Judas
Judas petoyaquinaebaxuto Jesús peliwaisi pejumexaniataewijawabelia
Pebajacobiliwaisi
1
Xanë Judasnë, Jesucristo pijajiwitonënë, Santiago pejuyapijinënë. Pacatoyaquinatsi mapabaxutoje paxamë waxa Dioso papeca-asiwawi, papecajunatsiwi papijajiwinexamë, Jesucristo papeca-ewetsiwinua.
2 Pacatojitsipatsi Dioso bitso papeca-itaxutotsoniataejawa, nabarajamatabëcuenexanepanaeya panenajuajinawanapaejawa, namata-enetsia-ata panena-asiwajawa.
Judas muxujioba Jesús pijajiwi, pejumexaniataeyaniwa bepexaniajailiwaisi itajara pepaebiwi
(2 Pe 2:1-7)
3 Tajamonae, bitso pataca-asiwawi, jitsipajë picani bitso patacatoyaquinaejawa matawëjëa Dioso wajanacacapanepaeliwaisi yabara, paliwaisi daxitatsi najuajumexaniatanetsi. Itsiata, bajaraxua yabara apopacatoyaquinae tsanetsi mapabaxutotaje, tsipaji wënëliwaisitaniji paxamëtuatuajëta pejinawanapaejawa itsamonae bepexaniajailiwaisi itajara pepaebiwi. Bajaraxuata, pacatoyaquinatsi asaëyata patacamuxujiobicuenia, panecuenecopatsiyaniwa bajarapamonae. ¡Nexata, baja, pëtsa pacuenecopatame itsajiwi-ata pebijianaejawa papexaniajailiwaisi apóstolewi pacatsipaeba, Jesús peliwaisi yabara! Bajarapapexaniajailiwaisi Dioso tonajumecopata, daxita pijajiwinexa
4 Bajarapacuenia pacamuxujiobatsi, tsipaji paxamëtuatuajëta najoneyabiaba nacuenematayatsia bepexaniajailiwaisi itajara pepaebiwi. Nexata, bajarapamonae papecacujarubijawata, pacajumaitsi tsabiabi: «Dioso baja cajena ayaicuenia wajanaca-itaxutotsoniataexae, Jesucristo pejamatabëcueneta, nexata pibisiacuene exanae-atatsi, apo-itsacuene. Tsiteca nacacapanepaena», pacajai tsabiabi, pibisiacuene pane-exanabiabinexa panasiwabëjamënejewa. Bajarapacuenia pejinawanapaexae, bajarapamonae najamatabëcuene-itajëta pejume-aebijawa caenë Jesucristo wajatuxanenëcuene, wajanacaxainaenëcuene-ata. Bajarapamonae yabara, Dioso tajëwelia pejumeliwaisibaxutota, tocaëjëtatsi penaneconitsia-exanaejawanexatsi.
5 Paxamë payapëtae-atamë picani mapaliwaisije, itsiata, orijibia pacanajamatabënapitsia-exanaenatsi icatsia. Bajayata, daxita Israel-pijinë pemomoxi petuxanenë Dioso capanepae-atatsia Egipto nacuawecua, bajarapamonaemi yajuwënëwerebiabatsi, pejume-aebixaeb xua Dioso jumaitsitsi.
6 Bajara-icatsia pacuenia Dioso exana ángelewijawabelia-ata. Dioso exanae-ata petonacuenebawanapaenexatsi athëbëtatsia, itsamonae ángelewiyajuwënëwi apo-exanae pacuenia Dioso itorobatsi. Apojinawanapaenua itsajota picani Dioso tocopata pejinawanapaenexa. Bajaraxuata, Dioso ángelewiyajuwënëwi cëbiaya jinawanapaeya-exana pitaquirinacuata, pecopia-ewetawanapaenexa Dioso penaneconitsia-exanaejawanexatsi, pamatacabi naneconitsia-exanaejitsia daxita pijaneconi pexainaewi.
