Furim fásuum mee fara Yéesu Kirista fan
Maruk
asafer mee
Gawaare gara Saŋ Bátiis
1
Fúcihum furim fásuum mee fara Yéesu Kirista,
Aleeh Atúuha,
ufee.
2 Nꞌéliibar yara anabiyoŋ aahu Esayi,
Atúuha naroge :
« Injé be eboñúl an agaani gakoŋen,
nalohi fácil mimbil ayaaso bulagoi. »
3 « Furim fahahank fápureul mee baabu nꞌerampaasa yaayu furoge :
“Jiyaaso bulago Acehériit mee !
Jítiiguloor ugur waawu min ulago bu nu ho !” »
4 Ñeer Saŋ Bátiis nápurul nan ngawaare bo nꞌerampaasa yaayu nak arok :
« Jílowul bakaaneruul min íbatiiseuul,
mimbil Atúuha abonket síjunubeuul. »
5 Bugara mof maamu peepe mara Yúde mꞌbugara ésuk yara Yéruusalem ró nak gujow gutoogool bo,
ngulob síjunubeiil bújooŋoor bugan gaagu peepe,
min Saŋ ábatiiseiil nꞌeraal yaayu yara Suruden.
6 Saŋ,
gájuwo'ool mꞌbufal eñonkome ngucookoori,
ban fupincenum fara gabaŋ nja aŋar nakok go nꞌfukoŋolool.
Fábangur mꞌmukum mara futaŋaat nja atiñ.
7 Nak awaare arok :
« An umu néjool mꞌbúsolom,
aregom sembe máaamak.
Itíiŋut sah éñup be ejal gulahaay usamataool.
8 Injé mꞌmal níbatiiseuul,
bare ho mꞌBúyeget Baset mee nabiluul gábatiise. »
Saŋ nábatiise Yéesu
9 No unu Yéesu ápurulo mee Nasaret mꞌmof mara Gálile ájool min Saŋ ábatiiseool nꞌeraal yara Suruden.
10 Nan Yéesu ammee népurul mꞌmal maamu,
nañow émit yaayu épeegulo,
ban Búyeget Baset mee mbúwaloul bu nu ho naŋ élaabaan.
11 Furim nfúpurul nꞌémit furok :
« Aw Aleehom han íboolie máamak ;
gásuumaayom peepe nꞌaw ngoom. »
Seetaane naliik gabanten Yéesu
12 To bújooŋoor,
Búyeget Baset mee mbuŋar Yéesu bu nꞌerampaasa yaayu.
13 Nakaan bo gunak gafaŋ gúruba.
Dó nꞌgunak gaagu,
Seetaane nak aliik gabantenool.
Nalako bo ho nꞌsínunkureŋ sara futaŋaat,
simalayika nak sicookoorool bo.
Yéesu nawook ulagenaool gútiyaara
14 Saŋ Bátiis gujogoojok gúrur nꞌfupeek.
Púr to,
Yéesu najow bu Gálile nawaare bo Furim Fásuum mee fara Atúuha.
15 Nak arok :
« Ñeer tíiŋe,
Jáyiih Atúuha jicigulo !
Jikat bakaaneruul bajagut mee njíyinen Furim Fásuum mee ! »
16 Funak fucee,
Yéesu ho nejow nꞌgabereberef gara fal fara Gálilea,
nañow ujambaala gúruba,
Simoŋ nꞌatiool Andere gubet ujambaaliil dó nu fal faafu.
17 Narogiil :
« Jíjool jilagenom,
ínje be ekaanuul njóoni ujambaala gabile éñagul bugan bu nꞌínje. »
18 To bayaas,
ngukat to ujambaaliil min gulagenool.
19 Yéesu nafaalen dó mꞌbulago'ool fáriit,
nañow Saak nꞌatiool Saŋ,
guleeh Sébede gon dó mꞌbusaanaiil ngakeeten ujambaaliil.
20 Nátiiŋ newoogiil,
ngukat paayiil bugo nꞌújagagaool dó mꞌbusaana baabu min gúpurul gulagenool.
Yéesu nápuren eseytaane nꞌan
21 Púr to,
Yéesu nꞌulagenaool ngujow bu nꞌésuk yan guroge mee Kaparanaum.
Nan funak fulako fara Esúiif yaayu fútiiŋ mee,
Yéesu nanogen nꞌfúrehoorumiil fara gawaare furim Atúuha,
nalako galiigeniil.
