Pacuenia Juan athëbëtatsia cobetaeyeta Dioso pequionaecuyalatobaxuto peca-ecaejawa, yabara peliwaisi
5
Bajaraxuacujinae, athëbëtatsia taeyetajë Dioso, tronota pequionaecuyalatobaxuto pecobena-ecaejawa pecujuanenia. Bajarapabaxuto peboxowerena, pejumawelia-ata, xaina peyaquinae-itane. Siete pasellotabejea upicatsanaruba.
2 Nexata, taenutajë bitso piacuenesaë-ángelnë. Bajaraponë pinijijumeta jumaitsi mapacueniaje:
—¿Jipatsa meta, Dioso petocopatsixaetsi, cuenecaëjëpatsi bajarapabaxuto piupicatsanarubisellojawanë pesaracaponaenexa, pebaxupatsinexa? —jai.
3 Itsiata baitsi jane, ajibi caejiwi-ata, Dioso petocopatsijiwitsi, athëbëpijiwi, mapanacuapijiwije, petëpaewimi-ata, bajarapabaxuto piupicatsanarubisellojawanë pesaracaponaenexa, pebaxupatsinexa, bëpënëa pa-itane rubena petaenexa.
4 Nexata, xanë bajaraxua itsa taniji, bitso cajena nuajë, tsipaji baja ajibi caejiwiyo-ata, Dioso petocopatsijiwitsi, bajarapaquionaecuyalatobaxuto piupicatsanarubisellojawanë pesaracaponaenexa, pelebinexa.
5 Itsiata, itsanë ancianowiyajuwënënë nejumaitsi:
—¡Pëtsa baja nuame, tsipaji raja caenë, Dioso tocopatatsi Judápijinë pemomoxibitsaëtoyajuwënënë, bajarapabaxuto pequionaejawa piupicatsanarubisellojawanë pesaracaponaenexa, pebaxupatsinexa! Bajaraponë piasaënë bitso, Judápijinë pemomoxi pijaLeón,b peyanacua-ewetsicuene yabara, nacua-ewetsinëmi David-pijinë pemomoxiyajuwënënë-ata. Pejamatabëcuene-amoneyabixaec baja daxita pijawajabitsaëwi, Dioso tocopatatsi bajarapacuyalatobaxuto, piupicatsanarubisellojawanë pesaracaponaenexa —nejai ancianowiyajuwënënë Jesucristo yabara.
6 Nexata jane baja, Corderonëd taenutajë, penucaenë trono pitabarata, veinticuatro ponëbeje ancianowi, cuatro ponëbeje pitothiawi pitabarata-ata. PaCorderonë taenutajë nayapëtane pebeyaxuabinëmitsicuene, jiwi pijaneconi yabara, tsipaji pewajënë xaina peperabëtota. BajaraPonë xaina siete pamata-etobeje, siete pijinia pa-itaxutobeje. Bajarapasiete pa-itaxutobeje xaina mapajamatabëcueneliwaisije: siete pa-espíritubeje,e Dioso pijajawanë pecanacuenebinexa. Bajaraxuanë Dioso baja itoroba daxitanacuanëjawa.
7 Nexata jane baja, Corderonë cujitabalia Dioso, ponë cobena-eca pecujuanenia tronota, pequionaecuyalatobaxuto. Wecuapita jane baja bajarapabaxuto.
8 Paepatota wecuapita bajarapabaxuto, nexata cuatro ponëbeje pitothiawi, veinticuatro ponëbeje ancianowi yajawa, bajaraPonë pitabarata pematabacabëta tonubenajunua. Cae-anciano canacujitsia saicaya xainapona pija-arpa. Caponanua pewënëbi petuxujuwi-inciensopërëjawanë, oronanitota pexanaecopajawanëta. Bajarapa-inciensopërëjawanë xaina mapajamatabëcueneliwaisije: Jesús pijajiwi pewajëtaponaejawami Diosojawabelia.
