Mapacueniaje Wajatuxanenë Jesús itoroba Juan petoyaquinaenexa Jesús pijajiwi, Éfeso tomarata penamatacaitorobinëjawabelia
2
Jesús icatsia nejumaitsi:
—¡Toyaquinare tajajiwi penamatacaitorobinëjawabelia,a Éfeso tomarata peponaponaenë, pijajiwi yajawa, neyapëtaeya-exanaenexa tacatsipaebicuenia!
«Mapacueniaje Jesús, siete patuluputobeje pecujuanenia pecobenanucaenë, siete papitayotsicandelabrobeje-ata, oronanitota pexanaejawanëtuatuajëta penucaenë, pacajumaitsi:
2 »Yapëtaniji daxita xua pa-exanawanapame. Nexata, yapëtaniji ayaicuenia taxa Dioso panetonacuenebijawa, ajamatabëcuenesaëya Dioso peliwaisi paneca-asaëtsawanapaejawa, panecuene-ataejitsibijawanua pibisiacuene pexanaewi. Yapëtanijinua nayajiwitaeya panejinawanapaejawa itsamonae papecayamaxë-itojorobiyaniwa, pamonae picani nawënëruba apóstolewicuenia, panejumeyaiyataenexa picani papecatsipaebiliwaisi. Bajarapamonae papecatsipaebiliwaisi panecanaëjëbixae, payapëtaneme penajumetsënëtsiwicuene.
3 Paxamë bajayajebi pa-ajamatabëcuenesaëmë tsawanapae patanejumexaniataejawamë tajumeliwaisi, paliwaisi yabara itsamonae pacabejiobia-exanabiaba. Ayaicuenia panacuenebame pataca-itorobicuene. Apopayabaracueranaemë cajena. Bajarapacuenia panenacuenebawanapaexae, pacasiwajamatabëcuenebarëyatsi.
4 Itsiata baitsi jane, caejawayo yabara pananeconitame xanëjawaberena. Aeconoxae baja, pacopabame xaniawaetsia tajajiwi pane-asiwajawa, patane-asiwajawamë-ata.b Pacuenia copiaya a̱jena̱ pamatacabi panesiwanajamatabëcuenecopabame, apobajarapajamatabëcuene-itsimë baja.
5 ¡Bajaraxuata, panajamatabënapire copiaya patane-asiwacuenemë, panenajamatabëcuenepënëyorotsinexa bewelia patane-asiwajawamëwecua, icatsia patane-asiwanexamë, tajajiwi yajawa, pacuenia copiaya pane-asiwamë! ¡Asiwaya panetonacuenebawanapare icatsia, pacuenia bajayata xaniawaetsia tajitsipaecuene paneto-exanawanapame patane-asiwajamatabëcuenemë! Itsiata itsa baja apopanajamatabëcuenepënëyorotsimë tsane, nexata baja, pacawecuatixitsianatsi becandelabrocuenia pane-itayotsitaxunaemi,c panijatomarapijiwituatuajëta.
6 Itsiata baitsi jane, pacasiwajamatabëcuenebarëyatsi patanejamatabëcuenejëpaexaemë mapacueneje. Pacuenia xanë cuene-itoyanë nicolaítawid pibisiacuene pexanaponaejawa, bajarapacuenia pijinia paxamë-ata pacuene-itoyamë tsawanapae.
7 Pajiwi muxuwojoruca, natojumetae pacuenia Espíritu Santo jumaitsi daxita Jesús pijajiwijawabelia.
»Pajiwi ajamatabëcuenesaë pewajënaeyabelia, taxa Dioso pitaxutuajamatejematsaponaponaejawa ëpetëpaejawabelia, itsamonae bejiobia-exanae-atatsi pecopatsia-exanaenexatsi, nexata taxa Dioso tocopatsiana bajarapajiwi pexaenexa ponaecuaito wëna-asaëtsaponaponaejitsia daxitamatacabijawabelianexa, ponae nucae taxa Dioso pijapexanianacuatatsia», pacajaitsi siete papitayotsicandelabrobejetuatuajëta tanucaenë —nejai Jesús, tatoyaquinaenexa ponë namatacaitorobapona Jesús pijajiwi Éfeso tomarata.
Mapacueniaje Wajatuxanenë Jesús itoroba, Juan petoyaquinaenexa Jesús pijajiwi Esmirna tomarata penamatacaitorobinëjawabelia
8 Jesús icatsia nejumaitsi:
—¡Toyaquinare tajajiwi penamatacaitorobinëjawabelia, Esmirna tomarata peponaponaenë, pijajiwi yajawa, neyapëtaeya-exanaenexa tacatsipaebicuenia!
