Pacuenia Juan tane Dioso pijajiwi athëbëtatsia, yabara peliwaisi
4
Bajarapacuenia tane-itorobicujinae tatoyaquinaenexa, icatsia taniji penabaupatsijawa itaboxo athëbëtatsia, itsatusatojawabetsia tataenexa. Ponë baja copiaya jumetanijia pecuaicuaijaijawata, betrompetajumecuenia, bajaraponë nejumaitsi mapacueniaje:
—Junaimina xanëjawabetsina. Nexata, catsitajëtsianatsi maxuanëcujinae pacuenia bajarapanacuatareca pewajënaeyabelia pepacuene copiapataponaejitsia —nejai.
2 Nexata, bajarapaepatota caecuenia nayapëtaniji tanucaejawa athëbëtatsia, Espíritu Santo pesaëta. Bajarajota taniji tronowënëjawa. Bajarapatronota Dioso taeyetajë,b daxitacuene peyanacua-ewetsinëcuenia.
3 Bajaraponë, daxitanë, bitso perabëniweniwena. Pacuenia cotia-itsi penamatamotsi-ibotonë jaspewënë iboto,c cornalinawënë iboto-ata, bajaraperabëcotia-itsi. Bajarapatrono matatoyorotsia taenutajë arawalibo, peraënaecotia pexainaejawa, pacuenia esmeraldawënë iboto-itsi.
4 Bajarapatrono matatoyorotsia, taenubajënua veinticuatro patronobeje, itsajota ecapona cae-ancianonë canacujitsia. Bajarapa-ancianowi naxatabena penioponaejawanë. Oronanitota pexanaecoronajawanë mata-ena.
5 Dioso pe-ecaetronojawawerena yamaxë binebinejai. Najumetajunujunua-ata.d Siete xuabeje pitayotanubenaejawanë taenubajë bajarapatrono-itabarata. Bajaraxuanë mapajamatabëcueneliwaisi xainaje: siete pa-espíritubeje,e Dioso pijajawanë pecanacuenebinexa.
6 Bajarapatrono-itabarata, taeyetajënua bemanuamene picani. Itsiata baitsi jane, pacuenia vidriojawa ataja, nasabanua, bajarapitsicuenejawa.
Bajarapatronojawa matatoyorotsia taenubajë cuatro ponëbeje pitothiawi, ayainëanë. Bajarapamonae pitabarayareca, pejumareca-ata, itaxutorubenaponareca.
7 Copiayanë, benewëthë petsobianë. Cotocaewinë pijinia, betoro. Acueyabinë pijinia, bejiwi-itabaranë. Cuatronë pijinia, jëpa becotsala pepunanajetarucaenë.
8 Papitothiawi taniji, caenë canacujitsia xainapona seis pacorofetobeje. Pecorofetonë jumawelia, bëxëpanawerena-ata itaxutorubenaponareca. Matacabijebi, merawijebi-ata, apocopatanubenae pejumaitsanubenaejawa Diosojawabelia:
«¡Pepopetuxanenë Dioso, bitso raja Xamë peponianeconijibinë daxitawecua! ¡Ayaijamatabëcuenenëmënua daxitawecua, daxitacuene nexanaenexa! Xamë baja cajena neponaponaenë, daxitacuene ne-exanaewajënaeya. Ajena mapamatacabita-ata abaxë ponaponame. Daxitamatacabijawabelianexa-ata tsiteca neponaponaenë tsane», jai tsanubenae bajarapamonae wënëxaniatsiaya Diosojawabelia.
9 Bajarapacuenia, caewënëxaniataponae canacujitsia, bajarapacuatro ponëbeje, pitothiawi, pexaniajamatabëcuene rajutapona Diosojawabelia. Wënëxaniatanua daxitawecua ayaijamatabëcuenenë yabara. Bajarapacuenia pejumaitsitsabiabijawata Diosojawabelia, tronota pe-ecaenë, daxitamatacabijawabelianexa peponaponaenë,
10 bajarapijinia paepatota, veinticuatro ponëbeje ancianowi-ata yaiyataeya pematabacabëta tonubenabiaba Dioso pitabarata, daxitamatacabijawabelianexa peponaponaenë. Orijibia, Dioso pijatronojawabelia topenetabiabalia pijacoronanë. Jumaitsinua tsabiabi bajaraPonëjawabelia:
11 «Xanepana rabaja daxitajiwi pecawënëxaniataponaejawa Petuxanenëmë, patajaDiosomë, nexainaenë neniweniwenaecotia. Ayaijamatabëcuenenëmë. Pecayaiyataenë. Niacuenesaënë, tsipaji baja daxitacuene nexanaenë. Nejitsipaecuenia daxitacuene exaname. Nexata, itsacuenejawayo-ata aponaitajëtsi xamë exanaenejewamë», jai tsanubenae ancianowi Diosojawabelia, pewënëxaniatsijawata.