisiacuene pexanaeneconi pewecua-ajibia-exanaenexa.
3 Waja-exanawanapaejawata pacuenia Dioso naca-itoroba, natoyapëtanetsi pepacuene caejamatabëcuene wajaxainaejawa Diosojawabelia.
4 Itsajiwi jumaitsi-ata: «Xanë raja cajena Dioso yapëtaniji», jai-ata, itsiata itsa apojumecowënëtsi pacuenia Dioso itorobatsi, bajarapajiwi saya najumetsënëta. Pexaniajailiwaisi cajena, Dioso pejumeliwaisi, apotsijamatabë-ecaetsi.
5 Pajiwi exanaponapona Dioso pitorobicueniatsi, bajarapajiwi najamatabëcuene-itajëta pepacuene bitso piasiwajawa Dioso. Bajarapacuenia waxaitsi-ata itsa exanawanapaenatsi, nexata natoyapëtaenatsi caejamatabëcuene wajaxainaejawa Diosojawabelia.
6 Pajiwi jumaitsi: «Xanë rabaja Dioso yajawaponaponajë», jai, bajarapajiwi xaniawaetsia be-exanaponapona ëDioso pejitsipaecuenia, pacuenia Jesús exanaponapona mapanacuataje.
Cristo nacatonajumecopata pejanaliwaisi pijajiwitsi wajajumecowënëtawanapaenexa
7 Tajamonae, xua ajena pacatoyaquinatsi panejumecowënetsinexa, apopejanaliwaisi raja picani. Baitsi, bajarapaliwaisi picani bajayata pacatsipaebatsi, pamatacabi a̱jena̱ pajumexaniataneme Jesús peliwaisi.
8 Nexata, bajarapaliwaisi pacatoyaquinatsi bepejanaliwaisicuenia panejumecowënëtsinexa. Cristo baja cajena pijacuata natoxaina bajarapapexaniajailiwaisi. Paxamë-ata baja panecueneyapëtaexae pacuenia Cristo exanaponapona, pajumecowënëtawanapame bajarapaliwaisi. Bajarapapexaniajailiwaisi pejamatabëcueneta, pacawecua-ajibi baja tsaponae mapanacuapijijamatabëcuenemije, pitaquirijamatabëcuenemi, tsipaji Jesucristo pacajamatabëcuene-itayotapona bajarapaliwaisita.
9 Itsajiwi jumaitsi-ata: «Xanë raja Dioso tanejamatabëcuene-itayotsiliwaisicuenia exanaponaponajë», jai-ata, itsiata itsa itoya itsajiwi Jesucristojawabelia penajuasiwanajamatabëcuenecopatsiwi, nexata bajarapajiwi abaxë tsiteca ajamatabëcuene-itaquiri tsaponaponae.
10 Pajiwi bitso asiwa itsajiwi-ata, Jesucristojawabelia penajuasiwanajamatabëcuenecopabiwi, bajarapajiwi Dioso jamatabëcuene-itayotatsi pexaniajailiwaisita. Nexata, bajarapajiwi apo-exanae tsane itsacuenejawayo-ata xua yabara jopaeya-exanaejitsipa Dioso peliwaisiwecua Jesucristojawabelia penajuasiwanajamatabëcuenecopabiwi.
11 Pajiwi itoya itsamonae-ata, Jesucristojawabelia penajuasiwanajamatabëcuenecopabiwi, bajarapajiwi abaxë tsiteca ajamatabëcuene-itaquiri tsaponaponae. Nexata, pitaquirijamatabëcuene pitorobicueniatsi exanaponapona. Apoyapëtae itsabelia caponaejitsiatsi bajarapajamatabëcuene, tsipaji pewajënaeyabelia dowathi ya-ajamatabëcuene-itaquiriaya-exanaponatsi, piajamatabëcuene-itaquirixae.
