Glosario
Apowajayapëtaejumenë pijaliwaisianë
Penacowaebijumexi wowaijumewerena, piayapëbejejumenënua pejaijamatabëcueneliwaisianë
Abib-juameto
Hebreojumeta penamataxainaejuameto pija-almanaquejawata anijawënëbeje xaina. Perujuwënë «Abib», pejanawënë pijinia «Nisán». Bajarapajuameto be-enerojuameto judíowinexa. Baitsi caewai canacujitsia bajarapajuameto petaxuxuabijuameto bajarapamonaenexa. Itsiata hebreomonae pija-almanaque aponajëpae pawiria-almanaque canacuenebatsi waxaitsi maparucaeje. Baitsi Nisán-wënë juameto taxuxuababiaba bejamatabëcujiru Marzo tuatuajëjawa. Copiaruca pijinia bejamatabë Abril tuatuajëjawa. Hebreomonae pijajuametonë taxuxuababiaba merawipijijuameto itsa a̱jena̱ pejanacuenia ecaica. Nexata pijajuametonë xainabiaba 28 pamatacabibeje caejuameto canacujitsia.
Abimelec
Bajayatami Filistea nacuata pejinawanapaewi wënërubabiaba pepopeyanacua-ewetsiwitsi «Abimelec». Apopepawënë picani; saya pijataxunaewënë pacuenia presidentenë. Pacuenia wowai, «Presidentenë», jai tsabiabi, pacuenianua resguardojawa, «gobernador cabildonë», jiwi jai tsabiabi, bajarapijinia pacuenia, «abimelec», jai tsabiabitsi peyanacua-ewetsiwi Filistea nacuapijiwimi.
Nexata pa-Abimelec najumeliwaisicajuna Abraham-jawabelia Gén. 21:22-jawata apocaenë yabaracuaicuaijai, ponë Abimelec barëcuaicuaijai Isaac-jawabelia Gen. 26:26-jawata. Bajaraponë saicayanë nacaetaxunaewënë xainae-ata. Nexata apopebarëcuai-cuaijainëtsi Abraham-pijinë.
Aceitebëyo
Bajayatami apocanacuenebabiabi botellabëxita petsimata-epacaera pecaponaenexa. Israel pemomoxi xainabiaba ovejamata-etoyo pexanaebëyo, pejenexa bajarapa-aceitera. Orijibia neyapëtaenexa pacuenia canacueneba bajarapora, taemanua página 69 pabaxutota wënëruba «Pacuenia Jinawanapa Judíowi Bajayatami», cotocaewipijibaxutota (segundo partejawata).
Adán
Hebreojumeta Adán itsajai, apojai ëpebiyabara. Cajunua pebi, petiriwabeje. Najëpa saya «jiwi», pejaijawa jiwijumeta. Dioso pacujinae exana Adán, apo-exanaetsi caenë. Itsiata abaxë petiriwanexa peyenesito tsarucae. Nexata saya caecuenia najua-exanatsibeje nacuenecataeya. Bajaraxuata jiwijumeta Adánwi apojaitsi jiwi yabara. Saya «jiwi», bajaitsi.
Adoración
Adoración-jumejawabelia cajunua mapitsicuenejawanë: 1. Wajayaiyataejamatabëcuene Dioso. 2. Waja-asiwajamatabëcuene. 3. Wajasiwanajamatabëcopatsijamatabëcuene Diosojawabelia wajanacayawenonaenexa. 4. Waja-itaxutuajamatejemajamatabëcuene Diosojawabelia, 5. Wajanawajëcaejawa bajaraponëjawabelia-ata. 6. Pexaniacuenia wajawënëxaniatsijawa Dioso pexanaecuene yabara. 7. Asiwaya wajajumecowënëtsijawa pacuenia naca-itoroba. Daxita bajaraxuanë yabara wowaijumeta cajunua «adoración-jume».
Nexata jiwi najamatabëcuene-itajëta Dioso peyaiyataejawa pejumecowënëtsijawata, bajarapacuenia Dioso piasiwajawa pexaniajamatabëcuene perajutabiabijawata, Dioso pewënëcacuaicuaijaijawata-ata. Bajarapacuenia najamatabëcuene-itajëta Diosojawa-belia pesiwanajamatabëcopatsijawa peyawenonaenexatsi, itsapacujinae wajëta bajaraponëjawabelia penamatawenonaejawata, bajarapacuenia Dioso pitaxutuajamatejemajawa itsapacujinae bëjainejewa jinawanapa apopejitsipaecuene tocopia-patsi-atatsi. Baitsi daxita xua yaiyataeya asiwaya-ata to-exanatsi Dioso, bajaraxuanëyabara «adoración». Daxita mapaliwaisi cajunua itsajawata wowaijumeta, «servir a Dios», baitsi petoexanaenexa petonajume-copatsicueniatsi.
Bajarapajamatabëcuene-ata jëpa itsa exanatsi jumapecataenëanëjawabelia, penajorobinëjawabelia, waji peyapëtaewijawabelia-ata. Baitsi daxita bajaraxuanë itsa itaxuatuajamatejematsi, jumecowënëtabiabatsinua wajanaca-itorobicuene, nexata to-exanaponaponatsi adoracióncuene. Águila Bajarapawiria pepunaenë jinawanapa Israel nacuata. Bajaraponëanë bepinijicotsala. Bajarapitsipepunaewi wowai wënëruba, «águila». Bajarapa-águilawi pecorofetojumata pexi bacapuna itsajota tsiayaijitsiatsi, bajarapacuenia bajaraponëxi pepanepaenexa, jamatejema pecapatsinexa caewëarena icatsia pematapenajawatatsia.
Águila
Bajarapawiria pepunaenë jinawanapa Israel nacuata. Bajaraponëanë bepinijicotsala. Bajarapitsipepunaewi wowai wënëruba, «águila». Bajarapa-águilawi pecorofetojumata pexi bacapuna itsajota tsiayaijitsiatsi, bajarapacuenia bajaraponëxi pepanepaenexa, jamatejema pecapatsinexa caewëarena icatsia pematapenajawatatsia.
Altar
Bajaraxua jiwi exana bajayatami petajuitabiabinexa dajubi Diosojawabelia. Ibotonë najumajeba bemesacuenia pexanaejawa. Nexata pijaneconi penatoyapëtaenë, bajara pa-altar-jumawereca najuma-eta pecapatsidajubi, petajuitsinexa Diosojawabelia pijaneconijamatabëcuene, itsajume pexaniajamatabëcueneyabara-ata capatabiaba. Nexata daxita dajubinë tajuitabiaba.
Bajarapacuenia itsamonae tonacuenebabiaba jumapecataeya pexanaenëanëjawabelia-ata, pitaxutuajamatejemaxae bajarapa-jumapecataenëjawabelia Diosowecua peyawenonaenexatsi. Itsiata bajapamonae apotajuitabiabi daxita dajubinë. Nexata penacopabiwi tajuitsinejewa, najuanabanebiaba penajamatabëcuene-itajëtsinexa asiwaya caejamatabëcuene pexainaejawa jumapecataeya pexanaenëjawabelia. Bajaraxuata Dioso itoroba Israel-pijinë pemomoxijawabelia pebijianaenexa bajarapitsi-altar-jawanë.
Ancianowi
Israel pemomoxi, pijawiriayajuwënënë wënëruba ancianonë, pewetsinëxae pijawiriawi. Baitsi penaweretsiwicujinae, itsa ayaijamatabëcuenenë, pexanialiwaisi pecanaëjëtsinë, nexata itapetabiaba pewetsinënexa pijamonae tuatuajëta. Bajaraxuata wowaipijiBibliajawata capitsapa ancianowi. Bajarapamonae itsiata apo-iglesia pewetsiwi picani. Saya nacaewiriamaëtowi pewetsinë. (Nacaewiriamaëto wowaijumeta clan).
Israel-pijinë pexi pemomoxi natsana doce papemomoxibitsaëtobejecuenia. Bajarapadoce papemomoxibitsaëtobeje canacopata pijasalinaiwënëcuenia, Israel pexi pewënëcuenia. Bajarapapemomoxibitsaëtonë wënërubabiaba, «caenë pemomoxibitsaëto». Wowaijumeta pijinia «tribu», pejaiwënë.
Nexata daxita Israel pemomoxi xainae-ata pepopeyanacua-ewetsinënexa, caenë pemomoxibitsaëto canacujitsia xainabiaba itsamonae pejinawanapaenacuayo pewetsiwinexa. Bajayatami bajarapamonaemi wënëruba peto-ewetsiwitsi pijawiriayajuwënëwi, príncipewi. Bexëajawabelia wënëruba pewetsiwi ancianowi pijinia. Bajarapa-ancianowi enabiaba tomaralia pejonenamutomuxuneneta, itsajota nacaetuatabiaba bajarapatomarapijiwi liwaisi yabara. Bajarapamonae tsipaebabiaba penaewetsicuene pijasalinaijawarenacujinae, xaniawaetsia jiwi penajuajinawana-paenexa. Xaniawaetsia natocaëjëba xua exanaejitsia, nexata itsa liwaisiyabara penajamatabëxainaewi jamatabëcuene-caewia-exanabiaba. Muxujioba pexanialiwaisita itsamonae nacaewiriamaëtowi. Bajarapamonae taicabiaba piajamatabë-cueneliwaisibejewi, pacueneta penacobetoxotsiwi, jiwibewi-ata penaneconitsia-exanaenexa.
Bajarapijinia itsi aeconoxae-ata pamonae to-ewetawanapa Jesucrito pijajiwi, iglesiapijiwi. Pexanialiwaisita muxujioba itsa-monae Dioso pejumecowënëtsiwi, bajaraxuata bajarapamonae-ata aeconoxaeta pewënë ancianowi.
Arpa
Pawiria-arpa canaxëana bajayatami, aponajëpae pitsi-arpa racatabiaba wowai maparucaeje. Bajayatapijiwiria-arpa tsiquiri-arpayo tsabiabi. Xainabiaba 6 pamaëtobeje, itsa jume 12 pamaëtobeje saya. Bajarapa-arpaxi racatabiaba pecobesitota, música pexanaenexa. Bajarapamatacabijawa pa-arpa racatabiaba apoxainae caewënë. Itsawënëanë pijinia cítara, salterio, lira-ata.
Asfalto
Bajayanacuapijiwimi canacuenebabiaba asfaltowënëjawa, breawënëjawanua mawicuenia pecatsanaenexa. Bajaraxuabeje bemawitsapatojawanë picani. Itsiata pepitsapaejawa saya irajawata. Maparucaeje Colombia nacuata wënëruba breanani «neme».
Asterot – Astarte – Afrodita
Bajarapitsijumapecataewijawabelia Canaán nacuapijiwimi nawajëcabiaba petonaxaniabinexatsi peubijawanëmi, pijadujubi-ata petonacoxiwiatsinexatsi, bajarapacuenia jiwi-ata pexi pexainaponaenexa. Nawitsia wënëxainae-ata bajarapajumapecataewi, itsiata caecanacuenebicuene xaina. Itsaja-wata saya nubabiaba naejawanë bajarapajumapecataenë pewënëta, bajarapanaejawanëjawabelia penawajëcabiabinexa.
Becaejiwi
Becaejiwi itsa yabarajai pebi, petiriwabeje penapitsicujinae, yapëtanetsi mapajamatabëcuene yabaraje: 1. Caejamatabëcuene pexainaenexabeje. 2. Caejamatabëcuene xainabeje penajuacanaëjëtsijawatabeje. 3. Petsiyapëtaejiwibejenua penacoxi-ewetsi-nexabeje pijamonaewecua. 4. Pena-imoxoyobijawatabeje natoyapëtanebeje becaeperabëto penaexanaejawabeje. Daxita bajarapajamatabëcuenejawanë jumetanetsi becaejiwi penaexanaejawayabara. Bajara-xuata jumaitsi, anijajiwi-atabeje naexanabeje becaejiwi.
Bedelionani
Mapanaejawayo bedelionae. Bajarapanaejawanë nanijucabiaba pecanacuenebinexa petuxujuwijawanë. Bajarapawirianaejawanë nubena Havila nacuata. Taema Gén. 2:12 Bajarapanani pejutsicujinae pepërëtoxi-cuenia nacopata.
Beerseba
Beerseba tomara eca Israel nacuami petabujawatareca Neguev nacua canacujitsita. Beerseba tomarajawata eca meramëthëmi, Meramëthë pewënë Beerseba. Itsamatacabijawabelia bajarapatomara canacopata bajarapameramëthë pewënëcuenia. Taema Gén. 26:33. Bajarapa-taxunaeta Abraham-pijinë copiaya najumeliwaisi cajunuabeje Abimelec-pijinëbeje, pebeyaxuabijawata siete ponëbeje oveja. Taema Gén. 21:22-34 Bajaraxuacujinae pacujinaeta ponapona Isaac bajarapacowëta, icatsia najumeliwaisicajunuabeje itsa Abimelec-beje. Bajaraxuata bajarapameramëthë wënëruba, «Penajumeliwaisi cajone meramëthë», pejaiwënë, itsawënë pijinia «Siete ponëbeje pijameramëthë», pejaiwënë. Taema Gén. 26:26-34
Ben-ammi itsawënë amonitawi
Ben-ammi raja Lot pexënatoyota juyapijiwata penaitajëtsinë. Ponëyo xaina paxa Lot-jawabelia (Gén. 19:30-38). Pewënë Ben-ammi hebreojumeta pejumaitsijume: «Nacaemonaewi pexënato», pejaijume. Najumejëpabeje pejumaitsiwënë «Bené-Amón», pejaiwënë; Hebreojumeta Amón pemomoxi pejaijume. Bajaraxuata bajaraponë pewënëcuenia wënëruba pijawiriamaëto amonitawi. Panacuajawata jinawanapa amonitawi, bajarapanacua wënëruba Amon nacua pijasalinainë pewënëcuenia. Amon nacua eca Moab nacuamuxuneneta. Bajarapamonae jinawanapa Mar Muerto pucaxaneto itsa-panawetsina. Israel-pijinë pemomoxi nacaemonae-ata Lot-pijinë pemomoxijawabelia, aponanaëcotsi xaniawaetsia, saya jinawanapa pena-itoyacuenia. Duet. 2:9,19, Núm. 22-24, Juec. 3:12-14, 26-30, 10:6-11:33
Bendecir
Pacuenia waxaijiwitsi canacuenebabiabatsi bendecirjume, bajarapacuenia apoyabarajumaitsi Dioso pejumeliwaisibaxutota.
Dioso pejumeliwaisibaxutota, bendecir itsajai Dioso yabara cuaicuaijai, bajarapajume nacayapëtaeya-exana mapacueniaje: 1. Dioso pexaniacuenia peyawenonaejawanexa yabara, itsa jume 2. Dioso pexaniacuenia pecuenecaëjë-paeya-exanaejawanexanua pexi pexainaponaenexa.
