22
Bajaraxuacujinae, icatsia ángelnë netsitajëta pepamene, bitso pitaranaemene. Nasaba bitso, pacuenia itsi vidriojawa. Bajarapamene jiwi pejamatabëcuene-aitawaya-exanaemene.a Bajarapamene pitsaparena Dioso, Corderonëbeje pijatronojawawerena.
2 Bajarapamene bocapona ayaicallexanetotuatuajëareca. Bajarapamene-itapayareca daxitamuxubërëneniabeje nubena naejawanë, pecuai pecapitsapaenaenë. Bajarapanaejawanë caewaita nacuaitapona doce panacuaitsibeje.b Caejuameto canacujitsia nacuaitapona. Nexata, jiwi wëna-asaëtsawanapaejitsiac bajarapacuai pexaejawata. Pebaxuta pijinia, xanepana daxitanacuanëpijiwi penawaëbinexa, pejamatejemanexa piawitanejawawecua.
3 Nexata, bajarapatomarata ajibi tsane daxita piabejecuene,d tsipaji Dioso, Corderonëbeje pijatronota ecaenabeje, pijajiwi pitorobabiabinexabeje daxitamatacabijawabelianexa bajarapatomarata. Nexata, daxita Dioso pijajiwi tonacuenebawanapaena, penajamatabëcuene-itajëtsinexa asiwaya peyaiyataejawa.
4 Bajarapamonae Dioso itabarataena. Dioso pewënë-ata rucaena bajarapamonae pitapathaitota.
5 Bajarapatomarata ajibi tsane merawi. Pepopetuxanenë Dioso pijapeniweniwenaecotia itayotsiana. Nexata, bajarapatomarata pejinawanapaewi aponamatawenonae tsane lámparacotia, matacabipijijuametocotia-ata. Pamonae jinawanapaena bajarapatomarata, Dioso barë-ewetsianatsi daxitamatacabijawabelianexa.
Pacuenia baja imoxoyo pewajënae Jesucristo pepatsijawanexatsica, yabara peliwaisi
6 Icatsia, ángelnë nejumaitsi:
—Paliwaisi baja pacatsipaebatsi neyaquinaenexa, pexaniajailiwaisi cajena. Daxita xua taneme, jumetanemenua, pepacuene copiapatsiana. Nexata, toxanepanatsi jiwi pejumexaniataenexa. Dioso, Ponë baja cajena bajayata tajëwelia yapëtaeya-exana profetawimi pacuenia itsamatacabi itsijitsia mapanacuataje. BajaraPonë icatsia itoroba pija-ángelnë, peyapëtaeya-exanaenexa pijajiwijawabelia, xua baja imoxoyo pewajënae pecopiapatsijawanexa mapanacuataje —nejai ángelnë.
7 Icatsia, ángelnë nejumaitsi:
—Jesús raja jumaitsi pijajiwijawabelia: «¡Panejumetaema. Bepijia patsianicajë¡», jai. Nexata, pajiwi jumexaniataenae paliwaisi ruca mapabaxutotaje, penajamatabëcuenepënëyorotsinexa Diosojawabelia, bajarapajiwi jamatabëcuenebarëyaf tsaponaponae tsane», jai Jesús —nejai ángelnë.
8 Xanë rabaja, Juannë, tajumetaenë, tataenënua, daxita baja paliwaisi yaquinajë mapabaxutotaje. Bajaraxuanë tajumetaecujinae, tataecujinaenua, tamatabacabëta picani yaiyataeya nucajë ángelnë pitabarata, ponë netsitajëta daxita bajaraxuanë.
9 Itsiata baitsi jane, bajaraponë nejumaitsi:
—¡Pëtsa bajaraxua exaname, tsipaji saya xanë-ata Dioso pijajiwitonënë, pacuenia xamë, itsamonae-ata profetawi, pamonae-ata jumexaniataena mapabaxutotaje neyaquinaeliwaisi! Pacuenia paxamë xaniawaetsia pawajunupaebabiabame Dioso peliwaisi, bajarasaya pacuenia xanë tatsipaebinë. ¡Nexata, ëDiosojawabelia yaiyataeya nematabacabëta tonucare!, —nejai ángelnë.
10 Icatsia, nejumaitsi:
—¡Pëtsa muetsiacuenia xainame Jesucristo pecayapëtaeya-exanaeliwaisi,g xuanë itsamatacabi copiapatsijitsia, paliwaisi yaquiname mapabaxutotaje! Tsipaebianame daxitajiwijawa, bajarapamonae peyapëtaenexa, tsipaji rabaja imoxoyo pewajënae pecopiapatsijawanexa mapanacuataje.
11 ¡Nexata, pamonae pibisiacuene pexanawanapaewi, tocopare pewajënaeyabelia pibisiacuene pexanawanapaenexa! Pamonae piajamatabëcuenebejewi, tocoparenua pewajënaeyabelia ëpibisiacuene pesiwanajamatabëxainabiabinexa. ¡Bajarapacuenia tocopare, tsipaji pematatsënëa apoxainae tsane matacabianë penacuenexanetsinexa! Itsiata baitsi jane, pamonae pexaniacuene exanawanapa, catsitecae pewajënaeyabelia pexaniacuene pexanawanapaejawa. Pamonae-ata Dioso aneconijibia tanetsi, pesiwanajamatabëcuenecopatsixae Jesucristojawabelia, casaë pewajënaeyabelia aneconijibia pejinawanapaejawa Dioso pitabarata —nejai ángelnë.