9 Nexata, cuatro ponëbeje pitothiawi, veinticuatro ponëbeje ancianowi yajawa, naxëana Corderojawabelia mapapejanawajije. Penaxëanaejawata jumaitsi mapacueniaje:
«Xamë rabaja, caenëmë, Dioso catocopata nepitsinexa mapacuyalatobaxutoje, piupicatsanarubisellojawanë nesaracaponaenexa-ata, nebaxupatsinexa. Bajarapacuenia catocopata, tsipaji baja cabeyaxuaba, neneconimatamotsinexa daxita jiwi pijaneconi. Nejanarunaejawata tomatamotame baja pijaneconi daxitawiriawi, daxitawiriajumewi, daxitanacuanëpijiwi-ata, tsiquirinacuaxipijiwi, pecunuanacuanëpijiwi-ata, penaexanaenexa Dioso pijajiwi.
10 Daxita necomuatsiwi, exaname baja Dioso pijajiwinexa, bajaraPonë peyanacua-ewetsiwinexa. Exanamenua baja sacerdotewi, petonacuenebinexa Dioso pejitsipaecuenia. Bajarapamonae tocopatsianamenua baja, daxitanacuanëpijiwi pewetsiwinexa», jai cuatro ponëbeje pitothiawi, ancianowi yajawa Corderonëjawabelia, penaxëanaejawata mapapejanawajije.
11 Nexata, itsa naëcotajë trono matatoyorotsia. Bajarajota taniji ayaibitsaëtoxaneto ángelewi, peyajawanubenaejawa cuatro ponëbeje pitothiawi, veinticuatro ponëbeje ancianowi-ata. Bajarapa-ángelewi aponamata-ëjëtsicapanepaetsi, tsipaji millones, pamillones-beje pematatsënëa. Nexata, jumetanijinua penaxëanaejawa.
12 Ayaijumeta, becaejumecuenia, naxëananubena mapacueniaje:
«BajarapaCorderonë picani beyaxuabatsi, jiwi pijaneconi yabara. Bajaraxuata, Dioso tocopatatsi bitso ayaijamatabëcuenenënexa, pinijicuenesaë pexainaenënexa, daxitacuene pexainaejawa pexainaenënexa, bitso pesiwacanaëjëtsicuene pexainaenënexa, pinijisaë pexainaenënexa, peyaiyataecuenetsi pexainaenënexa, peniweniwenaecotia pexainaenënexa, daxita jiwi pewënëxaniatsinënexatsi-ata pexaniacuenia, bajarapecuene-itsinëxae», jai tsanubenae ángelewi Corderonë yabara.
13 Nexata, jumetanijinua icatsia daxita Dioso pexanaewi, pamonae athëbëpijiwi, mapa-ira matatsënëwereca pejinawanapaewi, irabëxëpana pejinawanapaewi, manuamenepijiwi-ata. Daxita bajarapamonae penaxëanaejawata ayaijumeta jumaitsi Dioso, Jesús-beje yabara, mapacueniaje:
«Diosomë, tronota ne-ecaenë, xamë pijinia Corderonëmë, paxamëbejejawabelia toxanepanatsi daxita jiwi pexaniajamatabëcuene papecarajutsinexabeje, papecawënëxaniatsinexabejenua, bitso ayaijamatabëcuene panexainaenëxaebeje, peniweniwenaecotia panexainaexaebeje, pinijicuenesaënua bitso panexainaexaebeje. Bajarapajamatabëcuene raja, panejamatabëcuenetsitecaenëbeje daxitamatacabijawabelianexa», jai daxita Dioso pexanaewi petonaxaënaejawata, Dioso, Jesús-beje yabara.
14 Cuatro ponëbeje pitothiawi jumecanawiatsiaya jumaitsi tsaponae mapacueniaje: «¡Bajara-itsi tsane!», jai tsaponae. Veinticuatro ponëbeje pijinia ancianowi, asiwaya yaiyataeya, tonubenajunua pematabacabëta, Dioso, Corderonëbeje pitabarata.