»Jesús, ponë daxitacuene pepopetaxuxuabinë, daxitacuene icatsia pecopiarucaeya-exanaenënexanua. Bajaraponë picani tëpa. Itsiata baitsi jane, icatsia asaë petëpaecujinae, piasaëtsaponaponaenexa daxitamatacabijawabelia. Mapacuenia bajaraponë pacajumaitsije:
9 «Yapëtaniji daxita pane-exanawanapaecuene. Pacuenianua itsamonae pacabejiobia-exanabiaba patajajiwixaemë. Yapëtanijinua bitso bepanejiobiwicuene, apopanexainaexae panecobecowëjawanë. Itsiata, taitabarata bitso panexainaewi tsawanapae, tsipaji panajamatabëcuene-enaeyabame bëpënëa taxa Dioso pijacuenejawanë,f xuanë bitso penamatamotsijawanë. Baitsi, panejamatabë-ëthëtojawawetsina xaniawaetsia payapëtaneme pepacuene pataca-asiwajawa, patacayawenonabiabijawanua, patane-itaxutuajamatejemaxaemë daxitacuene yabara. Yapëtanijinua pibisiacuenia papecabaracuaicuaijaijawa, pamonae nataeyabiaba judíowicuenia.g Itsiata, bajarapacuenia nataeyabiabi-ata, xanë juya taniji bajarapamonae pepodowathi pijajiwicuene.h
10 Imoxoyo raja pewajënae, pepodowathi pejamatabëcueneta, itsamonae papecajebinexa paxamëyajuwënëwi, penaneconitsiwi pejebabiabibota. Bajarapacuenia pacajamatabëcuene-ëjëbiana, papecacopabia-exanaenexa xanë patane-itaxutuajamatejemajawamë. ¡Itsiata, pëtsa pacujunawame bajarapamonae papecabejiobia-exanaejawanexa, tsipaji apobajayajebinexa!i Nexata, bajarapamatacabijawa petëpaejawabelianexa, bajarapajiwi rajutsianajë coronajawa,j pecuene-itajëtsijawa matacabi apopewerewerecaejawa.
11 Pajiwi muxuwojoruca, natojumetae pacuenia Espíritu Santo jumaitsi daxita Jesús pijajiwijawabelia.
»Pajiwi ajamatabëcuenesaë pewajënaeyabelia, taxa Dioso pitaxutuajamatejematsaponaponaejawa, ëpetëpaejawabelia, itsamonae bejiobia-exanae-atatsi, pecopatsia-exanaenexatsi, bajarapajiwi apo-itsacueniabi tsanetsi cotocaewi patëpaejawa», pacajaitsi xanë, daxitacuene pepotataxuxuabinë, daxitacuene icatsia tacopiarucaeya-exanaenënua —nejai Jesús, tatoyaquinaenexa ponë namatacaitorobapona Jesús pijajiwi Esmirna tomarata.
Mapacueniaje Wajatuxanenë Jesús itoroba, Juan petoyaquinaenexa Jesús pijajiwi Pérgamo tomarata penamatacaitorobinëjawabelia
12 Jesús icatsia nejumaitsi:
—¡Toyaquinare tajajiwi penamatacaitorobinëjawabelia, Pérgamo tomarata peponaponaenë, pijajiwi yajawa, neyapëtaeya-exanaenexa tacatsipaebicuenia!
»Ponë, pecuaibuatsina pitsapa anijabarëneniabeje pexiujai-espada, pacajumaitsi mapacueniaje:
13 «Yapëtaniji daxita pane-exanawanapaecuene. Yapëtanijinua pitsitomarata pajinawanapame, itsajota Satanás xaina pewetsitaxunae, jiwi pejamatabëcuenenamatacaitorobinexa pepopeyanacua-ewetsinëcuenia. Nexata, panijatomarapijiwi bajayata beyaxuaba Antipas-pijinë, ponë tajumeliwaisi ajumesaëya tsipaebabiaba jiwijawabelia, bejiobia-exanae-atatsi. Itsiata baitsi jane, panewajënaeyabelia xanë pane-itaxutuajamatejemamë tsawanapae, pacabejiobia-exanae-ata. Nexata, pacasiwajamatabëcuenebarëyatsi bajaraxua yabara.