Juya Dioso pejumeliwaisibaxutota itsa jiwitonë yabarajumaitsi pebendeciabijawa pewënajiwitonëjawabelia, bajarajota nacayapëtaeya-exana pacuenia cuene-itajëta pexaniacuenia petaeponaponaenexa Dioso pewënëta. Baitsi jiwitonë apopecuenecaë-jëpaexaetsi pijacuata petocopiapatsia-exanaejawanexa bajarapabendición, nexata bejumaitsi mapacueniaje: «Catojitsipatsi Dioso pecayawenonaenexa pexaniacuenia», bejai.
Itsa bendiciaba jiwitonë Diosojawabelia bajarajota bajarapajume nacayapëtaeya-exana pacuenia jiwitonë pexaniajamatabëcuene rajuta Diosojawabelia pexaniacuene peto-exanaexaetsi, penabanijawa perajutsixaetsinua. Itsajawata pijinia nacayapëtaeya-exana pacuenia wënëxaniata Dioso pexaniacuenia.
Pacujinae Dioso junata Abraham peponaenexa Canaán nacuajawabelia, itsa bajaraponë jumexaniataeya jumecowënëta xua Dioso najumecapanepaya jumaitsitsi peto-exanaenexatsi, nexata Dioso pexaniacuenia cuene-itajëtatsi petaeponaponaenexa, bajarapacuenia daxita pemomoxijawabelia-ata pecanacopataponaenexa. (taema Gen. 12:1-4) Bajaraxuacujinae daxita paxajiwi, Abraham pemomoxiyajuwënëwi, matatsënë-wajëtabiaba pexënato matapijinë, bajaraponë pecanacopataponaenexa xua Dioso najumecapanepaeya jumaitsi Abraham-pijinëjawabelia Gen. 12:1-4. Bajarapama-tatsënëwajëcaejawa wënëruba wowai-jumeta «la bendición de la primogenitura», pepomatapijinë pecanacopatsijawa Dioso peyawenonaeyapaebijawanexatsi Abraham pemomoxae.
Bepecuene-amoneyabiwicuenia
Bajayatami pamatacabimi itsapacujinae caenacuapijiwi pijiwajabitsaë barënawajabitsaëtsipa itsanacuapijiwijawabelia, nexata pecuene-amoneyabicujinae notabiaba daxita pecobecowëjawanëmi. Xuacujinae totsata itsajawanë pepopeyanacua-ewetsinëtsi, itsajawanë pijinia tsicobetsanabiaba peyanabiwitsijawabelia, pijamonaejawabelia-ata.
Pacujinae Dioso itoroba israelitawi Éxo. 3:21-22-jawata pawajëcaponaenexa Egipto nacuapijiwijawabelia, Dioso pepopewetsinë israelitawinexa. Nexata itsa Dioso cuene-amoneyaba Egipto nacuapijiwi petsitorobijawata 10 papiayaicuenejawanë, bajaraponë tocopata pijajiwi israelitawi penotaponaenexa penotsinexa Egipto nacuapijiwi pecobecowëjawanë pewajëcaejawata. Picani bajarapamonae pijacuata apobarënawajabitsaëtsi Egipto nacuapijiwijawabelia, pepopewetsinëtsi Dioso bajarapacuenia to-exana saya. Nexata itsa pewajëcaecuenia notapona Egipto nacuapijiwi pecobecowëjawanëmi, bepecueneamoneyabijawa pejamatabëcueneta nota amoneya, Dioso bajarapacuene to-exanatsi, bajayajebi bedajubiwicuenia petonacuenebawanapaejamatabëcuene.
Bepenaxuirabinëcuenia tanetsi
Wajanacujarubijawata Números capítulo 6 yapëtanetsi pacuenia Dioso canaëjëta jiwi petaenexa bepenaxuirabiwicuenia itsapacujinae jayatsipa itsacuenejawa pecuene-itawetsijawatsi, bajarapacuenia itsa xaejitsipa xuanë jani-itawetatsi. Mapitsijawanë-yabara Dioso bepenaxuirabiwicuenia jiwi taejitsia itsa xaejitsipa, itsa jayatsipanua: 1) pepunaewi pawiriawi baxane pewi, pacuenia quequere, watarama-ata, 2) matatsënëwereca pejinawanapaewi pawiriawi baxane pewi, pacuenia newëthë, namo-ata, 3) insectomonae baitsi pamonae pesi apopexainaewi pacuenia amaimonae, sure, bocobocowa, pëbë, alerito-ata, 4) menepijidujuai piatsebocojibiwi, 5) pecotobëxëta penarobobocaewi matatsënëpijiwi pacuenia bocobë, jomo-ata, bajarapacuenia pijina menepijiwi-ata pacuenia maxëneje. 6) Dioso itaweta pexaejawa itsawiria dajubi pacuenia caballo, camello, marrano-ata. 7) Itawetanua pejayatsiyaniwa pibisiacuene pexanawanapaewi, pamonaenua lepratsabanaejawa pexainaewi, xua-ata jiwi canacueneba peyaiyataenexa jumapecataeya pexanaenëanëjawabelianua, xuanë-ata canacueneba penajorobiwi. Daxitaxua Dioso itaweta pexaeyaniwa, jiwi itsa jayatsipanua tsiteca nacopatabiaba bepenaxuirabijiwi Dioso pitabarata. Orjibia itsa jayatsipa bepenaxuirabinë petaenëtsi, nexata bepenaxuirabinë nanaexanaejitsipa juya. Orijibia bajarapajamatabëcueneyabara nawitsia cuaicuaijai Levíticobaxutota.
Bepijawacuenia caponapona
Pamonae yapëtane bajayata pijicuenemi, nacayapëtaeya-exana pacuenia nacua-ewetsiwi itsa pitsijitsia itsawa pijawanexa, caecuenia apobarëmajitsi bajarapowa. Pepitsiwajënaeya, bajarapowa copiaya anijajuametobejecuenia nacuenexaniawaetsiaya beponapona petocopiarucaejawabelianexatsi bepenaxuirabiwacuenia petae-jawatsi. Baitsi bajarapowa ponaponaejitsia bota taenejewa itsanë pebi. Nawaejitsianua pexaniatuxujuwijawanë pematajërëabi-merata. Bajayata nacua-ewetsiwi nataeyabiaba bediosowi pijajiwi pitabarata. Bajaraxuata to-acuenebitsi itaxutejema pebarë-majitsinexa pejanapitsiwa, bajarapowa pejamatabëcuene bepenaxuirabinë penaexanaeyaniwa. Bajaraxuata pijawanexa-ata abaxë caecuenia apopebarëmajitsixae caponapona bepijawacuenia, tsipaji pajuametobeje tocaëjëtatsi petocopiarucaejawabeliatsi peyapëtaenexa bajaraponë bajarapowa apopimoxoyotsijawa pebi.
Taemanua concubina – cotocaewi pepitsiwa.
Betaxijiwiyocuenia
Bajayatami mawecowaxi bitso acuene-ura tsabiabi apopenacoxitsixae. Nexata pexi pexainaenexa mapacuenia exanaje: Mawecowayo itsa xainaejitsipa amoneya bedajubiwacuenia petonacuenebiwayotsi penatocomuatsixae bedajubicuenia, nexata bajarapowayo rajutsipa pamonajawabelia, pepitsinexa cotocaewi pepitsiwacuenia. Belia itsa bajarapowa nacoxita, nexata penacueto penaexanaejawata pepopijawa isapitabiaba pethaëtota. Bajarapacuenia itsa exana, najamatabëcuene-itajëta bepexijiwiyocuenia petaejawa. Bajarapacuenia mawecowaxi pexi nanaxainaeyababiaba bajayatami, itsawayo pejumata. Itsiata maparucaeje itsacuene Jesucristo nacatocopata. Taema 1 Tim. 3:2,12.
Betel
Betel itsa jai Hebreojumeta: «Dioso Pijabo», itsa jume, «Dioso Pijataxunae», pejaijume. Betel-jawata Dioso tsitanaitajëtatsi Jacob pacujinae wecuanajetabijirawa pematapijinë Esaú, Gén. 28:19. Bajarajotanua Dioso icatsia tsitanaitajëta Jacob-jawabelia, bajaraponë penawiatsicujinae Padan-Aran nacuawerena, Gén. 35:15
Brújula
Bajayatami judíowi, ajena pamatacabijawaberena wowai-ata itsacanaëjëtsicuene xaina pacuenia paebijitsia itsabelia pona jiwi, itsajotalia eca itsacuenejawanua. Bajarapamonae tane nacua matonotsia penucaejawa. Nexata nacuamatatu wowai wënëruba (Norte). Nacuatabu pijinia wënëruba (Sur). Nexata juameto pepitsapae-jawawetsina wënëruba (Oriente, itsa jume este). Pijinia juameto itsa betsia pëcaewabiaba (Occidente, itsa jume Oeste). Nexata xua wowai canaëjëta nortenenia waxaitsi jiwitsinexa «matatsënënenia», jaitsi. Bajarapacuenia xua wowai canaëjëta surnenia, waxaitsi jiwitsinexa «ununenia». Baitsi bajarapacuenia canaëjëtabiaba Vichada-menejawareca pejinawanapaewi. Itsamonae pijinia itsanacuanëjawa pejinawanapaewi itsacuenia meta canaëjëtsipa, nortenenia, sur-neniabeje yabara. Bajarapacuenia itsa yabarajumaitsi waëyabetsia, pemutuabereca (tamoyabereca) bibliabaxutota, apoyabarajumaitsi mene penawotsijawabereca yabara; saya juameto pepitsapaenacuajawawetsina, juameto pepëcaewinacuajawabetsia pijinia yabara jumaitsi.
Maparucaeje wowai canacuenebabiaba brújulawënëjawa peyapëtaenexa itsabelia ponaejitsia, matacabita, merawi-ata itsajota matacabipijijuameto apotaeyabiabi, bajarapacuenia nacua pitacaënaejawatanua. Bajaraxua pe-etoyo jiarata pitaropitsinexa itsapayenepananenia norte. Nexata jiwitonë pecanucaenë canamatatajiarata pe-eto peto-itaropitsinexatsi Nortejawabelia brújulajawata. Bajarapacuenia nexata yapëtane itsabelia ponaejitsia. Brújulajawata «N» nacayapëtaeya-exana nortenenia, «S» pijinia sur-nenia, bajarapacuenia pijinia «E» Este-nenia o Orientenenia, «O» occidentenenia.
Bueyu
Bajaraponë raja vaca pebito petobëjutsinëtsi, itsa jume vaca pesorowato, ponëxi canacuenebabiaba piracatafunucaeya-exanaenexa pijapabianënexa peto-iratotowinexatsi, bajarapacuenia-ata pejotsimonë peyarobobocaenexa.
Burro
Maponëyo burroyo. Bajaraponëta jiwi bacanacuenebabiaba petojotsinënexa pecobecowë. Bewelianë-ata caballowecua itsiata ajumasaë tsabiabi. Bajaraponë itsiata apojejai tsabiabi pacuenia pexainanë itorobatsi.
Cabra – chivo
Mapitsiwiria chivoxi Israel-pijinë pemomoxi ewetabiaba. Bajaraponëxi Diosojawabelia tajutabiabanua altar-jumata pijaneconi yabara.
Caín pijawa
Adán, Evabeje pajiwibeje pexi xaina apoyapëtaetsi, tsipaji xaniawaetsia aponacatsipaebi Dioso Pejumeliwaisibaxutota. Itsiata pamonae xainabeje itsamone wënëtanetsi pexi, pacuenia Caín, Abel, Set-ata. Bajarapamonaewecua orijibia xainabeje tsaena itsamonae. Taema Gén. 5:4. Itsamonae Adán pexi nacayajata tsaena itsanacuanëjawa pejinawanapaenexa. Nexata pacujinae Caín nacojioba apoyapëtae-atatsi powa pita, itsiata tsaena pijabanawa pita. Bexëajawabelia Dioso nacatonajumecopata wajapitsiyaniwa wajamonaewa. Taema Levítico 18:5-23
Camello
Ponë taneme mapadibujojawata, bajaraponë raja pewënë camello. Peneta bepetsaunaenë. Jiwi bajarapamonae juma-ponabiabatsi, itsa ponaejitsia itsanacuajawabelia. Itsajawata caponaeya-exanabiaba pijajawanë. Bajaraponë caëjëpatsi ayaijawa pecaponaenexa, arewe-ata. Tajënamutomi bepijiayocuenia pata caematacabita. Tsipaji asipia, nexata tajë nonotanajetaruca. Judíowi itsa ponaejitsia tajënamuto, itsabelia ajibi mera, nexata pijacamello abata mera ayaira, namuto peponaewajënaeya. Ponae-ata nexata acueyabi pamatacabibeje, apo-apae-ata mera, ajumalisaë.
Camello pijasilla
Camello pijasillanexa bajayatami pinijidoroxanetota petsewipo̱na jeyabiaba, bajarapajumata pe-ecaenexa. Gén. 31:34 nacayapëtaeya-exana pacuenia Raquel jia paxa pijadiosonëanë bajarapapônadoro-ënëta, bajaraponë pecaxitajarabiyaniwa.
Candelabro
Itsajiwi-ata apotae maparucaeje pacuenia cuene-itsi pitayotsicandelabrojawa Dioso pijacarpabota penutsijawa. Itsiata itsamonae nacayapëtaeya-exana pecanaëjëbiwi pijacueneta Dioso peliwaisita. Bajaraxuata nacatsitajëta pacuenia tsaena tane.
Carpabo-carpapanabo
Bajayatami pajiwi oweja pewetsiwi, bajarapamonaemi xainabiaba pijacarpaboyo, yapëxanepanaeya pecawarapabiabibo. Bajarapaboxinexa natojorocabiaba pinijipana dajubibocotonëmita. Nexata itsa warapaejitsia, bajarapaboxi wematajonabiaba pecawarapaenexa itsanacuajawabelia. Pepatsicujinae panacuajawabelia pona, icatsia nacuenebabiabanuta caxatabiaya pijabonexa.
Carrozawënëmo
Bajayatami pamo caballo roboboca pecanawajabitsaëtsinexa, bajarapamo pewënë carroza. Bajarapamo pecanawajabitsaëtsimo nacua-ewetsinë, itsamonae pijajiwi wajabitsaëwiyajawa. Itsiata itsajawata nacua pewetsiwi yaponabiaba bajarapamota itsabelia jamatabëpona. Pamonae pona bajarapamo-ënëta apo-enae. Saya nubenabiaba. Bajarapamo xainabiaba anijataxutoyorotabeje petabufewetsina.
Cebada
Cebadabotonë najëpabeje arroz-botonë. Cebada bepijiayo nacuaitabiaba trigobotonëwecua. Itsiata judíowi beweliacuenia taeyabiaba cebadaxu pecanacuenebiyaniwa. Canaëjëta saya perajutabiabinexa amoneya petonacuenebiwitsijawabelia pexaenexa. Maparucaeje jiwi pexaejawa matajeyabiaba.
