Pacuenia Babilonia tomaraxanetomi copiaruca, yabara peliwaisi
18
Icatsia, itsa-ángelnë taniji, perunaejawatsica athëbëwetsica; bitso penamatacaitorobisaë pexainaenë. Pinijicotia yajawarunaica. Nexata, ira itayota daxitanacuanëjawa.
2 Ayaijumeta wawajai. Jumaitsi mapacueniaje:
«Werebiabijitsiatsi rabaja Babilonia tomaraxanetota pejinawanapaewi. Nexata baja, ëjoriminacua tsarucae tsane, ëdowathimonae pejinawanapaenexa. Bajarapatomarata juya jinawanapaena, daxitawiria pibisiacuene pexanaedowathiwi, daxita pibisiawiriawi pepunaewi, unupijiwi, dajubi-ata, pawiriawi Dioso itaweta jiwi pexaeyaniwa, pejayatsiyaniwanua, bepenaxuirabiwi penacopatsiyaniwa Dioso pitabarata.
3 Bajarapacuenia Dioso bijiana bajarapatomara, tsipaji bajarapatomarapijiwi daxitanacuanëpijiwi jamatabëcuenebijiana, asiwaya pebarënawajëcabiabinexa jumapecataeya pexanaenëanëjawabelia Diosowecua, bitso pibisiacuene pexanawanapaenexanua. Daxitanacuanë pewetsiwi-ata, caejamatabëcuene xainanua bajarapacuenia pexanaenexa. Daxitanacuanëjawawerena pepatsiwi, penawijatsinexa Babilonia tomarapijiwijawaberena, naexanapona bitso ayaijawa palata pexainaewi, bajarapatomarapijiwi pejamatabëcuene. Babilonia tomarapijiwi itaxutejema comuacabiaba daxitacuene, pibisiacuene pexanabiabinexa, bitso pexaniacuenia penaitabëtsinexanua. Bajarapacuenia penaneconitsixae, Dioso werebiabijitsiatsi», jai ángelnë.
4 Bajaraxuacujinae, jumetaniji athëbëwetsica itsa jume pewawajaijawa Dioso pijajiwijawabelia mapacueniaje:
«¡Paxamë patajajiwimë, papitsapare baja Babilonia tomarawecua, panecuenejëpaeyaniwa bajarapamonae pexanaecuene, bajarapatomarapijiwi yajawa Dioso papecananeconitsia-exanaeyaniwa!
5 Bajarapatomarapijiwi pijaneconi baja bitso ayaijawa xaina. Pijaneconi itsa napebetsipa, itsa najuma-etaponaejitsipa, nexata copiapatsipa itaboxojawabetsia. Dioso cajena yapëtane daxita Babilonia tomarapijiwi pibisiacuene pexanaejawa, xaniawaetsia penaneconitsia-exanaenexa.
6 Panewerebiabinexaa bajarapatomarapijiwimi, cuenecanawiatsiaya juya pabejiobia-exanaename, pacuenia bajarapamonae bejiobia-exanabiaba itsamonae. Pananeconitsia-exanaename, ayaicuenia panebejiobia-exanaejawata, anijatobeje matatoxenetsia bajarapamonae pexanaecuenemi itsamonaejawabelia.
7 Babilonia tomarapijiwi bitso be-ayaijamatabëcuenewi natane. Natocomuacabiaba ayaijawa penamatamotsijawanë penaitabëtsinexa. Nexata, pacuenia bitso siwabëjai tsabiabi bajaraxuanë pexainaenexa, juya cuenecanawiatsiaya ayaicuenia panawixaetaeya-exanaename, panejamatabëcuenebëjaiya-exanaenexa. Bajarapatomarapijiwi jamatabëjumaitsi tsabiabi: «Waxaitsi raja majotaje bitso pexaniacuenia jinawanapatsi, nacuanë waja-ewetsiwicuenia. Apojinawanapaetsinua najamatabëxainaeya pamona bepewecuatëpaewatsicuenia. Nexata, apojamatabëcuenebëjaitsi tsane itsacuenejawayo-ata yabara», jamatabëjai tsabiabi bajarapamonae.
