Pacuenia becueneyapëtanetsi pamonae bepexanialiwaisi itajara pepaebiwi
4
Tajamonae, bitso pataca-asiwawi, ¡xania baja tsane! ¡Pëtsa abaxë caecuenia pajumexaniataneme itsamonae papecatsipaebiliwaisi, pacajumaitsi-ata tsane!: «Espíritu Santo neyapëtaeya-exana mapaliwaisije», pacajai-ata tsane. Copiaya abaxë paneyapëtaenexa pajamatabëcuene-ëjëbianame bajarapaliwaisi, itsa xaniajai Espíritu Santo peyapëtaeya-exanaeliwaisitsi. Bajarapacuenia pa-exanaename, tsipaji raja daxitajawa mapanacuajawaje yacaëjëpa pamonae bepexaniajailiwaisi itajara pepaebiwi.
2 Paxamë pacueneyapëtaename mapacueniaje: pamonae paeba Espíritu Santo peyapëtaeya-exanaecueniatsi. Peneta, paeba Jesucristo pepatsijawatsica mapanacuayabetsicaje, penaexanaejawa pacuenia waxaitsi banaexanatsi.
3 Pamonae pijinia itsacuenia paeba Jesucristo pepatsijawatsica yabara, bajarapamonae peneta apopaebi Espíritu Santo peyapëtaeya-exanaecueniatsi. Biji rajane, paeba Cristo pecuene-itoyanëtsi pejamatabëcueneliwaisicuenia. Pawënëliwaisitaneme baja pepatsijawanexa bajaraponë. Bajaraponë abaxë apopatsi-ata, itsiata maparucaeje jinawanapa baja pamonae bepexaniajailiwaisi itajara pepaebiwi, pecanacuenebiwi bajaraponë peliwaisi.
4 Tajamonae, paxamë rabaja Dioso papijajiwimë. Nexata baja, pawecua-ajamatabëcuenesaëmë pamonae bepexaniajailiwaisi itajara pepaebiwi. Nexata, apopacayamaxë-itojorobicapanepae penajumetsënëtsiliwaisita, tsipaji Ponë pacatsijamatabë-eca, bitso piajamatabëcuenesaënë, ponëwecua mapanacuapijiwije jamatabëcuenematacaponabiaba.
5 Pamonae bepexanialiwaisi itajara pepaebiwi, bajarapamonae saya Dioso apopeyapëtaewi. Bajaraxuata, mapanacuapijicuene yabara cuaicuaijai tsabiabi. Nexata, pamonae apopeyapëtaewi Dioso, namuxuna-ewetabiabatsi bajarapaliwaisi.
6 Paxanë, juya Dioso papijajiwinë, pa-apóstolewinë. Pajiwi panenamuxuna-ewetabiaba patatsipaebiliwaisi, bajarapajiwi yapëtane Dioso. Pajiwi pijinia apopanenamuxuna-ewetabiabi, bajarapajiwi apoyapëtae Dioso.
Nexata, cueneyapëtanetsi pajiwi paeba Espíritu Santo peyapëtaeya-exanaecueniatsi,a tsipaji xaniajaiya cujarubabiaba Jesucristo yabara. Cueneyapëtanetsinua pajiwi paeba mapanacuapijiwi pejamatabëcuenematacaponaenë peyapëtaeya-exanaecueniatsi,b tsipaji cujarubabiaba ëmapanacuapijicuene yabara, penajumetsënëtsiliwaisinua Jesucristo yabara.
Namata-enetsia wajana-asiwatsawanapaejawata, najamatabëcuene-itajëtatsi Dioso pijajiwicuenetsi
7 Tajamonae, bitso pataca-asiwawi, waxaitsi namata-enetsia na-asiwa tsawanapae tsanetsi, tsipaji Dioso nacajamatabëcuenecaëjëpaeya-exana wajana-asiwanexa. Pajiwi, Dioso pexijiwi, peneta asiwa penajuasiwanajamatabëcuenecopabiwi Cristojawabelia. Yapëtanenua Dioso.
8 Pajiwi apo-asiwa itsamonae-ata, bajarapajiwi apoyapëtae Dioso, tsipaji baja cajena Dioso bitso asiwa daxitajiwi.
9 Dioso nacatsitanajamatabëcuene-itajëta bitso wajanaca-asiwajawa waxaitsi, mapanacuapijiwitsi, wajanacato-itorobijawatatsica pepocaenë pexënato mapanacuayabetsicaje, wajanacasiwatëpaenexa, wajaxainaenexa matacabi apopewerewerecaejawa.