Cepo
Bajayatami itsapacujinae jiwi naneconitabiaba beweliacuenia, nexata taxuxatatetabiabatsi cepowënëjawata. Bajarapaceponaejawa xaina anijawojotobeje itsaxuayo taxuyaweroxatatetsijitsia anijanaetabeje tuatuajëalia. Bajaraponaebeje bitso arewe. Bajaraponaebeje namataenetsia tsarëta petaxuyawerocaëjëpaecueniatsi jiwitonë. Nexata xuacujinae naitabarataeya buatabeje epatajërëtsialia penaneconitsinë petaxuyaweratojawalia. Xuacujinae bajaraponaebeje caxatata candadota. Bajarapacuenia exana penawixaetaeya-exanaenexa, pepanepaeyaniwa-ata pamonae penaneconitsiwi. Bajaraponaebeje pewënë cepo. Itsawiriacepo pijinia piapiajawa pecuibosixatatsinexa, pecobetabuyaweretobejeyajawa.
Cetura pemomoxi
Sarapijiwami petëpaecujinae, Abraham nacojioba Ceturawënëwajawabelia. Xaina bajarapowata 6 ponëbeje pexi pebijiwi. (Taema Gén. 25:1,2.) Cetura pexijawawerena pepitsaponaewi daxita naexana árabemonae, madianitawinua. Bajarapamonae pejinawanapaenacua, ëpetsewitusatonacua tsarucae. Bajarapa-ira nacua boca Canaán nacua pemutuabereca. Gén. 37:28-jawata nacayapëtaeya-exana pacuenia José Abraham-pijinë pemomo caponatsi Madianitawi Cetura pemomoxi Egipto nacuajawabelia pecanajetsinexatsi.
Chivo – Cabra
Taema cabrajume.
Concubina – cotocaewi pepitsiwa
Bajayatami itsajawata itsanë xainaejitsipa caewa pepopijawa, itsawa pijinia beweliawa penatocomuatsixae amoneya petonacuenebiwanexatsi pijabojawata. Bajarapitsiwaxi wënëruba concubinawa wowaijumeta. Powa pepopijawa ayaijamatabëcuenewa concubinawaxiwecua, bajaraxuata judíowinexa concubinawa, cotocaewi pepitsiwa, apocuenejëpae pepopepitsiwa. Copiaya pepitsiwa pepopijawa tsabiabi. Pebi najëpaeya ewetabeje bajarapowabeje picani. Saya pamonae pexi xaina pepopijawata, pexainaenë taeyabiaba ayaijamatabëcuenewi concubinawa pexiwecua. Itsiata maparucaeje itsacuene Jesucristo nacatocopata. Taema Mat. 19:3-8, 1 Tim. 3:2, 12, Tito 1:6
Cuervo
Bajaraponë petsaebianëyo pacuenia uni picani, itsiata pepunaponaponaenëyo bajayajebi. Ajamatabëcuenesaë bitso peponaponaenexa bajayajebi. Bepijiayo apocueranae, pacuenia sewesewebo. Bajaraponë petëpaenë pewi xaeyabiaba.
Dajubibocodoro
Bajayatami judíowi mera jotabiaba itsacuenejawaxita. Bajarapamonae natonacueneba pijacuenia ovejabocotomi, bedoruanë pexanaecuenia. Itsajawata natonacueneba chivobocodoruanë-ata. Bajarapadoruanëta pebijiwi mera jotabiaba.
Bajarapitsidoroxita pijinia xaniawaetabiaba vinoranë. Bajarapamonae bajarapadoruanë bajayajebi pecanacuenebabiabixae, belia yapëtane piabejecuene vinoranexa, itsa baja niona. Bajarapavinoranë caponabiaba tomara imoxoyojawabelia, bajarajotalia pecanajetsinexa. Jumaponabiaba vinoranë pewënëtsidoruanë, pacuenia taenutame dibujojawata.
Diezmo
Diezmo itsa rajuta, exana mapacueniaje: Caejawayo diez xuayomibejeyajuwënëmijawa rajutapona. Canacopata pijinia nueve xuayobeje pijajawanexa. Nexata itsa xaina diez xuabeje, rajuta caejawa ofrendacuenia. Canacopata pijinia nueve xuabeje. Orijibia itsa xainaejitsipa cien xuabeje, rajutsipa diez xuabeje. Canacopatsipa noventa xuabeje. Bajarapacuenia itsa xainaejitsipa mil xuabeje, nexata rajutsipa cien xuabeje. Canacopatsipa pijinia novecientos xuabeje. Bajaraxua pewënë diezmo, itsajume décima parte.
Dioso
Bajarapacuenia itsa yaquinarutatsi Dioso pewënë mapabaxutota, nacatsitajëta «El-jume» hebreojumeta. Bajarapahebreojume nacayapëtaeya-exana Dioso piayaijamatabëcuenenëcueneyabara. Xaniawaetsia orijibia neyapëtaenexa bajarapajumeyabara, taema petaxuxuabiliwaisita Dioso pewënëanë yabara.
DIOSO
Mapawënë Dioso pewënë hebreojumeta «Elohim», pejaiwënë. Nexata xaniawaetsia wajayapëtaenexa itsa canacueneba «El», itsa jume «Elohim» hebreowi pijajumeta Dioso Pejumeliwaisibaxutota Perujuliwaisibaxutota, penawecua-aitothiacuenia payaquinarutajë.
Itsa hebreojume canacueneba «El» Dioso-nexa, nexata payaquinarutajë «Dioso». Najëpa saya pacuenia yaquinaruta Dioso Pejumeliwaisibaxutota Pejanaliwaisibaxutota. Juya itsa hebreojume canacueneba «Elohim» Diosonexa, nexata payaquinarutajë «DIOSO». BajarapaElohim-wënë pejamatabëcuene yapëtanetsi Dioso caenë-ata, itsiata acueyabi ponëbeje. Baitsi bajarapawënë najumejëpa waxaitsi wajajumexi. Pacueneta itsa ayai-bitsaëto «pëbë», bajaitsi. Itsiata itsa caenëyo «pëbëto», jaitsi. Bajarapacuenia pijinia itsa ayaibitsaëto dujuai jaitsi, itsa caenë «dujuainë», jaitsi, itsa ayaibitsaëto «amai», jaitsi, itsa caenëyo «amaito». Nexata hebreojumeta itsa «Elohim», jai, nayapëtane apocaenë, pepobitsaëto yabara. Itsa jumaitsi «El» nayapëtane caenëyabara. Dioso Peliwaisi wajanacujarubijawata yapëtanetsi pacuenia Dioso, caenë-ata, itsiata acueyabi ponëbeje; Dioso pepoDioso, Dioso pexënato, Dioso Espíritu, baitsi Espíritu Santo.
Dioso pecotia
Bajarapacotia yabara anijajamatabëcuenebeje xaina: Caejamatabëcuene itajëta Dioso ayaijamatabëcuenenëcuene, itsajawa pijinia Dioso pianeconijibinëcuene. Pacuenia pecotia napebeta, bajarapacuenia tanetsi yapëxanepanaeya Dioso ayaijamatabëcuenenëcuene wajawënëxaniatsinexa. Pacuenia-nua pecotia nawecuatsata pitaquirijawa, bajarapacuenia Dioso pianeconijibinë nawecuatsatabiaba daxita pibisiacuene pexanaewi. Itsawënë pijinia bajarapacotianexa wowaijumeta, «gloria».
Dioso peEspíritu – Espíritu Santo
Dioso raja caenë-ata acueyabi ponëbeje tsaponaponae; penamataxainaenë Dioso Paxa, pecotocaewinë Dioso Pexënato, acueyabinë Espíritu Santo (PeEspíritu). Daxita caenëxae acuenebi wajajumaitsijawa Dioso pijapaxa, Dioso pijapexënato, Dioso pija-espíritu, wajaijawa. Bajaraxuata itsa Dioso peEspíritu jaitsi, yabarajaitsi pepoDiosoyabara. Baitsi apopexainaeyajuwënëjawa Dioso, bajarapacuenia apopecobecowënë-ata. PepoDioso cajena, penaitajëtsinë espíritucuenia. Bajarapacuenia peyaquinarutsijawata itsa jumaitsi: «Espíritu Santo bajaraxua exana», itsajume «Dioso peEspíritu bajaraxua exana», itsa jai, nacayapëtaeya-exana pacuenia pepoDioso exana bajaraxua. Baitsi Dioso apo-itorobi bajaraponë peto-exanaenexa, pepoDioso saya exana.
Espíritujume itsa jai wowai mapajamatabëcuene xaina: «Apowajataecapanepaenë yabara. Apotaecapanepae-atatsi itsiata espíritumonae xaina pejamatabëcueneliwaisi, pecanaëjëtsicuene, pecuaicuaijaicuene, penato-itapetsicuene, piasiwacuene, pianaepanaecuene-ata pacuenia jiwi», pejaijamatabëcuene. Daxita bajarapacuenia cajunua espíritujumejawabelia yabara-cuaicuaijai-ata Dioso pe-espírituyabara, ángelewiyabara, dowathimonaeyabara, jiwi pe-espíritu-atayabara.
Pepacuene jiwijumejawabelia espíritujume pitsapa tsaena «pejumape» pejaijume. Jiwijumeta pejumapenë pexaniacuene apopexanaenë tsabiabi. Bajaraxuata apocanacuenebi Espíritu Santonexa bajarapajumeyo.
Dioso najamatabënapita
Dioso aponacofënëtsi picani itsacuenejawayo-ata. Bajarapacuenia itsa cuaicuaijai Dioso yabara hebreojumeta pecuaicuaijaiwi, yabarajumaitsi Dioso penajamatabëcuene-itajëtsijawanexa jiwijawabelia pitaxuto-tsoniataejawatsi, pexaniacuene peto-exanaenexa. Matapania baitsi exanaejitsia pacuenia tajëwelia najumecapanepaeya jumaitsi pexanaenexa. Wainë pepanepaexae bajayajebi pejumaitsicujinae, jiwinexa tsaena tsitatsi Dioso nacofënëta. Bajaraxuata Dioso Peliwaisi peyaquinaewi jumaitsi tsabiabi, «Dioso najamatabënapita», jai tsabiabi. Itsiata Dioso aponacofënëtsi. Saya tsiwajënaecaëjëta pamatacabi exanaejitsia pejumaitsicowëya.
Dioso Pewënëanë
Xaniawaetsia neyapëtaenexa daxita Dioso pewënëanëyabara, pawënëanë hebreojume pecuaicuaijaiwi canacuenebabiaba, taema Dioso pewënëanëpijitabla petaxuxuabiliwaisita.
Dioso pijabaula
Bajarapabaulajawata Dioso pitorobicuenia Moisés Aarón-beje xaniawaetabiaba pa-ibopanabejejawata rubena daxita paliwaisi Israel-pijinë pemomoxi jumecowënëtawanapaejitsia Dioso juya peto-exanabiabinexa najumecapanepaeya pejumaitsicowëya penajumeliwaisicajonejawata. Bajarapa-ibopanabeje pebuatabiabixae bajarapabaula-ënëta, nexata bajarapabaula wënëruba, «Penajumeliwaisixaniawaetsibaula». Bajarapabaulajawata xaniawaetabiaba ibopanabeje itsajota Dioso yaquinaruta petonajumecopatsiliwaisi, maná pewënëtsi canalitoyo, bajarajota yajawa xaniawaeta Aarón pijanaebomi penamatonotsinaebo. (Éxo. 16:32; Heb. 9:4 Núm. 17:10).
Dioso pijabaula pematapa
Bajarapamatapa pewënë «Dioso jiwi pijaneconimi pesiwajamatabëcuenecaewi taxunae». Itsawënë pijinia «Dioso jiwi pitaxutotsoniataetaxunae». Wowaijumeta wënëruba «propiciatorio». Caewai canacujitsia sacerdotewi pepopenamatacaitorobinë beyaxubabiaba dajubi jiwi pijaneconijamatabëcuene. Nexata bajarapadajubijana caponabiaba Lugar Santísimojawabelia, pejumatsicabinexa Dioso pijabaula pematapajumata. Nexata Dioso bajarapajana petaejawata, itaxutotsoniataeya najamatabëcuenecataita caewaicuenia israelitawi pewerebiabiyaniwa pijaneconijamatabëcuene. Bajaraxuata wënëruba bajarapataxunae, «Dioso jiwi pijaneconimi pesiwajamatabëcuenecaewitaxunae». Itsiata dajubijana itsa apojumatsicabi tsipae, nexata Dioso aposiwajamatabëcuenecaewi tsipae Israel-pijinë pemomoxi pijaneconi, penaneconitsia-exanaeyaniwa. Rowialia saya naneconitsia-exanaejitsipa petocaëjëtsicuenia penajumeliwaisicajonejawa apopejumecowënëtsixae.
Egipto nacuapijiwi pena-ewetsicuene
Bajayatami Egipto nacuapijiwi saicaya nawecuanabane José pijamonaewecua, tsipaji Jacob pexi, hebreowiriawi, oveja pewetsiwi. Nexata Egipto nacuapijiwi bajarapitsiwi taeyabiaba itajunawiaya. Taeyabiabanua beweliajamatabëcuenewi. Bajarapacuenia Egipto nacuapijiwi xaina saicaya pena-ewetsicuene, nacacujunawiaya pejinawanapaenexa oveja pewetsiwiwecua. Bajaraxuata apojitsipae pimoxoyotsijawa José pijamonae, penacopatsiyaniwa bepenaxuirabinëcuenia penataejawa.
Emanuel
Isa 7:14 Emanuel: Mapawënë pejumaitsiwënëje: «Dioso nacayajawa», pejaiwënë. Itsa Isaías yabaracuaicuaijai peyanacua-ewetsinë Acaz-jawabelia penacueto penaexanaejawanexa pejanawata, yabaracuaicuaijai anijanacuetobeje yabara. Caenacueto penaexanaejawanexa papejanawa Acaz peyapëtaewatsijawabelia. Bajaraponëyo penaexanaecujinae, wënërubijitsia Emanuel. Bajarapacuenia wënërubijitsia Acaz peyapëtaenexa pexaniajaicuene Dioso pewetsijawa Judá nacuapijiwi. Bajaraxuata Asiria nacuapijiwajabitsaë cuene-amoneyabijitsia-ata, Dioso nacayapëtaeya-exana bajarapaEmanuel-wënëta pacuenia itsamatacabijawabelia naexanaejitsia Jesús bajarapanacuajawata. Picani Isaías tsitatsi becaenacuetoyabara. Pacuenia jumaitsi Acaz-jawabelia copiayanacuetoyabara, tocopiapatatsi baja.
