Pamonae Dioso pexi, yabara peliwaisi
3
¡Pacanaëjëre waxa Dioso ayaicuenia wajanaca-asiwajawa, pexicueniatsi wajanacataejawa! Xaniajai rabaja. Dioso pexitsi. Mapanacuapijiwije Dioso apopeyapëtaexae, nexata waxaitsi-ata aponacayapëtae Dioso pexicuenetsi.
2 Tajamonae, bitso pataca-asiwawi, aeconoxae rabaja waxaitsi daxitatsi Dioso pexitsi. Apoyapëtaetsi abaxë pacuenia itsamatacabi waxaitsi cuene-itsijitsiatsi. Itsiata, pamatacabi Cristo patsianica, waxaitsi cuene-taenatsi pacuenia cuene-itsi. Nexata jane baja, cuenejëpaenatsi, pacuenia bajaraPonë cuene-itsi.
3 Xaniajai Cristo icatsia patsianica. Bajarapamatacabi, cuenejëpaenatsi bajaraPonë. Nexata, pamonae copia-ewetawanapa pecuenejëpaejawa Cristo, najamatabëcuenecataitawanapa pibisiacuene pexanaeyaniwa, aneconijibia pejinawanapaenexa Dioso pitabarata, pacuenia Cristo cuene-itsi tsaponaponae.
4 Pajiwi exana pibisiacuene, bajarapajiwi apojumecowënëtsi Dioso penajumecopatsiliwaisi Moisés-pijinëta, tsipaji daxita apopejumecowënëtsicuene bajarapaliwaisi, bajaraxua raja pibisiacuene.
5 Payapëtaneme rabaja mapacueneje. Cristo patsica mapanacuayabetsicaje wajanacawecua-ajibia-exanaenexa pibisiacuene waja-exanaeneconimi. Cristo baja cajena caeto-ata pibisiacuene apopexanaenë.
6 Bajaraxuata, pajiwi baja Cristo yajawaponapona, pibisiacuene apo-exanaponaponae. Pajiwi pijinia tsiteca pewajënaeyabelia pibisiacuene exanaponapona, bajarapajiwi apotae baja cajena Cristo. Apoyapëtaenua cajena.
7 ¡Tajamonae, pëtsa panacopatame itsajiwi-ata papecayamaxë-itojorobinexa! Pajiwi exanaponapona pexaniacuene, Dioso pejitsipaecuene, bajarapajiwi Dioso aneconijibia tanetsi, tsipaji najamatabëcuene-itajëta pejamatabëcuenejëpaejawa, pacuenia Cristo jamatabëcuene-itsi.
8 Pajiwi pijinia tsiteca pewajënaeyabelia pibisiacuene exanaponapona, bajarapajiwi dowathi pijajiwitonë tsaponaponae, tsipaji dowathi pibisiacuene pexanaponaponaenë nacua pexanaejawaweliacujinae, mapamatacabijawaberena-ataje. Dowathi pibisiacuene pexanaecujinae, apocopatsi. Tsiteca pewajënaeyabelia pibisiacuene exanaponapona mapanacuataje. Bajarajane xua yabara, Dioso pexënato patsica mapanacuayabetsicaje, piajibia-exanaenexa dowathi penamatacaitorobisaë.
9 Pajiwi baja naexanaa Dioso pexijiwi, Dioso najamatabëcuenerajutatsi pitawajamatabëcuene. Bajarapajamatabëcuene pexainaexae, bajarapajiwi baja copata pibisiacuene pexanaponaponaejawa, tsipaji baja naexana Dioso pexijiwi.
10 Bajarapacuenia xaniawaetsia yapëtanetsib pajiwi Dioso pexijiwi, pajiwi pijinia dowathi pexijiwi. Yapëtanetsinua pajiwi Dioso apopexijiwi, tsipaji pexaniacuene apo-exanaponaponae. Apo-asiwanua Jesucristojawabelia pesiwanajamatabëcuenecopabiwi.
Pacuenia Jesús pijajiwi namata-enetsia bena-asiwa tsawanapae, yabara peliwaisi
11 Jesucristojawabelia baja cajena panesiwanajamatabëcuenecopabijawaweliacujinae, pajumetaeyabiabame pejumaitsiliwaisi mapacueniaje: «Waxaitsi namata-enetsia bena-asiwatsi tsawanapae», pejailiwaisi.
12 Bajaraxuata, apobecuenejëpaetsi Caín-pijinë, Jesús pijajiwiyajuwënëwi waja-itoyanexa. Caín-pijinë dowathi pijajiwitonëxae, beyaxuaba pejuyapijinëmi. Pacatsipaebianatsi pajamatabëcuene yabara beyaxuaba pejuyapijinë. Caín-pijinë pibisiacuene pexanaponaponaexae, itoya pejuyapijinëmi pexaniacuene pexanaponaponaexae. Nexata, beyaxuaba pejuyapijinëmi.
