Juan tane athëbëtatsia, pacuenia itsamatacabi itapa-itanerubijitsiatsi 144,000 ponëbeje, Israel nacuapijiwi, Dioso pijajiwixae
7
Bajaraxuacujinae, taniji cuatro ponëbeje ángelewi, nacua matatoyorotsia penubenaejawa, itsanë nortenenia, itsanë sur-nenia, itsanë orientenenia,a itsanë occidentenenia. Caenë canacujitsia caranatanubena jowibo peponaeyaniwa, irajawa, manuamenejawa, naejawanëjawa-ata pebijianaeyaniwa.
2 Taniji icatsia itsa-ángelnë orientejawawetsina penajetarucaenë, itsawetsina pitsapa matacabipijijuameto. Bajaraponë caponapona piasaënë Dioso pijasello, Dioso pijajiwi pitapa-itanerubaponaenexa. Bajaraponë wawajai ayaijumeta cuatro pa-ángelenëbejejawabelia, pamonae Dioso tocopatatsi pebijianaenexa ira, manuamene-ata. Jumaitsi mapacueniaje:
3 «¡Pëtsa abaxë jowibota pabijianame ira, manuamene, naejawanë-ata! Matapania baja Dioso pijajiwi pijasellota paxanë pa-itapa-itanerubianajë, bajarajane pabijianaename», jai ángelnë, orientejawawetsina penajetarucaenë cuatro pa-ángelnëbejejawabelia.
4 Bajaraxuacujinae, jumetaniji ayaibitsaëtoxaneto Dioso pijasellota pitapa-itanerubijawatsi; ciento cuarenta y cuatro mil pajiwibeje daxitata, Israel-pijinëmi pexi, doce ponëmibeje pemomoxiyajuwënëwi.
5 Nexata, Dioso pijasellota itapa-itanerubatsi doce mil pajiwibeje, Judápijinëmi pemomoxibitsaëtoyajuwënëwi, doce mil pijinia pajiwibeje, Rubén-pijinëmi pemomoxibitsaëtoyajuwënëwi, doce mil pijinia pajiwibeje, Gad-pijinëmi pemomoxibitsaëtoyajuwënëwi,
6 doce mil pijinia pajiwibeje, Aser-pijinëmi pemomoxibitsaëtoyajuwënëwi, doce mil pijinia pajiwibeje, Neftalípijinëmi pemomoxibitsaëtoyajuwënëwi, doce mil pijinia pajiwibeje, Manasés-pijinëmi pemomoxibitsaëtoyajuwënëwi,
7 doce mil pijinia pajiwibeje, Simeón-pijinëmi pemomoxibitsaëtoyajuwënëwi, doce mil pijinia pajiwibeje, Levípijinëmi pemomoxibitsaëtoyajuwënëwi, doce mil pijinia pajiwibeje, Isacar-pijinëmi pemomoxibitsaëtoyajuwënëwi,
8 doce mil pijinia pajiwibeje, Zabulón-pijinëmi pemomoxibitsaëtoyajuwënëwi, doce mil pijinia pajiwibeje, Josépijinëmi pemomoxibitsaëtoyajuwënëwi, doce mil pijinia pajiwibeje, Benjamín-pijinëmi pemomoxibitsaëtoyajuwënëwi. Nexata, bajarapacuenia caejawata, Dioso pijasellota itapa-itanerubatsi ciento cuarenta y cuatro mil pajiwibeje daxitata, Israel-pijinëmi pexi, doce ponëmibeje pemomoxiyajuwënëwi.
Pacuenia Juan athëbëtatsia tane jiwi ayaibitsaëtoxanetonë, penioponaejawanë penaxatabiwi, yabara peliwaisi
9 Pitapa-itanerubenaecujinaetsi bajarapamonae, icatsia taniji jiwi ayaibitsaëtoxanetonë, itsajiwi-ata apopenamata-ëjëtsicapanepaecuenia. Bajarapamonae daxitanacuanëpijiwiyajuwënëwi, daxitawiriawiyajuwënëwi, daxitawiriajumewiyajuwënëwi-ata. Bajarapamonae nubena Dioso pe-ecaetrono pitabarata, Corderonë-ata pitabarata. Daxita bajarapamonae, ëpenioponaejawanë penaxatabiwi, cobenanubena benaxarebaxutonë,b penajamatabëcuene-itajëtsinexa pesiwajamatabëcuenebarëyajawa bajaraPonëbejejawabelia.
