Juan tane pacuenia itsamatacabi Cristo mil pawaibeje ewetsijitsia mapanacuaje
20
Icatsia, taniji itsa-ángelnë perunaejawatsica athëbëwetsica. Cobenarunaica pinijimëthëxanetopijillave, ayaicadenamaëtoxaneto yajawa.
2 Bajaraponë waetaba tsawaliwali, ponë bajayatami naitajëta jiwijawabelia bejomocuenia. Bajaraponë, pepodowathi, itsawënë pijinia Satanás. Nexata, ángelnë ayaicadenamaëtoxanetota cëtabuata pepodowathi mil pawaibejenexa.
3 Pecëtsicujinae pinijimëthëxanetojawareca xuareca. Yawëpaxatatabuata bajarapamëthëxanetojawareca. Pematatsënëa icatsia sellojawata yamëthëwëpajumacatsata. Daxita bajarapacuenia exana pepodowathi pepitsapaeyaniwa bajarapamëthëwecua, peyamaxë-itojorobiyaniwa mapanacuapijiwije. Bajarapacuenia xuarecatsi bajarapamëthëxanetojawareca mil pawaibejenexa. Itsiata baitsi jane, pepanepaecujinae mil pawaibeje, isinaenatsi, cae-epatoyo icatsia jiwi peyamaxë-itojorobaponaponaenexa.
4 Bajaraxuacujinae, icatsia taniji jiwi tronojawata pe-enaewi. Bajarapamonae Dioso itorobatsi petocanaëjëtsinexa jiwi pijaneconi pexainaewi,a peyapëtaeya-exanaenexa pacuenia naneconitsia-exanaejitsia pijaneconijamatabëcuene. Tanijinua itsamonae-ata, petëpaewimi, pamonaemi wësi-ucubejebatsi,b apopecopabixae jiwi petsipaebaponaejawa Jesús peliwaisi, Dioso pejumeliwaisi-ata. Bajarapamonae asiwaya, yaiyataeya, apotonubenaenua pematabacabëta piayainë pitabarata, piayainë jumapecataeya pexanaenëjawabelia-ata. Aponacopatsinua piayainë pewënë-itanetota pitapa-itanerubinexatsi, pecobejuma-itanerubinexatsi-ata. Nexata, bajarapamonaemi icatsia Dioso piasaëya-exanaejawatsi, taniji. Piasaëya-exanaecujinaetsi, bajarapamonae mil pawaibeje Cristo barë-ewetatsi mapanacuaje.
5-6 Dioso piasaëya-exanaejawa pamonae pewësi-ucubiwitsi, wënëruba copiaya jiwi piasaëya-exanaematacabi.c Itsiata, caecuenia Dioso apo-asaëya-exanae daxita petëpaewimi. Mil pawaibejecujinaed jane baja, Dioso asaëya-exanaena daxita petëpaewimi pamonae abaxë apo-asaëya-exanae bajarapamatacabita. Jamatabëcuenebarëya tsane pamonae Dioso asaëya-exanatsi copiaya piasaëya-exanaematacabita, tsipaji cotocaewi patëpaejawanexa, acuenebi baja tsane itsacuene pexanaenexatsi. Biji rajane, bajarapamonae Dioso, Cristo-ata, pijasacerdotewi exanaenatsi. Bajarapamonae Cristo barë-ewetsianatsi mapanacuaje mil pawaibeje.
7 Itsa baja panepaena mil pawaibeje, Satanás icatsia isinaenatsi, mëthëxanetowecua pepitsapaenexa.
8 Pitsapaena icatsia daxitanacuanëpijiwi peyamaxë-itojorobinexa, Diosojawabelia apopesiwanajamatabëcuenecopabiwi. Nexata, bajarapacuenia Gog-jawawerena, Magog-jawawerena-atae Satanás caetuatsiana wajabitsaë. Bajaraponë pijajiwi bitso ayaibitsaëtoxaneto tsane. Pacuenia tajetabo-atsapërë nawita, bajara-itsi tsane.
9 Bajarapamonae wajabitsaë tsimaxënajetarubenaena daxitanacuanëjawawerena, matatoyorotsia jane baja tsimaxë patsiana Jerusalén tomara, Dioso piasiwatomarata, pewerebiabinexa picani Dioso pijajiwi, Jerusalén tomarata pejinawanapaewi. Itsiata baitsi jane, Satanás pijajiwi Dioso tsixuabianicatsi isoto athëbëwetsica. Nexata, bajarapamonaemi tajuenatsi.
10 Nexata, pepodowathi, ponë jiwi yamaxë-itojorobaponaena daxitanacuanëjawa, xuabialiatsi isotopucalia, papuca azufre yajawa tajueyecabiaba, itsaxuayolia copiaya xuabatsibeje piayainë, peyamaxë-itojorobiprofetanëbeje. Nexata, bajarajota bajarapamonae Dioso naneconitsia-exanaenatsi isoto petajuta, matacabijebi, merawijebi, daxitamatacabijawabelianexa.
Juan tane jiwi penubenaejawa penioponaetrono pitabarata, Dioso penaneconitsia-exanaenexatsi
11 Icatsia, taniji penioponaetronoxanetojumata pe-ecaenë. Nawecua-ajibia-exanaxuaba nacua, itaboxo-ata. Bajaraxuacujinae, caejiwi-ata apotae baja pematatsënëa bajaraxuabeje.
12 Taenubajënua daxita petëpaewimi, ayaijamatabëcuene pexainaewimi, beweliajamatabëcuene pexainaewimi-ata, penubenaejawa Dioso pitabarata. Peneconicanaëjëtsinexatsi,f cuyalatobaxutonë baxupanejeba, itsajota itanerubena daxita petëpaewimi pexanaecuenejawanëmi mapanacuataje. Itsabaxutota pijinia wënërubena pamonae matacabi apopewerewerecaejawa pexainaewinexa. Nexata, paliwaisianë rubena bajarapabaxutobejejawata, caejiwi canacujitsia Dioso tocaëjëtsijitsiatsi pacuenia tocopiapatsijitsiatsi pexanaecuenemi yabara. Nexata, itsa aponawënërubenae pabaxutota wënëyaquinaruba pamonae xainaejitsia matacabi aponawerewerecaejawa, bajarapamonae, caejiwi canacujitsia, paneconiwajëto xaina, bajarapaneconiwajëtota Dioso naneconitsia-exanaponaenatsi.
13 Caejiwi-ata, petëpaewimi, aponacopatsi tsane Dioso naneconitsia-exanaenejewatsi, tsipaji pamonaemi manuameneta tëpa, pamonaemi-ata jinawanapa petëpaewi pejinawanapaenacuata,g daxita pitsapaina, penubenaenexa Dioso pitabarata. Nexata, caejiwi canacujitsia paneconiwajëto xaina, bajarapaneconiwajëtota Dioso naneconitsia-exanaponaenatsi.
14 Bajaraxuacujinae, jiwi petëpaeya-exanaejamatabëcuenemi, petëpaewi pejinawanapaenacuami-ata, Dioso xualia isotopucalia. Bajarapapuca raja jiwi cotocaewi patëpaejawah pexainaewi pejinawanapaepuca.
15 Pamonae apowënërubenae, pabaxutota wënërubena pamonae matacabi apopewerewerecaejawa pexainaewinexa, bajarapamonae peneliatsi bajarapapucalia.