Mapacueniaje Wajatuxanenë Jesús itoroba, Juan petoyaquinaenexa Jesús pijajiwi Sardis tomarata penamatacaitorobinëjawabelia
3
Jesús icatsia nejumaitsi:
—¡Toyaquinare tajajiwi penamatacaitorobinëjawabelia, Sardis tomarata peponaponaenë, pijajiwi yajawa, neyapëtaeya-exanaenexa tacatsipaebicuenia!
»Mapacueniaje Jesús, ponë xaina siete pa-espíritubeje, Dioso pija-Espíritu, pecobenanucaenënua siete patuluputobeje, pacajumaitsi:
«Yapëtaniji daxita xua pa-exanawanapame. Paxamë yabara itsamonae pacawënëliwaisitae-ata panejamatabëcuene-aitawajawa Diosojawabelia, itsiata xanë taitabarata pepacujiru pajamatabëcuenetëpawanapame.
2 ¡Panayajiwitaema! ¡Paca-asaëmëre papecatowerewerecaeyaniwa, Dioso pejitsipaecuenejawanë pane-exanawanapaejawa, tsipaji baja imoxoyo papecatocopiarucaejawanexa! Pacacuenetanetsi Dioso pejitsipaecuenia bijiaya pane-exanawanapaejawa.
3 ¡Panajamatabënapitaponare copiaya paliwaisi paxamë pajumexaniataneme, itsamonae papecacujarubiliwaisi! ¡Paca-asaëmëre tsawanapae bajarapaliwaisi panejumecowënëtawanapaejawa! ¡Panajamatabëcuenepënëyorore taxa Diosojawabelia, pibisiacuene pane-exanaejawawecua! Nayajiwitaeya itsa apopajinawanapaemë tsane, tajitsipaecuenia pane-exanawanapaenexa, nexata xanë jemata patsiarecajë, paepatota apopanejamatabënajinaemë, patacananeconitsia-exanaenexa panijaneconijamatabëcuene. Pacuenia penacobetoxotsinënexa jemata bapata, paepatota apojamatabënajinaetsi, bajarapijinia xanë-ata itsinë tsane.
4 Itsiata, yapëtaniji pacuenia Sardis tomarata, itsamonae, caejiwixi, tajajiwiyajuwënëwi, penaxatabijawa apopebijianaewia jinawanapa. Tsitecaeya jinawanapa apopenaxuirabiwicuenia, pibisiacuene apopexanaexae. Bajarapacuenia pejinawanapaexae, itsamatacabi bajarapamonae xanë neyajawajinawanapaena, naxatabiana penioponaejawanë,b penajamatabëcuene-itajëtsinexa pianeconijibiwicuene.
5 Pajiwi ajamatabëcuenesaë pewajënaeyabelia, pitaxutuajamatejemajawa taxa, Diosojawabelia, ëpetëpaejawabelia, itsamonae bejiobia-exanae-atatsi pecopabia-exanaenexatsi, bajarapajiwi-ata naxatabiana penioponaejawanë. Apowënë-iquinaenë-ata tsane pabaxutota wënërubena pamonae matacabi apopewerewerecaejawa pexainaewinexa. Biji rajane, wënëyapëtaeya-exanaponaenajë taxajawabelia, pija-ángelewijawabelia-ata, tatsitajëtsinexa tajajiwicuene.
6 Pajiwi muxuwojoruca, natojumetae pacuenia Espíritu Santo jumaitsi daxita Jesús pijajiwijawabelia», pacajaitsi xanë, taxainaenë siete pa-espíritubeje, Dioso pija-Espíritu, tacobenanucaenënua siete patuluputobeje —nejai Jesús, tatoyaquinaenexa ponë namatacaitorobaponapona Jesús pijajiwi Sardis tomarata.
Mapacueniaje Wajatuxanenë Jesús itoroba, Juan petoyaquinaenexa Jesús pijajiwi Filadelfia tomarata penamatacaitorobinëjawabelia
7 Jesús icatsia nejumaitsi:
—¡Toyaquinare tajajiwi penamatacaitorobinëjawabelia, Filadelfiac tomarata peponaponaenë, pijajiwi yajawa, neyapëtaeya-exanaenexa tacatsipaebicuenia!
