Waja-itaxutuajamatejemajawata Jesucristo, jamatabëcuene-amoneyabatsi wajanacajamatabëcuene-ëjëbijawanë mapanacuataje
5
Pajiwi Jesús jumexaniatane Cristocuene,a bajarapajiwi Dioso pexijiwi exanatsi. Bajarapacuenia pijinia, pajiwi asiwa paxa Dioso, yajawa-asiwanua pamonae pexi.
2 Mapacueniaje yapëtanetsi pepacuene waja-asiwajawa pamonae Dioso pexi. Itsa asiwatsi Dioso, exanawanapatsinua wajanaca-itorobicuenia.
3 Wajanajamatabëcuene-itajëtawanapaenexa waja-asiwajawa Dioso, be-exanawanapatsi wajanaca-itorobicuenia. Xua naca-itorobapona wajato-exanaenexa, aponacatsita-ayapëbeje,
4 tsipaji baja pexitsi wajanaca-exanaexae, nacajamatabëcuenecaëjëpaeya-exanapona wajajamatabëcuene-amoneyabinexa mapanacuapijicuenejawanë.b Nexata, waja-itaxutuajamatejemajamatabëcuene waxa Dioso, jamatabëcuene-amoneyabatsi daxita wajanacajamatabëcuene-ëjëbijawanë mapanacuataje.
5 Pajiwi jumexaniatane Jesús, Dioso pexënatocuene, bajarapajiwi caëjëpatsi pejamatabëcuene-amoneyabinexa mapanacuapijicuenejawanë.
Pacuenejawanë cuene-itajëtatsi Jesús, Dioso pexënatocuene
6 Jesucristo itsa patsica mapanacuayabetsicaje, yapëtanetsi pepacuene Dioso pexënatocuene, tsipaji bautizabatsi merata. Bajaraxuacujinae janacayajatatsi pebeyaxuabijawatatsi cruzata. Bajaraxua yapëtanetsi apo-ëmera pejamatabëcueneta. Biji rajane, pejana pejamatabëcuenetanua. Orijibia, Espíritu Santo, Ponë pexaniajailiwaisi pepaebabiabinë, nacayapëtaeya-exana pexaniajaicuene bajaraxua yabara.
7 Orijibia, athëbëtatsia itsamonae jinawanapa, acueyabi ponëbeje, pewajunupaebiwinexa Jesucristo, Dioso pexënatocuene. Mapamonaeje: Dioso, Jesucristo, Espíritu Santo-ata. Bajarapa-acueyabi ponëbeje, penajamatabëcuenejëpaewi, caenë rabaja picani tsaponaponae.
8 Mapanacuata-ataje acueyabi xuabeje pejamatabëcueneta yapëtanetsi Jesucristo, pepacuene Dioso pexënatocuene. Maraxuanëje: Espíritu Santo, mera, pejana-ata. Bajarapa-acueyabi xuabeje, caejamatabëcueneliwaisi xaina wajanacayapëtaeya-exanaenexa, Jesucristo, pepacuene Dioso pexënatocuene.
9 Mapanacuapijiwije liwaisi itsa nacatsipaebabiaba jumexaniataeyabiabatsi. Biji rajane, matatoxenetsia bejumexaniatanetsi Dioso wajanacatsipaebiliwaisi, tsipaji bitso pejumeliwaisinamatamotsinë mapanacuapijiwiwecua. Bajaraxuata, bejumexaniatanetsi xua bajaraPonë nacayapëtaeya-exana pexënato yabara.
10 Pajiwi siwanajamatabëcuenecopata Dioso pexënatojawabelia, bajarapajiwi pejamatabë-ëthëtota yapëtane pepacuene Jesús, Dioso pexënatocuene. Pajiwi apojumexaniatae Jesús, Dioso pexënatocuene, bajarapajiwi bepenajumetsënëtsinë tane Dioso, apopejumexaniataexae xua bajaraPonë yapëtaeya-exanatsi pexënato yabara.
11 Bajarapaliwaisita Dioso nacayapëtaeya-exana pexënato yabara, wajanacarajutsijawanua matacabi apopewerewerecaejawa. Nacayapëtaeya-exananua, pexënato Jesús pejamatabëcueneta, wajaxainaejawa bajaraxua.
12 Nexata, pajiwi tsijamatabë-ecatsi Dioso pexënato, bajarapajiwi baja xaina pitawajamatabëcuene. Pajiwi pijinia apotsijamatabë-ecaetsi Dioso pexënato, bajarapajiwi apoxainae pitawajamatabëcuene.
Juan pecopiarucaeliwaisi pemuxujiobijawa
13 Pacatoyaquinatsi mapaliwaisije, paxamë, panejumexaniataewi Jesús, Dioso pexënatocuene, paneyapëtaenexa panexainaejawa matacabi apopewerewerecaejawa.
14 Itaxutuajamatejamatsi Dioso, tsipaji yapëtanetsi wajanacajumetaejawa wajawajëtsijawa bajaraPonëjawabelia, xua wajëtatsi wajanacato-exanaenexa pejitsipaecuenia.
15 Nexata, itsa yapëtanetsi wajanacajumetaejawa, yapëtanetsinua wajanacarajutsijawanexa xua wajëtatsi.
16 Paxamë itsa pacuenetaneme itsajiwi pibisiacuene pexanabiabijawa, panenajuajumexaniataewi Jesús peliwaisi, paneconi yabarac apopetëpaejawanexa,d patowajëtsianame Diosojawabelia, pejamatabëcueneyawenonaenexatsi. Nexata, Dioso tocopatsianatsi piasaëtsaponaponaenexa. ¡Itsiata, itsa pacuenetaneme pexanaponaponaejawa paneconi yabara petëpaejawanexa, pëtsa patowajëtame Diosojawabelia! Bajarapitsineconi yabara apopaca-itorobitsi panetowajëtsinexa Diosojawabelia.
17 Daxitacuene xua piabejecuenejawanë jiwi exana, bajaraxua cajena pibisiacuene. Itsiata baitsi jane, bajarapapibisiacuene xua jiwi exana, bajarapaneconi yabara Dioso apopewecuanaxuabijawanexa.
18 Yapëtanetsi baja cajena mapacueneje: Pajiwi Dioso pexijiwi exanatsi, pibisiacuene apo-exanaponaponae. Bajarapajiwi Dioso pexënato, Jesucristo, cuenecaranatatsi. Nexata, dowathi apocuenecaëjëpaetsi pitsacueniabinexatsi.
19 Waxaitsi yapëtanetsi baja Dioso pexicuenetsi. Yapëtanetsinua dowathi pejamatabëcuenenamatacaitorobijawa daxita mapanacuapijiwije.
20 Pematatsënëa, yapëtanetsinua Dioso pexënato, Jesucristo, athëbëwetsica pepatsijawatsica. Nacarajutanua wajayapëtaejamatabëcuenenexa pepoDioso. Nexata baja, yajawajinawanapatsi Dioso, pexënato, Jesucristo-ata. PaDioso yajawajinawanapatsi, pepoDioso cajena, wajanacarajutsinë matacabi apopewerewerecaejawa.
21 ¡Tajamonae, betaxicuenia patacataewi, panayajiwinatsare pamonae Diosowecua siwanajamatabëcuenecopababiaba itsacuenejawanëjawabelia, bajarapamonae panejamatabëcuenejëpaeyaniwa!