14 Itsiata baitsi jane, itsajamatabëcuenejawaxi yabara pananeconitame xanëjawaberena. Bajarajota, itsamonae, paxamëyajuwënëwi, ca-asaë tsawanapae paliwaisi bajayata Balaam-pijinëmik muxubijiapenetsiaya cujaruba Israel-pijinë pemomoxijawabelia. Bajaraponëmi itoroba Balac-pijinëmi peyamaxë-itojorobinexa Israel-pijinë pemomoxi, bajarapamonae pibisiacuene pexanaenexa, taxa Dioso pitabarata. Nexata, Balac-pijinëmi yamaxë-itojorobiaya junata Israel-pijinë pemomoxi penaponaenexa fiestajawabelia, bajarajota penaxaenexa dajubinë pewi, perajutsiyajuwënëjawa jumapecataeya pexanaenëanëjawabelia, pibisiacuene pexanaenexanua pewitota bajarapafiestajawata pepatsipetiriawijawabelia. Bajarapacuenia pijinia, aeconoxae paxamëyajuwënëwi-ata muxubijiapenetapona tajajiwiyajuwënëwi, cuenejëpaeya pibisiacuene pexanaenexa.
15 Itsamonae pijinia paxamëyajuwënëwi ca-asaë tsawanapae nicolaítawi petsipaebaponaeliwaisi.l Nexata, bajarapamonae muxubijiapenetapona tajajiwiyajuwënëwi, pibisiacuene pexanaenexa, nicolaítawi pecujarubicueniatsi. Xanë cajena, ayaicuenia cuene-itoyanë bajarapitsiliwaisi jiwi pejumecowënëtsijawa.
16 ¡Bajaraxuata, panajamatabëcuenepënëyorore pibisiacuene pane-exanaejawawecua,m icatsia pane-exanawanapaenexa tajitsipaecuenia! Itsa paxamë apopanajamatabëcuenepënëyorobimë tsane, xanë nexata naxatsiayo ponaenajë paxamëjawabereca, tabarënabenexa pamonae apopenajamatabëcuenepënëyorobiwijawabelia, tacuibuatsina pepitsapae-espadata.n
17 Pajiwi muxuwojoruca, natojumetae pacuenia Espíritu Santo jumaitsi daxita Jesús pijajiwijawabelia
»Pajiwi ajamatabëcuenesaë pewajënaeyabelia, taxa Dioso pitaxutuajamatejematsaponaponaejawa, ëpetëpaejawabelia, itsamonae bejiobia-exanae-atatsi, pecopatsia-exanaenexatsi, nexata, xanë, rajutsianajë bajarapajiwi pexaenexa manáwënëjawa, athëbëtatsia xua xaniawaeta. Rajutsianajënua penioponae-ibotoyo, pa-ibotoyojumata xanë wënëyaquinarutsianajë pejanawënë. Bajarapawënë itsajiwi-ata apowënëyapëtae tsanetsi. Caejiwi, pepitsijiwi, nawënëyapëtaena», pacajaitsi xanë, tacuibowojotuatsina pepitsapae-espada taxainaenë —nejai Jesús, tatoyaquinaenexa ponë namatacaitorobapona Jesús pijajiwi Pérgamo tomarata.
Mapacueniaje Wajatuxanenë Jesús itoroba, Juan petoyaquinaenexa Jesús pijajiwi Tiatira tomarata penamatacaitorobinëjawabelia
18 Jesús icatsia nejumaitsi:
—¡Toyaquinare tajajiwi penamatacaitorobinëjawabelia, Tiatira tomarata peponaponaenë, pijajiwi yajawa, neyapëtaeya-exanaenexa tacatsipaebicuenia!
«Mapacueniaje Jesús, ponë Dioso pexënato, pitaxutobeje penaitayotsinë, pacuenia isotocotia ba-itatsajawa. Petaxubeje-ata niweniwena, pacuenia broncenanijawa pe-ojobijawa, pacajumaitsi:
19 »Yapëtaniji daxita pane-exanawanapaecuene. Nexata, pacatoyapëtanetsi itsamonae-ata pane-asiwatsawanapaejawa. Pacatoyapëtanetsinua patane-itaxutuajamatejemajawamë xanëjawaberena, panetonacuenebijawa-ata taxa Dioso. Pacatoyapëtanetsinua panewajënaeyabelia panenajamatabëcuenesaëtsijawa xanëjawaberena, itsamonae pacabejiobia-exanabiabi-ata. Yapëtanijinua, pacuenia aeconoxae, bitsoyo panetonacuenebawanapame, patanetonacuenebawanapaejawamëwecua, pamatacabi panesiwanajamatabëcuenecopabame xanëjawaberena. Bajarapacuenia pane-exanawanapaexae, pacasiwajamatabëcuenebarëyatsi.
