Apocalipsis
Apóstolnë Juan peyaquinaeliwaisi, Jesús tajëwelia peyapëtaeya-exanaeliwaisitsi, pacuenia Dioso tsitajëtatsi xuanë itsamatacabi copiapataponaejitsia mapanacuataje
Paliwaisi Jesucristo yapëtaeya-exana Juan-jawabelia
1
Mapaliwaisije Dioso tsitajëtaa tajëwelia Jesucristojawabelia, peyapëtaeya-exanaenexa pijajiwijawabelia, xuanë bepijiayo copiapatsiana. Nexata, Jesús itorobica ángelnë, xanë, Juan-nëjawabetsica, pijajiwitonënë, tanetsitajëtsinexa, taneyapëtaeya-exanaenexanua, pajamatabëcueneliwaisi xaina bajaraxuanë.
2 Nexata, paliwaisi neyapëtaeya-exana ángelnë, xanë juya pacayapëtaeya-exanatsi, daxita xuanë taniji, pacuenia jumetanijinua. Nexata mapabaxutotaje pacatoyaquinatsi Dioso peliwaisi, Jesucristo-ata peliwaisi.
3 Pajiwi lebiana, natojumetaena, mapabaxutojawataje perubenaeliwaisi, orijibia bajarapajiwi itsa jumecowënëtsiana pacuenia itorobatsi, jamatabëcuenebarëya tsaponaponae tsane, tsipaji rabaja imoxoyo pewajënae tsaponae pecopiapatsinexa daxita xuanë liwaisiyaquinajë mapabaxutotaje.
Juan pebajacobiliwaisi toyaquina Jesús pijajiwijawabelia
4 Xanë, Juannë, mapaliwaisi pacatoyaquinatsije paxamë, Jesús papijajiwimë, Asia nacuata panejinawanapaewijawabelia. Patacabajacobijawata, pacayapëtaeya-exanatsi, pacuenia bitso pacatojitsipa Dioso, ponë peponaponaenë ajena pamatacabi, nacua pexanaewajënaeya, daxitamatacabijawabelianexa-ata, papecajamatabëcuenewënëtsinexa papeca-asiwajamatabëcuene, papecabarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa. Bajaraxuanë pacatojitsipatsinua pewënëta siete pa-espíritubeje,b penubenaewi Dioso pe-ecaetrono pitabarata, pewënëta Jesucristo-ata.
5 BajaraPonë raja xaniajaiya petsipaebabiabinë Dioso peliwaisi jiwijawabelia, itsajamatabëcuene xainaenejewa. Ponë beyaxuabi-atatsi, Dioso copiaya asaëya-exanatsi daxita petëpaewiwecua. Ponë pepopeyanacua-ewetsinë, daxita pewetsiwi matatoxenetsia.
Bajaraxuata, pexaniacuenia bewënëxaniatatsi Wajatuxanenë Jesucristo, tsipaji bajaraPonë naca-asiwa. Pejanata nacawecua-ajibia-exananuac daxita pibisiacuene waja-exanaeneconimi, wajanacasiwatëpaejawata.
6 Orijibia, bajaraPonë pijajiwitsi naca-exana, wajanacayanacua-ewetsiwinexa.d Pijasacerdotewitsie naca-exananua, wajatonacuenebiwinexa Dioso, Jesús Paxa. «Xanepana rabaja pecanacopatsijawa Jesús ayaijamatabëcuenenëcuene, daxitacuene pewetsijawanua daxitamatacabijawabelianexa, tocopiarucaenejewatsi», jai tsawanapaetsi tsane Wajatuxanenë yabara. ¡Bajara-itsi tsane!
7 ¡Panenamuxuna-ewere mapaliwaisije! Cristo raja najetarucaena athëbëwetsica itarërëbota. Bajarapamatacabi daxitajiwi taenatsi. Nexata, pamonae yenecacuatatsi, daxita nacuanëpijiwi-ata, pecopiataejawata, nuena pecajunawif pijaneconi yabara. «¡Bajara-itsi tsane!»,g jaitsi barëyaya.
8 Jesús nayabarajumaitsi mapacueniaje: «Xanë rajane baja daxitacuene pepotataxuxuabinë, icatsia tacopiarucaeya-exanaenë-ata»,h nayabarajai Wajatuxanenë Jesús, Ponë daxitawecua Piacuenesaënë,i peponaponaenë ajena mapamatacabitaje, nacua pexanaewajënaeya-ata. Daxitamatacabijawabelianexa-ata tsiteca ponaponaena.