7 Bajarapacuenia pijinia Dioso exana Sodoma tomara, Gomorra tomarapijiwimibejejawabelia, pemuxuneneta penaetomaranëpijiwimijawabelia-ata. Bajarapamonaemi bitso pibisiacuene pewitota exanabiaba. Orijibia, pibisiacuene pewitota exanabiaba nacaewënapebijiwijawabelia, nacaewënapetiriawijawabelia-ata. Bajaraxuata, Dioso werebiaba bajarapamonaemi isotota. Bajarapacuenia Dioso pewerebiabixae bajarapamonaemi, nacayapëtaeya-exana, mapamatacabita wajajinawanapaewije, pibisiacuene waja-exanaeyaniwa, wajanacayajawananeconitsia-exanaeyaniwa pibisiacuene pexanaewi apopewerewerecae-isotojawabelia.
8 Bajarapacuenia pijinia, Dioso exanaena bepexaniajailiwaisi itajara pepaebiwijawabelia. Bajarapamonae pejumenamatamotsinexa papecatsipaebiliwaisi, pacajumaitsi tsabiabi: «Dioso raja bemajitsinaebocuenia neyapëtaeya-exana mapaliwaisije», pacajai tsabiabi. Bajarapacuenia jumaitsitsabiabi-ata, pacajamatabëcuenematacapona pibisiacuene pane-exanabiabinexa, tsipaji apojitsipae caeto-ata pejumecowënëtsijawa wajatuxanenë pitorobicueniatsi. Orijibia, pibisiacuenia wënëcacuaicuaijai Dioso pija-ángelewi-ata, be-ayaijamatabëcuenewi penataexae bajarapamonaewecua.
9 Bajarapacuenia apo-exanae, ángelnë Miguel, ángelewi penamatacaitorobinë-ata. Nexata, bajayata pacujinae Moisés-pijinë petëpanucaenë,c ángelnë Miguel, dowathibeje najumenotabeje Moisés-pijinëmi peperabëto pepitsijawad yabara. Miguel, bitso ayaijamatabëcuenenë-ata, itsiata, pijacuata pibisiacuenia apobijatae dowathi. Biji rajane, xaniawaetsia jumaitsi dowathijawabelia: «Dioso ca-itaweta, bajarapacuenia ne-exanaeyaniwa», jai.
10 Itsiata baitsi jane, pamonae penajumetsënëtsiliwaisi pacatsipaebawanapa, bajarapamonae pibisiacuenia baracuaicuaijai tsabiabi, xaniawaetsia apopeyapëtaecuene-ata yabara. Nexata, pacuenia unupijidujuai natsiwajënaecanaëjëtsinejewa jinawanapa pejitsipaecuenia, bajarapijinia bepexanialiwaisi itajara pecujarubiwi najamatabëcuenecataitsinejewa exanawanapa daxita pibisiacuene. Nexata, Dioso itsamatacabi werebiabiana bajarapamonae, bajarapapibisiacuene pexanawanapaexae.
11 Bitso bejiobi tsane pamonae bepexaniajailiwaisi itajara papecatsipaebawanapaewi. Bajarapamonae Dioso naneconitsia-exanaena, tsipaji Caín-pijinë cuenejëpa, pibisiacuene pexanawanapaenexa najamatabëcuenecataitsinejewa. Cuenejëpanua Balaam-pijinë, ponë apojumecowënëtsi pacuenia Dioso itorobatsi, palata pepitsinexa. Cuenejëpa Corépijinë-ata, ponë apoyaiyatae Moisés-pijinë, Dioso pitapetsinëtsi penamatacaitorobinënexa. Nexata, pacuenia Corépijinëe Dioso werebiabatsi pejamatabëcueneyanabiwitsi yajawa, bajarapacuenia pijinia, Dioso werebiabiana bepexaniajailiwaisi itajara papecatsipaebawanapaewi, pecuenejëpaexae bajarapamonaemi.