Itsiata Pejanaliwaisibaxutota Mat. 1:23-jawata nacayapëtaeya-exana pacuenia paliwaisi Isaías wajunupaeba Acaz-jawabelia, apocaenacuetoyabara. Mateo nacayapëtaeya-exana pacuenia itsanacueto naexanaejitsia itsa pejanawajawata, icatsia pebijawabelia apopenaperabëquenetsiataewa, penacoxitsijawanexa penacuetonëyo. Pacuenia-ata wënëruba copiaya panacueto Emanuel-wënë, catocaewi nacueto-ata jamatabëcuene-itajëtsijitsia Dioso peyajawajawa pijajiwi. Baitsi bajarapacotocaewi nacueto pepoDiosonë. Nexata xaniajai Dioso yajawa pijajiwi. Taema Mateo 1:23, Lucas 1:27.
Escudo
Bajayatami wajabitsaëwi pacujinae nawajabitsaëtsijitsia, itsajawata caponabiaba anija-escudopanabeje, pijawajabitsaëwi pewecuanacaranatsinexa. Cae-escudo, tsiquiri-escudoyo. Namaxëcëtabiaba, pijawajabitsaë espadata pecacuatsiyaniwatsi, pe-ucutaxuabiyaniwatsi-ata. Itsa-escudo pijinia ayaijawa. Bajaraxua daxitanë penaperabëcaranatsinexareca, pejorojoronaeyaniwatsi cuererebota, yawinato-ata. Bajarapapecunua-escudopana namatawenonabiaba petocaponaenënexatsi.
Faraón
Bajayatami Egipto nacuata wënërubabiaba pepopeyanacua-ewetsiwi Faraón. Apopepawënë, saya bajarapacuenia jumaitsi pijataxunae yabara pacuenia presidentenë jai tsabiabi wowai, pacuenianua resguardojawa, «gobernador cabildonë», jiwi jai tsabiabi, bajarapijinia pacuenia, «Faraón», jaitsi tsabiabi peyanacua-ewetsiwi Egipto nacuapijiwimi.
Ficol
Bajayatami filistea nacuapijiwi wënëruba-biaba pepopenamatacaitorobinë pijajiwi wajabitsaëwi «Ficol». Apopepawënë, saya bajarapacuenia jumaitsi pijataxunae yabara, pacuenia «comandantenë», jai tsabiabi ejercitopijiwi. Nexata paFicol najumeliwaisicajunua Abimelec-yajawa Abraham-jawabelia Gén. 21:22-jawata, nacayapëtaeya-exana saicaeya Abraham peponaponaematacabita. Itsiata paFicol Isaac barëcuaicuaijai Gen. 26:26-jawata, saicayanë pijinia copiaya ponë barëcuaicuaijai Abraham-pijinë.
Filacterias
Pamatacabijawa israelitawi jinawanapa Egipto nacuata, bajarapamatacabijawa nacëbabiaba itsacuenejawanëta, pacuenia Egipto nacuapijiwi, penayajiwitorotsinexa pibisiacuene petocopiapatsiyaniwatsi. Bajarapacuenia pijinia israelitawi exanabiaba pecuenecowëya Egipto nacuapijiwi. Bajarapapexanaecuene Moisés tsaena pecopiarucaeya-exanaenexa, itoroba itsacuenia penacëbabiabinexa. Itoroba penacëbabiabinexa Diosojumeliwaisijawawerena pejucaeliwaisixi, peyajawa-ënëaponaecajaxi. Bajarapacuenia exana bajara-pamonae penacofënëtsiyaniwa Dioso petonajumecopatsiliwaisitsi. Maparucae-ataje judíomonae bajarapacuenia nacëbabiaba pacujinae wajëcaejitsia Diosojawabelia. Bajarapanacëbicajaxi ya-ënëa pona pequionaebaxutoxi. Bajarapabaxutoxijumata yaquinaruba paliwaisianë juca Diosojumeliwaisiwerena, Deut. 11:13-22, Deut. 6:4-9, Éxo. 13:11-16, Éxo. 13:1-10. Bajarapanacëbicajaxi pewënë «filactérias».
Filisteomonae
Bajarapamonae jinawanapa Filisteawënë nacuata, bajaraxuata pijanacuawënëcuenia wënëxaina filisteomonae. Filistea nacua eca Mediterraneo manuamene-itapa imoxoyojawata, Canaán-yajuwënënacuami.
Gloria
Gloria pejaijume caejamatabëcuene apoxainae. Nacayapëtaeya-exana pecotia yabara, pecuene yabara, pesaëyabara-ata. Jiwijumeta, gloria itsa yaquina bacapitsapa mapacueniaje: «Jehová pijapeniweniwenaecotia», pejaicuenia. Gloria itsajai wowaijumeta jumaitsi Dioso yabara, apojumaitsi ëpecotia yabara. Gloriajume nacayapëtaeya-exana: Diosos pecuenecaëjëpaenëtsicuene, Dioso pecuenenamatamotsinëcuene, Dioso ayaijamatabëcuenenëcuene-ata daxitawecua. Bajarapacuenia wajacuenetaejawata Dioso pexanaecuene, nacatsita ayaijamatabëcuenenë. Nexata «ayaijamatabëcuenenëmë», siwajamatabëjaitsi bëpënëa. Bajaraxua-ata pewënë «gloria». Baitsi pacuenia pecotia taejunuatsi pebutujaijawata, bajarapacuenia Dioso pexanaejawa wajataejawa. Bajaraxuata wënëruba gloria. Taema Éxo. 16:7, Éxo. 24:16-17, Mat. 6:13; 16:27, Lu 2:9; 23:47, Heb. 1:3.
Harán tomara
Bajarapatomarami bajayata eca Eufratés menematatujawabetsia, Ur tomarawecua. Bajarapatomarayo apo-ecae Canaán nacuata. Eca Mesopotamia nacuamita. Bajarapa-tomarayota bajayatami jinawanapa arameowi. Bajarapamonae Diosowecua nawajëcabiaba merawipijijuametojawabelia. Bepijadiosocuenia tane. Bajarapatomaramijawata ponapona Abraham, paxapijinëyajawa. Bajarajota tsaena tëpa paxapijinëmi. Bajarapatomaramita pijinia ponapona Rebeca pematapijinëmi Labán.
Hebreonë – Hebreowi
Hebreojumeta, «hebreonë», itsa jai, mapajamatabëcuene yabara jumaitsije: «Heber-pijinë pemomoyajuwënënë», pejaijamatabëcuene. Taema Gén. 11:10-26-jawabelia. Bajaraponë Heber Sem-pijinë pemomoxiyajuwënënë. Sem-pijinë, Noépijinë pexënato. Hebreowi cuaicuaijai hebreojume. Bajarapajumeta hebreowi bajayatami toyaquina Dioso pejumeliwaisi. Itsawënë pijinia hebreowinexa judíowi, itsa jume Israel-pijinë pemomoxi, jai tsabiabi. Itsa jume israelitawi, itsa jume maparucaeje Israelí, jai tsabiabi. Wënënawitsi-ata itsiata saya caewiriawi yabara jumaitsi.
Higocuai
Judíowi notabiaba higueranaecuai; bajarapacuai pewënë higo. Itsawënë pijina «breva». Notabiaba pexaeyabiabinexa. Tsixanepanatsi bitso bajaraponaecuai. Bajaraponae higueranae bitso apo-apia, itsiata pexania-itacaënae xaina, tsipaji baxuxatajai. Higueranae nacuaitabiaba anijatobeje caewai canacujitsia. Marzo juametota bajaraponae pejanabaxutonë juwabiaba, penacuaitsinexa copiayapijinacuaitsi. Nexata bajaraxuacujinae junio juametota icatsia nacuaitabiaba.
Itsa baja nawereta bajarapacuai peneta tsobia, itsajawata purana. Bitso xaica, tsapatsapapanua. Bajarapacuai becumalibë picani, jane baitsi apo-ataja. Saya caëjëpa pexaejawa yamatabocua. Nexata itsajawata xane cae-asiaya. Itsajawata pijinia ejebabiaba icotiata, tsipaji itsa pepuanionae, xaniawaetsia, ajamatabësaë tsabiabi, jebi-ata bajayajebi. Nexata bajarapacuenia daxitawaijebi xanepana wajaxaenexa higocuai abejenejewa. Itsajawata, namuto itsa exana tajëjawabelia, bajarapanionaecuai natocaponabiaba pexaenexa namuto-epatua.
Horno
Bajayanacuapijiwimi pan pecasebabiabijawanënexa; nato-exanabiaba tsaena atsata pefaratsiboyo, bajarapabo-ënëta pesebinexa pijapan-jawanë. Bajaraxuanë wënëruba wowaijumeta «horno».
Iboto petsimata-epanaxuabijawa aceiterata
Bajayatami itsapacujinae jiwi najumecapanepaeya naliwaisicajunua itsanëjawabelia, itsajawata nutabiaba iboto penajamatabënapitsinexa penajumeliwaisicajonejawami bajarapataxunaejawata. Nexata bajarapanutsi-iboto pexenetsijawata najamatabënapitabiaba penajumeliwaisicajonejawami, pexanaenexa pejumaitsicowëya najumecapanepaeya. Jacob itsa tsimata-epanaxuaba aceiterata bajarapanucae-iboto Dioso pewënëta, najamatabëcuene-itajëta petotsatsijawa bajarapataxunae Diosojawabelia saicaya. Taema Gén. 28:16-22.
Incienso petajuitabiabi-altaryo
Bajarapa-altar nucabiaba bajayatami Dioso pijacarpabo-ënëta, copiaya peyatu-ucutsi-ënëjawawereca, peyatu-ucutsipana pënë-wereca. Bajarapa-altar-jumata tajuitabiaba inciensopërëjawaxi anijatobeje caematacabi canacujitsia; bajayacunua, itsajawa caniwiyo. Bajarapa-altar canacujitsita nuca Zacarías itsajota angelenë yapëtaeya-exana-nucatsi pijawa pexënato pexainaejawanexa. Lu 1:8-17.
Israel-wënë
Israel-wënë xaina mapejumaitsiwënëje: «DIOSO raja piacuenesaënë», pejaiwënë. Nexata Jacob itsapacujinae ángelenë wënërubatsi Israel pebarënatorobijawata, jamatabëcuene-itajëtatsi pejanajamatabë-cuene pexainaejawanexa. Baitsi Jacob-wënëmi copatsijitsia pijaperujucuenemi yajawa, xuanëmita naewetabiaba pijacuata. Aeconoxae Israel itaxutuajamatejemajitsia DIOSO piacuenesaënëcuene peyawenonaenexatsi daxitajawalia.
Jacob-wënë
Jacob-wënë xaina mapejumaitsijamatabë-cueneje: ‘Penaxainaeyabinë itsanë pijataxunae,’ pejaiwënë. Bajarapacuenia wënërubatsi tsipaji taxusalibëwaetabiaya pematapijinë naexana. Bajarapacuenia penaexanaejawa jamatabëcuene-itajëta judíowinexa bajayatami itsamatacabijawabelia bajaraponë yamaxë-itojorobiaya pepitsinexa pematapijinë pijataxunaemi. Gén. 25:26
Jehová
Bajarapawënë itsawënë Diosonexa. Baitsi pepawënë Dioso Israel-pijinë pemomoxinexa, penajamatabëcuene-itajëtsinexa daxitamatacabi peyamatacabiatsitecaenëcuene, pejamatabëcueneitajëtsinexanua Pepopetuxanenë daxitanexa. Bajarapawënë Dioso nawënërubabiaba itsapacujinae naliwaisicajonejitsia jiwijawabelia. Mapejumaitsiwënëje: «Daxitamatacabi peyamatacabiatsitecaenë». Baitsi Ponë aponaexanae, apotëpae-ata tsane, Ponë pitawanë tsabiabi, pejaiwënë. Bajarapejumaitsijamatabëcuene bajarapawënë Diosowënë. Judíomonae bitso ajume-ura tsabiabi «Jehová», pejaijawa itsa yabaracuaicuaijaijitsia Dioso, itsa junatsijitsianua pewajëcaejawata. Bajaraxuata canacuenebabiaba itsawënëanë. Itsajawata jumaitsabiabi: «Dioso», jai tsabiabi. Itsa Jume: «Tajatuxanenë», itsa jume «Wajatuxanenë», jai tsabiabi. Tajatuxanenë itsa jai, najamatabëcuene-itajëtabiaba pacuenia Dioso pepopitorobinë tsaponaponae daxitawecua. Baitsi pepoPetuxanenë.
Jehová pija-ángelenë
Bajayatami Jesús penaitajëtsiwajënaeya mapanacuataje Maríata jiwi pecapanepaenënexa, itsajawata naitajëtabiaba be-ángelenëcuenia. Wajayorobijawata Dioso Pijume Perujuliwaisibaxuto bajarajota tanetsi pacuenia Dioso Pexënato itsajawata naitajëtabiaba jiwijawabelia be-ángelenëcuenia, petsipaebinexa pecaponaeliwaisi Diosojawawerena. Itsa Dioso Pexënato naitajëtabiaba ángelenëcuenia, Dioso Pijume Perujuliwaisibaxutota jiwi jumaitsi tsabiabi Jehová pija-ángelenë; jai tsabiabi. Juya itsamonae jumaitsi tsabiabi ángelewi; jai, ángelenë; jai, itsa jume Diosojawawerena peponae-ángelenë, jai tsabiabi.
Joyas
Pexaniawiria-itabëtsi-ibotoxi yabara wowai bajumaitsi, «joyas», bajai, tsipaji nawita pijapitabëtsicuene. Joyas itsajai wowaijumeta itajëta acueyabi pajamatabëcuenebeje: pexaniabutujaijawa, penamata-motsijawa, bitso piatajajawa yabara-ata.
Juez-monae
Bajayatami Josué petëpaecujinae, itsa abaxë apotaxuxuabi pepopeyanacua-ewetsinëcuene (reynëcuene), nexata Israel-pijinë pemomoxi xainabiaba peyanacua-ewetsinëtsi. Bajarapamonae pewënë juez-monae. Itsiata bajarapajuez-monae apocuenejëpae pajuez-monae xainatsi maparucaeje wowaiwi tuatuajëta, tsipaji nawecua-aitothiabeje penacuenebicuene. Bajayata pajuez-monae yanacua-eweta israelitawi, xaina cuatro pajamatabëcueneliwaisibeje. Copiaya bajarapajuez-monae matacapona Israel pemomoxi pebarënawajabitsaëtsijawata, pewecuacapanepaenexa pijawajabitsaë pecobewecua, pamonae bajayajebi bejiobia-exanawanapatsi. Pecapanepaecujinae, bajaraxuacujinae bajarapajuez-jiwi yanacua-ewetabiaba pecapanepaewi. Pewetsijawata bajarapamone, itsapacujinae itsanë neconitsipatsi itsamonae, bajarapajuez-monae liwaisi canaëjëtabiaba Dioso petonajumecopatsiliwaisi Moisés-pijinëta, peyapëtaeya-exanaenexa xaniajaiya penaneconitsinëcuene. Pecopiarucaejamatabëcuene-liwaisi, bajarapajuez-monae muxujiobabiaba Israel pijinë pemomoxi pecopaba-othopaenexa jumapecataeya pexanaenëanëjawabelia penawajëcabiabiyaniwa, ëJehovájawabelia juya penawajëcaenexa. Bajarapacuatro pajamatabëcueneliwaisibeje baxaina Israel-pijinë pemomoxi pewetsiwi juez-cuenia bajayatami.
