Máca 5

Gawaare gara Yéesu nꞌemontaañ yaayu (Máca 5 bu 7)

Gásuumaay gara maregen

Nan Yéesu añow mee gayooŋ gaagu, najiŋ bu fatiya nꞌemontaañ, nalako dó. Ulagenaool may ngujiŋ gutoogool tan ammee. 2 Ñeer nalako galiigeniil arogiil :

3 « Gásuumaay góoni mꞌbugan gawalenooro mee bújooŋoor Atúuha :

Jáyiih Atúuha jooliil !

4 Gásuumaay góoni mꞌbugaagu gammee nuhuu :

Atúuha bu gabeben úyegehiil !

5 Gásuumaay góoni mꞌbugaagu gabeb mee :

gaŋariil go gommee mof maamu !

6 Gásuumaay góoni mꞌbugaagu gabaŋ mee úyegehiil peepe nfuŋes buroŋ bátilintiliŋ :

waaf waawu wan guŋese mee bugo be ebaj wo !

7 Gásuumaay góoni mꞌbugaagu gájuh mee gabonket bugan :

Atúuha bu gabonkehiil !

8 Gásuumaay góoni mꞌbugaagu gan úyegehiil uset mee :

bugo be eñow Atúuha !

9 Gásuumaay góoni mꞌbugaagu gájagage mee bu mara gajamoor :

Atúuha be ejogiil naŋ guleehool !

10 Gásuumaay góoni mꞌbugaagu gálaameni mee mara mujak ngukaane :

Jáyiih jara fatiya jooliil !

11 Gásuumaay góoni mꞌbuguul nan nja bugan gujeluul mee, ngúlaamenuul ban ngulob kóji guyah mꞌbuguul mara ínje.

12 Súumuul ban njilako nꞌgásuumaay mara bacaamuul bu gájalako fatiya nꞌémit. Buguul bu gáani naŋ enabiyoŋ bugara no gan gúlaamen mee may.

Yéesu nalob mara mutasen son gujaaŋa

(Maruk 9.50 ; Lúk 14.34-35)

13 Buguul jommee mutasen mara dúniya. Bare éeni gafir gara mutasen maamu gúpur, waa nubile eŋar min ubaañenúl go ? Mubajut ñeer nafa yanooyan. Bu gabehen mo tíyaŋ déhooro, nak bugan gukak mo bo.

14 Buguul jommee gujaaŋa gara dúniya. Esúk yateepi fatiya nꞌemontaañ éjuhut ekoop. 15 An mat asapen may fujaaŋa afaak naŋar fo árur nꞌebara. Ho bu gariten fo kum nꞌejaaj tan fújuhe fuŋanten bugan gaagu peepe gammee nꞌyaŋ yaayu. 16 Mbil gujaaŋauul guŋanten may bújooŋoor bugan gaagu min guñow bakaaneruul bajak mee, ngusal Paayuul ammee fatiya mara bo.

Yéesu nalob mara fuyuhoum fara Móyiis

(Lúk 24.14)

17 Jambil jipinoor mara nijaalojow be ébuy fuyuhoum fara Móyiis, teer be ébuy Busafer bara enabiyoŋ yaayu. Ijaloot be ébuy, bare bu gátiiŋen. 18 Iroguulee, maregen émit nꞌetaam piyo min piyoe so be enim, bare haani eciic yanur sah mat enim dó nꞌfuyuhoum faafu. Haani may gaŋay eciic mat gunim, ban mo mbile gáani jaram émit nꞌetaam sinim. 19 An abil mee efaat fuyuhoum fanur haani fareg mee barehoor, ban naliigen bugan gaagu min gukaan naŋ ho, an aahu bu gáani hareg mee barehoor nꞌJáyiih jara fatiya. Bare an abil mee buroŋ naŋ min fuyuhoum faafu furok mee afaak naliigen bugan gaagu ngukaan naŋ ho, ho bu gáani an háamak nꞌJáyiih jara fatiya. 20 Iroguulee, maregen éeni jikaanut wan fuyuhoum Atúuha furok mee reg úpajula fo bugo nꞌEfarisiit yaayu, mat jíjuh jinogen nꞌJáyiih jara fatiya.

Yéesu nalob mara síñigen bu nꞌapaali

(Maruk 11.25 ; Lúk 12.57-59)

21 Jijanjam kum gurorok sipaayolaal gufaan “Jambil an amuk apaalool ; an amuk mee an, ho be ecafi.” 22 Bare ínje niroguul : Anooan áñigene bu nꞌapaalool, ho be ecafi. An abil mee erok apaalool : “agonoa he”, an aahu be ecafi bújooŋoor fujoj fáamak. An abil mee erok apaalool : “Aw ulet waaf”, an aahu bu gabeheni nꞌsambun sacehériit.

23 Eéni ñeer uŋar waaf be éjii Atúuha to nꞌfúsimenumool, útiiŋ dó nuwosen mara atii afoocifooc, 24 ukat to wan uŋarulo mee bújooŋoor tin tan gújie mee, min umundum ujow jijamoorúl nꞌan aahu, kindiŋ núbaañul usen Atúuha wan ucamen mee be éjiool.