8 Bajarapacuenia pejamatabëjumaitsixae jamatabëcuenenawëxaniabiaya, ayaicuenia Dioso bejiobia-exanaenatsi. Nexata, caecuenia caematacabita Dioso tocopiapatsia-exanaenatsi petëpaecuene, pematanueyabicuene, janibocuene. Totajuenatsinua isotota bajarapamonae pejinawanapaetomaraxanetomi. Bajarapacuenia Dioso naneconitsia-exanaenatsi bajarapamonae, tsipaji pepopetuxanenë Dioso, bitso piacuenesaënë, daxitajiwi pijaneconi petocaëjëtsinë-ata, siwanajamatabëcuenewereta bajarapacuenia penaneconitsia-exanaenexa», jai itsa jume athëbëwetsica.
9 »Daxitanacuanë pewetsiwi, pamonae pibisiacuene najua-exanawanapa Babilonia tomarapijiwi, najuacabarëyanua ayaijawa penamatamotsijawanë pexainaejawa, itsa tsëxëtaena petajuejawatsi bajarapatomaraxaneto, ya-itaxutonueya wawajai tsane.
10 Pecajunawi, tajë wecuanubenaena, petaejawata bajarapatomarapijiwimi peyamatatajuejawatsi. Bajarapamonae najumaitsi tsane:
«Bitso baja cajena bejiobi pinijitomaraxaneto, Babilonia tomarata, pejinawanapaewimi peyaiyataewimitsi. Cae-epatoyocujinae baja weriajawatsi, Dioso penaneconitsia-exanaexaetsi», najai tsane bajarapamonae.
11 Daxitanacuanëjawa, pamonae pecanajetabiabawanapaewi, nuena, ya-itaxutonueya wawajai tsanenua, tsipaji baja xua capatabiaba pecanajetsinexa, ajibi baja tsane pecomuacaewitsi.
12 Bajarapamonae capatabiaba pecanajetsinexa, oronanita, palatananita-ata pexanaejawanë, perlajawanë, penamatamotsi-ibotonë-ata. Capatabiabanua pexaniawiria papaëbërë, lino, seda papaëbërëjawanë-ata. Bajarapapapaëbërë peraënaejawanë, petsobiajawanë-ata. Capatabiabanua daxitawiria petuxujuwinaejawanë, pexaniajawanë-ata, marfíl-jawata pexanaejawanë, penamatamotsinaejawanë pexanaejawanë, broncenani, hierronani, mármol-ibo-ata pexanaejawanë.
13 Capatabiabanua canelabocojawanë, pexaejawa pematajejawanë pexanepanaeya-exanaenexa, inciensojawanë, mirrajawanë-ata. Capatabiabanua petuxujuwiranë, vinoranë, aceiteranë, pexaniawiria trigobenonë, trigobultonë-ata. Capatabiabanua vaca, oveja, caballo, perobobocaemonë-ata, carrozamonë. Capatabiabanua jiwi pecanajetsinexa itsamonaejawabelia amoneya petonacuenebawanapaenexa.
14 Nexata, pamonae pecanajetabiabawanapaewi ya-itaxutonueya jumaitsi tsane Babilonia tomarapijiwi yabara:
Daxitacuene panejitsipaecuenemi pacatowerewereca baja. Xuanë yabara bitso pasiwabarëyamë tsabiabi, pacatowerewereca baja. Daxitamatacabijawabelianexa pacato-ajibi baja tsane daxita panexainaejawanëmi, penamatamotsijawanë, pitabëjawanë-ata», jai tsane bajarapamonae ya-itaxutonueya.
15 Pamonae naexana ayaijawa palata pexainaewi, pecanajetabiabixae xua capata Babilonia tomarapijiwimijawabelia, bajarapamonae tajë wecuanubenaena pecajunawi, itsa taena bajarapatomarapijiwimi petajuejawatsi. Ya-itaxutonueya wawajai tsanubenae tsane.
16 Jumaitsi tsane Babilonia tomarapijiwi yabara:
«Bitso baja cajena bejiobi pinijitomaraxanetota pejinawanapaewimi. Bajarapatomarapijiwimi naxatababiaba picani pexaniawiria linopapaëbërëjawanë. Itsajawanë peraënaejawanë. Itsajawanë pijinia petsobiajawanë. Naitabëtabiabanua picani oronanitota pexanaejawanëta, perlajawanëta, penamatamotsi-ibotonëta-ata.