Jumapecataeya pexanaewi pijasacerdotewi
Mapitsisacerdotewi apoxainae caenacuenebicuene Aarón-pijinë pemomoxi penacuenebicuenebeje. Aarón-pijinë pemomoxi tonacuenebawanapa pepoDioso petonajumecopatsicueniatsi. Juya pasacerdotewi jumapecataeya pexanaewi petonacuenebiwi peliwaisita matacapona jiwi pejumecowënëtabiabinexa dowathimonae, itsa jume pijawiriamalicai jumaitsitsi jumapecataeya pexanaenë pewënëta. Sacerdotejume itsa canacueneba wowaiwi, Israel-pijinë pemomoxi-ata, bajarapajume yabarajumaitsi, «ponë jiwi peto-exanabiabinë pijadiosowijawabelia petonajumecopatsicueniatsi, ponënua peyapëtaeya-exanaenënexa jiwijawabelia xua bajarapadiosonë tonajumecopatatsi». Nexata sacerdotejume xaina anijajamatabë-cuenebeje: «ponë jiwi peto-exanabiabinë pepoDiosojawabelia petocaëjëtsicueniatsi, itsa jume jumapecataeya pexanaenëjawa-belia peto-exanabiabinë.» Najuacuenebeje najëpa sacerdotewinexa. Egípto nacuapijisacerdotewi yawenonabiaba Egipto nacuapijiwi pewajëcabiabinexa jumapecataenëanëjawabelia, pacuenia matacabipijijuametojawabelia, bajarapacuenia Nilo menejawabelia-ata. Bajarapasacerdotewi yapëtaeya-exanabiabanua paliwaisianë tonajumecopata pejumecowënëtabiabinexa.
Justo
Justojume jiwijumeta mapajamatabëcuene xaina. Pexaniajainëcuenia pecanaëjëtsinë: Bajarapaliwaisiyo yabara wowai capitsapa «justo». Bajarapajumeyo xaina mapajamatabëcueneliwaisibeje: 1) Pexaniajainë. 2) Pexaniajaicuenia pexanabiabinë. 3) Pexaniajaicuenia petocanaëjëtsinë peneconitsiwitsi, pexaniajaijawa yabara, penajumetsënëtsijawa yabara-ata. 4) Cotocaewijawa pijinia najëpaeya petaenë jiwijawabelia. Apoxainae piasiwacuene caejiwijawabelia.
León
Mapitsinewëthëje Israel nacuata jinawanapa. Bajaraponë petsobianë, itsiata pinijinë wajanacuapijinewëthëwecua. Bajaraponë pijinia itsacuene pexainaenë. Baitsi itsa siwajirewa pexaenënexa, xërëjaiya waetaba. Asaëbeje bitso. Cuenecaëjëpatsi perujuainë pejumajirewijawa, tsiquiribacayo-ata.
Leopardo
Bajaraponë newëthë pitaneyaquijainë. Itsiata apojëpae mapanacuapijinewëthë. Baitsi asipia, nexata babitsojina. Mapawirianewëthë jinawanapa, itsanacuanëjawa, Israel nacuata-ata.
Levadura
Bajaraxua levadurawënëjawa bamatajërëaba pan-matabëjawabelia, pefufunaeya-exanaenexa bajarapamatabë. Pefufunaematabë capitsapabiaba petotowipan. Levadurata apopematajërëabimatabë capitsapabiaba pecarëcarënaepan.
Levadurata apopematajërëabipan-pijifiesta
Pamatacabi israelitawi pitsapa Egipto nacuawecua, bepijiayocuenia pitsapa. Nexata acuenebi israelitapijipetiriawi pematabëanë pematajërëabinexa levadurata, petotowipan penamitsasebinexa namutua pexaenajetarubenaenexa. Nexata pan-matabë levadura matajërëabinejewa bepijiayo namitsasebaxuaba pecarëcarënae-pan namutojawa pexaenexa. Nexata itsa israelitawi exanabiaba bajarapalevadura-matajërëabinejewa pexanaepan-pijifiesta, najamatabënapitabiaba pacuenia Jehová bepijiayocuenia pecapanepaejawatsi Egipto nacuapijiwi penamatacaitorobabiabi-cuenemiwecua, pebejiobia-exanawanapae-jawamitsi-atawecua.
Linopana
Bajarapawiriapapaëbërëpana bitso peyacueyacuecaejawa daxitawiriapananëwecua, bajayata xuanë canacueneba penaxatabijawanënexa. Bajarapapanata exanabiaba sacerdotewi penaxatabijawanënexa. Bajarapapana pexanaenexa canacueneba piapiabotojawanë linowiriabotonë. Linobotonë penamatonotsicujinae, itsa niona, nexata meniajeba merata bajarapabotonë pejumaboco pewecuanotsinexa. Nexata notsijitsia ëpepajawanë. Bajaraxuanëta firaba pemaëtonë pejucaenexa, bajarapamaëtonëta cueyabiaba pepananë.
Lobo
Bajaraponë unupijinë pianaepanaenë. Benamo picani itsiata pinijiwiriawi, matatoxenetsia bitso pianaepanaenë. Pacuenia namoxi nacatowerenebiaba wacaraxi, bajarapacuenia pijinia lobomonae toxaeyabiabatsi Israel nacuapijiwi pija-ovejamonae. Bajarapamonae caenë pija-epato apoponaponae. Pepabitsaëto najuajinawanapa, bejamatabë veinte ponëbeje caebitsaëtota. Bajaraxuata ayai bajarapamonae pecuene-amoneyabinexa ayainë-ata pexaenexa.
Lugar Santo
Bajarapajume pejumaitsijume: «Peyaiyatae-taxunae Diosonexa», pejaijume. Bajarapatusato Dioso Pijacarpabo-ënëyatu-ucutsijawa, penamataxainae-ënë. Bajarapa-ënëta joneyabiaba sacerdotewi caematacabi canacujitsia, pitayotsicandelabro pewënëbi-nexa olivacuaipiji-aceiterata, petuxujuwi-inciensojawanua petajuitabiabinexa.
Lugar Santísimo
Bajarapajume pejumaitsijume: «Pepopeyaiyataetaxunae Dioso pepopijataxunaenexa daxitataxunaenëwecua», pejaijume. Bajarapataxunae Dioso Pijacarpabo-ënëjawa, cotocaewi peyatu-ucutsi-ënë. Bajarapa-ënëjawata buatabiaba Dioso penajumeliwaisi-xaniawaetsibaula. Bajarapa-ënëlia joneyabiaba ëpepopenamatacaitorobinë sacerdotewi caeto caewai canacujitsia, pejumatsicabinexa Dioso penajumeliwaisixaniawae-tsibuala pematapa dajubijanata.
Mandrágoracuai
Bajayatami petiriawi jitsipabiaba pexaejawa bajarapacuai penacoxitsinexa, powaxi mawecowi. Bepewaëcuenia xaeyabiaba. Itsamonae pijinia xainabiaba pejitsipaenexatsi, pacuenia itsamonae baxaina naecono.
Matapijinëjamatabëcuene paxa pewënamuto
Bajayatami pamonae pexi xaina bitso tonamatamotabiabatsi copiaya pexainaenë pebi. Copiaya penaexanaenë pebi, tsicarucatsi pepitsinexa paxa pijataxunae, bajarapacuenia pijawiriamaëto pecanacopatsinexa, pecobecowë-ata pecanacopatsinexa anijajawanë pematatsënëa. Nexata xuabeje Esaú canajetaxuaba matapijinëjamatabëcuene mapacuenejawanëje: 1) Esaú pijasalinaiwiriamaëtojawalia Cristo penaitajëtsijawaminexa. 2) Paxa pewënamuto besacerdotenëcuenia petonacuenebijawaSminexa pijamonae tuatuajëta. Baitsi daxita pijamonae petotajuitabiabijawaminexa dajubimonae altar-jumata pijaneconijamatabëcuene. Pecujarubinëminexa Dioso Peliwaisi pijamonaejawabelia. 3) Paxa pewënamuto pecanacopatsijawaminexa pecobecowë anijajawabeje tsaponae. 4) Itsajamatabëcuene pijinia xua Dioso najumecapanepaeya jumaitsi baja pamo Abraham-pijinë, paxa Isaac-jawabelia peyawenonaeyapaebijawatsi picani. Daxita bajaraxuanë Esaú bijiaya naëcota, jumeaebiaya Dioso. Bajarapacuatro pajamatabëcueneliwaisibeje canacopatabiaba pexënato pebi pepomatapijinë, paxa pewënamuto.
Matapijiwi pecuene-itajëtsijawatsi paxajiwi
Pacujinae paxa petëpaewajënaeya tsiwajënaecuenewajunu-itajëtsijitsia pexënato matapijinë, bajarapacuenia exana pexënatojawabelia pecanacopatsinexa xua Dioso cuenewajunupaeba pamopijiwimijawabelia peyawenonaejawanexatsi bajayatami. Bajarapacuenewajunu-itajëtsijawa towajunupaeba Dioso petoyawenonaenexatsi pexënato pexainaponaenexa pexi, dajubi-ata ayaijawa, petonaxaniabinexatsi pe-ubijawanë, pecobecowë-ata, xua xaina petopitsapaponaenexatsi xaniawaetsia daxita pejuyapijiwiwecua matapijinëxae. Bajaraxua yabara paxajiwi pexaniacuenia cuenewajunupaeba Dioso pewënëta pexënato pepomatapijinë.
Mallawiriatrampa – baratsui peyataicaebu
Bajayatami israelitawi canacuenebabiaba peyataicaebuxi baratsui. Copiaya bajarapabuxi tsiwajënaeruta. Bajaraxuacujinae baratsui yorotabiaba bajarapabunëjawabelia. Nexata bajarapacuenia baratsui taicabiaba. Petaicaenëxi itsajawata canajetabiaba, itsajawanua xane.
Mesajawata pan pejebabiabijawa Dioso Pijacarpabota: Exo. 25:23-30, Lev.24:5-8
Itsamonae canaëjëta mapitsimesajawa tsaena nuca Dioso pijacarpabo-ënëta. Bajarapitsimesajumata jebabiaba pan-jawanë sacerdotewi caesemana canacujitsia, Sábado matacabita. Orijibia neyapëtaenexa natoyorobare athëbëyo pawënëbaxutobeje wënëruca.
Moab – moabitawi
Moab raja Lot pexënatoyota matapijiwata penaitajëtsinë. Ponëyo xaina paxa Lot-jawabelia (Gén. 19:30-38). Moab-wënë hebreojumeta pejumaitsijume: «Paxa pewënëta pijawiriamaëto pecanacopatsinë», pejaijume. Bajaraxuata Moabitawi jaitsabiabi pemomoxi yabara. Saya pewënëcuenia nawënëruba pijawiriamaëto. Panacuajawata jinawanapa moabitawi bajarapanacua wënëruba Moab nacua, pijasalinainë pewënëcuenia. Moab nacua eca bajayata Amon nacuamuxuneneta. Bajarapamonae jinawanapa Mar Muerto pucaxaneto itsapanawetsina. Israel-pijinë pemomoxi nacaemonae-ata Lot-pijinë pemomoxijawabelia, aponanaëcotsi xaniawaetsia. Bajarapamonae saya jinawanapa pena-itoyacuenia. Duet. 2:9,19, Núm. 22-24, Juec. 3:12-14, 26-30, 10:6-11:33
Molec – Milcom
Bajarapajumapecataenëjawabelia bajayanacuapijiwi pexi tajuitabiaba, bajaraponë pitaxutotsoniataenexatsi, peyawenonaenexatsinua pexaniacuenia pewajëtsicowëya. Pexi piasaënë totajuitabiaba. Nexata pijamonaejiwi pejumetaeyaniwa petajuitsijawata penue-jawa, Molec pijasacerdotewi conitabiaba tambor pejumecaranatsinexa.
Moríah-tsuto
Tajuitsijitsia pexënato Isaac Moríah-tsutojumata, itsiata Dioso tonutatsi oveja, pexënato petoyapijiwitëpaenënexatsi. Taema Gén. 22:2
Bexëajawabelia peyanacua-ewetsinë David penaneconitsixae Diosojawabelia, bajarapatsutojumata bajaraponë tajuita altar-jumata bueyubeje pijaneconijamatabëcuene. Nexata pawixae Dioso tsitoroba, ángelenë Israel-pijinë pemomoxi pebeyaxuabanajetarucaenexa, bajarapatajuitsijawa Dioso petaexae, nexata itaweta ángelenë orijibia itsamonae pebeyaxuabiyaniwa. Bajarajota ángelenë pebenajetarucaenë nucajopa Moríah-tsuto matatsënëta. Nexata David itapeta bajarapataxunae pexënato Salomón penacueneba-nutsinexa Jehová pijatemplobo. Taema 1 Cró. 21:18-22:1
Mosquito
Pacujinae Dioso tsicopata Egipto nacuata wacapemonae pewënëcaenexa, apoyapëtaetsi xaniawaetsia itsa pepacuene wacape-monae. Wowaijumeta, «mosquito», itsa jai, saya cajunua atsinëxi yabara, pacuenia tsiquiridainatoxi, fiafiatoxi, petinenëxi, wacapetoxi-ata yabara, jai. Bajaraxuata apoyapëtaetsi xaniawaetsia pawiriacuene. Bajarapacuenia pijinia Hebreojumeta. Reina-Valerapijibibliabaxuto pejucaewi juya itajëta tarë yabara, tsipaji apocaxitajarabi tsaena pajumerutsijitsia pawirianë yabaracuaicuaijai bajarapahebreojumeta. Saya canaëjëta tarë yabara. Tsipaji apocaxitajarabi pawirianë yabaracuaicuaijai, bajaraxuata bajarapacuenia yaquinaruta. Juya Dios Habla Hoy-pijibibliabaxuto pejucaewi itajëta bajarapajume mosquitocuenia.
Nacobebuata pethaëbëxëpanawitota
Bajayanacuapijiwimi xaina itsacuenejawanë pexanaenexa pexaniajaicuene penato-exanaenexa. Pamatacabi ponë najumeliwaisi cajonejitsia itsanëjawabelia, bajaraponë peto-exanaenexatsi itsacuenejawa, bajarapamatacabi nexata ponë nacobebuatabiabia-exana pethaëbëxëpanawitojawata. Bajarajota nexata bajaraponë jumaitsabiabi: «Itsa pepacuene neto-exanae-jitsiamë, nejejaijawa nitajëtsinexa tathaëbëxëpanawitojawata nacobebuatsianame», jai tsabiabi. Pethaëbëxëpanawitojawata itsa nacobebuata, bajaraxua itajëta yaiyataeya xua exanaejitsia pacuenia jumaitsi itsanëjawabelia. Bajaraxua banato-exana ëpenayapëtaewijawabelia penaliwaisicajonejawatabeje. Nexata itsa apoto-exanae pacuenia najumeliwaisi cajonejitsia, cuenecaëjëpa bajaraponëbeje pemomoxijawabelia penayabara-itoyajawa. Apocopiarucae pena-itoyajawa apopenato-exanaexae bajaraxua.
