Furim fásuum mee fara Yéesu Kirista fan
Lúk
asafer mee
(Audio de ce chapitre disponible dans Fuliik Atúuha)
1
Amalayika nagaan Mari ho be ebaj Yéesu
26 Nan far fara Elisabet fubaj mee gujenna futok nu fanur,
Atúuha naboñ amalayika aahu Gáburel bu nꞌésuk yan gurege mee Nasaret mꞌmof mara Gálile,
27 bu nꞌájur acee gurogool Mari.
Ho amusut ámir amaañen.
Ngupañool gusen acee amaañen gajaool Suseef,
búbajum áyiih aahu Dawid.
28 Ñeer nan amalayika aahu anogen dó mee nꞌyaŋ yaayu,
narok Mari :
« Ilobe nꞌaw,
ukaroor !
Aw ásoonieni mee,
Atúuha umu nꞌaw. »
29 Furim faafu nfujaahaliool máamak jaram arok dó mꞌbúyegehool :
« Elob buu uyu ? »
30 Amalayika aahu narogool :
« Mari,
jambil úsebi.
Atúuha ásoonienisoonien.
31 Aw be eŋar búteb nubaj aleeh amaañen,
mbil urogool Yéesu.
32 Ho bu gáani an háamak,
ban ngurogool “Aleeh Atúuha ara fatiya.”
Acehériit mee Atúuha be esenool fúyiihet fara paayool afaan Dawid.
33 Ho abil mee gáani áyiih hara bugara Isirayeel bu nanoonan,
ban fúyiihehool mat fumus fufaago. »
34 Mari narok amalayika aahu :
« Injé ímirut amaañen,
buu njúhe kaan ? »
35 Násuupool arogool :
« Búyeget Baset mee bu gawaloúl nꞌaw,
ban sembe Atúuha ara fatiya be éjool naŋ bálandiŋ sigongeni.
Yo ecil mee aleeh aahu habil mee ebaji be eset,
ban ngurogool “Aleeh Atúuha.”
36 Uñoñow ani Elisabet,
ho may haani min afallen mee aŋaŋar búteb ban be ebaj aleeh amaañen.
Ho han gurogeen mee ájuhut sah afaret,
maareer umu nꞌfujennaool fakaan mee futok nu fanur.
37 Bajut kum waaf wan Atúuha ájuhut ekaan. »
38 Ñeer Mari narok :
« Injé amiigeel Atúuha.
Mbil wan ulob mee nꞌínje peepe ukaano.
» Amalayika aahu ñeer nápurul,
najow.
(Audio de versets 68-70 disponible dans Gagur gara Mútiliŋ)
68 Usalaal Acehériit mee,
Atúuha hara bugara Isirayeel
mara náriikene buganool ban naseheniil mara gupapak.
69 Nasenolaasen múpaguma mabaje sembe,
mápurulo nꞌfiil fara ájagagaool Dawid
70 naŋ min alobolaal yo mee piyo nꞌutum enabiyoŋool.