12 Tajamonae, bepataximë patacataewi, pacatoyaquinatsi mapaliwaisije, tsipaji baja Dioso pacawecua-ajibia-exana pibisiacuene pane-exanaeneconimi Jesucristo papecasiwatëpaexae.
13 Paxamë, panenaweretsiwi, pacatoyaquinatsi mapaliwaisije, tsipaji baja payapëtaneme Jesucristo, Ponë baja cajena athëbëtatsia ponapona pepobajayatami-ata, Dioso daxitacuene mapanacuataje pexanaewajënaeya. Paxamë, papewëjëawimë, pacatoyaquinatsi mapaliwaisije, tsipaji baja dowathi pajamatabëcuene-amoneyabame. Bepataximë patacataewi, pacatoyaquinatsi mapaliwaisije, tsipaji baja, payapëtaewanapame Dioso pane-axacuenia.
14 Patawajënaeyapijiwimë, imata pacatoyaquinatsi mapabaxutotaje, tsipaji baja, payapëtaewanapame Jesucristo, Ponë baja cajena athëbëtatsia ponapona pepobajayatami-ata, Dioso daxitacuene mapanacuataje pexanaewajënaeya. Paxamë-ata papewëjëawimë, imata pacatoyaquinatsi mapabaxutoje, tsipaji baja pajamatabëcuenesaëmë tsawanapae Dioso pijacuenejawalia. Pacatsijamatabë-ecanua baja Dioso pejumeliwaisi. Nexata, baja dowathi pajamatabëcuene-amoneyabame.
15 ¡Pëtsa pa-asiwamë mapanacuapijicueneje, daxita xua-ata xaina, pacuenia mapanacuapijiwije najamatabëxaina piasiwanexa! Nexata, mapanacuapijicuene itsa pa-asiwamë tsipae, apopacatsijamatabë-ecae tsipae pane-asiwanexa Dioso.
16 Pajamatabëcuene jiwi jitsipaeya-exanabiabatsi mapanacuapijijawanë, bajarapajamatabëcuene apopitsapae Diosojawawerena. Pitsapa saya mapanacuataje. Nexata, capitsapabiaba mapajamatabëcuenejawanë: Jiwi jitsipabiaba peperabëto pejitsipaecuenia, pexanabiabinexa. Petaejawata, itajitsipabiaba xua jamatabënaxainaeyaba. Jitsipabiabanua be-ayaijamatabëcuenewi penataejawa. Daxita bajarapajamatabëcuene pitsapa mapanacuataje.
17 Mapanacuapijijawanë, daxita pejitsipaecuenejawanë-ata capitsapa, bajaraxuanë bepijiayo yajawawerewerecapona. Itsiata baitsi jane, pamonae exanawanapa Dioso pejitsipaecuenia, jinawanapaena daxitamatacabijawabelianexa.
Bepexaniajailiwaisi itajara pepaebiwi, yabara peliwaisi
18 Tajamonae, imoxoyo rabaja pewajënae tsaponae pewerewerecaenexa mapanacuaje. Pawënëliwaisitaneme rabaja pacuenia najetarucaejitsia pepopecuene-itoyanëtsia Cristo. Pata rabaja cajena ayaibitsaëto, Cristo pecuene-itoyawitsi. Bajaraxuata, yapëtanetsi imoxoyo baja pewajënae tsaponae pewerewerecaenexa mapanacuaje.
19 Pamonae, Cristo pecuene-itoyawitsi, nacayajawanacaetuatabiaba picani, bewaxaitsiyajuwënëwi. Itsiata baja, nacawecuapitsapa. Bajaraxuata, yapëtanetsi pepacuene apowaxaitsiyajuwënëwi.b Itsa peneta waxaitsiyajuwënëwi tsipae, waxaitsituatuajëta tsitecaeya najinawanapaejitsipa. Bajarapamonae wajanacawecuapitsapaejawata, daxitajiwi yapëtane, wajanajuacaetuatsiwi-ata, caejumexaniataejamatabëcuene apowajanajuaxainaejawa.
