Juan tane Dioso icatsia pexanaejawa pejana-itaboxo, pejananacua yajawa
21
Icatsia, taniji pejana-itaboxo, pejananacua yajawa, tsipaji pa-itaboxo, panacua-ata, Dioso copiaya exana, ajibi baja. Manuamene-ata ajibi.
2 Xanë rabaja Juannë, taniji pejanaJerusalén, Dioso pitapetsitomara, athëbëwetsica, Diosojawawetsica, perunaejawa. Daxita rabaja Dioso itabëtsiaya xaniawaeteta bajarapatomara, pacuenia petiriwa, pamona pepitsiwajënaeyatsi, naitabëtsiaya banaxaniawaeteca, itsa siwapatsijitsiatsi penacojiobifiestanexa. Bajarapacuenia pijinia, Dioso xaniawaeta pejanaJerusalén tomara, pijajiwi petojinawanapaenexatsi.
3 Nexata, jumetaniji pinijijume athëbëwetsica, tronojawawetsica. Jumaitsi mapacueniaje: «¡Taema! Majotaje raja Dioso aeconoxae jiwi yajawaponapona daxitamatacabijawabelianexa. Bajarapamonae pepoDiosonë pijajiwi tsane. Dioso pijinia bajarapamonae pijatuxanenë tsane.
4 Dioso itaxutobarëmene-iquinaponaena bajarapamonae. Ajibi baja tsane petëpaecuene, penuecuene, bitso penajamatabëxainaecuene, penawixaetaecuene-ata. Daxita bajarapitsicuenemi copiarucaena jane baja», jai athëbëwetsica.
5 Bajaraxuacujinae, Dioso, tronota pe-ecaenë, jumaitsi: «¡Taema! Daxitacuene bajayata ta-exanaejawami, xuanëmi baja picani werewerecaeya-exanajë, pejanajawanë icatsia exanajë», jai.
Bajaraxuacujinae, xanëjawaberena icatsia nejumaitsi:
—¡Yaquinare bajaraxuanë peliwaisi, tsipaji baja paliwaisi catsipaebatsi, bajarapaliwaisi pexaniajailiwaisi cajena! Xanepana nexata daxitajiwi pejumexaniataenexa bajarapaliwaisi —nejai.
6 Bajaraxuacujinae, icatsia Dioso nejumaitsi:
—Daxita rabaja weretajë ta-exanaejawa.a Xanë rajane baja daxitacuene tataxuxuabinë, icatsia tacopiarucaeya-exanaenënexa-ata. Pajiwi bitso jitsipaena pia-itawajamatabëcuene, bemerajitsipaejiwi, bajarapajiwi amoneya rajutsianajë pia-itawajamatabëcuene, matacabi apopewerewerecaejawa pexainaenexa, Cristo pejamatabëcueneta,b Ponë jiwi pejamatabëcuene-asaëya-exanaenë.
7 Pajiwi ajamatabëcuenesaë tanejumexaniataejawa tajumeliwaisi ëpetëpaejawabelianexa, bajarapajiwi canacopatsiana daxita bajarapapexaniacuenejawanë.c Xanë-ata pijaDiosonënë tsane. Bajarapajiwi pijinia taxënatojiwiyo tsane.
8 Itsiata baitsi jane, pamonae pitajepaebijamatabëcuene pexainaewi,d itsamonae pebejiobia-exanaeyaniwatsi tajumeliwaisi yabara, pejume-aebiwi tajumeliwaisi, piabejecuene pexanawanapaewi itsamonaejawabelia, jiwibewi-ata, ponaena isotopucaxanetojawabelia. Bajarapacuenia pijinia, pewitota pibisiacuene pexanaewi, penajorobiwi, jumapecataeya pexanaenëanëjawabelia penawajëcaewi, penajumetsënëtsiwi-ata, daxita bajarapamonae ponaena isotopucaxanetojawabelia, papuca tajueyecabiaba azufre yajawa. Bajarapa-isotopucata raja, jinawanapaena pamonae cotocaewi patëpaejawa pexainaewi —nejai Dioso, tronota pe-ecaenë.
Pacuenia pejanaJerusalén tomara itsamatacabi itsijitsia, yabara peliwaisi
9 Nexata jane baja, rena caenë ángelnë, siete pa-ángelnëbejeyajuwënënë, pecaponaewimi siete pawaxiyobeje, piayaijawanë pewënëcaejawanë. Bajaraponë nexata nejumaitsi:
—¡Naxatsia! Catsitajëtsianatsi powa Corderonë pijawanexa —nejai ángelnë.
10 Bajaraxuacujinae, Espíritu Santo bemajitsinaebocuenia, neyapëtaeya-exana ángelnë tanebarëponaejawa pinijitsutoxaneto, piapiatsutoxanetojawabelia. Nexata, bajarapatsutoxanetojawatalia ángelnë netsitajëta Dioso pitapetsiJerusalén tomaraxaneto, athëbëwetsica perunaejawa Diosojawawetsica.
11 Bajarapatomara cotianiweniweneca Dioso pijapeniweniwenaecotiata. Pacuenia penamatamotsijaspewënë-iboto cotianiweniwena, bajaracotia-itsi. Nasabanua pacuenia vidriojawa.
12 Bajarapatomara matatoyorotsia yacaranata pia-itayaë-ibopanaxaneto, piapiajawa athëbëabetsia-ata. Bajarapayacaranatsijawa matatoyorotsia xaina doce pabaupabeje. Nexata, ángelewi, caenë canacujitsia, nucapona caebaupa canacujitsia. Bajarapabaupanëjawa Israel-pijinë pexi, doce ponëmibeje, caenë canacujitsia pewënëanë wënërubenapona.