Nacuenecataeya exanaenatsi
Dioso asiwaya jiwi exana aitothiaya daxita pecobecowëwecua mapanacuataje. Dioso itsa jumaitsi: «nacuenecataeya exanaenatsi» itsa jai, apojumaitsi peperabëto yabara, saya pijumali yabara, tsipaji pa-epatota pumu-uxunetsi bajarapajumali rajutatsi. Bajaraxuata caejiwiyo canacujitsia cuenejëpa Dioso. Baitsi xaina pija-espíritu pacuenia Dioso jamatabëcuene-itsi. Bajarapanacuene cataejamatabëcuene perajutsixae, caejiwiyo canacujitsia xaina penato-itapetsijamatabëcuene, penato-itapetsinexa pejumecowënëtsinexa Dioso, pexanabiabinexanua pexaniacuene pacuenia Dioso itsi. Cuenecaëjëpatsinua pecuaicuaijainexa, pacuenia Dioso.
Orijibia Dioso nacuenejëpaeya jiwi xaina mapitsijamatabëcuenejawanë: pebarëyajamatabëcuene, pianaepanaejamatabëcuene, pejamatejemajamatabëcuene, penajamatabëxainaejamatabëcuene, piasiwajamatabëcuenenua xaniawaetsia piasiwanexa Dioso, pewënajiwi-ata.
Caejiwiyo canacujitsia xainanua pecana-ëjëbijamatabëcuene, xaniawaetsia peyapëtaenexa Dioso. Nexata pacuenia Dioso jamatabëcuenematatoxeneta daxita pecobecowë, bajarapacuenia pijinia jiwi jamatabëcuenematatoxenetsijitsia daxita Dioso pecobecowë mapanacuataje. Bajarapapitsicuenia jiwi jamatabëcuenejëpa Dioso itsa nacuenecataeya exanatsi.
Nadab, Abiúbeje
Bajaraponëbeje Aarón pexënatobeje sacerdotenëbeje picani. Lev 10:1-jawata itsa yorobatsi pacuenia bajaraponëbeje piaitothiacuenia saya exanabeje, Dioso petonajumecopatsicuenewecua itsapacujinae incienso tajuitabeje Dioso pitabarata. Nexata Dioso tsitorobatsibeje isoto petajuenexatsibeje. Jiwi pecana-ëjëbiwi mapa-liwaisi apoxainae caejamatabëcuene xua yabara naneconitabeje Diosojawabelia. 1) Itsamonae canaëjëta pepitsijawa itsa-iso-ita-ire piniji-altar broncepijijawawecua. 2) Itsamonae pijinia canaëjëta pepitsijawa itsawiria-inciensopërëjawa Dioso petocaëjëtsijawawecua. 3) Itsamonae canaëjëta saicaya horata pexanaejawabeje. 4) Itsa-monae canaëjëta bajaraponëbeje aposacerdotenëbeje. Saicayacuenia mapamonae canaëjëtsi-ata bajaraponëbeje pexanaecueneyabara, itsiata daxita bajarapaliwaisianë nacayapëtaeya-exana bajara-ponëbeje apopeyaiyataejawa Dioso. Bajaraxuata naneconitabeje.
Nonotapuna paxa pitabarata
Bajayatami pexijiwi banonotapunabiaba paxa pitabarata, pecopiapitsinexa itsa junua pabo-ënëlia eca. Bajarapacuenia najamatabëcuene-itajëta peyaiyataecuene paxajawabelia. Itsiata Gén. 31:35-jawata Raquel apononotapunae paxa pitabarata, tsipaji bajarapowa naboxonobaponapona pina. Itsamonae pecanaëjëbiwi bajayapijicuene jumaitsi Raquel yabara: «Apopexaniajaijawa penaboxonobijawa yabara. Saya nayawajunuaxaina, bajarapadiosowi pejedorota pejumata pe-ecaexae», jai itsamonae.
Ónice-iboto
Pa-ibotoxi rubena majotaje pe-ojobi-jawanë. Bitso bajarapa-ibotonë pexaniawiria-ibotonë. Pe-ojobiwajënaeya bajarapa-ibotoxi jumaxuxuwabiaba. Jiwi canacuene-babiaba penaitabëtsinexa.
Oveja
Judíowi bajayatami ewetabiaba ovejaxi. Bajarapadajubi witsatabiaba pewinexa, pemilechenexa, pejumana̱notsinexa-ata, pepananë pejorocaenexa. Caewai canacujitsia pija-oveja jumana̱xunabiaba.
Oveja monae itsajota apoxainae pewetsinëtsi, nexata caebitsaëtoyocuenia aponacopatsi. Saya nacayajatsia jinawanapabiaba, caenë canacujitsia pejitsipaejawabelia. Nexata imisia peponaponaexae, yapëxanepanaeya piayaiwi xaeyabiabatsi. Bajarapacuenia pijinia waxaitsi-ata. Itsapacujinae apoxainaetsi abaxë Dioso wajanaca-ewetsinënexa, nexata caejiwitsi canacujitsia natojaitabiabatsi saicayacuenia wajanaewetsinexa Diosonejewa. Bajarapacuenia exanae-atatsi, itsiata bitso nacatsi-ayai tsabiabi. Caenë ra jane Dioso xaniawaetsia wajanacaewetsinë tsaponaponae.
Oveja mata-eto–piobijawanë judíowi
Judíowi bajayatami xainabiaba piobijawanë apocaewiriacuenejawa; apopenajëpaejawanë. Bajarapacuenia-ata caejawa canacujitsia xaina saicayacuenia pecanacuenebijawanënexa. Chofar-wënëjawa obabiaba pa-epatota dajubi tajuitabiabijitsia altar-jawata. Obabiabanua peyapëtae-ya-exanaenexa pejanajuameto petaxuxuabijawanexa, pa-epatota pitsapaina merawipijijuameto tsiquirimuxupayo. Obanua fiesta matacabi pecopiajopaejawa jiwi pemuxunapatsinexa.
Ovejamata-etoyo pijinia xaina saicayacuenia peyapëtaeya-exanaenexa piobijawata. Bajarapaovejamata-etota itsa oba, pejumeyapëtaewi wajabitsaëwi yapëtane pejunatsijawa penacaetuatsinexa. Pamonae pijinia apowajabitsaëwi penamatayabinexa pijawajabitsaëwecua, bajarapacuenia-ata penacuenexaniawaetsinexa. Wajabitsaëwi pebarënawajabitsaëtsijawata pijawajabi-tsaëwijawabelia, ponë oveja mata-eto piobinë yapëtaeya-exanabiaba pi-obijumeta itsa tsi-ayaijitsiatsi pijawajabitsaë, caewëarena penawiabinexa. Itsa jume itsacuenia oba daxita caecuenia petsimaxëponaenexa pijawajabitsaë.
Itsajawata sacerdotenë itsa to-ajibitsi pepopiapiachofar nexata obabiaba pecunua oveja mata-etoyo chofarcuenia.
Itsajawa judíowi xainabiaba itsawiria piobijawanë broncenanitota, itsajume palatananitota pexanaejawanë. Bajaraxuanë wënërubabiaba trompeta. Bajarapatrompetajawanë obabiaba fiesta matacabianëjawa.
Piapiachofar-jawanë aponawitsi tsipaji canacuenebabiaba unupijinë pemata-eto, be-owebicuenenë. Mapitsi-unupijinëje pemata-etota bacanacueneba chofar pexanaenexa.
Pacujinae israelitawi jinawanapa Babilonia nacuata, bajarapanacuapijiwi obabiaba itsawiria-obijawanë, pewënë zampoño. Bajaraxuanexa canacuenebabiaba chivo-bocoto daxitanë. Peuxunijawata piababa-nexa naebo upixatatabiaba. Itsamaxë-upijawawelia upixatata pewojo pexainaebo itsaxuayo jumalipitsapaejitsia penajumetsinexa.
Oveja pewetsiwi pijanaebo
Daxita pamonae oveja pewetsiwi xainabiaba pijanaebo. Bajarapanaebota tsatabiaba pija-ovejabitsaëto. Yajiwiyorotabiabanua piayaiwiwecua pijadajubi petoxaeyaniwatsi.
Itsajawata bajarapanaebo upicatoxorona, jamatejema pewësicawaetabinexa pija-oveja itsawecuatoqueta. Itsamonae namuto pexanaewi nayajiwi caponabiaba pijanaebo penacobetoxotsiwiwecua, jomowecua, itsamonae pijinia piayaiwiwecua.
Oso
Bajaraponë unupijinë pianaepanaenë. Pinijinë bemetsajawajëto, itsiata pecuaibo jëpa be-awiri; awonopia. Bajaraponë pewi pexaenë. Toxaeyabiaba judíowi pijadajubi, pacuenia newëthë nacatoxaeyabiaba wajadajubi itsajawata.
Padam-aram nacua
Bajarapanacuami eca Eufratés mene, Tigris menebeje tuatuajë irajawata. Caewënë apoxainae bajarapanacua. Dioso Pejumeliwaisi Perujuliwaisibaxutota itsajawata wënëruta Mesopotamia, itsajawata pijinia jumaitsi tsabiabi bajarapanacua yabara Padam-aram nacua; jai. Bajarapanacuamita jinawanapa Abraham-pijinë pijamonae, Abraham pepitsapaecujinae Canaán nacuayabelia.
Pandereta
Bajarapacuenia xua bajayatami wënërubabiaba tambores, maparucaeje wënërubabiaba pandereta. Bajarapapanderetajawaxi najumetsia-exana penacobeconitabiabijawata pecobejapatojawabelia.
Paxuyo tonacueneba pexënatoyo pepitsinexa
Bajayatami Padam-aran nacuapijiwi ponë pitsijitsia itsanë pexënatoyo bamatamonacueneba copiaya pitsinejewa abaxë pexënatoyo. Palata itsa pexainaenë matamotabiaba caecuenia pepitsinexa. Itsa palata apoxainae, nexata paxuyo tonacueneba petocaëjëtsicueniatsi. Jacob apopexainaexae palata, nexata tonacuenebaponapona paxuyo siete pawaibeje pematamotsinexa pexënatoyo pepitsinexa.
Bajarapanacuapijiwimi, piopaxajiwi itsa matamotapona paxuyo pexënatoyo pematamo, bajarapamatamoyajuwënëjawa benapita pexënatoyo penacojiobicujinae. Gén. 31:14-16-jawata nacayapëtaeya-exana pacuenia Labán tsaena aporajutsibeje pexënatoyobejejawabelia Jacob petonacuenebimatamoyajuwënëjawa, saya naxainaeyaba ëponënexa.
Pascua fiesta
Pamerawijawa Dioso jutsijitsia Israel-pijinë pemomoxi Egipto nacuawecua, bajarapamerawi Jehová pija-angelenë tocaëjëta pebenajetarucaenexa copiaya penaexanaepebijiwi. Itsiata Israel pemomoxi tocaëjëtatsi itsacuenia pexanaenexa petotëpaeyaniwatsi pexi matapijiwi pebijiwi. Itsiata baitsi jane, pamonae pijabaupa tsautaruba oveja pejanaxita, bajarapabopijiwi Jehová apobenajetarucae. Matatosatsiaya najetaruca. Pa-ovejayo pejanapejamatabëcueneta wecuapanepaejitsia petëpaejawaminexawecua daxita pebijiwi pepopematapijiwi, bajarapa-ovejanëyo Dioso wënëruba Pascuanë. Nexata caewai canacujitsia xua Israel-pijinë pemomoxi exanabiaba fiesta, penajamatabënapitabiabinexa Jehová pitaxutotsoniataejawatsi bajarapamerawi dajubiyo pejanapejamatabëcueneta pepanepaejawa. Bajarapanabanicuene wënëruta baja Pascuafiesta, oveja pejamatabëcujiru.
Jesucristo wajanacasiwatëpaexae Pascua-wënëfiestamatacabijawata wajanacacapanepaenexa wajapascuanëcuenia, bajaraxuata wowai wënërubabiaba Semana Santa Pascuawënëcuenia.
Pecaquiatsijawanë trigoxu
Itsa baja trigoxu bitso tsewa, nexata bajarapaxu caquiata molinota. Pamolino nacueneba ibotomi. Mapadibujojawata nacayapëtaeya-exana pacuenia canacueneba bajayatami judíowi.
Pijamolinonexa nacueneba mapacueniaje: Copiaya buata irata penamatajëpae-iboto. Bajarapa-iboto jumawereca matatoyorotsia nuba itsa ibotonë. Pared-cuenia catsananuba pecaquiatsijawata piothopaeyaniwa irabereca trigoxu.
Judíowi petiriawi xaina pijinia itsamolinoyo pecaquiatsinexa. Copiaya buata pefererecae-ibotoyo irata. Bajaraxuacujinae pexu eta pijumawereca. Bajarapaxujumawereca icatsia buata piarewe-iboto, pecaquiatsinexa. Pemuxubërëyota xaina pewojotoyo penutsinexareca naejawayo, petajiaratsinexa. Bajarapatajiaratsijawata nacaquiata trigoxu, pepobeno pepitsapaenexa.
Pecaxueyatsinë
Bajarapajume wowaijumeta hechicero. Itsiata hechicerojume cajunua mapajamatabëcueneliwaisianëje: 1) Bajarapajiwi pijacujirucuenia jiwi awitania-exanabiaba pebeyaxuabinexa. 2) Yapëtaeya-exanabiaba xuanë jiwi tocopiapatsijitsiatsi. 3) Bajarapajiwi peyapëtaewi wajicuene, naeconocuene, peyarajutsicuene, peyacuenexanepananexa tsiyapëtane, peyacuenia-abejia-exanaenexanua pecueyawi.
Pecuamonatëpaewa pijacuene (pamona pewecuatëpaewatsi)
Bajayatami judíomonae xaina pacuenia ewetsijitsia pamona pewecuatëpaewatsi. Tsipaji petiriawi caeto-ata aponapitsi paxa pija-irayajuwënëjawa, pamonami pija-irayajuwënëjawami-ata, bajaraxuata pecuamonatëpaewa bitso bepejiobiwa.
Itsajawata bajarapajudíowi pitabiaba pematapijinëmi pijawami. Itsa pematapijinëmi tëpa barëxainaenejewa pijawa pebinëyo, petiriwa nexata nacojiobabiaba pamona pewënamuto petëpaenëmi pejuyapijinëjawabelia pebarëxainaenexatsi pebinëyo. Nexata itsa pexi barëxainaejitsipa bajaraponë bajarapowajawabelia, copiaya penaexanaenëyo bajarapapebinëyo pecanacopatsinexa bepexënatocuenia petëpaenëmi pecobecowë. Bajarapacuenia petowerewerecaeyaniwatsi pijawiriamaëto petëpaenëmi. Bajaraponëyo itsa pecunuanë baja pita xua petëpaenëmi pecobecowëmi; baitsi pijadajubimi, pija-irami-ata. Itsa baja nacojioba bajaraponë, nexata paxapijinëmi pijawiriamaëtocuenia catsitecaponapona. Bajarapacuenia exanawanapa bajayatami judíowi.