«Jesús, ponë pepopianeconijibinë, pexanabiabinënua pejumaitsicuenia. Ponë xaina pepopeyanacua-ewetsinë David-pijinë pijallave.d Nexata, pacuenia David-pijinë tobaupata Jerusalén tomarapijibaupanë, itsamonae pejonenexa tomaraberena, bajarapacuenianua bajaraPonë tobaupataponae pamonae jitsipa pejonejawa peyanacua-ewetsinacuajawaberena. Wecuabaupaxatatabiabanua pamonae apojitsipae pejonejawa. Nexata, bajaraPonë itsa tobaupata itsajiwi pejonenexa, acuenebi itsajiwi pewecuaxatatsinexa icatsia. Itsa wecuabaupaxatatanua, acuenebi pijinia itsajiwi pebaupatsinexa icatsia. BajarapaJesús pacajumaitsi mapacueniaje:
8 »Yapëtaniji daxita xua pa-exanawanapame, bajaraxuata bepatacatsiwajënaebaupatanutsi, jamatejema panenacuenebinexa patacatojitsipaecuenia.f Nexata, caejiwi-ata, apocuenecaëjëpaetsi papecacuenecaranatsijawa, patsiquiribitsaëtoyoxaemë. Pinijicuenesaëg apopaxainae-atamë, itsiata xaniawaetsia panejumecowënëtawanapame patacajumaitsicuenia. Apopanayajawajunuaxainaemënua patajajiwicuenemë.
9 ¡Panejumetaema! Itsamonae panijatomarata nataeyabiaba bejudíowicuene. Itsiata, xanë juya taeyabiabajë Satanás pijajiwicuenia, tsipaji najumetsënëta bajaraxua yabara. Bajarapamonae, itsamatacabi, paxamë pane-itabarata pematabacabëta nubenaeya-exanaenajë, penatoyapëtaexae xanë pataca-asiwacuene bajarapamonaewecua.
10 Paxamë rabaja ajamatabëcuenesaëya paca-asaëmë tsawanapae panejumexaniataejawa tajumeliwaisi, itsamonae pacabejiobia-exanabiabi-ata bajarapaliwaisi yabara. Bajaraxuata, pamatacabi piayaicuene copiapatsianah daxitanacuapijiwi petaeponaenexa, xanë juya, bajarapamatacabi paca-ewetsianatsi papeca-itsacueniabiyaniwa. Bajarapapiayaicuene tocopatsianajë daxitamapanacuanëpijiwi petaeponaenexa, xaniawaetsia tayapëtaenexa itsa najamatabëcuenepënëyorotsijitsia pibisiacuene pexanaejawawecua, itsa jume, itsa catsitecawanapaejitsia.
11 Bepijiayo rabaja ponaenajë paxamëjawabereca. ¡Nexata, panewajënaeyabelia panesiwa-itaxutuajamatejemamëre tsawanapae, itsajiwi-ata papecawecuapitsiyaniwa xua taxa Dioso pacarajutsiana athëbëtatsia coronajawa!
12 Pajiwi ajamatabëcuenesaë pewajënaeyabelia taxa Dioso pitaxutuajamatejematsaponaponaejawa, ëpetëpaejawabelia, itsamonae bejiobia-exanae-atatsi, pecopatsia-exanaenexatsi, bajarapajiwi xanë tocopatsianajë peyaiyataetaxunae,i taxa Dioso pijatemplobota athëbëtatsia. Bajarajotatsia yajawaponaponaena bajaraPonë, daxitamatacabijawabelianexa. Nexata, xanë wënëyaquinaenajë bajarapajiwijawata taxa Dioso pewënë, pijatomarawënë-ata, pejanaJerusalén, patomara athëbëwetsica patsianica taxa Diosojawawetsica. Bajarapajiwijawatanua, pejanawënë nawënëyaquinarutsianajë.
13 Pajiwi muxuwojoruca, natojumetae pacuenia Espíritu Santo jumaitsi daxita Jesús pijajiwijawabelia», pacajaitsi xanë, pepota-aneconijibinë, ta-exanabiabinënua tajumaitsicuenia. Taxainaenënua pepopeyanacua-ewetsinë David-pijinë pijallave —nejai Jesús, tatoyaquinaenexa ponë namatacaitorobaponapona Jesús pijajiwi Filadelfia tomarata.
Mapacueniaje Wajatuxanenë Jesús itoroba Juan petoyaquinaenexa Jesús pijajiwi Laodicea tomarata penamatacaitorobinëjawabelia
14 Jesús icatsia nejumaitsi:
—¡Toyaquinare tajajiwi penamatacaitorobinëjawabelia, Laodicea tomarata peponaponaenë, pijajiwi yajawa, neyapëtaeya-exanaenexa tacatsipaebicuenia!