20 Itsiata baitsi jane, itsajamatabëcueneyo yabara pananeconitame xanëjawaberena, tsipaji apopacujiru-itawetsimë Jezabel,o bajarapowa pibisiacuene pexanaeyaniwa, penajumetsënëtsiliwaisi pepaebiyaniwanua tajajiwijawabelia. Bajarapowa nawajunupaebabiabi-ata xanë betaitorobijawa profetawacuenia itsiata apoxanajai. Biji rajane, patajajiwimë pacayajuwënëyamaxë-itojorobapona baja. Bajarapowa muxubijiapeneta penacojiobiwi penawecuajaitsinexa penapitsijiwibeje, pibisiacuene pewitota itaxutejema pexanabiabinexa. Pacacujarubanua patajajiwimë panexaeyabiabinexa dajubinë pewi, perajutsiyajuwënëwip jumapecataeya pexanaenëanëjawabelia.
21 Bajarapowa picani pecopatsijawa pibisiacuene pexanabiabijawa, bajayajebi ewetaponaponajë. Itsiata baitsi jane, apojamatabëcopatsi pewitota pibisiacuene pexanabiabijawa, penajamatabëcuenepënëyorotsinexa xanëjawaberena.
22 Bajaraxuata, bajarapowa awitania-exanaenajë, camata pebobocaenexa nabejiobitsiaya. Orijibia, pamonae pibisiacuene exanabiaba pewitota bajarapowa pecujarubicueniatsi, nexata bajarapamonae-ata bitso nabejiobitsia-exanaenajë, itsa aponajamatabëcuenepënëyorotsi tsane bajaraxuawecua.
23 Werebiabianajë daxita bajarapowa pexi.q Bajarapacuenia ta-exanaejawata, daxita nacuanëjawa pejinawanapaewi, tajajiwi, nejamatabëcueneyapëtaena, xaniawaetsia tajamatabëcueneyapëtaenëcuene daxitajiwi bëpënëa pejamatabë-ëthëtota, penajamatabëxainaecuene-ata. Nexata, pacaejiwimë canacujitsia, pane-exanawanapaecueniar pacato-exanaenatsi.
24 Itsiata, patajajiwimë Tiatira tomarata panejinawanapaewi, paxamë apopajumecowënëtsimë mapaliwaisianëje: Jezabel pepaebiliwaisianë, paliwaisianënua itsamonae cujaruba jiwi apopejumeyapëtaeliwaisianëmi,s Satanás pecapitsapaeliwaisianë. Paxanë apopaca-itorobitsi, pematatsënëa itsaliwaisi pane-exanawanapaenexa paneyapëtaejawamiwecua.
25 Itsiata baitsi jane, paca-itorobatsi panewajënaeyabelia patanesiwa-itaxutuajamatejematsawanapaenexamë, patanejumexaniataewanapaejawamënua, matapania ëtapatsimatacabitsicajawabelianexa.
26 Pajiwi ajamatabëcuenesaë pewajënaeyabelia pexanaponaponaejawa ta-itorobicuenia ëpetëpaejawabelia, nexata, xanë itsamatacabi tocopatsianajë bajarapajiwi, pewetsinexa daxitanacuapijiwi.
27 Bajarapajiwi pewetsijawata, itorobabiabiana itaxutobejiobiataenejewa. Asaëyata naneconitsia-exanaenanua daxita pibisiacuene pexanawanapaewi, bajarapacuenia piajibia-exanaenexa bajarapapibisiajamatabëcuene. Pacuenia hierronaebotat batoxobiaxuaba atsananitota pefaratsicanalito, bajarapacuenia bajarapajiwi pewetsijawata ajibia-exanaena jiwi pibisiacuene pexanaejawa. Baitsi, pacuenia xanë, taxa netocopata daxitanacuapijiwi ta-ewetsinexa, bajarapacuenia pijinia piajamatabëcuenesaëwi ewetsia-exanaenajë.
28 Bajarapajiwi rajutsianajënua pexainaenexa bajayacunuapijituluputou penaitayotsicotia, bajarapacuenia pexainaenexa papinijicotia xanë xainajë, ayaijamatabëcuenewi petaenexatsi.
29 Pajiwi muxuwojoruca, natojumetae pacuenia Espíritu Santo jumaitsi daxita Jesús pijajiwijawabelia», pacajaitsi xanë, Dioso Pexënatonë, ta-itaxutobeje ta-itaxutona-itayotsinë, tataxubeje-ata tataxuniweniwenaenë —nejai Jesús, tatoyaquinaenexa ponë namatacaitorobaponapona Jesús pijajiwi Tiatira tomarata.