12 Bajaraxuata, bepexaniajailiwaisi itajara pepaebiwi paneyajawanacaetuatsixae, paepatota panacaetuatabiabame nacaemonaecuenia panenajuaxaenexa,f bajarapamonae pacatobijiana namata-enetsia panena-asiwajawamë. Aurajibia ayaijawa xaeyabiaba, apaeyabiabanua piapaeranë, siwabëjainejewa itsamonae-ata penaxaenexa. Bajarapamonae natae-ata papeca-ewetsiwicuenia, itsiata, ëpamonae nasiwanajamatabëxainabiaba. Nexata, cuenejëpa bijiaya pewetsiwi pija-ovejabitsaëto. Cuenejëpanua itarërëbo, pecaputsijawa jowibota petsewimatacabita, ema runaenejewa, tsipaji apopacajamatabëcueneyawenonae itsacuenejawayonexa-ata. Cuenejëpanua ponae pe-ubinae, aponacuaitabiabi, penacuaitsimatacabita. Apoxanepanae itsacuenejawayonexa-ata. Bajaraponae nexata pe-ubinë yatabutopaya juta petajuitsinexa isotojawabelia. Bajarapacuenia pijinia, Dioso xuabianatsi apopewerewerecae-isotojawabeliag bepexaniajailiwaisi itajara papecatsipaebawanapaewi, apopecapitsapaexae jiwi pejamatabëcueneyawenonaeliwaisianë, Dioso pejitsipaecuenia pejinawanapaenexa.
13 Pacuenia malataca capitsapabiaba piaxuirathamujawanë pitapayabelia, bajarasaya jamatabëcuene-itsi tsawanapae bajarapamonae. Capitsapabiaba pia-uracuenejawanë, pejamatabëcuenebijianabiabinexa itsamonae Jesús pijajiwi, pepaebijawata. Pacuenia japito cae-epatoyo ayaicotia yajawa najetabijirawa athëbëyo, xuacujinae acotiajibi, bajarapacuenia pijinia bajarapamonae cae-epatoyonexa ayaijamatabëcuenewi natane. Xuacujinae, Dioso xuabianatsi pitaquirinacuajawabereca,h pejinawanapaenexa daxitamatacabijawabelia. Pacuenia japito xaniawaetsia apomatacaponae namuto pexanaewi itsabelia jamatabëpona, bajarapacuenia bajarapamonae peliwaisita apojamatabëcuenematacaponae Jesús pijajiwi, pexanaenexa Dioso pejitsipaecuene.
14 Enoc-pijinëi bajayata ponapona. Adán-pijinë pemomoxiyajuwënënë, sietebitsaëtojawatarena penaexanaenë. Nexata, Enoc-pijinë Dioso pejamatabëcueneta bajayata tajëwelia wajunupaeba xua Dioso exanaejitsia, pamonaejawabelia aeconoxae mapamatacabitaje penajumetsënëtsiliwaisi pacatsipaebawanapa Dioso pewënëta. Bajarapamonae yabara tajëwelia wajunupaeba mapacueniaje: «Wajatuxanenë Cristo, pijajiwi ángelewi, ayaibitsaëtoxaneto yajawa, najetarucaena.
15 Nexata, tocanaëjëtsiana penaneconitsia-exanaenexa daxita pamonae apo-exanae Dioso pitorobicueniatsi. Tocaëjëtsiananua penaneconitsia-exanaejawanexa daxita pamonae pepopiabejecuene pexanaewi, pamonaenua pibisiacuenia baracuaicuaijai Dioso», jai baja cajena bajayata tajëwelia Enoc-pijinë.
16 Bajarapamonae, bepexaniajailiwaisi itajara pepaebiwi aposiwajamatabëcuenebarëya itsacuenejawayo-ata. Nexata, pibisiacuenia cuenecarapuababiaba itsamonae. Pibisiacuenia baracuaicuaijai tsabiabi daxita xua bajarapamonae tocopiapataponatsi. Nexata, bajarapamonae exanawanapa saya pijacuata penatojitsipaecuenia. Ayaijamatabëcuenewi nataeya nawajunupaebabiaba xua exana. Itsamonaejawabelia pexaniacuenia cuaicuaijai tsabiabi, saya pesiwajamatabëcuenebarëyanexatsi, juya perajutsinexatsi penamatawenonaejawanë.
Pemuxujiobiliwaisi pewajënaeyabelia piajamatabëcuenesaëtsawanapaenexa
17 ¡Tajamonae, bitso pataca-asiwawi, panajamatabënapire paliwaisi baja cajena tajëwelia pacatsipaeba apóstolewi, wajatuxanenë Jesucristo pijajiwi, bepexaniajailiwaisi itajara pepaebiwi yabara!