20 Bajaraxuata, Cristo baja pacarajuta Espíritu Santo, Ponë pejamatabëcueneta daxita paxamë payapëtaneme xua pexaniajailiwaisi, Dioso pejumeliwaisi, panenayajiwiyapëtaenexanua xua penajumetsënëtsiliwaisi.
21 Apopacatoyaquinaetsi mapabaxutoje apopaneyapëtaexae xua pexaniajailiwaisi. Biji rajane, pacatoyaquinatsi, tsipaji baja, payapëtaneme pexaniajailiwaisicuene Jesús peliwaisi. Payapëtanemenua baja Jesús peliwaisijawawerena acuenebi pepitsapaejawa penajumetsënëtsiliwaisi.
22 ¿De peneta jane jumaitsi penajumetsënëtsijiwi? Pajiwi jumaitsi mapacueniaje: «Jesús raja apoCristo, ponë Dioso athëbëwetsica itorobijitsiatsica, wajanacacapanepaenexa», jai, bajarapajiwi jane baja peneta penajumetsënëtsijiwi. Pajiwi cuene-aeba Dioso, Cristo paxacuene, cuene-aebanua Cristo, Dioso pexënatocuene, bajarapajiwi peneta Cristo cuene-itoya.
23 Pajiwi cuene-aeba Jesús, Dioso pexënatocuene, bajarapajiwi Dioso apoyajawaponaponaetsi. Pajiwi pijinia jumexaniatane Jesús, Dioso pexënatocuene, bajarajane pajiwi Dioso yajawaponaponatsi.
24 Bajarapaliwaisi pajumexaniataneme cajena, a̱jena̱ Jesucristojawabelia panesiwanajamatabëcuenecopabijawaweliacujinae. ¡Bajaraxuata, bajarapaliwaisi panewajënaeyabelia tsiteca pacajinawanapare! Bajarapaliwaisi papecatsijamatabë-ecaexae, panewajënaeyabelia payajawajinawanapaename Dioso, pexënato-ata, Cristo.
25 Wajayajawajinawanapaexae bajaraPonëbeje,c Jesucristo najumecapanepaeya nacarajutsiapaeba matacabi apopewerewerecaejawa.
26 Pacatoyaquinatsi mapabaxutoje patacayapëtaeya-exanaenexa panenayajiwitaenexa pamonae jamatabëpacayamaxë-itojoroba penajumetsënëtsiliwaisita, Dioso peliwaisiwecua.
27 Itsiata baitsi jane, paxamë baja Espíritu Santo pacatsijamatabë-eca, Ponë pacarajuta Jesucristo, papecajamatabëcueneyawenonaenexa, papecayamaxë-itojorobiyaniwa. Bajaraxuata, apopanamatawenonaemë baja itsajiwi-ata papecatsipaebinexa, paneyapëtaenexa daxitacuene, tsipaji baja daxita xua Espíritu Santo pacayapëtaeya-exanapona, pexaniajaicuene baja cajena. Penajumetsënëtsicuene baja cajena Espíritu Santo apopacayapëtaeya-exanaponae. ¡Pacuenia Espíritu Santo pacayapëtaeya-exanapona, bajarapacuenia pajumexaniataewanapare panewajënaeyabelia, paneyajawajinawanapaejawa Cristo!
28 Tajamonae, ajamatabëcuenesaëya yajawajinawanapaenatsi Cristo, wajacujunawiyaniwa pamatacabi bajaraPonë patsianica, waja-aurayaniwanua bajaraponëjawabelia.
29 Paxamë payapëtaneme baja Jesucristo pianeconijibinëcuene, pexanabiabixae pexaniacuene. Bajaraxuata, bepayapëtanemenua pamonae peneta pexaniacuene exanawanapa, bajarapamonae Dioso pexi.