Pacuenia Juan tane athëbëtatsia siete ponëbeje ángelewi, siete xuabeje piayaijawanë pecaponaewi, penaneconitsia-exanaenexa mapanacuapijiwije, yabara peliwaisi
15
Icatsia, taniji athëbëtatsia pinijicuene pitajëtsijawa, xuanë itsamatacabi bitso pibisiacuenejawanë copiapatsijitsia mapanacuataje; ayaicuenia jiwi pitaxutuanabenajacaejawanë. Taniji siete pa-ángel-nëbeje, pecaponaewinexa siete xuabeje piayaijawanë, xuanëta Dioso naneconitsia-exanaejitsia mapanacuapijiwije, pecopiarucaejawanëta. Bajarapapiayaicuenejawanë pepanepaecujinae, Dioso baja, mapanacuajiwi bitso pebara-anaepanaecueneje, copiarucaena.a
2 Nexata, icatsia taeyetajë bemanuamene picani. Itsiata baitsi jane, piatajajawa, penasabijawanua pacuenia vidriojawa. Bajarapanasabiboxojawa naitayota, pacuenia cotia-itsi isoto. Bajarapanasabiboxojumawereca nubena pamonae pecuene-amoneyabiwib piayainë, bajarapapiayainë jumapecataeya pexanaenëtsi-ata. Bajarapamonae itorobi-atatsi, apotonubenae pematabacabëta bajaraponëjawabelia, penajamatabëcuene-itajëtsinexa asiwaya peyaiyataejawa. Aponacopatsinua pitanerubinexatsi piayainë pijanúmerota, panúmero xaina pewënënexa. Pecuene-amoneyabixae, bajarapamonae canubena Dioso perajutsi-arpajawanëtsi.
3 Nexata, bajarapamonae naxëananubena Moisés-pijinë pewaji,c Dioso pijajiwitonëmi, Corderonë-ata pewaji. Wënëxaniatsiaya jumaitsi tsanubenae mapacueniaje:
«Xamë, petuxanenëmë Dioso, niajamatabëcuenesaënë daxitawecua. Daxita nexanaejawanë, pinijicuenejawanë cajena, jiwi pitaxutuanabenajacaejawanë.
Xamë raja neyanacua-ewetsinë daxitanacuanëjawa. Neyanacua-ewetsijawata, nesiwacanaëjëtsicuenia najëpaeya pexaniacuenia exanabiabame, itsacuenia exanaenejewamë nejumaitsicuenia.
4 Xamë, petuxanenëmë Diosomë, daxitajiwi pecayaiyataenë tsane. Pexaniacuenia cawënëxaniatsiananua, ayaijamatabëcuene nexainaenë yabara, tsipaji rabaja cajena caenëmë peponianeconijibinë.
Bajaraxuata, daxita nacuanëpijiwi patsiana xamëjawabelia, asiwaya, yaiyataeyanua, pecatonubenaenexa pematabacabëta, xamë nitabarata. Bajarapacuenia cato-exanaena, tsipaji baja daxitajiwi yapëtaena ëpexaniacuene nexanaponaponaejawa», jai tsanubenae naxëanaeya, pewënëxaniatsijawata Diosojawabelia.
5 Bajarapacuenia penaxëanaecujinae, icatsia taniji athëbëtatsia templobo-ënëtuatuajëalia peyatu-ucutsipana penapatsijawa, papana ruca Dioso penajumecopatsiliwaisi Moisés-pijinëta peyaquinae-ibopananë pexaniawaetejebibaula pewajënaeya.
6 Nexata, bajarapayatu-ucutsitaxunae-ënëwerena pitsaparena siete pa-ángel-nëbeje, pecaponaewinexa siete xuabeje piayaijawanë, xuanëta Dioso naneconitsia-exanaejitsia mapanacuapijiwije. Bajarapa-ángelewi naxataba pexaniawiriapapaëbërëjawanë, piaxuirajibijawanë. Peniojaijawanë bitso. Nacorobëcëbanubena oronanitota pexanaepananë.
7 Bajaraxuacujinae, caenë, cuatro ponëbeje pitothiawiyajuwënënë, rajutapona cae-oronanitota pexanaewaxiyo Dioso, pianaepanaejawa pewënëcaejawanë, ponë daxitamatacabijawabelianexa peponaponaenë. Rajutapona, caewaxiyo, caenë canacujitsia, bajarapasiete pa-ángelnëbejejawabelia, Dioso ayaicuenia anaeya penaneconitsia-exanaejawanexa mapanacuapijiwije, pibisiacuene pexanawanapaexae.
8 Bajarapayatu-ucutsi-ënë templobota, bitso wënëca ëtsëxë, penajamatabëcuene-itajëtsinexa peponaponaejawa Dioso ayaijamatabëcuenenë daxitawecua, Dioso pepopiasaënëcuene-ata. Nexata, itsajiwi-ata cajena apocaëjëpaetsi pejonenexa bajarapatemplobo-ënëtuatuajëabelia, matapania daxita peweretsijawabelia xuanë siete pa-ángel-nëbeje capona, piayaijawanë.