«Jesús, ponë pecopiapatsia-exanaenëj daxita Dioso najumecapanepaeya pejumaitsijawanë. Ponë pexaniajainë tsabiabi, petsipaebijawata Dioso peliwaisi. Ponë pejamatabëcuenetanua,k Dioso exana daxitacuene mapanacuataje. BajaraPonë pacajumaitsi mapacueniaje:
15 »Yapëtaniji daxita xua pa-exanawanapame. Paxamë perëbënaejamatabëcuene panexainaewil xanëjawaberena, pataneto-exanawanapaejawatamë tajitsipaecuene. Paxamëjawata, apocaxitajarabinë itsamonae piatajujamatabëcuene pexainaewim xanëjawaberena, tsipaji caejiwi-ata apo-exanaponaponae tajitsipaecuenia bitso tane-asiwajamatabëcuene. Apocaxitajarabinënua itsamonae, pecainaejamatabëcuene pexainaewin xanëjawaberena, tsipaji caejiwi-ata apo-exanaponaponae tajitsipaecuenia bitso yaiyataeya tanecujunawijamatabëcuene. Bitso jitsipajëo picani ayaicuenia patane-asiwajawamë, itsa jume, patanecujunawijawamë. Itsiata, paxamë saya jemacueniap tajitsipaecuene paneto-exanawanapame.
16 Perëbënaejamatabëcuene panexainaexae xanëjawaberena, pacanawecuatsatsianatsi. Baitsi, pacuenia mera pejitsipaejiwi perëbënaemera apotsixanepanaetsi piapaenexa, nexata nawecuasuaba apopecainaexae. Pacuenianua piatajuranë, pecainaecujinae apoxanepanae piapaejawa, nexata ëpexuabinexa, bajarapacuenia imoxoyo pewajënae patacanawecuaxuabinexaq patacayacabiwicuenia, tsipaji apojitsipaenë pacuenia bëpënëa pajamatabëcuene-itsimë tsawanapae, xanë, tajacuene-ata yabara. Baitsi, apojitsipaenë beweliacuenia patanejitsipaejawamë.
17 Paxamë panasiwajamatabëjumaitsimë tsabiabi: ‘Paxanë baja cajena bitso daxitacuene pataxainaewir. Pexaniacuenia panetopitsapabiaba patanacuenebijawanë, pataxainaenexa. Nexata, itsacuenejawa-ata apopanetosajinae patanamatawenonaejawanë’, panasiwajamatabëjamë tsabiabi. Bajarapacuenia panasiwajamatabë-itsi-atamë, apopanatoyapëtaemë, pacuenia xanë taitabarata bitso apopanexainaewi,s bepanejiobiwi,t bepane-itaxutotsëcënaewi,u bepanejumasajinaewi-ata. v
18 Bajaraxuata, pacamuxujiobatsi mapacueniaje: ¡Xanëjawaberena panewajëre bitso penamatamotsijawanë, bepexaniawiria-oronani pesetsijawanë! Nexata jane baja, taitabarata pepopanexainaewi tsane. ¡Panewajërenua penioponaenaxatatsijawaw panenaxatatsinexa, panenaperabëcaranatsinexanua! Nexata jane baja, apopa-auramë tsane taitabarata. Panewajërenua pane-itaxutotsëcënaewaë, panenaitaxutowaëbinexa. Bajarapacuenia xaniawaetsia panatsiwajënaetaename, tajitsipaecuenia panejinawanapaenexa.
19 ¡Xania baja tsane, tsipaji raja xanë tacuene-itawetsinë, tananeconitsia-exanaenënua pamonae asiwanë!x ¡Nexata, panajamatabëcuenepënëyorore xanëjawaberena, jemacuenia panejinawanapaejawawecua, asaëyata patanejumecowënëtsinexamë!
20 ¡Panejumetaema! Xanë raja pacajunataponatsiy panijabobaupajawata, patanetobaupatsinexamë. Nexata, pajiwi nejumetane, netobaupatsi tajonenexa pijaboyalia, tabarëcuaicuaijainexa, tayajawaxaenexanua, bitso tayapëtaenëcuenia bajarapabopijinë.
21 Pajiwi ajamatabëcuenesaë pewajënaeyabelia taxa Dioso pitaxutuajamatejematsaponaponaejawa, ëpetëpaejawabelia, itsamonae bejiobia-exanae-atatsi, pecopatsia-exanaenexatsi, nexata, xanë, tocopatsianajë bajarapajiwi tamuxuneneta pena-ecaenexa tajatronojawata, nacua tayajawa-ewetsinexa. Bajarapajiwi peca-asaëxae tanejumexaniataejawa, itsamonae bejiobia-exanae-atatsi, pacuenia xanë casaënë tajumecowënëtsijawa Dioso, jiwi nebejiobia-exanae-ata, nexata bajarapajiwi tocopatsianajë pe-ecaenexa tajatronojawata, pacuenia baja aeconoxae xanë yajawa-ecajë taxa pijatronojawata.
22 Pajiwi muxuwojoruca, natojumetae pacuenia Espíritu Santo jumaitsi daxita Jesús pijajiwijawabelia», pacajaitsi, xanë, tacopiapatsia-exanaenë daxita taxa, Dioso, najumecapanepaeya pejumaitsijawanë —nejai Jesús, tatoyaquinaenexa ponë namatacaitorobaponapona Jesús pijajiwi Laodicea tomarata.