10 Daxita bajarapajiwibitsaëtoxanetonë wawajai tsanubenae ayaijumeta mapacueniaje:
«WajaDioso, tronota pe-ecaenë, Corderonë-ata, nacacapanepa baja pibisiacuene waja-exanaeneconimiwecua», jai tsanubenae bajarapamonae.
11 Daxita pamonae trono matatoyorotsia nubena, ángelewibitsaëtoxaneto, cuatro ponëbeje pitothiawi, ancianowi-ata, daxita bajarapamonae irataenubenaeya bobena irata, Dioso pe-ecaetrono pitabarata, penajamatabëcuene-itajëtsinexa asiwaya peyaiyataejawa. Nexata, pirataenubenaejawata, pexaniajamatabëcuene rajutanubena Diosojawabelia mapacueniaje.
12 Jumaitsi:
«¡Bajara-itsi tsane! PatajaDiosomë, daxita jiwi toxanepanatsi pecawënëxaniatabiabijawa, neniweniwenaecotia nexainaenë, daxitacuene neyapëtaenë, daxitajiwi neyawenonaejamatabëcuene pecasiwajamatabëcuenebarëyanë, neyaiyataecuene nexainaenë, niacuenesaënë daxitamatacabijawabelianexa. Bajara-itsi tsane», jai tsanubenae irataeya Diosojawabelia.
13 Nexata, itsanë, bajarapa-ancianowiyajuwënënë, nejumaitsi:
—¿Detsa mapamonae, penioponaejawa penaxatabiwije? ¿Detsa werena pata bajarapamonae? —nejai bajaraponë.
14 Xanë nexata jumaitsinë:
—Itsabo. Xamë raeta jane yapëtaneme —janë ancianonëjawabelia.
Nexata, bajaraponë nejumaitsi:
—Mara pamonaeje petëpaewimi nacua pecopiarucaewajënaeya, ayaicuenia pebejiobia-exanaecujinaetsi.c d Bajarapamonae siwanajamatabëcuenecopaba Corderonëjawabelia, nexata Dioso siwajamatabëcuenecaewatsi pijaneconimi baja. Bajarapacuenia pesiwanajamatabëcuenecopabixae, bepequiatsijawa penaxatabijawanëe Corderonë pejanata, penaxatabinexa penioponaejawanë.
15 Bajaraxuata, baja bajarapamonae nubena, Dioso pe-ecaetrono pitabarata. Copatsinejewa tonacuenebawanapa Dioso pijatemplobota. Dioso, ponë eca tronota, ewetsianatsi peyajawajinawanapaexae.
16 Nexata, bajarapamonae baja aponatoyapëtae tsane piajanicuene, mera-ata pejitsipaecuene. Icotia-ata apotsajawi tsanetsi. Icotia piatajujawa-ata apojamatabë-itonotsi tsanetsi.
17 Bajara-itsi tsane, tsipaji Corderonë, ponë nuca trono pitabarata, xaniawaetsia ewetsianatsi bajarapamonae, pacuenia oveja pewetsinë xaniawaetsia ba-eweta pija-ovejabitsaëto. Pacuenia oveja pewetsinë matacaponabiaba pija-ovejabitsaëto, irawetsina pepitsaparubenaemeranë perajutsinexa, bajarapacuenia Corderonë matacaponabiabiana jiwi pi-aitawaya-exanaemeranëjawabelia.f Bajarapamonae jamatabëcuenebarëya tsawanapae tsane, Dioso pijanacuatatsia, tsipaji Dioso wecua-ajibia-exanaena daxita penuecuene, —nejai ancianonë mapacueniaje.