Juan tane athëbëtatsia pacuenia itsamatacabi Dioso naneconitsia-exanaejitsiaa daxita pijaneconi pexainaewi
16
Icatsia, jumetaniji templobo-ënëjawawerena pinijijumeta pejumaitsijawa, bajarapasiete pa-ángelnëbejejawabelia mapacueniaje: «¡Paponare iranëjawabereca, pane-epacaponaenexa jane baja, xuanë siete pawaxibeje wënëca, piayaijawanë! Dioso jane baja, anaeya ayaicuenia penaneconitsia-exanaejawanexa daxita pamonae naneconita bajaraponëjawabelia», pejaijawa jumetaniji.
2 Nexata jane baja, penamataxainae-ángelnë, waxiyota pecaponaera epatajaraba irajawabereca. Nexata, daxita pamonae piayainë pewënë-itanetota itanerubatsi, asiwaya, yaiyataeya, tonubenabiabanua pematabacabëta jumapecataeya pexanaenë pitabarata, bajarapaepatota bitso perabëtsabanareca,b pepopiatanejawanë.
3 Bajaraxuacujinae, pecotocaewi-ángelnë pijawaxiyopijira epatajaraba manuamenejawabereca. Manuamenemi nexata, naexana bepetëpaenë pejanara.c Daxita baja tëpa manuameneta pejinawanapaewimi.
4 Bajaraxuacujinae, acueyabi-ángelnë pijawaxiyopijira epatajaraba menianëjawabereca, irawetsina pepitsaparubenaemeranëjawabereca-ata. Nexata, daxita bajarapameranëmi naexana ëpejanaranë.
5-6 Bajaraxuacujinae, jumetaniji mera pewetsi-ángelnë wënëxaniatsiaya pejumaitsijawa Diosojawabelia mapacueniaje:
«Diosomë, xamë raja cajena caeto-ata pibisiacuene aponexanaenë. Xamë raja daxitamatacabi neyamatacabiatsitecaponaponaenë. Ajena pamatacabi ponaponame. Nacua ne-exanaewajënaeya-ata, ponaponame. Pepopexaniacuene nexanaenë raja, bajarapacuenia nenaneconitsia-exanaejawata pijaneconi pexainaewi.
Bajarapacuenia naneconitsia-exaname pecatobeyejebaponaexae nijajiwi, pijaneconimi newecua-ajibia-exanaewi, pamonaeata nijaprofetawimi. Nijajiwi pecatobeyejebiwi, xamë juya meranëmi pejanaranë to-exanaeya-exaname, bajarapamonae penatsi-apaenexa»,d jai Diosojawabelia mera pewetsi-ángelnë.
7 Icatsia, jumetaniji itsa-ángelnë, altar-jawawerena pejumaitsijawa mapacueniaje:
«¡Xaniajai cajena! Xamë, Diosomë, niajamatabëcuenesaënë daxitajiwiwecua. Jiwi nenaneconitsia-exanaejawata, pexaniajaicuenia naneconitsia-exanabiabame, pijaneconi pexainaewi», pejaijawa jumetaniji itsa-ángelnë wënëxaniatsiaya Diosojawabelia.
8 Bajaraxuacujinae, cuatro-ángelnë pijawaxiyopijira epatajaraba matacabipijijuametojawabetsica. Nexata, matacabipijijuameto pecotiata jiwi bitso ayaicuenia tsajawatsi.
9 Itsiata, bajarapacuene tae-ata, bajarapamonae apocopabi pibisiacuene pexanaponaejawa. Aponajamatabëcuenepënëyorotsinua Diosojawabelia, pewënëxaniatsinexa bitso ayaijamatabëcuenenëcuene yabara. Biji saya caranata, pibisiacuenia wënëbaracacuaicuaijai Dioso, ponë pecaëjëpaenëtsi petsitorobinexatsi, itsa jume, pewecua-ajibia-exanaenexatsi papiayaicuenejawanë tsitorobaponatsi.
10 Bajaraxuacujinae, cinco-ángelnë pijawaxiyopijira epatajaraba piayainë pijatronojawabereca, itsajota yanacua-eweteca daxita nacuanëpijiwi. Nexata, bajarapanacuanëmi aitaquiri tsanucae.e Orijibia, piayainë peyanacua-ewetsiwi bitso nawixaetane. Nexata, penawixaetaecobexae na-ebarëto ucubaxane.
