Itsamatacabi Dioso naneconitsia-exanaena Babilonia tomarapijiwi, patomara Dioso tane bepenaperabëcanajetsiwacuenia
17
Siete pa-ángel-nëbeje, siete pawaxiyobeje pecaponaewiyajuwënënë, caenë rena xanëjawaberena. Bajaraponë nejumaitsi:
—¡Naxatsia! Catsitajëtsianatsi pacuenia Dioso naneconitsia-exanaejitsia Babilonia tomarapijiwi, patomaraxaneto eca menexanetonëboxojumawereca. Bajarapatomarapijiwi cuenejëpa penaperabëcanajetsiwa,
2 tsipaji pacuenia bajarapitsiwaxi pebijiwi junatabiabatsi peperabëquenetsiataenexatsi pijawajiwiwecua, bajarapacuenia bajarapatomarapijiwi junatabiaba itsanacuanë pewetsiwi pejamatabëcueneyanabinexatsi, pesiwanajamatabëcuenecopatabiabijawata Diosowecua itsacuenejawanëjawabeliaa. Nexata, jamatabëcuenebijianatsi bajarapamonae-ata —nejai bajarapa-ángelnë.
3 Bajaraxuacujinae, Espíritu Santo bemajitsinaebocuenia neyapëtaeya-exana ángelnë tanebarëponaejawa petusatonacuayabelia. Bajarajotalia taeyetajë petiriwa, pe-ecaewa piayainë, petsobianë,b pejumata. Bajarapapiayainë xaina siete pamatabocotobeje, diez pijinia pamata-etobeje. Peperabëtuareca, Dioso apopejitsipaewënëanë, itanerubena.
4 Nexata, bajarapowa penaxatatsijawareca pabanaeya sãëjai, itsajawa tsobia. Naitabëteca orojawanëta, perlajawanëta, penamatamotsi-ibotonëta-ata. Cobena-eca oronanitota pexanaewaxiyo, pewënëcaejawa Dioso bitso piataejitsibijawanë.c
5 Bajarapowa pitapathaitota toyaquinarutatsi pitothiawënë. Itsajiwi-ata apoyapëtae pajamatabëcueneliwaisi xaina bajarapawënë. Mapejumaitsi-itane yaquinarutaje: «Babilonia tomaraxanetopijiwi capitsapabiaba jiwi pejamatabëcuenebijianaejawanënexatsi Diosowecua,d jumapecataeya pexanaenëanëjawabelia penawajëcabiabijawa. Capitsapanua, daxita papibisiacuenejawanë Dioso ayaicuenia itoya, pexanawanapaejawa mapanacuataje», pejai-itane, picani bajarapowa pitapathaitota toyaquinarutatsi.
6 Taeyetajë bajarapowa pia-itajibitsecaejawa Dioso pijajiwimi pejanaranë piapaecujinae, pamonaemi beyejebatsi, Jesús peliwaisi pewajunupaebixae ajamatabëcuenesaëya, bejiobia-exanae-atatsi picani pecopabia-exanaenexatsi.
Daxita bajaraxua itsa taniji, bitso cajena jamatabëcuenenajunawiacajë.
7 Nexata, ángelnë nejumaitsi:
—¿Detsa xuajitsia itaxutuajamatabëcuenenajunawiacame? Cayapëtaeya-exanaenatsi pajamatabëcueneliwaisi xaina mapowaje, papiayainëjumata-ata bajarapowa eca, pexainaenë siete pamatabocotobeje, diez pijinia pamata-etobeje.
8 Mapapiayainë tanemeje, bajaraponë ponaponae-ata picani bajayata mapanacuataje, aeconoxae baja apoponaponae. Itsiata baitsi jane, itsamatacabi pinijimëthëxanetojawatsina pitsapaeninae icatsia peponaponaenexa mapanacuataje. Bajarapamëthëwetsina pitsapaenina saya pebeyaxuabinexatsi, pepacuene jane baja pecopiarucaenexa. Bajarapapiayainë pepitsapaejawatsina petaejawata, nexata daxita mapanacuapijiwije jamatabëcuenenajunawiacaena, pamonae apowënërubenae Corderonë pijacuyalatobaxutota Dioso nacua pexanaewajënaeya, pabaxutota wënërubena matacabi apopewerewerecaejawa pexainaewi. Bajarapamonae jamatabëcuenenajunawiacaena, tsipaji bajaraponë pebeyaxuabicujinaetsi, icatsia asaë tsane —nejai ángelnë.
9 Icatsia, ángelnë nejumaitsi:
—Paliwaisi aeconoxae catsipaebijitsiatsi, pamonae baja peyapëtaewi, pecanaëjëtsijamatabëcuene pexainaewi, bajarapamonae jumeyapëtaena mapaliwaisije. Papiayainëjumata taeyetame petiriwa, pexainaenë siete pamatabocotobeje, bajarapamatabocotonë itajëta anijajamatabëcueneliwaisibeje; siete patsutobejejawata,f eca Babilonia tomarata, siete ponëbeje pijinia pewetsiwi Babilonia tomarata.
