Pacuenia Juan tane 144.000 pajiwibeje, Dioso pijajiwi, penaxëanaejawa, yabara peliwaisi
14
Bajaraxuacujinae, taniji Corderonë penucaejawa Sión-tsutojumata. Barënuca ciento cuarenta y cuatro mil ponëbeje,a pitapa-itanerubiwitsi Corderonë pewënë, paxa-ata pewënë.
2 Bajaraxuacujinae, jumetaniji athëbëwetsica pecuaicuaijaijawa, pacuenia bitso banajumeta pinijijõca, beyamaxë penajumetsijume-ata. Jumejëpanua pacuenia arpa, ayaibitsaëtoxaneto itsa najuaracata.
3 Bajarapacuenia najumetane, tsipaji Corderonë pijajiwi, ciento cuarenta y cuatro mil ponëbeje, naxëananubena pejanawaji trono pitabarata, cuatro ponëbeje pitothiawi, ancianowi-ata pitabarata. Itsajiwi-ata cajena apocaëjëpaetsi pecujaninexatsi bajarapapejanawaji bajarapamonaewecua, tsipaji bajarapaciento cuarenta y cuatro mil ponëbeje Dioso capanepatsi mapanacuawecuaje, Corderonë peneconimatamotsixae pejanata.
4 Bajarapamonae penaexanaejawawerenacujinae apopenaperabëquenetsiataewi petiriawijawabelia.b Xaniawaetsia penajamatabëcuene-ewetsiwi Dioso pitabarata. Pënajinawanapanua Corderonë itsaxuayo ponapona. Bajarapamonae baja namataxainaeya Dioso capanepatsi itsamonae pewajënaeya, Corderonë, Dioso-ata, pijajiwinexa, Corderonë peneconimatamotsixae pejanata.
5 Bajarapamonae caeto-ata aponajumetsënëtsi. Aneconijibi tsawanapae Diosojawabelia.
Acueyabi ponëbeje ángelewi wajunupaeba pacuenia itsamatacabi itsijitsia mapanacuataje
6 Icatsia, itsa-ángelnë taniji pepunanajetarucaejawa. Canajetaruca pexanialiwaisi, apopewerewerecaeliwaisi, petsipaebinexa mapanacuajawa pejinawanapaewije. Tsipaebijitsia daxitanacuanëpijiwi, daxitawiriajumewi-ata.
7 Bajarapa-ángelnë pinijijumeta jumaitsi tsanajetarucae: «¡Dioso cujunawiaya pajinawanapare! Pawënëxaniatabiabianamenua bitso ayaijamatabëcuene pexainaejawa yabara, tsipaji rabaja copiapata Dioso penaneconitsia-exanaponaenexa daxitajiwi. Asiwaya, yaiyataeyanua, panematabacabëta panawajëtabiabianame Diosojawabelia, tsipaji bajaraPonë exana itaboxo, ira, manuamene, mera pepitsaparubenaejawanë-ata», jai tsanajetarucae ángelnë pinijijumeta.
8 Icatsia, cotocaewi taniji itsanë ángelnë pepunanajetarucaejawa. Bajaraponë jumaitsi tsanajetarucae:
«Dioso rabaja werebiaba Babilonia tomaraxanetopijiwimi, tsipaji bajarapatomarapijiwimi jamatabëcuenebijianapona daxitanacuanëpijiwi, pesiwanajamatabëcuenecopababiabinexa itsacuenejawanëjawabelia Diosowecua. Nexata, belia daxita nacuanëpijiwi jamatabëcuenejëpatsi asiwaya penawajëcabiabinexa jumapecataeya pexanaenëanëjawabelia, bitsoc pibisiacuene pewitotad pexanawanapaenexanua najamatabëcuenecataitsinejewa», jai tsanajetarucae cotocaewi pa-ángelnë punanajetaruca.
9 Bajaraxuacujinae, icatsia taniji acueyabi-ángelnë pepunanajetarucaejawa. Bajaraponë pinijijumeta jumaitsi tsanajetarucae:
«Pajiwi najamatabëcuene-itajëta asiwaya peyaiyataejawa copiaya pepitsapaepiayainëjawabelia, bajaraponë jumapecataeya pexanaenëjawabelia-ata, pematabacabëta petonucaejawata, penacopatsijawatanua piayainë pewënë pitapata, itsa jume, pecobejumata pitanerutsinexatsi, bajarapajiwi naneconitsiana Diosojawabelia.
10 Bajarapacuenia pexanaewi natoyapëtaena Dioso bitso pebara-anaepanaejawatsi, ayaicuenia penaneconitsia-exanaenexatsi, najamatabëcuenecataitsinejewa. Nexata, naneconitsia-exanaenatsi azufre yajawa petajue-isotojawabelia,e Dioso pija-ángelewi pitabarata, Corderonë-ata pitabarata.