10 Bajarapacuenia Dioso wajanacato-exanaejawata, nacuene-itajëta pacuenia namata-enetsia bena-asiwa tsawanapaetsi. Namata-enetsia apona-asiwatsi, copiaya waja-asiwaxae Dioso. Biji rajane, bajarapacuenia na-asiwatsi, tsipaji baja, Dioso copiaya naca-asiwa. Wajanaca-asiwajamatabëcuene, bajaraPonë nacato-itorobica pexënato, cruzata wajanacasiwatëpaenexa, wajanacawecua-ajibia-exanaenexa daxita pibisiacuene waja-exanaeneconimi.
11 Tajamonae, bitso pataca-asiwawi, bajarapacuenia Dioso bitso wajanaca-asiwaxae, waxaitsi-ata namata-enetsia bena-asiwatsi tsawanapae.
12 Caejiwi-ata cajena Dioso apotae. Itsiata, yapëtanetsi Dioso wajanacatsijamatabë-ecaejawa, namata-enetsia wajana-asiwajawata. Nexata, itsa jamatabëcuenenaweretaponaenatsi Dioso wajanaca-asiwacuenejawalia, namata-enetsia na-asiwa tsawanapaetsi tsane, pacuenia bajaraPonë naca-asiwa.
13 Mapacuene yabara natoyapëtanetsi wajayajawajinawanapaejawa Dioso, bajaraPonë-ata pijinia wajanacayajawaponaponaejawa. Yapëtanetsi pexaniajaicuene bajaraxua, tsipaji baja Dioso nacarajuta Espíritu Santo.
14 Paxanë, pa-apóstolewinë, pataniji baja cajena, Dioso pexënato. Nexata, pawajunupaebabiabajë itsamonaejawabelia Dioso pexënato pitorobijawatsica mapanacuayabetsicaje, pecapanepaenexa daxita mapanacuapijiwije.
15 Pajiwi nawajunupaeba pejumexaniataejawa Jesús Dioso pexënatocuene, bajarapajiwi Dioso yajawaponapona. Dioso-ata pijinia yajawaponaponatsi.
16 Waxaitsi jamatabëcueneyapëtanetsi Dioso bitso wajanaca-asiwajawa. Orijibia, itaxutuajamatejematsi wajawajënaeyabelia wajanaca-asiwatsaponaejawa. Dioso raja daxitajiwi piasiwanë tsaponaponae. Nexata, pajiwi asiwa itsamonae-ata pacuenia bajaraPonë asiwatsi, bajarapajiwi Dioso yajawaponaponatsi. BajaraPonë pijinia yajawaponapona.
17 Wajayajawajinawanapaejawata Dioso, jamatabëcuenenaweretaponaenatsi, wajana-asiwanexa pacuenia Dioso naca-asiwa. Nexata, pamatacabi Dioso naneconitsia-exanaponaena daxita pibisiacuene pexanaewi, bajarapamatacabi waxaitsi Dioso pitabarata apojunawitsi tsane, tsipaji baja mapanacuataje waxaitsi asiwatsi itsamonae-ata, pacuenia Cristo naca-asiwa.
18 Itsa yapëtanetsi Dioso wajanaca-asiwajawa, apojunawitsi, tsipaji wajanaca-asiwaxae, nacawecua-ajibia-exana wajacujunawijawami wajanacananeconitsia-exanaejawaminexa. Pajiwi cujunawa Dioso, tsipaji abaxë copia-ewetaponapona penaneconitsia-exanaejawanexatsi. Bajarapajiwi Dioso piasiwajawatsi abaxë apojamatabëcuenenaweretsi.
19 Waxaitsi asiwatsi Dioso, tsipaji copiaya naca-asiwa bajaraPonë.
20 Pajiwi jumaitsi-ata mapacueniaje: «Xanë raja Dioso asiwanë», jai-ata, itsiata itsa itoya penajuasiwanajamatabëcuenecopabiwi Cristojawabelia, bajarapajiwi saya penajumetsënëtsijiwi. Baitsi, itsa apo-asiwa itsajiwi-ata, penajuasiwanajamatabëcuenecopabiwi Cristojawabelia, petaejiwi-ata, ¿detsa pacuenia nexata asiwa tsipae Dioso apowajataenë? ¡Ajibi cajena!
21 Waxaitsi biasiwatsi wajanajuasiwanajamatabëcuenecopabiwi Cristojawabelia, tsipaji baja cajena Cristo naca-itoroba mapacueniaje: «Pajiwi asiwa Dioso, bajarapajiwi biasiwanua penajuasiwanajamatabëcuenecopabiwi Cristojawabelia», nacajai.