18 Pacajumaitsi mapacueniaje: «Nacua pecopiarucaewajënaeyata, itsamonae capo̱capo̱naena pexaniajailiwaisi, Dioso pejumeliwaisi. Exanawanapaenanua pibisiacuene, pacuenia pijacuata natojitsipa», pacajai baja cajena tajëwelia apóstolewi.
19 Bajarapamonae cajena papecatsipaebiliwaisi pejamatabëcuene, pacanatsanaeya-exanapona,j paxamë Jesús papijajiwimë. Bajarapamonae pibisiacuene exanawanapa penatojitsipaecuenia, pejamatabëcueneta pitorobicueniatsi. Orijibia, bajarapamonae apotsijamatabë-ecaetsi Espíritu Santo.k
20 Tajamonae bitso pataca-asiwawi, bajarapamonae papecayamaxë-itojorobiyaniwa, namata-enetsia panajamatabëcuene-asaëya-exanaename pane-itaxutuajamatejemajawa Dioso. Bitso pexaniacuene cajena waja-itaxutuajamatejemajawa Dioso. Espíritu Santo papecajamatabëcuenenamatacaitorobicuenia pawajëcaponaename Diosojawabelia.
21 ¡Paneyapëtaexae Dioso bitso papeca-asiwajawa, na-asiwaya pajinawanapare! Pacopia-ewetawanaparenua matacabi apopewerewerecaejawa papecarajutsinexa, wajatuxanenë Jesucristo papeca-itaxutotsoniataexae.
22 ¡Pamonae abaxë apoyapëtae paliwaisi jumexaniataejitsia pexaniajailiwaisicuenia, asiwaya payawenonare pejumexaniataenexa Dioso pejumeliwaisi!
23 ¡Pamonae pijinia jamatabëjumexaniatane penajumetsënëtsiliwaisi, pacuenenajematsinejewamë pacapaneparel penaneconitsiyaniwa Diosojawabelia, pacuenia pacapanepaejitsipame itsajiwi pejopaejiwiminexa isotojawabelia! Itsamonae pijinia bitso pibisiacuene exanawanapa, penajumetsënëtsiliwaisi pejumexaniataexae. ¡Bajarapamonae-ata pa-itaxutotsoniataema, pacuenia Jesús paca-itaxutotsoniatane, asiwaya paneyawenonaenexa bajarapapibisiacuene pecopatsinexa! Itsiata baitsi jane, xania! ¡Panayajiwitaema! ¡Bajarapapibisiacuene pa-itoyamëre! ¡Pëtsa paxamë-ata bajarapamonaeta pibisiacuene pana-exaname!
Judas pexaniacuenia wënëxaniata Dioso, penapëjiobijawata
24 Bitso pexaniacuenia wënëxaniatsianatsi Dioso, tsipaji caenë Dioso cuenecaëjëpatsi papeca-ewetsinexa pibisiacuene pane-exanaeyaniwa, aneconijibianua papecanubenaeya-exanaenexa bajaraPonë pitabarata. Bajarapamatacabi bitso pabarëyamë tsane, Dioso pijapeniweniwenaecotiata panenubenaejawata.
25 Bitso nacatoxanepana, daxita wajajamatabë-ëthëtojawawetsina wajawënëxaniatsijawa Dioso, tsipaji bajaraponë pepocaenë Dioso, wajanacacapanepaenënua, wajatuxanenë Jesucristo cruzata wajanacasiwatëpaexae wajaneconi yabara. Bajaraxuata, daxitajiwi bewajunupaebapona itsamonaejawabelia pacuenia Dioso bitso ayaijamatabëcuene pexainaenë, penamatacaitorobisaë pexainaenë, pecuenesaë pexainaenë-ata. Bajarapacuenia Dioso jamatabëcuene-itsi tsaponaponae mapanacuaje pexanaewajënaeya, mapamatacabi-ataje, daxitamatacabijawabelianexa-ata. Bajara-itsi tsane.