11 Itsiata baitsi jane, bajarapacuene tae-ata, pewixaecobexae, bajarapamonae pibisiacuenia wënëbaracacuaicuaijai Dioso, ponë athëbëtatsia pe-ecaenë. Aponajamatabëcuenepënëyorotsinua Diosojawabelia, bitso peperabëtsabanaexae. Biji saya caranata, tsiteca pibisiacuene exanawanapa.
12 Bajaraxuacujinae, seis-ángelnë pijawaxiyopijira epatajaraba, pinijimenexaneto Éufrates menejawabereca. Nexata, bajarapamenexaneto tsewajunua, namuto petorucaenexatsi iranë pewetsiwi penicabinexa, penajetarubenaewi orientejawawetsina.
13 Bajaraxuacujinae, taniji acueyabi padowathinëbeje, becuaitoxicuenia pepitsapaejawa. Copiayanë pitsapa tsawaliwalinë pecuaibowojotuatsina. Cotocaewinë pitsapa piayainë pecuaibowojotuatsina. Acueyabinë pitsapa peyamaxë-itojorobiprofetanë pecuaibowojotuatsina.
14 Bajarapadowathiwi pinijicuene pexanaejawanë, exanapona. Bajarapamonae pona daxitanacuanëjawa, pebarënacaetuatsinexa caejawata daxitanacuanë pewetsiwi, pijajiwi wajabitsaë yajawa, wajabitsaë pebarë-exanaenexa daxitawecua piajamatabëcuenesaënë Diosojawabelia. Nexata, wajabitsaë barë-exanaena Dioso tajëwelia penato-itapetsimatacabita. Bajarapamatacabita jane baja, Dioso cuene-amoneyabiana daxita pitoyawitsi, pebarënawajabitsaëtsiwitsijawabelia-ata.
15 Bajaraxuacujinae, jumetaniji Wajatuxanenë, Jesús, pejumaitsijawa: «¡Panenamuxuna-ewere! Itsajota apopanejamatabënajinaemë, bajarajota jemata patsianajë. Baitsi, pacuenia penacobetoxotsinë jemata bapata, itsajota jiwi apojamatabënajinaetsi, bajara-itsinë tsane. Bitso jamatabëcuenebarëya tsane pajiwi jamatabëcuene-aitawaya ponaponaena tanecopiapitsinexa. Nexata, benacuenexaniawaeta tajitsipaecuenia, tapatsimatacabi pia-urayaniwa, pacuenia aura tsipae pejumasajinaewi,f pecopiapitsinexa pesiwaxainaewitsi», pejaijawa Jesús, jumetaniji.
16 Nexata jane baja, pepodowathi pijajiwi caetuatatsi daxitanacuanë pewetsiwi caejawata, Armagedón-wënëjawatag hebreojumeta.
17 Bajaraxuacujinae, siete-ángelnë pijawaxiyopijira epatajaraba itaboxojawabetsica. Nexata, athëbëtatsia templobo-ënëtuatuajëta Dioso pe-ecaetronojawawerena, pinijijumeta jumaitsi: «Daxita rajane baja, wereta Dioso penaneconitsia-exanaejawa mapanacuapijiwije», jai athëbëtatsia templobo-ënëtuatuajëta.
18 Nexata jane baja, binebinejai yamaxë. Ayaicuenia napëna najumetapona. Iranë-ata najëaba pinijicuenia. Jiwi pejinawanapaejawaweliacujinae mapanacuataje, caeto-ata apotae bajarapacuenia ira pinijicuenia penajëabijawa.
19 Bajarapacuenia penajëabixae, pinijitomaraxanetomi, Babilonia tomarami,h acueyabi xuabeje ira natsana. Bajarapacuenia itsanacuanëpijitomaranëmi-ata othopa irata. Bajarapacuenia Dioso exana bajarapapinijitomaraxanetopijiwimijawabelia, penajamatabënapitsixaei bitso pibisiacuene pexanaejawa. Nexata, Dioso ayaicuenia bara-anaepana. Bajaraxuata, pinijicuenia naneconitsia-exana bajarapatomarapijiwimi.
20 Pinijicuenia ira penajëabixae, daxitatunaetonëmi, daxitatsutonëmi-ata, ajibi baja. Ira baja namatajëpa.
21 Orijibia, athëbëwetsica othopaica jiwijawabetsica bitso pecainejebimatarejetonë, granizojawanë, pinijijawanë, piarewejawanë cuarenta pakilobeje pexainaejawanë. Bajarapacuenia penaneconitsia-exanaexaetsi, mapanacuapijiwije bitso pibisiacuenia wënëcuaicuaijai Dioso, tsipaji tsitatsi pinijinaneconitsia-exanaecuenetsi.j