19
Bajarapacuenia Babilonia tomarapijiwi yabara piacuenesaë-ángelnë pejumaitsicujinae, jumetaniji jiwi ayaibitsaëtoxaneto athëbëtatsia, pinijijumeta pejumaitsitsaponaejawa mapacueniaje:
«¡Dioso raja ayaijamatabëcuenenë bitso! ¡WajaDioso raja jiwi pecapanepaenë pijaneconiwecua! ¡Peniweniwenaecotia pexainaenë! ¡Piacuenesaënënua bitso daxitacuene pexanaenexa!
2 BajaraPonë xaniawaetsia naneconitsia-exanabiaba jiwi, peneconiyapëtaecujinae. Nexata, peneconiyapëtaexae Babilonia tomarapijiwimi, Dioso baja naneconitsia-exana bajarapamonaemi pibisiacuene bitso pexanaexae. Bajarapamonaemi naneconita Diosojawabelia pejamatabëcuenebijianaponaexae daxitanacuanëpijiwi, asiwaya pebarënawajëcaponaenexa jumapecataeya pexanaenëanëjawabelia, pitorobixaenua daxitanacuanëpijiwi Dioso pijajiwimi pebeyejebinexatsi. Bajaraxuata, Dioso juya yamatamotsiaya naneconitsia-exana bajarapamonaemi», jai jiwi ayaibitsaëtoxaneto athëbëtatsia.
3 Bajaraxuacujinae, bajarapamonae icatsia jumaitsi:
«¡Dioso raja ayaijamatabëcuenenë bitso! Babilonia tomarapijiwimi petajuetsëxëtsi pewajënaeyabelia junaenia athëbëabetsia daxitamatacabijawabelianexa», jai bajarapamonae.
4 Nexata, veinticuatro ponëbeje ancianowi, cuatro ponëbeje pitothiawi yajawa, irataeya bobena Diosojawabelia, penajamatabëcuene-itajëtsinexa asiwaya peyaiyataejawa. Bajarapaepatota jumaitsi tsanubenae Diosojawabelia, tronota pe-ecaenëjawabelia:
«¡Bajara-itsimë baja! ¡Xanepana rabaja nexanaejawa! ¡Bitso ayaijamatabëcuenenëmë!», jai tsanubenae Diosojawabelia.
5 Bajaraxuacujinae, icatsia tronojawawerena daxita Dioso pijajiwijawabelia jumaitsi:
«¡Daxita paxamë Dioso papijajiwimë, paneyaiyataewi, ayaijamatabëcuene panexainaewi-ata, itsa jume, beweliajamatabëcuene panexainaewinua, wënëxaniatsiaya pexaniajamatabëcuene parajutabiabare wajaDiosojawabelia!», jai tronojawawerena.
Corderonë penacojiobifiesta, yabara peliwaisi
6 Icatsia, jumetaniji ayaibitsaëtoxaneto jiwi pecuaicuaijaijawa. Bajarapacuaicuaijaijawa, najumeta bepinijijõcajume, beyamaxëjume-ata, ayaijume. Jumaitsi tsaponae bajarapamonae mapacueniaje:
«Bitso pexaniacuenia wënëxaniatsianatsi Dioso. Wajatuxanenë Dioso, ponë piajamatabëcuenesaënë daxitawecua, taxuxuaba rajane baja daxitanacuanëpijiwi pewetsijawa.
7 »Copiapata jane baja, fiesta pexanaematacabinexa, Corderonë penacojiobifiestanexa. Powa, Corderonë pebarënacojiobiwanexa, naxaniawaeta rabaja bajarapafiestanexa. Nexata, siwajamatabëcuenebarëyatsi tsane. Jamatabëcuenewënëcaenatsi wajabarëyajamatabëcuene. Wënëxaniatsianatsi Corderonë, pebarënacojiobiwanexa.
8 »Bajarapowa penaxaniawaetsinexa, rajutatsi bitso pexaniawiriapapaëbërëjawa penaxatatsinexa, piaxuirajibijawa, bitso peniojaijawa», jai bajarapamonae. (Bajarapanaxatatsijawa jamatabëcuene-itajëta Corderonë pijajiwi Dioso aneconijibia petaejawatsi.)»
9 Nexata, bajaraxuacujinae ángelnë nejumaitsi:
—¡Yaquinare mapejumaitsiliwaisije: «Jamatabëcuenebarëya pamonae junatatsi penaxaenexa pecunuapexaejawa, Corderonë penacojiobifiestajawata», pejailiwaisi yaquinare! Daxita xua catsipaebatsi, Dioso, pexaniajainë, pejumaitsijawa —nejai ángelnë.
10 Nexata, yaiyataeya tamatabacabëta tonucajunuajë bajarapa-ángelnë pitabarata, tanajamatabëcuene-itajëtsinexa asiwaya tayaiyataejawa. Itsiata baitsi jane, bajaraponë nejumaitsi:
—¡Pëtsa bajaraxua exaname! ¡Biji rajane, najamatabëcuene-itajëre asiwaya neyaiyataejawa ëDiosojawabelia! Xanë-ata raja saya Dioso pijajiwitonënë, pacuenia xamë, itsamonae-ata, Diosojawabelia panenajuasiwanajamatabëcuenecopabiwi. Pacuenia paxamë xaniawaetsia pawajunupaebabiabame panesiwanajamatabëcuenecopabijawa Jesús-jawabelia, bajarasaya xanë-ata pacuenia tatsipaebinë. Panewajënaeyabeliaa pawajunupaebaponaename Jesús peliwaisi, tsipaji bajarapaliwaisi bitso penamatamotsiliwaisi panetsipaebinexa Dioso pewënëta —nejai ángelnë.