13 Acueyabi pabaupabeje xainapona caeyenepana canacujitsia. Orienteyenepananenia xaina acueyabi pabaupabeje. Norteyenepananenia pijinia xaina acueyabi pabaupabeje. Sur-yenepananenia pijinia xaina acueyabi pabaupabeje. Oesteyenepananenia pijinia xaina acueyabi pabaupabeje.
14 Bajarapayacaranatsi-ibopanajawa, petabujawata xainapona doce pa-ibotoxanetobeje, petsiwajënaejebijawanë. Bajarapa-ibotoxanetonëjawata, cae-ibotoxaneto canacujitsia pejumawelia, Corderonë pijajiwi, doce ponëbeje, apóstolewi, caenë canacujitsia wënërubenapona.
15 Pa-ángelnë nebarëcuaicuaijai, cobenaponapona oronaebo, pecaëjëbinaebonexa Jerusalén tomara, peyacaranatsi-ibopanaxanetopijibaupanë, matatoyorotsia peyacaranatsi-ibopanaxaneto-ata.
16 Jerusalén tomara matatoyorotsia peyacaranatsi-ibopanaxaneto, daxitayenepananë najëpaeya xaina piapiajawa, matonotsiareca, epatajërëtsialia, athëbëabetsia-ata. Nexata jane baja, ángelnë pecaëjëbinaebota caëjëba Jerusalén tomara. Matonotsiareca piapiajawa xaina dos mil doscientos pakilómetrobeje. Epatajërëtsialia-ata xaina bajarapacuenia, dos mil doscientos pakilómetrobeje. Athëbëabetsia-ata piapiajawa bajarapacuenia xaina, dos mil doscientos pakilómetrobeje.
17 Bajaraxuacujinae, ángelnë caëjëba Jerusalén tomara matatoyorotsia peyacaranatsi-ibopanaxaneto, peyapëtaenexa paitayaëtowajëto xaina. Nexata, pitayaëjawa xaina sesenta y cuatro pametrobeje. Pawiriajawata mapanacuapijiwije bacaëjëba, bajarapitsijawata ángelnë caëjëba.
18 Jerusalén tomara matatoyorotsia peyacaranatsipanaxaneto, exana jaspewënë ibotonëta. Pepotomara exaneta ë-orojawanëta. Nexata, bitso nasaba, pacuenia itsi vidriojawa.
19 Bajarapatomara matatoyorotsia peyacaranatsipanaxanetotabujawata, copiaya piniji-ibotoxanetonë tsiwajënaejeba. Bajarapa-ibotoxanetonë itabëtsiaya jumacatsanaruba daxitawiria bitso penamatamotsi-ibotonëta. Penamataxainae-ibotoxaneto itabëta jaspewënë ibotonëta. Pecotocaewi-ibotoxaneto itabëta zafirowënë ibotonëta. Acueyabi-ibotoxaneto itabëta ágatawënë-ibotonëta. Cuatro-ibotoxaneto itabëta esmeraldawënë ibotonëta.
20 Cinco-ibotoxaneto itabëta ónicewënë ibotonëta. Seis-ibotoxaneto itabëta cornalinawënë ibotonëta. Siete-ibotoxaneto itabëta crisólitowënë ibotonëta. Ocho-ibotoxaneto itabëta berilowënë ibotonëta. Nueve-ibotoxaneto itabëta topaciowënë-ibotonëta. Diez-ibotoxaneto itabëta crisoprasowënë ibotonëta. Once-ibotoxaneto itabëta jacintowënë ibotonëta. Doce-ibotoxaneto itabëta amatistawënë-ibotonëta.
21 Doce pabaupabeje doce pijinia paperlawënëjawatabeje, bitso penamatamotsijawanëta, exana caebaupa canacujitsia. Bajarapatomarata caecalle ruca daxitacallewecua bitso ayaicallexaneto. Bajarapacalle ë-orojawanëta pexanaecalle. Nasaba bitso, pacuenia itsi vidriojawa.
22 Bajarapatomarata apotaenë templobo, tsipaji Dioso, Ponë pepopiajamatabëcuenesaënë daxitawecua, Corderonëbeje, betemplobo, bajarapatomarata peponaponaexaebeje.
23 Bajarapatomara aponamatawenonae pitayotsinexa matacabipijijuameto, merawipijijuameto-ata, tsipaji Dioso ayaijamatabëcuenenë, Corderonëbeje pijapeniweniwenaecotiata itayota bajarapatomara.
24-26 Daxitanacuanëpijiwi, pamonae baja Dioso capanepatsi pijaneconiwecua, bajarapamonae itsamatacabi jinawanapaena Dioso, Corderonëbeje pijapeniweniwenaecotiata. Daxitanacuanë pewetsiwi, pijatomaranëjawawerena capatsiana bajarapatomaraberena bitso penamatamotsijawanë, Dioso yaiyataeya perajutsinexa. Daxitamatacabijawabelianexa, baupatanutsiana, tsipaji bajarapatomarata ajibi tsane merawi.
27 Itsiata baitsi jane, bajarapatomaraberena apocopatsi tsane pejonenexa pibisiajamatabëcuene pexainaewi, pia-uracuene pexanaewi, penajumetsënëtsiwi-ata. Jonena ëpamonae wënërubena Corderonë pijacuyalatobaxutota, pamonae matacabi apopewerewerecaejawa pexainaewinexa.