17 Itsiata baitsi jane, cae-epatoyocujinae saya werewereca baja bitso pexainaejawanëmi,» jai tsanubenae tsane daxita bajarapamonae.
Daxita pamonae barcoxanetonë pewetsiwi, bajarapamonëta penaponaewi, penacuenebiwi, pecaponaejawanë pecanajetaponaewi-ata, daxita bajarapamonae tajë wecuanubenaena pecajunawi, Babilonia tomarapijiwimi itsa tajuenatsi.
18 Daxita bajarapamonae tsëxëtaenubenaena Babilonia tomarami itsa tajuenatsi. Nexata, wawajaiya jumaitsi tsanubenae tsane bajarapatomarami yabara:
«Ajibi cajena itsanacuata pecuenejëpaetomara, pacuenia itsi picani mapapinijitomaraxanetoje petajuewajënaeya», jai tsanubenae tsane.
19 Bajarapamonae petsëxëtaenubenaejawata, natsimata-othocaena atsabenonë, bitso pesiwanajamatabëxainaexae Babilonia tomarapijiwimi, peto-ajibixaetsinua pecomuacaewitsi. Ya-itaxutonueya jumaitsi tsanubenae tsane:
«Bitso baja cajena bejiobi pinijitomaraxanetota pejinawanapaewimi. Babilonia tomarapijiwimi ayaijawa palata pexainaexae, bitso pexainaewi naexana daxita pamonae barco pexainaewi, pecanajetabiabixae xua capata bajarapatomarajawaberena. Itsiata baitsi jane, Cae-epatoyocujinae saya bajarapatomarami werewereca baja», jai tsanubenae tsane bajarapamonae.
20 Petaejawata pacuenia Dioso naneconitsia-exana Babilonia tomarapijiwimi, itsanëb Dioso pijanacuatatsia jamatabëcuenebarëyaya jumaitsi tsane:
«Dioso baja cajena naneconitsia-exana Babilonia tomarapijiwi, pebejiobia-exanabiabijamatabëcuene Dioso pijajiwi. ¡Nexata, pasiwajamatabëcuenebarëyamëre daxita athëbëtatsia panejinawanapaewi, paxamë Dioso papijajiwimë, paprofetawimë, pa-apóstolewimë-ata, tsipaji Dioso naneconitsiaya cuenecanawiata bajarapatomarapijiwijawabelia, pacuenia paxamëjawaberena exana!», jai itsanë athëbëtatsia.
21 Bajaraxuacujinae, piacuenesaë-ángelnë yotaxuaba piniji-ibotoxaneto bitso. Nexata, manuameniabereca asaëyata xuabareca bajarapa-ibotoxaneto. Ángelnë jumaitsi mapacueniaje:
«Pasaëwajëtota xuarecajë mapa-ibotoxanetoje, bajarapitsisaëwajëtota itsamatacabi Dioso bijianaena Babilonia tomaraxaneto. Apotaetsi baja nexata tsane icatsia matawëjëa.
22 Nexata baja, apojumetae tsane pijacallejawa arpa peracatabiabijawa, flauta, trompeta-ata piobabiabijawa. Itsajiwi-ata baja aponacuenebi tsane bajarajota. Apojumetae baja tsane icatsia matawëjëa trigoxu pecaquiatabiabijawa pecaquiatsi-ibotota.
23 Itsalámpara-ata baja aponaitayotsi tsane bajarajota. Apojumetae baja tsane jiwi barëyaya penabarëcuaicuaijaitsabiabijawa, penacojiobifiesta pexanaejawata. Daxita bajaraxuanë baja tocopiapatsianatsi, tsipaji bajarapatomarata pecanajetabiabawanapaewi, daxitanacuanëjawa wënëjoneyabiaba. Penajorobabiabijawatanua yamaxë-itojorobabiaba daxitanacuanëpijiwi.
24 Orijibia,c Babilonia tomarapijiwi, beyejeba profetawi, ayaibitsaëto Dioso pijajiwimi-ata. Bajaraxuata juya, Dioso ayaicuenia naneconitsia-exanaena Babilonia tomarapijiwi»,d jai bajarapa-ángelnë.