Pacuenia Juan tane athëbëtatsia Cristo penioponaecaballojumata pe-ecaejawa, yabara peliwaisi
11 Bajaraxuacujinae, taniji itaboxo penapatsijawa. Bajarajota taniji jiwitonë, penioponaecaballojumata pe-ecaenë. BajaraPonë pewënë Caejamatabëcuene Pexainaenë.b Itsawënë pijinia Pepopexaniajainë. Bajarapacuenia wënërubatsi, tsipaji bajaraPonë jiwi xaniawaetsia peyanacua-ewetsinë. Caejamatabëcuene pexainaenënua, perowiajamatabëcueneta penawajabitsaëtabiabinexa pibisiacuene pexanaewijawabelia.
12 Pitaxutobeje naitayota pacuenia isoto bacotiatsobia. Bajaraponë matapona ayaijawa coronajawanë. Xainanua pewënëyaquinarutsijawatsi,c itsajiwi-ata apopewënëyapëtaewënëtsi.d Ëbajaraponë pijacuata nawënëyapëtane.
13 Penaxatatsijawareca tsobia, pejanarata pejabutsixae. Bajaraponë pewënë, Diosojamatabëcuene-itajëtsinëe jiwijawabelia.
14 Bajaraponë pënaponatsi wajabitsaë ayaibitsaëtoxaneto, athëbëpijiwi. Bajarapamonae naxataba bitso pexaniawiria linopapaëbërëjawanë, piaxuirajibijawanë, bitso peniojaijawanë. Bajarapamonae-ata yapona penioponaecaballuanëta.
15 Ponë wajabitsaë barë-exana, bajaraponë pecuaibuatsina pitsapa pexiujai-espadaf pecuene-amoneyabinexa daxitanacuanëpijiwi. Nexata, bajaraponë yanacua-ewetsiana daxitanacuanëpijiwi. Pewetsijawata, ajumesaëya itorobabiabiana pejumecowënëtsinexatsi. BajaraPonë pijacuata naneconitsia-exanaena daxitanacuanëpijiwi, bepecuetsabataxuabinë uvaruanë pebarëmenetaxubataxuabitaxunaeta. Pacuenia uvaruanë pecuetsabataxuabijawata ayaibarëmene pitsapa, bajarapacuenia pijinia Dioso, ponë piajamatabëcuenesaënë daxitawecua, ayaicuenia naneconitsia-exanaena daxitanacuanëpijiwi, pijaneconi pexainaewi, pebara-anaepanaexae.
16 Ponë wajabitsaë barë-exana, pewënë-itanebërëtoyo ruca pijacamisajumawelia penaxatatsijawata, pethaëtojumata-ata. Jumaitsi tsarucae bajarapa-itanebërëtoyo: «Daxitanacuanë pewetsiwi-ata pepopewetsinë. Daxita petuxanewi-ata pepopetuxanenë», jai tsarucae.
17 Bajaraxuacujinae, taenutajë ángelnë, matacabipijijuameto pecotiata penucaenë. Pinijijumeta wawajai tsanucae daxitawiria pepunaewi, petëpaewi pewi pexaewijawabelia, mapacueniaje:
—¡Naxatsia! ¡Panacaetuanare payaibitsaëtoxanetomë ayaijawa pewi panexaenexa Dioso pejamatabëcueneta!
18 Paponaremena panexaenexa, nacuanë pewetsiwimi pewi, wajabitsaë penamatacaitorobiwimi pewi, wajabitsaë pitatsacawimi pewi, caballuanëmi pewi, caballuanëjumata peponaewimi-ata pewi. Paxaenamenua pamonaemi amoneya tonacuenebawanapa pewi, pamonaemi-ata amoneya apotonacuenebawanapae pewi, pamonae beweliajamatabëcuene pexainaewimi, ayaijamatabëcuene pexainaewimi-ata pewi. Pacajunatatsi daxita bajarapamonae pewi panexaenexa —jai tsanucae ángelnë pepunaewijawabelia.
19 Bajaraxuacujinae, taniji piayainë,g daxitanacuanë pewetsiwi, pijajiwi wajabitsaë yajawa, pecaetuatsijawa pebarënawajabitsaëtsinexa penioponaecaballota peponaenëjawabelia, pijajiwijawabelia-ata.
20 Nexata, penioponaecaballota peponaenë waetaba piayainë, peyamaxë-itojorobiprofetanë yajawa, ponë bajayata pinijicuene tsita-exanaponapona piayainë pitabarata, jiwi peyamaxë-itojorobinexa. Nexata, jiwi nacaeweta piayainë pewënë-itanetota pitanerubaponaenexatsi, asiwaya, yaiyataeya, petonubenaenexanua pematabacabëta piayainë jumapecataeya pexanaenë pitabarata. Pewaetabicujinaetsibeje, piayainë, peyamaxë-itojorobiprofetanëbeje, xuabaliatsibeje ya-asaëya isotopucabelia, papuca tajueyeca azufre yajawa.
21 Nexata, daxita bajaraponëbeje pijajiwi, pamonae nacopaba, beyejebatsi penioponaecaballota peponaenë. Beyejebatsi pecuaibuatsina pepitsapae-espadata. Nexata jane baja, daxitawiria pepunaewi, petëpaewi pewi pexaewi, napeneyaba bajarapamonaemi pewi.