22 Baliigenerool mbujaahali bugan gaagu máamak,
mara naliigeneiiliigen naŋ an abaje fuyuhoum ;
bunogoorut mꞌbara úpajula fuyuhoum Atúuha.
23 To bayaas,
dó nꞌfúrehoorum faafu acee amaañen han eseytaane enogene nakaaw arok :
24 « Yéesu hara Nasaret,
waa nucamene nꞌéli ?
Teer ujaalojow bu gakajenóli ?
Nímimir aw ommee ay.
Aw an aahu haset mee hara Atúuha. »
25 Yéesu narotoor yo arok :
« Uníf,
ban núpur tímer nꞌamaañen aahu ! »
26 Ñeer eseytaane yaayu néliisen máamak amaañen aahu jaram nak atek tíb-tíb-tíb,
népur nu ho neyah fukaaw fáamak nu mo ró.
27 Bugo peepe ngujaahali jaram nak gusonkenoor gurok :
« Bakaaner buu ubu ?
Dáaru baliigener buwuugul bababaj sembe !
Haani siseytaane saasu may sisoŋeoosoŋ nan nja ayaaŋen so mee. »
28 Ñeer dó mꞌmof maamu peepe mara Gálile,
gajaool ngujamo.
Yéesu násonten to bayaas arol Simoŋ Piyeer akoña nꞌgucee gamemmeeŋ
29 Nan Yéesu ápurulo mee nꞌfúrehoorum faafu,
ngujawoor bugo nꞌSaak nꞌSaŋ bu nꞌyaŋ Simoŋ nꞌAndere.
30 Tooge arol Simoŋ akoña umu dó nafiihoe mara bájuusa bujogool.
Ngútiiŋ nelob Yéesu moola.
31 Yéesu nacigool,
najogool nꞌgañen ayihen.
Bájuusa baabu mbukahenool.
Ñeer akoña aahu nalako gacookooriil.
32 Gárusa gaagu,
nan bunak buloh mee,
nguŋarulool úsonta waawu peepe bugo nꞌgan siseytaane sinogen mee.
33 Bugara ésuk yaayu peepe ngúpurul guhomenoor to mꞌbutum yaŋ yaayu.
34 Ñeer Yéesu násonten bugan gameeŋe bugara úsomut wanogoorut.
Nakam may siseytaane sameeŋe.
Nsímir mee ho ammee ay,
akahut so nsilob.
Yéesu nabosoor Gálile
35 Fara gajom noono nꞌurab,
Yéesu nayiho,
nápurul ajow bu tin taririj nalako to náciin Atúuha.
36 Nan Simoŋ mꞌbugaagu gan to mee nu ho guyihoulo mee,
ngujow bu fuŋesool.
37 Nan guñowool mee,
ngurogool :
« Bugan gaagu peepe aw nguŋese mee ! »
38 Narogiil :
« Utosaal bu nꞌsaasu sísuk sacik mee yaaye min iwaare bo may,
mara yo ecilaam mee níjool. »
39 Nabosoor mof mara Gálile búroom mo,
nak awaare nꞌgúrehoorum gaagu furim Atúuha,
nakam may siseytaane saasu.
Yéesu násonten an hara haahaaye
40 Funak fucee,
amaañen han haahaaye ejoge nájool atook Yéesu.
Nan acigool mee,
nayah gújuul nahuoorool arok :
« Eéni ucamen,
aw be éjuh ukaanom nikolo jaj niset ! »
41 Yéesu eniinool netey máamak,
nabonkehool,
nañuhen gañenool agorool.
Narogool :
« Yoo,
nicamencamen.
Ujúh jaj,
nuset wic ! »
42 To bújooŋoor,
haahaaye yaayu népur nu ho,
ban naset wic.
43 Ñeer Yéesu narotoorool,
nakamool.
44 Narogool :
« Ukáanum !
Jambil ulob yo anooan !
Ujow min ásimena aahu añowi,
nukaan búsimen ban fuyuhoum fara Móyiis furok mee.
Dó bil mee ecil ésuk yaayu némir mara nukolokolo. »
45 Bare amaañen aahu nan ápurulo to mee,
nagangaanen wakaan mee banooban,
jaram Yéesu ájuhut anogen nꞌésuk babuuyut.
Ñeer nak ápur bu tíyaŋ alako tin tarije.
Bare manooman bugan gaagu nak gúpurul nꞌuhaja waawu peepe gutoogool bo.