10 Nexata, cinco ponëbeje bajarapapewetsiwiyajuwënëwi tëpa baja. Seisnë aeconoxae ewetaponapona Babilonia tomara. Sietenë abaxë apotaxuxuabi pewetsinexa. Itsiata, bajaraponë bajayajebi apo-ewetsi tsane.
11 Papiayainë taneme, petsobianë, benewëthë, mapajamatabëcueneliwaisi xainaje: «Ponë picani bajayata eweta Babilonia tomara. Itsiata baja, aeconoxae bajaraponë apo-ewetsi, tsipaji baja tëpa. Itsiata baitsi jane, pamatacabi pinijimëthëxanetojawawetsina pitsapaenina, bajaraponë Babilonia tomara icatsia ewetsiana ochonëcuenia», pejaijamatabëcuene xaina. Ochonë-ata bajaraponë, itsiata bajarapasiete ponëbeje Babilonia tomara pewetsiwiyajuwënënëmi baja cajena. Cae-epatoyonexa saya ewetsiana bajarapatomara, tsipaji bajaraponëmi beyaxuabianatsi, pepacuene jane baja pecopiarucaenexa —nejai ángelnë.
12 Icatsia, ángelnë nejumaitsi:
—Papiayainë taneme, diez pamata-etobeje pexainaenë, mapajamatabëcueneliwaisi xainaje: «Diez rabaja pijinia ponëbeje pewetsiwinexa, pamonae abaxë apotaxuxuabi peyanacua-ewetsicuene», pejaijamatabëcuene xaina. Itsiata, pamatacabi taxuxuabiana pijanacuanë peyanacua-ewetsijawa, Dioso tocopatsiana bajarapamonae, cae-epatoyonexa saya, peyajawa-ewetaponaenexa piayainë, bepepopeyanacua-ewetsiwicuenia.
13 Bajarapadiez ponëbeje, pewetsiwi, juya caejamatabëcuene xainaena, petocopatsinexa penamatacaitorobisaë piayainëjawabelia, pijanacuanë peto-ewetsinexatsi.
14 Nexata, bajarapamatacabi bajarapadiez ponëbeje piayainë yajawa wajabitsaë barë-exanaena Corderonëjawabelia. Itsiata baitsi jane, Corderonë cuene-amoneyabiana daxita bajarapamonaemi, tsipaji yajawapatsiana pijajiwi, pamonae Dioso pejunatsiwi, Dioso pitapetsiwi, baitsi caejamatabëcuene pexainaewi Corderonëjawabelia. Corderonë cuene-amoneyabiananua, tsipaji bajaraPonë pepopetuxanenë daxita nacuanë pewetsiwi matatoxenetsia, pepopeyanacua-ewetsinënua daxita peyanacua-ewetsiwiwecua —nejai ángelnë.
15 Ángelnë icatsia nejumaitsi:
—Pamenexanetonëboxojumawereca taeyetame pibisiacuene pexanaewa, mapajamatabëcueneliwaisi xainaje: «Bajarapamenexanetonë jamatabëcuene-itajëta jiwibitsaëtoxanetonë, daxitawiriajumewi, daxitanacuanëpijiwinua, pamonae Babilonia tomarapijiwi jamatabëcuenebijianeca Diosowecua, peyanacua-ewetsijawata», pejaijamatabëcuene xaina.
16 Diez pijinia pamata-etobeje pecuenecataewi, pamonae diez panacuabeje pewetsiwinexa, piayainë yajawa, barë-itoya tsane pibisiacuene pexanaewajawabelia. Nexata, bajarapamonae yacajërëtsiana peyanacua-ewetsicuenemi, asiwaya peyaiyataecuenemi, daxita pecobecowë pexainaejawanëmi-ata, pecopatsinexa bejumasawag pexuababuatsicuenia. Werenianatsinua, bepexaeyabuatsicueniatsi unupijiwi pianaepanaewi. Pijatomarami-ata totajuitsianatsi isotota.
17 Dioso jamatabëcuene-itoroba bajarapadiez ponëbeje, najamatabëcuenejëpaeya petocopatsinexa piayainë pijanacuanë peto-ewetsinexatsi. Nexata, piayainë bajarapamonae pijanacuanë to-ewetsianatsi, matapania pecopiapatsijawabelia daxita pacuenia Dioso tajëwelia najumecapanepaeya jumaitsi.
18 Powa, pibisiacuene pexanaewa, taeyetame menexanetonëboxojumawereca, mapajamatabëcueneliwaisi xainaje: «Pinijitomaraxaneto Babilonia tomarapijiwi, patomara jamatabëcuenenamatacaitoroba mapanacuanë pewetsiwije, pibisiacuene pexanaponaenexa», pejaijamatabëcuene xaina —nejai ángelnë.