25 Eéni jibajoor nꞌan naŋari mꞌbulago, usommen njijamoor buguul nejow bala elobuul étiiŋ mꞌbatalen, jambil aŋari asen acafa, min acafa aahu afaaleni asen upooya fupeek min gúruri dó. 26 Iroguulee, maregen mat úpurul dó nꞌfupeek faafu aw bafaagut bacaam garontoi káŋ bu nꞌgakuparu gásola.

Yéesu nalob mara júnube yara jabunjen

(Maruk 9.43-48)

27 Jijanjam kum mara Busafer baabu buroge : “Jambil ufiihen akoña hara an.” 28 Bare ínje niroguul : anooan abil mee eñeer akoña halet hoola nꞌgúcil gara gacamen, nakankaan júnube yara jabunjen afaak mꞌbúyegehool. 29 Eéni jícili jírib be ecil min ukaan júnube, úkoosul jo ubehen kuhi. Gápuren gahaja gacee gara eniini yo ekoloe eniini búroom yo peepe gabeheni nꞌsambun sacehériit. 30 Eéni gañeni gárib gucili nukaan júnube, usaat go ubehen kuhi. Gápuren gahaja gacee gara eniini yo ekoloe eniini búroom yo peepe eloh nꞌsambun sacehériit.

Yéesu nalob mara efaak buñuuho

(Máca 19.9 ; Maruk 10.11-12 ; Lúk 16.18)

31 Busafer baabu buroge may : “An acamen mee gafanjoor nꞌakoñaool, amundum asafer gahiit gara efaak buñuuho asenool.” 32 Bare ínje niroguul : Anooan abil mee gafanjoor nꞌakoñaool, ho bajogutool mꞌbulahaet, nápeeguloopeegul gápeegum gara ekaan júnube yara jabunjen. Eéni amaañen acee ayabool, ho may akankaan júnube yara jabunjen.

Yéesu nalob mara gakali

(Máca 12.36 ; 23.16-22)

33 Jijanjam may Busafer baabu burorok sipaayolaal gufaan : “Jambil an akali afaak nabaayi, bare mbil akaan wan akali mee bújooŋoor Acehériit mee.” 34 Bare ínje niroguul : Jambil jimus jikali ! Jambil jikali nꞌgajow gara émit, mara étalum jáyiih Atúuha yon dó. 35 Jambil jikali nꞌgajow gara etaam, mara yo yommee múkagum goohool. Jambil jikali nꞌgajow gara Yéruusalem, mara yo yommee ésuk yara Atúuha ammee áyiih háamak aahu. 36 Jambil may an akali ayah nꞌeniinool, mara ájuhut akaan gal ganur nꞌfukowool ngufinet mba nguñuget. 37 Eéni be erok eem, njirok eem. Eéni be erok haani, njirok haani. Eeni jibenen to gakali ganoogan, nꞌSeetaane ngúpurulo.

Yéesu nalob mara galugen

(Lúk 6.29-30)

38 Jijanjam kum mara Busafer baabu buroge : “Ufumom jícil, nifumi jícil ; uñagom fúŋiiŋ, niñagi fúŋiiŋ.” 39 Bare ínje niroguul : Jambil an akaani kóji nulugen. An ategi mee nꞌgaraab gárib, usenool may gamay gaagu.

40 Eéni an acamen eŋari bu batalen be eŋar gájuwoi, ukahool may min aŋar gákoohi. 41 Eéni an acigeni min uteb bútebool njijaoor simetaar éwuli, uteb bo njijaaoor reg to, haani mbil kaan simetaar síwuli síruba. 42 An áciini waaf, usenool. Ban an acamen mee gúcaag waaf nꞌaw, jambil úwugool búsol.

Yéesu nalob mara gacamen alahoori

(Lúk 6.27-28, 32-36)

43 Jijanjam mara Busafer baabu buroge : “Ucamen apaali, ban nulat alahoori.” 44 Bare ínje niroguul : Jíbooli ulahooruul, ban njíciin Atúuha bu nꞌgálaamenuul mee. 45 Mo buguul be eliik mara buguul guleeh bugara Paayuul ammee fatiya. Ho nja akaan min bunak búyahul bu mꞌbugan gaagu peepe, gálaaj mee bugo nꞌgálaajut mee. Ho nja akaan may min émit élubul nꞌgátiliŋ mee bugo nꞌgátiliŋut mee. 46 Eéni jicamen gacamenuul mee déhooro, bacaam béy njibile eyab to ? Let may uyaba lémpo yaayu mo nja gukaan ? 47 Ban éeni nak jisaaf gutiuul déhooro, waa njikaane wamusut ubajo ? Gáyinenut mee Atúuha let mo may nja gukaan ? 48 Jóoni bugan gátiliŋe naŋ Paayuul ammee fatiya átiliŋ mee !