12 Icatsia, ángelnë nejumaitsi:
—Jesús raja jumaitsi: «¡Panejumetaema! Bepijia patsianicajë. Capatsianicajë tamatamotsijawanënexa, caejiwi canacujitsia, pexanawanapaejamatabëcuene mapanacuataje. Pamonae tajajiwi pexaniacuene exanawanapa, rajutsianajë pexaniacuenejawanë. Pamonae pijinia pibisiacuene exanawanapa, naneconitsia-exanaenajë.
13 Xanë rajane baja, daxitacuene tataxuxuabinë, icatsia tacopiarucaeya-exanaenënexa-ata», jai raja Jesús —nejai ángelnë.
14 Icatsia, ángelnë nejumaitsi:
—Pamonae Dioso wecua-ajibia-exanatsi pibisiacuene pexanaeneconimi, Jesucristo pejamatabëcueneta, bajarapamonae jamatabëcuenebarëya baja, tsipaji Dioso tocopatsianatsi pejonenexa Dioso pijatomarabaupanëjawa, pecuaixaenexanua ponaecuai wëna-asaëtsawanapaejitsia.
15 Itsiata baitsi jane, apojone tsane pamonae piajamatabëcuenebejewi,h penajorobiwi, pematawajibiwi, pewitota pibisiacuene pexanaewi, jiwibewi, jumapecataeya pexanaenëanëjawabelia penawajëcabiabiwi, penajumetsënëtsicuene piasiwawi-ata. Daxita bajarapitsicuene pexanawanapaewi nacopabanubenaena Dioso pijatomarajumawelia —nejai ángelnë.
16 Nexata, Jesús nejumaitsi:
—Xanë rabaja, Jesúsnë, itorobajë taja-ángelnë pecatsipaebinexa mapaliwaisije, juya neyapëtaeya-exanaenexa daxita tajajiwijawabelia. Xanë rabaja tapitsapaenëi nacua-ewetsinëmi David-pijinë pijawiriamaëtojawawerena, tacanacopatsinexa peyanacua-ewetsicuenemi. Pacuenia bajayacunuapijituluputo naitayota pitsapa pejanamatacabinexa, bajaratacuene-itsinë xanë, tayapëtaeya-exanaenexa pejanamatacabipijicuene tajajiwi petaewanapaenexa —nejai Jesús.
17 Espíritu Santo, Corderonë pijawabeje,j jumaitsibeje Jesús-jawabelia: «¡Naxatsiayo patsianimica!», jaibeje. Pamonae-ata jumetane paliwaisi ruca mapabaxutotaje jumaitsi tsane: «¡Naxatsiayo patsianamica!», jai tsane Jesús-jawabelia.
Pamonae pijinia bitso pejitsipaewi Dioso pecapanepaenexatsi, pacuenia jiwi bitso jitsipa mera piapaenexa, naxatsiayo patsi pesiwanajamatabëcuenecopatsinexa Jesucristojawabelia, Dioso amoneya perajutsinexatsi matacabi apopewerewerecaejawa, petocopatsinexatsinua mera piapaenexa, jiwi piajamatabëcuene-itawaya-exanaemenejawata.k
18 Pamonae jumetane paliwaisi ruca mapabaxutotaje, xuanë wajunupaeba pecopiapatsijawanënexa, bajarapamonaejawabelia xanë, Jesúsnë, jumaitsinë mapacueniaje: «¡Xania baja tsane! Mapabaxutotajel perucaeliwaisiwecua itsajiwi saicayaliwaisi itsa mataropotsia yaquinaena, bajarapajiwi naneconitsiana Diosojawabelia. Nexata, bajaraPonë naneconitsia-exanaenatsi, daxita bajarapapiayaicuenejawanëta, xua wajunupaeba mapabaxutotaje.
19 Mapabaxutotaje peyaquinaeliwaisi, itsajiwi itsa ajibia-exanaena itsaliwaisiyo, tajëwelia pewajunupaebiliwaisi, nexata bajarapajiwi naneconitsiana Diosojawabelia. Nexata, wecua-ajibia-exanaenatsi juya pecuaixaejawaminexa, ponaecuaito jiwi wëna-asaëtsawanapaejitsia. Apotocopatsinua tsane pejonejawaminexa Dioso pijatomarabetsia. Daxita bajaraxuanë yabara peliwaisi ruca mapabaxutotaje».
20 »Bepijia patsianicajë», jai Jesús.
Nexata, xanë juya jumaitsinë:
—¡Bajara-itsi tsane! ¡Xanepana rabaja! ¡Jesús pepopetuxanenëmë, naxatsiayo patsianimica! —janë.
21 Pacatojitsipatsi daxita paxamë Wajatuxanenë Jesucristo pexaniacuenia papecayawenonaejawanexa. Bajara-itsi tsane.