Juan yaquina piayainëbeje peliwaisi
13
Tanucaejawata manuamene tajetabota, taniji manuamenejawatsinaa pepitsapaejawatsina piayainë,b penucaenexa bajarapamene-itapata. Bajaraponë xaina siete pamatabocotobeje, diez pijinia pamata-etobeje.c Caemata-eto canacujitsia xainapona corona. Caematabocoto canacujitsia yaquinarubapona Diosonexa bitso piamuxujitsibiwënëanë.
2 Papiayainë taenucajë pepitsapaejawatsina, benewëthë peyaquijainë picani. Itsiata, petaxu xaina bepianaepanaewiria oso. Pecuaibowojoto pijinia cuaibojëpa benewëthë petsobianë. Tsawaliwalixaneto penamatacaitorobisaë rajuta bajaraponëjawabelia. Tocopata pijatrono.d Jamatabëcuenecaëjëpaeya-exananua, ayaicuenia pitorobinexa daxitanacuanëpijiwi mapanacuataje.
3 Bajarapapiayainë caematabocotoe matawajënëbatsi apobepeya-asaëwajënënexa itajara. Itsiata baja, matawajënënacëta.f Daxitanacuanëpijiwi itsa tane bajaraponë pematawajënënacëtsijawa, bitso jamatabëcuenenabenajaca. Nexata, bajaraponë pepaebiliwaisi pënapona.
4 Nexata, daxita bajarapamonae asiwaya, yaiyataeya, tonubena pematabacabëta tsawaliwalixaneto pitabarata, petocopatsixae piayainë pitorobinexa daxitajiwi mapanacuajawaje. Orijibia, yaiyataeya pematabacabëta tonubenanua piayainëjawabelia-ata. Wënëxaniatsiaya jumaitsi mapacueniaje piayainë yabara: «Ajibi cajena itsanë-ata pejamatabëcuenecaëjëpaenëtsi pacuenia itsi mapapiayainëje. Ajibi cajena itsanë-ata pecaëjëpaenëtsi pebarënabenexa, maponëje pecuene-amoneyabinexa», jai bajarapamonae wënëxaniatsiaya piayainë yabara.
5 Dioso cuenecopatag piayainëjawabelia, pibisiacuenia pebaracuaicuaijainexatsi, ayaijamatabëcuenenë nataeya.h Tocopatatsinua pitorobinexa jiwi mapanacuajawaje cuarenta y dos pajuametobeje.i
6 Bajaraponë exanapona pacuenia tocopatatsi. Bitso pibisiacuenia baracuaicuaijai tsabiabi, Dioso, Dioso pewënë, Dioso pijatemplobo, athëbëtatsia pejinawanapaewi-ata.
7 Dioso cuenecopatatsinua wajabitsaë pexanaenexa Dioso pijajiwijawabelia, pecuene-amoneyabinexa-ata. Orijibia, tocopatatsi pitorobinexa daxitawiriajumewi, daxita nacuanëpijiwi-ata.
8 Nexata, daxita mapanacuapijiwije pamonae apowënërubenae Corderonë pijacuyalatobaxutota, yaiyataeya pematabacabëta tonubenabiaba piayainë pitabarata. Bajarapabaxutota, Dioso nacua pexanaejawaweliacujinae, Corderonë wënëyaquinapona ëpamonae matacabi apopewerewerecaejawa pexainaewinexa, bajaraPonë pesiwatëpaexae, pijaneconijamatabëcuene.
9 ¡Paxamë, Dioso papijajiwimë, itsa pamuxuwojorubename, panatojumetaema Dioso papecatsipaebiliwaisi! Pejumaitsijume mapacueniaje:
10 «Paxamëyajuwënëwi, pamonae xanë Diosonë tocaëjëtajë pijawajabitsaë petaicaenexatsi, taicaenatsi. Pamonae pijinia tocaëjëtajë espadata pebenexatsi, espadata benatsi», pejaijawa Dioso papijajiwimë yabara. Bajarapacuenia Dioso pijajiwi bejiobia-exanabiabi-atatsi, xanepana pewajënaeyabelia pitaxutuajamatejematsaponaejawa Diosojawabelia, epatua copatsinejewa.j
11 Bajaraxuacujinae, icatsia taniji irawetsina pepitsapaejawa itsanë piayainë. Anijamata-etobeje pexainaenë pacuenia oveja pebito mata-e-itsi. Itsiata baitsi jane, pecuaicuaijaijawata, jumejëpa pacuenia tsawaliwali jume-itsi.