13 ¡Tajamonae, pëtsa pajamatabëcuenenabenajacame, paxamë-ata itsa paca-itoya pamonae Cristo peliwaisi pejume-aebiwi!
14 Waxaitsi picani bajayata jamatabëcuenetëpawanapatsi Dioso pitabarata. Itsiata, Dioso nacarajuta pitawajamatabëcuene, wajasiwanajamatabëcuenecopatsijawata Cristojawabelia. Yapëtanetsi bajarapajamatabëcuene wajanacarajutsijawa, tsipaji namata-enetsia na-asiwa tsawanapaetsi wajanajuasiwanajamatabëcuenecopabiwi Cristojawabelia. Pajiwi baja apo-asiwa penajuasiwanajamatabëcuenecopabiwi Cristojawabelia, tsiteca jamatabëcuenetëpaponaponac Dioso pitabarata.
15 Pajiwi itoya penajuasiwanajamatabëcuenecopabiwi Cristojawabelia, bajarapajiwi bejiwibenë tsaponaponae Dioso pitabarata. Paxamë rabaja payapëtaneme, jiwibenë baja cajena apotsijamatabëcuene-ecaetsi Dioso pijapitawajamatabëcuene. Nexata, apoxainae tsane matacabi apopewerewerecaejawa.
16 Mapacueniaje yapëtanetsi baja cajena wajanaca-asiwacuene. Wajanaca-asiwaxae, Jesucristo nacopata pebeyaxuabinexatsi waxaitsi wajaneconi yabara. Nexata, bajarapacuenia waxaitsi-ata waja-asiwaxae wajanajuasiwanajamatabëcuenecopabiwi Cristojawabelia, benacopatatsi wajayapijiwinacaewetsinexa pebeyaxuabiyaniwatsi.
17 Paxamë, panecobecowë panexainaewi, xaniawaetsia panena-ewetsinexa, patae-atamë penamatawenonaecuene, panenajuasiwanajamatabëcuenecopabiwi Cristojawabelia, itsiata itsa apopa-itaxutotsoniataemë paneyawenonaenexa, nexata pacato-acuenebi panejumaitsijawa: «Xanë bitso Dioso asiwanë tajamatabë-ëthëtojawawetsina», panejaijawa.
18 Tajamonae, apobejumaitsitsi ëwajajumeta waja-asiwajawa yabara. Biji rajane, benajamatabëcuene-itajëtatsi waja-asiwajawa itsajiwijawabelia, pexaniacuene wajato-exanaejawata. Bajarapacuenia itsa yawenonaenatsi, pepacuene natoyapëtaena waja-asiwacuene.
19 Bajarapacuenia pepacuene natoyapëtaenatsi Dioso pexicuenetsi, asiwaya wajayawenonaejawata wajanajuasiwanajamatabëcuenecopabiwi Cristojawabelia. Natoyapëtaenatsinua Dioso pejitsipaecuenia wajajinawanapaejawa. Nexata, ajunawijibia jinawanapaenatsi bajaraPonë pitabarata.
20 Waxaitsi, apowaja-exanaexae Dioso pejitsipaecuene wajajamatabëcuene nacanajamatabënapitsia-exanaponae-ata, itsiata yapëtanetsi wajanajamatabëxainaejawawecua Dioso bitso ayaijamatabëcuenenë. Peyapëtaenënua daxitacuene.
21 Tajamonae, bitso pataca-asiwawi, wajajamatabëcuene itsa aponacajamatabënapitsia-exanaponaed pibisiacuene waja-exanaejawa yabara, nexata itaxutuajamatejematsi wajawajëtsinexa Diosojawabelia.
22 Yapëtanetsinua Dioso wajanacarajutsijawanexa daxita xua wajëcatsi bajaraPonëjawabelia, tsipaji exanawanapatsi pacuenia naca-itoroba, pacuenejawanënua siwajamatabëcuenebarëya.
23 Marapacueniaje naca-itoroba Dioso: Wajajumexaniataenexa Jesucristo, Dioso pexënatocuene, namata-enetsia wajana-asiwatsawanapaenexanua wajanaca-itorobicuenia.
24 Pajiwi exanaponapona Dioso pitorobicueniatsi, bajarapajiwi Dioso yajawaponaponaena. Dioso-ata pijinia yajawaponaponaenatsi. Yapëtanetsi pepacuene Dioso wajanacayajawaponaponaejawa, tsipaji nacarajuta Espíritu Santo, wajanacatsijamatabëcuene-ecaenexa.e