Siete pasellobeje, yabara peliwaisi
6
Bajaraxuacujinae, taniji Corderonë pequionaecuyalatobaxutoa pesarananucaejawa penamataxainaesello. Nexata, cuatro ponëbeje pitothiawiyajuwënënë, jumetaniji caenë pecuaicuaijaijawa ayaijumeta, beyamaxë penajumetsicuenia. Bajaraponë jumaitsi: «¡Naxatsia!», jai caballojumata peponaenëjawabelia.
2 Nexata, bajaraxuacujinae icatsia taniji perenajawa, penioponaecaballota peyanajetarucaenë.b Bajaraponë cobena-eca bitsabi.c Rajutatsi corona,d penamataxatatsinexa. Bajaraxuacujinae, pona pijawajabitsaë pebarënabenexa. Nexata, pebarënabejawata cuene-amoneyabanajetaruca daxita pijawajabitsaëwi, pecuene-amoneyabijawabelia.
3 Bajaraxuacujinae, icatsia Corderonë sarananuca itsasello, pecotocaewijawa. Nexata, cuatro ponëbeje pitothiawiyajuwënënë, icatsia itsanë jumetaniji: «¡Naxatsia!», pejaijawa.
4 Nexata, bajaraxuacujinae icatsia taniji perenajawa petsobiacaballota peyanajetarucaenë.e Bajaraponë rajutatsi piapia-espada. Tocopatatsinua pecopiarucaeya-exanaenexa mapanacuata jiwi xaniawaetsia pejinawanapaecuenemi. Jiwi jane baja namata-enetsia nabeya-exanaejitsia daxita nacuanëjawa.
5 Bajaraxuacujinae, icatsia Corderonë sarananuca itsasello, acueyabijawa. Nexata, cuatro ponëbeje pitothiawiyajuwënënë, acueyabinë jumetaniji: «¡Naxatsia!», pejaijawa.
Nexata, bajaraxuacujinae, icatsia taniji perenajawa petsaebiacaballotaf peyanajetarucaenë. Bajaraponë cobena-eca pepesabaponaejawa.
6 Icatsia, jumetaniji cuatro ponëbeje pitothiawijawata pejumaitsijawa mapacueniaje: «Janibomatacabi, caedenariotag comuatsiana saya caekilo trigoxu. Cebadaxuh pijinia caëjëpaena pecomuatsinexa acueyabi pakilobeje. ¡Itsiata, pëtsa bijianamei olivonaebacabonë, uvanaebacabonënua, pematamojunaeyaniwa aceiteranë, vinoranë-ata!», pejaijawa.
7 Bajaraxuacujinae, icatsia Corderonë sarananuca itsasello, cuatrojawa. Nexata, cuatro ponëbeje pitothiawiyajuwënënë, pecopiarucaenë, jane baja jumetaniji: «¡Naxatsia!», pejaijawa.
8 Nexata, bajaraxuacujinae icatsia taniji perenajawa pewayanaecaballota peyanajetarucaenë. Bajaraponë, pewënë Jiwi Petëpaecuene. Ponë pijinia pënaponatsi wënërubatsi Hades, petëpaewi pejinawanapaenacua, pejaiwënë. Bajaraponëbeje Dioso tocopatsianatsibeje pebeya-exanaponaenexabeje daxita mapanacuajawaje jiwi ayaibitsaëtonëyajuwënëwi. Cuatro pajiwibejeyajuwënëwi, caejiwi, beyaxuabia-exanaponaenabeje wajabitsaëcuenia, janibocuenia, piawitanecuenia-ata. Bajaraponëbeje pejamatabëcuenetanua, unupijinëanë piayainëanë pitsapaena, pebeyajebaponaenexa jiwi ayaibitsaëtonë. Bajarapacuenia itsi tsane mapanacuataje, pamatacabi Dioso jiwi nananeconitsia-exanaena pibisiacuene pexanaeneconi yabara.
9 Bajaraxuacujinae, icatsia Corderonë sarananuca itsasello, cincojawa. Nexata, taeyejebajë daxita pamonaemij bajayata beyejebatsi Dioso pejumeliwaisi yabara, pebobenaejawa altar-jawabëxëpanata. Bajarapamonaemi beyejebatsi,k piajamatabëcuenesaëxae pewajënaeyabelia jiwi petsipaebaponaejawa Dioso pejumeliwaisi.
10 Daxita bajarapamonaemi Diosojawabelia pinijijumeta jumaitsi tsanubenae: «Diosomë, ayaijamatabëcuenenëmë, caeto-ata pibisiacuene aponexanaenë, najumecapanepaeya nejumaitsicuenia-ata nexanabiabinë. ¿Detsa pamatacabibeje abaxë saica nenaneconitsia-exanaenexa mapanacuata pejinawanapaewije, pataneyamatamotsinexamë nejumaitsicuenia patanebeyejebijamatabëcuene?»,l jai tsanubenae petëpaewimi altar-jawabëxëpanata.
11 Nexata jane baja, bajarapamonaemi Dioso rajutatsi penioponaenaxatabijawanë.m Abaxë, Dioso itorobatsi bajarapamonae penacuera-ewetanubenaenexa, tsipaji abaxë saica itsamonae Dioso pijajiwi, Jesucristo-ata petonacuenebiwi, pebeyejebinexatsi Dioso peliwaisi yabara.
12 Bajaraxuacujinae, icatsia Corderonë sarananuca itsasello, seis-jawa. Nexata, icatsia taniji bitso ira ayaicuenia penajëabijawa. Matacabipijijuameto bitso itaxutotsaebia,n pacuenia itsi petsaebiapapaëbërëpana. Merawipijijuameto pijinia bitso itaxutotsobia,o pacuenia itsi pejana.
13 Nexata, tulupu irabetsica othopaicanua, pacuenia naecuai ba-othopaica, pinijijowibota naejawa pejëabijawata.
14 Pacuenia cuyalato banaquionajunua piupi-isinaecujinae, bajarapacuenia daxita itaboxomi naquionajunua baja. Ajibi baja nexata itaboxo. Ira penajëabijamatabëcuene daxita petsutonëmi, petunaetonëmi-ata, natixiba pijataxunaenëmiwecua.
15 Bajarapacuenia petaejawata, mapanacuapijiwije namatayaba pecajunawi, ibowajuanëjawa, ibotoxanetonëtuatuajëjawa-ata. Daxita mapanacuanëjawaje jiwi pewetsiwi, ayaijamatabëcuenewi, bitso pecobecowë pexainaewi, wajabitsaë penamatacaitorobiwi, piacuenesaëwi, itsamonaejawabelia pecanajetsiwitsi amoneya petonacuenebawanapaenexa, pamonaenua apopecanajetsiwitsi, daxita bajarapamonae namatayaba.
16 Nexata, jumaitsi ibotsutonëjawabelia, ibotoxanetonëjawabelia-ata: «¡Panetsimata-othopare, patanematayatsinexamë Diosowecua, ponë eca tronota, Corderonëwecua-ata pinijicuenia patanenaneconitsia-exanaeyaniwa, patanebara-anaepanaexae patajaneconi yabara,
17 tsipaji baja, copiapata pinijicuenia Dioso jane baja penaneconitsia-exanaematacabinexa pijaneconi pexainaewi! Nexata, itsajiwi-ata cajena apocuenecaëjëpaetsi pepanepaejawa bajaraxuawecua», jai picani bajarapamonae.