11 Ayaicuenia Dioso penaneconitsia-exanaexaetsi, athëbëabetsia bajarapa-isototsëxë junaenia daxitamatacabijawabelianexa. Baitsi, pamonae najamatabëcuene-itajëta asiwaya peyaiyataejawa piayainëjawabelia, bajaraponë jumapecataeya pexanaenëjawabelia-ata, pematabacabëta petonubenaejawata, penacopatsijawatanua piayainë pewënë pitanerutsinexatsi, isoto petajuta bitso jamatabëfaefaena. Cae-epatoyo-ata apocopatsi tsane.f Bajarapacuenia Dioso naneconitsia-exanaenatsi pejamatabëcuenewënëcaexae pebara-anaepanaejamatabëcuene bajarapajiwijawabelia pijaneconi yabara.
12 »Bajaraxuata, Dioso pijajiwi benacuenecujaruba piajamatabëcuenesaënexa Diosojawabelia, copatsinejewa pitaxutuajamatejemajawa Jesús-jawabelia, pejumecowënëtawanapaejawanua Dioso pitorobiliwaisitsi, itsamonae bejiobia-exanabiabi-atatsi bajaraxuanë yabara», jai tsanajetarucae pa-acueyabi ángelnë punanajetaruca.
13 Bajaraxuacujinae, jumetaniji athëbëwetsica tanejumaitsijawa mapacueniaje:
—Yaquinarutsianame mapejumaitsiliwaisije: «¡Mapamatacabijawaweliacujinaeje, pewajënaeyabelia-ata, jamatabëcuenebarëya baja tsawanapae tsane pamonae beyaxuabatsi Wajatuxanenë Jesucristo pijajiwixae»,g pejailiwaisi, yaquinarure! —nejai athëbëwetsica.
Orijibia, Espíritu Santo-ata nejumaitsi bajarapamonae yabara mapacueniaje:
—Xaniajai rabaja tsane. Bajarapamonae raja Dioso pexaniacuenia peyawenonaewitsi, tsipaji baja nacuera-ewetsiana penacuenebijawawecua, pebejiobia-exanaejawatsiwecuanua. Bajarapacuenia Dioso matamotsianatsi daxita xua pexaniacuene exanawanapa, pamatacabi abaxë asaë tsawanapae mapanacuataje. Nexata, jamatabëcuenebarëya tsawanapae tsane —nejai Espíritu Santo.
Pacuenia itsamatacabi Dioso naneconitsia-exanaejitsia daxita pamonae pijaneconi pexainaewi, yabara peliwaisi
14 Icatsia, taniji penioponae-itarërëbojumawetsica pe-ecaejawa jiwitonë. Bajaraponë netsita Jesús, Daxitajiwi Pematapijinë. Namataxatateca oronanitota pexanaecorona. Cobena-eca pexiujaijawa, penajumafurutsijawa, bemasete pecaucubinexa penaweretsitrigoruanë.
15 Nexata, icatsia, itsanë ángelnë pitsaparena templobo-ënëwerena. Asaëyata wawajai itarërëbojumawetsica pe-ecaenëjawabelia. Mapacueniaje: «¡Caucubare jane baja penaweretsiruanë mapanacuayaberecaje, tsipaji rabaja copiapata necaetuatsimatacabinexa penaweretsixu mapanacuatarecaje!», jai itarërëbojumawetsica pe-ecaenëjawabelia.
16 Nexata, bajaraxuacujinae ponë eca itarërëbojumawetsica, penajumafurutsimaseteta irajumawereca caucubanajetaruca penaweretsitrigoruanë.h Caetuata jane baja daxitanacuanëpijiwi, pacuenia pijapabi pexainaenë notabiaba penaweretsitrigoruanë, petanabataxuabinexa.
17 Bajaraxuacujinae, icatsia athëbëtatsia itsa-ángelnë pitsaparena templobo-ënëwerena. Bajaraponë-ata capona pexiujaijawa, penajumafurutsijawa, bemasete pecaucubinexa penaweretsi-uvaruanë.
18 Orijibia, itsa-ángelnë, altar-piji-isoto pewetsinë, pitsaparena altar-jawawerena. Junata pinijijumeta pexiujaimasete, penajumafurutsijawa, pecaponae-ángel-nëjawabelia. Jumaitsi mapacueniaje: «¡Mapanacuayaberecaje caucubaremeca daxita penaweretsi-uvaruanë!», jai.
19 Nexata jane baja, bajarapa-ángelnë pexiujaijawa, penajumafurutsimasetejawata irajumabereca caucubanajetaruca penaweretsi-uvaruanë. Pecaucubicujinae, othoca bajarapa-uvacuaii petaxubataxuabimëthëabelia, pebarëmeneyujubataxuabinexa. Bajarapataxubataxuabimëthë nacatocuenecatane Dioso pebara-anaepanaejawa pibisiacuene pexanaewijawabelia.
20 Nexata jane baja, uvacuaibarëmene yujubataxuaba tomarapënëwerena. Nexata, pebarëmeneyujubataxuabijawata pinijijanaraxaneto pitsapapona. Bajarapajanaraxanetoj penawotsijawa piapiajawa xaina trescientos pakilómetrobeje. Piawajubuajawa pijinia xaina bejamatabëcuene caemetro epatua.