12 Cotocaewi pepitsapaepiayainë irawetsina, namatacaitorobisaëjëpa copiaya pepitsapaenë manuamenejawatsina. Nexata, bajarapacuenia bajaraponë namatacaitorobaponapona daxita mapanacuapijiwije, copiaya piayainë pitabarata. Itorobabiaba yaiyataeya pematabacabëta petonubenaenexa copiaya pepitsapaenëjawabelia, ponë xaina pematabocotota apobepeya-asaëwajënënexa itajara matawajënënacëta.
13 Nexata, papiayainë irawetsina cotocaewi pitsapaina, ayaicuene pexanaejawanë jiwi tsita-exanapona. ¡Bajarapacuenia pexanaponaejawata, pematatsënëa pitatsajawi-ita-ire athëbëwetsica othopaeya-exana irabetsica, daxitajiwi pitabënejewa!
14 Pa-ayaicuenejawanë tocopatatsik pexanaponaenexa, pewënëta papiayainë copiaya manuamenejawatsina pitsapaina pitabarata, bajaraxuanë pejamatabëcueneta yamaxë-itojoroba mapanacuajawa pejinawanapaewije. Nexata, itorobapona daxita pamonae yamaxë-itojoroba bajaraxuanëta, pexananutsinexa jumapecataenë, papiayainë copiaya manuamenejawatsina pitsapaina jumapecataeya, ponë icatsia asaë, beyaxuabi-atatsi espadata.l Nexata, bajaraponë jumapecataeya exana jane baja.
15 Nexata, cotocaewi papiayainë irawetsina pitsapaina, Dioso cuenecopatatsim piasaëya-exanaenexa bajarapajumapecataenë, pecuaicuaijaiya-exanaenexanua. Bajarapajumapecataenë jane baja, itoroba pebeyaxuabia-exanaponaenexa daxita pamonae asiwaya, yaiyataeya, apotonubenaetsi pematabacabëta.
16 Orijibia, bajarapajumapecataenë jane baja pejamatabëcueneta, daxitajiwi mapanacuata pejinawanapaewije, cobejuma-itanerubaponaeya-exanaenatsi, pecujuanenia pacobe, itsa jume, pitapathaitota. Bajarapacuenia exanaena daxitajiwijawabelia; pamonae beweliajamatabëcuenewi, ayaijamatabëcuenewi-ata, pamonae bitso pexainaewi, bepejiobiwi-ata, pamonae amoneya petonacuenebawanapaewi itsamonaejawabelia, pamonae-ata amoneya apopetonacuenebawanapaewi itsamonaejawabelia, apopecanajetsiwitsi-ata itsamonaejawabelia amoneya petonacuenebabiabinexa. Daxita bajarapamonae itanerubaponaenatsi.
17 Nexata, itsajiwi-ata apocuenecaëjëpaetsi tsane itsacuenejawayo-ata pecomuatsinexa, pecanajetsinexa-ata, pajiwi apoxainae pitanerutsijawatsi. Pa-itanetota jiwi itanerubaponaenatsi, papiayainë copiaya manuamenejawatsina pitsapaina, pewënë, itsa jume, pijanúmero pewënë.
18 Paneyapëtaenexa pajamatabëcuene xaina bajaraponë pijanúmero, xaniawaetsia bepacanaëjëtame. Pajiwi canaëjëtsiana, yapëtaena jiwitonë pijanúmeronexa. Bajarapanúmero raja seiscientos sesenta y seis tsane.