Sietejawa sellojawa, yabara peliwaisi
8
Icatsia, Corderonë sarananuca cuyalatobaxuto piupicatsatarutsi siete sellojawa. Nexata jane baja, athëbëtatsia ajumejibi tsarucae,a bajaya-epatowajëto.
2 Bajaraxuacujinae, icatsia taniji siete ponëbeje ángelewi, Dioso pitabarata penubenaewi. Bajarapamonae rajutatsi siete patrompetabeje.b
3 Icatsia, xuacujinae itsanë ángelnë najetaruca. Nucajopa altar-jawa pitabarata. Cobenanuca oronanitota pexanaewaxiyo, inciensopërëjawanë, pawaxiyota tajuitabiaba pitatsajawi-ita-irejumata. Nexata jane baja, rajutatsi ayaijawa petuxujuwi-inciensopërëjawanë, bajarapa-inciensopërë petajuitsijawata, petsëxë yajawatsiajitsia, Dioso pijajiwi pewajëtaponaejumenë Diosojawabetsia. Bajaraxuanë buata altar-jumata, oronanitota pexanae-altar-jawa, penucaejawa Dioso pe-ecaetrono pitabarata.
4 Nexata jane baja, ángelnë petajuitsijawata petuxujuwijawanë bajarapatsëxë, Dioso pijajiwi pewajëtaponaejumenëmi Diosojawabelia yajawa athëbëa bejunaya altar-jawawetsia, Diosojawabetsia.
5 ¡Bajaraxuacujinae, ángelnë altar-jumawecua pijawaxita nota pitatsajawi-ita-ire pewënëtsinexa! ¡Bajarapa-itatsajawi-ita-ire pewënëtsiwaxi ënëtuatuajëwecua othotajarabareca irabereca! Nexata, yamaxë najumeta iratareca, binebinejainua. Iranë jane baja ayaicuenia najëaba.
Siete patrompetabeje, yabara peliwaisi
6 Bajaraxuacujinae jane baja, pasiete ponëbeje ángelewijawabelia rajutatsi trompetajawanë, bajarapamonae canaweretanubena pijatrompetanë pe-obinexa.
7 Nexata jane baja, penamataxainae-ángelnë oba pijatrompeta. Nexata, bitso pecainejebimatarejetonë, granizowënëjawanë, isoto yajawa, pematajërëatsijawa pejanata, asaëyata othopareca irabereca. Nexata jane baja, bajaraxua pejamatabëcuene, daxitanacuajawa ira ayaijawa yajuwënëtajua, naejawanë, pejuwijawanë yajawa. Caejawa tajua acueyabiyajuwënëjawa.c Nacopata pijinia anijajawabeje tajuenejewa.
8 Bajaraxuacujinae, icatsia pecotocaewi-ángelnë oba pijatrompeta. Nexata, taniji bepinijitsutoxaneto petajueyecaejawa. Bajaraxua asaëyata jopareca manuamenejawareca. Nexata, caetupa manuamenemi pejana naexana, acueyabiyajuwënëjawa. Nacopata pijinia anijatupamanuamenebeje pejana naexanaenejewa.
9 Pamanuamene ëpejana tsarucae, bajarapamanuamenepijidujuaimi tëpa, perubenaebarcoxanetonëmi-ata napeneta. Pamanuamene pijinia pejananejewa nacopata, dujuai apotëpae, perubenaebarcoxanetonë-ata aponapenetsi.
10 Bajaraxuacujinae, icatsia acueyabi-ángelnë oba pijatrompeta. Nexata, pinijituluputoxaneto bepiniji-isotocotiaxaneto petajuejawa, jopareca irabereca, mapanacuata perubenaemenianëmi, irawetsina mera pepitsaparubenaejawanëmi-ata, pebijianaenexa. Caejawa, menianëmi, mera irawetsina pepitsaparubenaejawanëmi-ata, bijiana acueyabiyajuwënëjawa. Nacopata pijinia, anijajawabeje bajarapamenianë mera irawetsina pepitsaparubenaejawanë-ata bijianaenejewa.
11 Patuluputo jopaica, pewënë Ajenjo,d piatsaxacuene pejaiwënë. Pamerajawareca jopareca bajarapatuluputo, bajarapamera atsaxa baja. Jiwi ayaibitsaëtoxanetonë tëpa bajarapamera penatsi-apaexae.
12 Bajaraxuacujinae, icatsia cuatro-ángelnë oba pijatrompeta. Nexata jane baja, itaxutobijiana matacabipijijuameto, merawipijijuameto, tuluputonë-ata. Nexata, caejawa pitaxutobijianaexae acueyabiyajuwënëjawa, e bijiaya naitayota bajaraxuanë. Yajuwënënacopata pijinia anijajawabeje itaxutobijianaenejewa.
13 Bajaraxuacujinae, icatsia taniji pepunanajetarucaenë becotsala. Bajaraponë pepunanajerucaejawata, jiwi pecuaicuaijaicuenia jumaitsi tsanajetarucae ayaijumeta mapacueniaje: «¡Xania, xania, xania baja tsane! Pepacuene to-abejetsi baja tsaponae tsane mapanacuapijiwije, itsa obiana trompeta acueyabi pa-ángel-nëbeje penacopabiwi. Bajarapamonae rabaja imoxoyo pewajënae pe-obijawanexa,» jai tsanajetarucae pepunanajetarucaenë.