Penacasabifiesta
Bajayatami pamatacabi anijajiwibeje napitsiajitsiabeje, pinijifiesta barë-exana peyapëtaewitsi, imoxoyo pe-enaewi yajawa. Bajarapafiesta exanabiaba bejamatabë siete pamatacabibeje, itsajume catorce pamatacabibejecuenia.
Penacojiobiwanexa pijacuene
Bajayatami petiriawi pamatacabita nacojiobijitsia banaitabara-acatabiaba penaitabaracaranatsipanayota. Nexata merawi matapania pitaquirijaijawata we-itabarapita. Bajaraxuata bajayacunua pepitsinë xaniawaetsia itabaratane matapania powa pita.
Penacëbijawanë
Bajayatami penaewetsinexa Israel-pijinë pemomoxi apocanacuenebi picani pitsicuenejawanë wajamonaeyajuwënëwi canacuenebabiaba. Itsiata bajarapamonae xainabiaba xua nacëbijitsia pitsacueniabi-yaniwatsi, bajarapacuenia pijinia itsajawanë canacueneba sebocuenia, itsajawanënua pecajinawanapaenexa peyacueniaxanepanaenexa, daxita bajaraxuanëjawabelia pesiwanajamatabëcopatsinexa Diosowecua, bajarapacuenia xaniawaetsia penaewetsinexa.
Penaliwaisicajonecuene bajayanacuapijiwimi
Bajayatami pacujinae anijajiwibeje naliwaisicajonejitsiabeje penasiwajamatabëcuenebarëyanexabeje exanabeje mapacueniaje pejumenamatamotsinexabeje: Dajubi capatabiaba. Nexata caenëyo canacujitsia pebeyaxuabicujinae, tupatitibabepona, pebuataponaenexa nacorobotsiaya. Bajaraxuacujinae nexata penaliwaisicajonenënexabeje, bajarapatupatitibabejawa tuatuajëalia ponabiababeje. Bajarapacuenia exanabiaba penajamatabëcuene-itajëtsinexa pepacuene pexanaejawanexa xua namata-enetsia najumaitsibeje najumecapanepaeya pexanaenexabeje. Itsiata pacujinae Dioso itoroba Abram bajarapacuenia pexanaenexa Génesis 15:8-21-jawata, Abram tuatuajëalia aponucaponae. Caenë Dioso tuatuajëalia pona pitayotsicunucuenia, tsipaji Abram apotsicarucaetsi itsacuenejawa pexanaejawanexa. Dioso saya najumecapanepaeya jumaitsitsi pacuenia to-exanaejitsia pemomoxijawabelia.
Penaperabëcanajetabiabiwa
Bajayatami Canaan nacuata pejinawanapaewi itsajawata itsawaxi naperabëcanajetabiaba pibisiacuene pexanaenexa pewitota. Jamatejema pebijiwi peyapëtaenexa bajarapitsiwacuene, bajarapowaxi naitabara-acata pepanayota. Ecabiabanua namutomuxuneneta itsajota ajena jonejitsia tomarajawabelia.
Penawecuacapitsapaejawa
Bibliabaxutota itsa Dioso itoroba israelitawijawabelia penawecuacapitsapaejawayabara, xaina mapajamatabëcuene: Itsa pacujinae jiwi apojumecowënëtsi pacuenia Dioso tonajumecopatatsi penajumeliwaisicajonejawatsi, pijajiwicuenia, nexata itsa apo-exanae, Dioso itoroba: 1. Penawecuacapitsapaeya-exanaenexa pijamonaewecua, saicaya peponaponaenexa. 2. ApoDioso pijajiwitonëcuenia petaenexatsi. Nexata acuenebi pebarëcuaicuaijainexa pijamonae-ata, acuenebi pebarënacuenebinexa itsacuenejawayo-ata, penawijatsinexanua to-ayapëbejetsi; bepetëpaenëcuenia petaenexatsi. Orijibia acuenebi pecapatsinexa dajubi petajuitsinexa altar-jumata, penawajëcaenexanua Diosojawabelia penacaetuatabiabibota, penajuacaetuatsinexanua pijamonae Dioso pewënëta. Bajarapacuenianua Dioso-ata bepetëpaenëcuenia taejitsiatsi peyawenonaeyaniwatsi 3. Bajara-pajume nacayapëtaeya-exananua pebeyaxuabi-exanaejawanexatsi itsa aponajamatabëcuenepënëyorotsi pexanaejawawecua, penawecuacapitsapaeya-exanaecujinaetsi.
Itsiata itsa bajarapajiwiyo najamatabëcuenepënëyorotsipa pexanaejawawecua, icatsia Dioso pejitsipaecuene pexanaenexa, nexata bajarapajiwiyo xaniawaetsia copiapitabiabatsi dajubi petajuitsicujinae pijaneconijamatabëcuene.
Hebreojumeta panawecua capitsapare itsa jai, yabara jumaitsi pawerebiabijawa, itsa jume piajibia-exanaejawa, pejaijawa. Bajaraxuata wowaipijibibliabaxutota canacuenebabiaba, «eliminarlos» pejaijume.
Bajarapacueneyabara Pablo itoroba Corinto tomarapijiwi Dioso pejumecowënëtsiwi penawecuacapitsapaenexa ponë pibisiacuene pexanaponaponaenë. Itorobanua petocopatsinexa Satanájawabelia pebeyaxuabinexatsi, itsa aponajamatabëcuenepënëyorotsi pexanaecuenewecua. (Taema 1 Corintios 5).
Penayacaranatenaejawa
Bajayatami itsatomaranë xainabiaba matatoyorotsia penayacaranatenaejawa. Daxitatomara matatoyorotsia exananuba-biaba peyacaranatsipanaxaneto pejoneyaniwa pijawajabitsaë. Bajarapanucaepanata exanabiaba baupa pejoneyabiabinexa pijatomarajawabelia. Bajarapatomara-yacaranatsipanapijibaupajawata, bajarapatomarapijiwi nacaetuatabiaba. Itsa pinijitomara tsipae bajarapayacaranatsipanaxaneto xainaejitsipa pijinia itsabaupanë.
Pepopenamatacaitorobisacerdotenë
Marapacuenia naxatata sacedotewi pepopenamatacaitorobinë.
Petiriwa Gén. 2:23
Hebreojumeta petiriwa pejaijume, «pebiwa», pejaijume, itsa jume «petiriwa-pebi», pejaijume. Nexata Adán, pijawabeje najamatabëcueneliwaisijëpabeje. «Pebiwa», itsa jai hebreojumeta maxua yabaraje: Xaina mapajamatabëcueneje: Xaina pebi pecanaëjëtsicuene. Xaina pebi pijumalicuene. Itsa bajaraxuanë najua xainabeje, nexata aponawecua-aitothiabeje. Pacuenia pebi cuenejëpa Dioso, bajarapacuenia-ata pijinia petiriwa nacuenejëpa Dioso.
Petëpaewimi pijamonaemi pecowëyapona
Bajarapaliwaisi nacato-itajëta petëpaenë piasiwajawa yaiyataecuenia pejumaitsijawa petëpaenë yabara. Buata pijamonaemi-yajawa: Judíowi amuxujitsibi pemëthëtsicuene petëpaenë. Nexata itsa mëthëta pijamonaenëmi, yaiyataeya jumaitsi tsabiabi: «Pabuatajë pijamonaemita», jai tsabiabi. Bajarapacuenia bajumaitsi, tsipaji bajayatami mëthëtabiaba nacaemonaewi caeibowajujawata.
Pexaetunaxujawanë
Bajaraxuanë pewënë wowaijumeta, nueces, itsajawanë pijinia almendra. Bajaraxuanë nacuenebabiaba pexaenexa. Itsajawanë ejebabiaba icotiata. Itsajawanë pijinia sebabiaba. Itsajawanë pijinia asiaya xane pacuenia cumali-ëthëto, jipiribëtunaxuto-ata. Bajarapitsijawanë Jacob to-itoroba amoneyacuenia perajutsinexa Joséjawabelia, Egipto nacua pewetsinë.
Peyanacua-ewetsibo
Bajarapitsibo wowai wënëruba palacio. Palacio pejaijume xaina anijajamatabëcuenebeje: 1) Bitso pexaniaboxaneto, 2) itsapabota ponaponabiaba pepopeyanacua-ewetsinë bitso palata pexainaenë.
Piniji-altar broncenanitota pexanaejawa
Bajarapa-altar-jawa nucabiaba Dioso pijacarpabo panabota, itsa jume templo panabota. Bajarapa-altar-jumata tajuitabiaba dajubi jiwi pijaneconijamatabëcuene.
Piobijawanë judíowi pijajawanë
Taema Ovejamata-eto.
Quedorlaomer
14:1-2 Quedorlaomer-wënënë: Bajayatami Quedorlaomer peyanacua-ewetsinë tsaponaponae panacuanë ena Jordán menemuxubërëalia, pecuene-amoneyabixae bajarapamonaemi. Nexata wajëcabiaba impuestomatamo bajarapamonaejawabelia. Itsiata bexëajawabelia bajarapamonaemi acuenejitsibi bajarapamatamo pematamotabiabi-jawa. Bajaraxuata Sodoma pewetsinë, itsamonae cuatro ponëbeje pewetsiwi, najamatabëxaina pebarënawajabitsaëtsinexa Quedorlaomer-jawabelia; penawecuapitsapaenexa peyanacua-ewetsijawatsiwecua. Quedorlaomer juya natsicueyajunata itsanacuanë pewetsiwi pebarënawajabitsaëtsinexa Mar Muerto pucaxanetoyenepanata pe-enaetomaranë pewetsiwijawabelia, penaneconitsixae Quedorlaomer-jawabelia.
Quemos
Bajarapajumapecataeya pexanaenë moabitawi pijadioso. Bajaraponëjawabelia siwanajamatabëcuenecopatabiaba itsapa-cujinae barënawajabitsaëtsijitsia pijawajabitsaëjawabelia. Salomón pina tonacuenebanuta Quemos pijapenawajëcaetaxunaenexa Olivowënëtsutojumata, Jerusalén-tomarata. 1 Reyes 11:7.
Querubinewi
Bajarapamonae querubinewi apowajataecapanepaewi picani. Dioso pija-ángelewiyajuwënëwi. Itsapacujinae naitajëta jiwi-jawabelia, naitajëtabiaba jiwicuenia, pecorofejuwiwi. Itsamonae canaëjëta pijinia itsacuenia penaitajëtsijawanexa. Bajarapamonae pewetsiwi Dioso pijataxunae, itsawerena yanacua-eweta pijajiwi, daxitacuene-ata. 1 Reyes 6:27; Eze. 10:1-20; Sal. 99:1; Isa. 37:16.
Itsajawata bajarapaquerubinewi wënëruba serafinewi (Isa. 6:2,6). Itsamonae canaëjëta serafine-ánglelewi pewetsijawa Dioso pe-ecaetrono (Apoc. 4:8; 9:9; 12:14). Apopewënërubixae pijawiriacuene Apocalipsis-baxutota, aponayapëtae itsa peposerafinewi, itsa jume itsawiria ángelewiyajuwënëwi.
Reynë – pepopeyanacua-ewetsinë
Bajayanacuapijiwi xainawanapa pepopeyanacua-ewetsinënexatsi. Bajarapamonae wënëruba rey. Bajaraponë judíowinexa pijawiriayajuwënënë tsabiabi. Caenë reynë yanacua-ewetabiaba daxita judíowi. Bitso peliwaisi namatamotsinë daxita itsapewetsiwiwecua pacuenia ancianomonae, príncipewi, juez-monae-ata. Reynë jaitabiaba pacuenia pijajiwi xaniawaetsia jinawanapaejitsia. Itorobabiaba pejumecowënëtsinexa, peyaiyataenexa-ata penaewetsiliwaisianë. Namatacaitorobabiabanua penawajabitsaëtsinexa, nexata itorobabiaba pacuenia exanaejitsia pijawajabitsaëjawabelia. Reynë itoroba-biaba jiwi pematamotsinexa impuestomatamo, jamatejema wajabitsaëwi pematamobinexa peya-ewetsiwitsi pijawajabitsaëwecua.
Sacerdotewi
Dioso pejumeliwaisibaxutota bajarapamonae Dioso pitapetsiwitsi pebijiwi petonacuenebiwinexa, jiwi caejamatabëcuene pexainaenexa Diosojawabelia, pecujarubiwinexanua Dioso Peliwaisi. Bajayatami Dioso Pejumeliwaisibaxuto peyaquinaeweretsiwajënaeya, Jesucristo jiwi pesiwatëpaewajënaeyanua, itsamonae naexana petocuaicuaijaiwinexa Diosojawabelia Dioso pitapetsixaetsi. Bajarapamonae wënëruba sacerdotewi. Nexata bajarapamonae pematatsënëa towajëtabiaba jiwi jiwi Dioso pewënëta, Dioso juya peyawenonaenexatsi bajarapamonae. Itsajawatanua yapëtaeya-exanabiaba jiwi Dioso Pejumeliwaisi. Itsa Moisés-pijinë wereta Dioso pijacarpabo pexanaejawa, bajaraxuacujinae Dioso tocaëjëta sacerdotewi petotajuitabiabinexa altar-jumata pecapatsiwi pijadajubi pijaneconijamatabëcuene. Bajarapacuenia yawenona jiwi caejamatabëcuene pexainaejawa Diosojawabelia. Dioso pijacarpabo pexanaeweretsicujinae, pacuenia Aarón pexi, pemomoxi-ata cuenecaëjëpatsi sacerdotewi panaexanaenexa.
Tabernáculobo – Dioso pijacarpabo
Tabernáculobo pejaijamatabëcuene: «Pecawarapabiabibo, caetaxunae apopexainaebo», pejaijamatabëcuene xaina. Dioso itoroba bajarapitsibo israelitawi-jawabelia peto-exanaenexatsi, pacujinae israelitawi jinawanapa petusatonacuata. Bajarapamonae-ata saicaya cajinawanapa pijacarpaboxi, tsipaji warapabiabanajetarubena. Nexata peponaewajënaeya pijabonë jonabiaba pecaponaenexa. Itsapacujinae pata icatsia itsajota nacuenebijitsia pijataxunaebo, pejinawanapaenexa cae-epatoyo, nexata icatsia xatabiaya nubabiaba pijacarpaboxi. Bajarapitsibocuene Dioso itoroba israelitawi peto-exanaenexatsi saicaya pijacarpabonexa, itsajota Dioso petocaëjëtsicuenia exanaejitsia. Bajarapatabernáculobo wënërubabiaba Dioso Pijacarpabo.