Jesús yacotiaya tsitanaitajëta Juan-jawabelia
9 Xanë, Juannë, panijabananënë, tsipaji najuajumexaniatanetsi Jesús peliwaisi. Bajaraxuata, itsamonae nacanajuabejiobia-exanapona, Dioso pijajiwixaetsi. Jesucristo nacanajuayanacua-eweta, nacanajuayawenonaponanua wajawajënaeyabelia, wajanajuanasaëtsinexa waja-itaxutuajamatejemajawa Diosojawabelia. Xanë, Jesús peliwaisi jiwi tatsipaebaponaponaexae, naneconitsiaponaponajë Patmos-tunaetota.j
10 Nexata, domingota Espíritu Santo netsijamatabëwënëca, pejitsipaecuenia tanejamatabëcuenematacaponaenexa. Nexata, tapënëwerena pecuaicuaijaijawa ayaijume, betrompetajume penajumetsijawa, jumetaniji.
11 Pecuaicuaijainë nejumaitsi mapacueniaje: «Xanë rajane baja daxitacuene pepotataxuxuabinë, icatsia daxitacuene tacopiarucaeya-exanaenënexa-ata. Xua baja taneme, xua-ata icatsia taeponaename, daxita bajaraxuanë baja, peliwaisi yaquinaename. Bajaraxuacujinae, bajarapabaxuto to-itorobianame Jesús pijajiwi, siete patomarapijiwibejejawabeliaje, patomaranë ena Asia nacuata. Mapawënëtomaranëjawabeliaje: Éfeso, Esmirna, Pérgamo, Tiatira, Sardis, Filadelfia, Laodicea tomarapijiwijawabelia-ata», nejai betrompetajume pecuaicuaijainë.
12 Nexata, napënëyorotajë tataenexa ponë tapënëwerena cuaicuaijai. Itsa naëcoliajë, taenubajë siete xuabeje penaitayotsicandelabrojawanë,k oronanitota pexanaejawanë.
13 Bajaraxuanëtuatuajëta taenutajë pebi.l Bajaraponë yabara jamatabëjumaitsinë: «Jesús raeta, Daxitajiwi Pematapijinë»,m jamatabëjanë. Bajaraponë penaxatatsijawa apiareca.n Nacorobëcëtanucao oronanitota pexanaepana.
14 Mataniojai bitso,p pacuenia baniojai papaëputo matatoxenetsia. Pitaxutobeje naitayota,q pacuenia isotocotia bacotia-itsi.
15 Petaxubeje-ata niweniwenabejer pacuenia baniweniwena broncenanitojawa, pe-ojobijawa, isotota pesetsicujinae, pecuaicuaijaijawa najumeta pacuenia banajumeta jõca.
16 Pecujuanenia cobenanuca siete patuluputobeje. Pecuaibowojotuatsina pitsapa anijabarëneniabeje pexiujai-espada. Pacuenia matacabipijijuameto itsa aitawajënae, xaniawaetsia itayota, bajarapacuenia itabaranaitayota.s
17 Itsa taniji bajaraponë, betatëpaenë irataeya bocajunuajë bajaraponë pitabarata. Itsiata baitsi jane, bajaraponë nejayarena pecujuacobeta. Nejumaitsi:
—¡Pëtsa necujunawame! Xanë rajane baja daxitacuene pepotataxuxuabinë, daxitacuene icatsia tacopiarucaeya-exanaenënexa-ata.
18 Xanë rajane baja, pepotasaëtsaponaponaenë daxitamatacabijawabelianexa. Xanë picani tëpajë. Itsiata baitsi jane, tatëpaecujinae icatsia baja asaënë tsaponaponae daxitamatacabijawabelianexa. Xanë rabaja tatocaëjëtsinët jiwi petëpaematacabinexa, ta-ewetsinënua petëpaewi pejinawanapaenacua.
19 »¡Yaquinareu peliwaisi, xua baja taneme, xua aeconoxae taeponaponame, xua-ata icatsia taeponaename pecopiapataponaejawanënexa!
20 Mapajamatabëcueneliwaisi xainaje netaejawanë: «Xuanë, siete patuluputobeje, tacujuanenia cobenanucajë, bajaraxuanë rabaja siete ponëbeje penamatacaitorobiwiv tajajiwi, siete patomarabejepijiwi. Xuanë pijinia siete papitayotsicandelabrobeje, oronanitota pexanaejawanë, bajaraxuanë rabaja pijinia siete pabitsaëtobeje tajajiwi» —nejai Jesús, pitayotsicandelabrojawanëtuatuajëta penucaenë.w