3 Juan
Mapabaxutoje, acueyabibaxuto, apóstolnë Juan toyaquina Jesús peliwaisi pejumexaniataewijawabelia
Pebajacobiliwaisi
1
Xanë Juan, ancianonënë, catoyaquinatsi mapabaxutoje, Gayo, bitso taca-asiwanë, nejumexaniataejamatabëcuene pexaniajailiwaisi.
2 Catowajëtabiabatsi Diosojawabelia, pecayawenonaenexa, daxitacuenejawanë pecatoxanepanaenexa, jumalixanepanaeya neponaponaenexanua, pacuenia Dioso pitabarata jamatabëcuenexanepanaeya ponaponame.
3 Bitso siwajamatabëcuenebarëyanë itsa parena xanëjawaberena itsamonae wajanajuasiwanajamatabëcuenecopabiwi Cristojawabelia, tsipaji cawënëliwaisipaeba xaniawaetsia neponaponaejawa. Netsipaebanua xaniawaetsia asaëya nejumexaniataeponaponaejawa pexaniajailiwaisi.
4 Ajibi pematatsënëa itsaliwaisi tanejamatabëcuenebarëyaya-exanaejawanexa, tawënëtaejawa pexaniajailiwaisicuenia pejinawanapaejawa pamonae betaxicuenia tataewi.
Pacuenia be-eweta Dioso pijacuene petonacuenebaponaponaenë
5 Xamë xaniawaetsia Dioso tonacuenebabiabame, neyawenonabiabijawata Jesús pijajiwi, Dioso pijacuene petonacuenebiwi. Bajarapamonae saicayanacuawerena pepatsiwi-ata, yawenoname xaniawaetsia.
6 Bajarapamonae itsa parena xanëjawaberena, daxita majotaje Jesús pijajiwi pitabarata, cawënëliwaisipaeba bajarajotalia asiwaya neyawenonaejawa. Pexaniacuenia cawajëtatsi, newajënaeyabelia tsiteca neyawenonaenexa bajarapitsiwi, pacuenia namatawenona pijanamutonexa. Yawenonaename pacuenia, Dioso siwajamatabëcuenebarëya.
7 Bajarapamonae itsa naropoba Jesucristo pewënëta pepaebanajetarubenaenexa pexaniajailiwaisi, apowecuapitsi itsacuenejawayo pijanamutonexa, pamonae Jesucristojawabelia aposiwanajamatabëcuenecopabi pecobecowëjawa.
8 Bajaraxuata waxaitsi, Jesucristojawabelia wajasiwanajamatabëcuenecopabiwi, nacatoxanepana wajayawenonaejawa bajarapamonae. Bajarapacuenia itsa exanaenatsi, Dioso nacatane bajarapamonaeta, pijacuene bewajatonanacuenebiwi.
Pacuenia Diótrefes pibisiacuene exana, yabara peliwaisi
9 Xanë picani bajayata copiaya toyaquinajë Jesús pijajiwi, nijatomarata pejinawanapaewi. Itsiata, bajarapabaxutota ta-itorobicuenia Diótrefes apojumecowënëtsi, tanecuene-aebixae Jesucristo tane-itorobinëcuene. Bajaraponë ayaijamatabëcuenenë jamatabënaexana papecanamatacaitorobinënexa.
10 Bajaraxuata, itsa patsianajë xamëjawata, xaniawaetsia pacatsipaebianatsi daxita pacuenia Diótrefes exana. Bajaraponë pibisiacuenia nebaracuaicuaijai. Neyabaranajumetsënëtanua. Pematatsënëa, mapitsipibisiacuenejawanë exanabiabaje. Apocopiapitabiabi xaniawaetsia pamonae Jesucristo peliwaisi paebanajetarubena. Cuene-itawetanua itsamonae pecopiapitsiyaniwa. Nexata, pajiwi copiapitabiaba Jesucristo peliwaisi pepaebanajetarubenaewi, Diótrefes bajarapajiwi capitsapabiaba, Jesús pijajiwi peyajawanacaetuatabiabijawawecua, apopejumecowënëtsixaetsi pitawetsiliwaisi.
11 ¡Gayo, bitso taca-asiwanë, pëtsa cuenejëpame pibisiajamatabëcuene pexainaewi pexanawanapaecuene! ¡Exanaponaponare jane pacuenia pexaniacuene pexanaewi ba-exanawanapa! Pajiwi pexaniacuene exanaponapona, peneta Dioso pexijiwi. Pajiwi pijinia pibisiacuene exanaponapona, apopeyapëtaejiwi Dioso.
Pacuenia Demetrio pexaniacuene exana, yabara peliwaisi
12 Daxita pecueneyapëtaewi Demetrio, pexaniacuenia wënëliwaisipaebapona pexanaponaponaejawa yabara. Pecuenejawata daxita jiwi yapëtane pexaniajaijawa xua wënëliwaisitane bajaraponë yabara. Paxanë-ataa baja cajena payapëtaniji Demetrio pexaniacuene pexanaponaponaejawa. Nexata, daxitajawa bajaraponë pawënëliwaisipaebaponajë. Paxamë-ata payapëtaneme pexaniajaicuenia patawajunupaebijawa.
Apóstolnë Juan penapëjiobiliwaisi
13 Gayo, xanë picani xainajë ayailiwaisi tacamuxujiobinexa. Itsiata, abaxë apojitsipaenë bajarapaliwaisi tacatoyaquinaenexa mapabaxutotaje.
14 Jamatabëcatanetsi bepijia. Nexata bajarapamatacabita jane baja, tajacuata cabarëcuaicuaijaitsi tsane bajaraxuanë yabara.
15 Catowajëtatsi Diosojawabelia pecayawenonaenexa, jamatabëcuenexanepanaeya neponaponaenexa. Daxita pecayapëtaewi, majotaje pejinawanapaewi, cabajacobalia. Nebajacobiana caejiwi canacujitsia, daxita wajayapëtaewibeje.