Tajatuxanenë
Hebreowi itsa junata Dioso bajarapajumeta junatabiaba jumaitsi tsabiabi, «adonai», jai tsabiabi. Bajarapacuenia junatabiaba ayaijamatabëcuenewi, pewetsiwi, itsamonae peyaiyataewi-ata. Pacuenia wowai canacueneba «Señor», bajarapacuenia judíowi canacueneba «adonai» pejaiume. Bajarapajumecuenia-ata junatabiaba Dioso, pepopetuxanenëxae daxitanexa. Bajarapacuenia itsa jumaitsi Diosojawabelia, najamatabëcuene-itajëta beweliajamatabëcuene penataejawa pejunatsijawata: «Daxitacuenenexa Pijatuxanenëmë», pejaiwënëcuenia junatabiaba.
Terafim
Bajaraxuaxi jumapecataeya pefaratsinëxi pecobeta, jiwi pecajinawanapaenexa bediosowicuenia petaenexa. Bajayatami itsamonae wajëcabiaba bajaraxuanëjawabelia, pexaniacuene petaenexa. Itsajamatabëcuene pijinia peyapëtaeya-exanaenexatsi pexainaejawa paxa pecobecowë pecanacopatsijawanexa. Raquel tsaena tsitatsi pamona pecanacopatsinexa paxa pecobecowëmi, bajaraxuata meta pita bajaraxuanë. Itsa jume, meta tsitatsi bajarapowa pexi pexainaenexa, apopenacoxitabiabixae. Baitsi pacuenia paxa pijadajubi pexi xainabiaba nawitsiacuenia, peyacaëjëpaenexa paxa pijadajubinexa, pamona Jacob pijadajubinexa-ata, bajarapacuenia bajarapowa-ata penacoxitaponaenexa. Jamatabëcuenejumaitsi tsaena meta bajarapowa: «Itsa capitsianatsi, nexata caxainaenatsi taxi», jamatabëjai meta pepitsiwajënaeya.
Tofet
Tofet pejumaitsijume, ‘tãëbaba,’ pejaijume. Bajarapacuenia wënëruba tsaena tsipaji jiwi ayaijumeta tambor peconitsijawata tãëpajunujunua pejumetaeyaniwa pejewaxi pe-aëaëjaijawa petajuitsijawata Molec-wënë jumapetacaeya pexanaenë-jawabelia. Bajarapitsicuene Dioso bitso pecuene-itoyaxae, bajaraxuata Tofet-wënëfoto Dioso tane bepenaxuirabinacua.
Tofet-jawatanua Jerusalén tomarapijiwi bapenetabiaba petotëpaedajubitsi, petuxutsaebijawanë-ata. Nexata bajarapamonae itajunawabiaba bajarajota peponaejawa. Bajarapataxunae pinijifotoxaneto anijatsutobeje tuatuajëta pebocaejawa. Nexata pitajanitojawareca xuababiabireca pepenetsijawanë. Najuacuenebeje yabara petaenexa bepenaxuirabinacua. Najëpa saya «jiwi», pejaijawa jiwijumeta. Dioso pacujinae exana Adán, apo-exanaetsi caenë. Itsiata abaxë petiriwanexa peyenesito tsarucae. Nexata saya caecuenia najuaexanatsibeje nacuenecataeya. Bajaraxuata jiwijumeta Adánwi apojaitsi jiwi yabara. Saya «jiwi», bajaitsi.
Tribu
Wowaijumeta, bajarapatribujume xaina anijajamatabëcuenebeje. Caejamatabëcuene yabaracuaicuaijai pamonae nacaemonae caesalinainëjawawerena pepitsapaexae. Baitsi caenë pemomoxi natsanae-ata pepobitsaëtoxicuenia. Itsajamatabëcuene pijinia yabaracuaicuaijai pamonae nacaewiriapijiwi pecuene, pijume-ata yabara, sicuanicuenia pejinawanapaewi. Baitsi itsa tribu jai, nayapëtane apocaenacuacueniapijiwi pacuenia wowai, chinomonae, japones-monae, rusomonae. Saya tsiquiribitsaëtoyo.
Dioso pejumeliwaisibaxutota tribu yabaracuaicuaijai caesalinainëjawawerena pepitsapaewi. Nexata Israel-pijinë pemomoxi canacopata bajarapawënë pijawiriayabara. Itsiata Israel-pijinë pemomoxi apocaewënë pexainaewi pijawiriayabara: Itsawënë Israelpijinë pemomoxi. Itsawënë pijinia israelitawi. Itsawënë pijinia judíowi, tsipaji bajayata Jesús peponaponaematacabita bajarapa-monae jinawanapa Judea nacuata. Bajaraxuata bajarapawënë canacopata judíowënë. Nexata canacopata nacuawënë pijawiria-wënënexa. Maparucaeje Israel pemomoxi anijawënëbeje xaina: judíowi, israelí-ata.
Israel-pijinë xaina pexi doce ponëbeje. Nexata Israel-pijinë pemomoxi nacopata doce papemomoxibitsaëtobejecuenia natsanaeya. Bajarapapemomoxibitsaëto wënëruba tribu wowaijumeta. Caepemomoxibitsaëto canacujitsia canacopata pijasalinaiwi Jacob pexi pewënëcuenia pijatribunexa. Baitsi Rubén pemomoxi nacopata Rubén pewënëcuenia pijatribunexa, bajarapacuenia Judá pemomoxi Judá pewënëcuenia pijatribunexa, Leví pemomoxi nacopata Leví pewënëcuenia pijatribunexa, bajarapacuenia itsi tsaponae caenë canacujitsia pemomoxinexa. Daxita bajarapapemomoxibitsaëtonë tribucuenia caenë itsiata Israel-pijinë pemomoxi.
Trigo
Bajayatami judíomonae ubabiaba trigojawanë pexaejawanënexa. Maparucae-ataje itsanacuanëpijiwi-ata xaina bajaraxuanë. Pecaquiatsijawata trigoxu capitsapabiaba pexaniabenonë. Bajarapabenonë bitso xanepana petotowipan pexanaenexa itsawiriaxu pebenojawanëwecua. Bajaraxuata judíomonae bitso asiwaya taeyabiaba cebadaxuwecua. Itsajawata trigoxu tajatabiaba pexaenexa namutua, itsapacujinae pona itsajawabelia tajë pijabowecua.
Tulupu pecanaëjëbicuene
Bajaya nacuapijiwi tsitatsi tulupu bejiwi. Nexata wënërubabiaba bejiwiwënëcuenia. Nexata yaiyataeyabiaba, tsipaji tsitatsi be-ayaijamatabëcuenewi peyaiyataenexa. Nexata itsamonae canaëjëba pijacujiru-cuenia, peyapëtaenexa pacuenia bajarapa-rubenaejawanë yapëtaeya-exanaejitsiatsi merawiapijicueneyabara. Bajaraxuacujinae jumecowënëtabiaba paliwaisi pe-ëjëbi-cuenia tocopiapatatsi. Pijamonaenua itorobabiaba pejumecowënëtsinexa bajarapaliwaisi. Bajarapitsiwi wënëjona «astrólogowi» wowaijumeta, «tulupu-ëjëbiwi», bajarapamonae peliwaisi pijinia «astrología», «tulupu-ëjëbiliwaisimi».
Baitsi nacuenejëpa wajasalinai pejume-cowënëtsijawa Tsamaniwi peliwaisi. Pacuenia tulupu wënëruba jiwiwënëcuenia; pacueneta jiwi wënëruba tulupu Tsamaniwënë, Cajuyaliwënë, maxënejebarëpa-ata. Nexata Tsamaniwi peliwaisi jumecowënëta. Wajasalinai, itsamonae bajaya nacuapijiwi-ata, ayaicuenia yamaxë-itajorobatsi Sataná. Bajaraponë yamaxë-itojoroba pijamalicai-wita (demonio), bajarapamonae athëbëta-tsia pejinawanapaexae.
Túnica
Itsajawanë saicaya penaxatabijawanënexa Aarón xaina, penajamatabëcuene-itajëtsinexa sacerdotewi pepopenamatacaitoro-binëcuene yabara. Itsajawanë pijinia bewelia penaxatabijawanë Aarón pexi pebijiwi penaxatabinexa penajamatabëcuene-itajëtsinexa sacerdotewicuene israelitawi tuatuajëta. Éxo. 28:40 Patúnica-nawaxi naxatatabiaba sacerdotewi peniojai-nawa tsabiabi. Itsiata patúnicanawa itsamonae israelitawi naxatatabiaba aposacerdotewi pasãëjainawanë.
Ucucu pinijiwirianë
Mapitsi-ucucuto Israel pemomomoxi bepejiobiwi tajuitabiaba Diosojawabelia pijaneconijamatabëcuene. Baitsi pamonae apopexainaewi oveja, palata-ata apoxainae penatocomuatsinexa, nexata capatabiaba ucucuto pinijiwirianë. Bajaraxuata José Mariabeje capata ucucuto petajuitsinexa Diosojawabelia, bepejiobijiwixaebeje. Bajarapacuenia Dioso to-exana Israelpijinë pemomoxi caejiwiyo-ata penacopatsiyaniwa pijaneconiyajawa natotajuitsinejewa, bepejiobijiwiyo-ata.
Ur tomara
Bajarapatomara eca bajayatami Éufrate menemuxuneneta. Bajarajota jinawanapa itsamonae Sem-pijinëmi pemomoxiyajuwënëwi. Bajarapamonae Diosowecua nawajëcabiaba merawipijijuametojawabelia. Bepijadiosocuenia tane bajarapamonae.
Urim
Urim, Tumim-wënëjawabeje apoyapëtaetsi pepacuene pawiriacuenejawabeje. Itsiata sacerdotewi penamatacaitorobinë canacuenebiaba peyapëtaenexa xua exanaejitsia Dioso pejamatabëcueneta. Nexata bajaraponë canacuenebabiaba pijacujiru-cuenia Urim, Tumim-beje, peyapëtaenexa xua Dioso tojitsipatsi pexanaenexa.
Pepacuene apoyapëtae-atatsi pawiriacuenejawabeje, bajarapitsicuenejawanë tsaena canaëjëta bajayapijicuene penacujarubiwi. Urim, Tumim-jawabeje naejawayobeje, bewajacobesitowajëto. Bajarapanaejawayobeje xaina cuatro payenepanabeje penamatajëpaejawanë. Nexata caenenia xainapona bendición pejai-itaneto, itsanenia xaina maldición pejai-itaneto, bajarapacuenia daxita bajarapacuatro payenepanabeje peyacaëjëpaenexa bajarapa-itanetonë. Baitsi anijayenepanabeje xaina bendición pejai-itanetobeje, itsayenepanabeje pijinia xaina maldición pejai-itaneto. Daxita bajarapacuenia canacuenebabeje Urim naeboyo, Tumim naebobeje. Nexata peyapëtaenexa pacuenia exanaejitsia Dioso pejitsipaecuenecowëya pinijicuenejawalia, Sacerdotenë pepopenamatacaitorobinë canacuenebabiaba bajaraxuanëta. Bajarapacuenia canacueneba Dioso peyanijobicuenia pe-ëjëbijawata. Pethaëtojumawereca pijanawa tsiwajënaeyereta sacerdotenë pebixabajarabinexa Urim, Tumim-jawabeje, peyapëtaenexa xua topitsapaejitsiatsi. Itsa topitsapaejitsipatsi daxita naebobejejawata «bendición», peneta Dioso pejejaicuene pexanaenexa. Yawenonaejitsia pexania-cuenia petopitsapaenexatsi. Itsa pijina topitsapaejitsipatsi «maldición» daxita naeboyobejejawata, peneta Dioso pitoya-cuene pexanaeyaniwa. Cuenecaranatsijitsia pexaniacuenia petopitsapaeyaniwatsi. Itsa pijinia itsa Urim naeboyota topitsapatsi «bendición», itsa pijinia Tumim naeboyojawata topitsapatsi «maldición», peneta Dioso, «abaxë raja», pejaijawa pexanae-yaniwa. Bajarapacuenia nexata bajarapamonae yapëtaeyabiaba pexanaewajënaeya. Itsiata Espíritu Santo Dioso pejumecowë-nëtsiwi petsijamatabë-ecaexaetsi, bajarapitsicuene apocanacuenebi baja. Baitsi Espíritu Santo yapëtaeya-exanatsi pexaniajaicuene pexanaenexa. Éxo. 28:30, Num. 27:21, Prov. 16:23, Jn 14:16-17,26, 16:13, 8:30-36,40, Hech. 15:1-2,4,23-29.
Vinora
Judíomonae bajayatami baxainabiaba uvabacabonë. Papabianëta ubabiaba ë-uvamacanaenë. Bajarapamacanaenë nacuaitabiaba caeto caewai canacujitsia. Nexata natoxainabiaba uvacuai bajayajebi, xaniawaetsia-ata xaniawaetabiaba peto-abeje yaniwatsi.
Uvacuai penotsicujinae daxita, itsajawa tsatabiaba pe-ejebinexa bepeyajajawawajëto uvapasanexa. Pecunuajawa itsiata copata petaxubataxuabinexa, pejutsinexa pepora. Bajarapora pewënë vinora. Uvacuai petaxubataxuabinexa tsixainamëthë, pepora pejutsinexa petaxubataxuabicuenia. Bajaraxua ibomëthë. Itsanë nexata taxubataxuaba pejutsinexa vinora. Itsamëthë pijinia eca pemuxuneneta, ëpeporanexa. Petaxubataxuabimëthë xaina pewojotoyo caenenia pepora pepitsapaenexa itsamëthëabereca, jamatejema penawotsinexa ë-uvabarëmenera. Bajarapora penawotsicujinae tsiquirimëthëyojawabereca, nexata bajarapora epaca waxianëjawabelia pexaniawaetsinexa. Itsajawata yajeba dajubibocodoruanëta. Itsajawata bajarapora yajeba piajatura penaexanaejawabelia. Bajarapora pewënë vinagre. Bajarapavinagrera bepejiobiwi matajërëtabiaba merata piapaenexa. Itsajawata pijinia bajarapora yajeba bajayajebi, piamenetanejawabelianexa.
Piamenetanecujinae bajarapora xaniawaetsi-ata bajayajebi apo-abeje tsanucae. Itsajawata bepijiayo apa, amenetanenejewa. Pacueneta tsixanepanatsi piapaenexa apaeyabiaba. Porayo apa amenetanenejewa wënëruba pejanavinora. Pora pijina piamenetanerayo wënëruba vinora saya, tsipaji nayapëtane piataneracuene. Panacuata jinawapa judíowi penajatonë, pepamenianë-ata bewelia. Nexata pexaniawaetsimera piapaenexa atuxubeje tsabiabi. Bajaraxuata matajërëatabiaba piatanevinora, itsa jume vinagrera merata piapaenexa. Piatanera matajëreababiaba merata piaitajibiyaniwanua. Bajarapacuenia pexanaexae piapaejawata apo-aitajibi tsabiabi.