12. Yéesu nabaji
12. La naissance de Jésus
Amalayika nagaan Mari ho be ebaj Yéesu
26 26 Nan far fara Elisabet fubaj mee gujenna futok nu fanur,
Atúuha naboñ amalayika aahu Gáburel bu nꞌésuk yan gurege mee Nasaret mꞌmof mara Gálile,
27 27 bu nꞌájur acee gurogool Mari.
Ho amusut ámir amaañen.
Ngupañool gusen acee amaañen gajaool Suseef,
búbajum áyiih aahu Dawid.
28 28 Ñeer nan amalayika aahu anogen dó mee nꞌyaŋ yaayu,
narok Mari :
« Ilobe nꞌaw,
ukaroor !
Aw ásoonieni mee,
Atúuha umu nꞌaw. »
29 29 Furim faafu nfujaahaliool máamak jaram arok dó mꞌbúyegehool :
« Elob buu uyu ? »
30 30 Amalayika aahu narogool :
« Mari,
jambil úsebi.
Atúuha ásoonienisoonien.
31 31 Aw be eŋar búteb nubaj aleeh amaañen,
mbil urogool Yéesu.
32 32 Ho bu gáani an háamak,
ban ngurogool "Aleeh Atúuha ara fatiya".
Acehériit mee Atúuha be esenool fúyiihet fara paayool afaan Dawid.
33 33 Ho abil mee gáani áyiih hara bugara Isirayeel bu nanoonan,
ban fúyiihehool mat fumus fufaago. »
34 34 Mari narok amalayika aahu :
« Injé ímirut amaañen,
buu njúhe kaan ? »
35 35 Násuupool arogool :
« Búyeget Baset mee bu gawaloúl nꞌaw,
ban sembe Atúuha ara fatiya be éjool naŋ bálandiŋ sigongeni.
Yo ecil mee aleeh aahu habil mee ebaji be eset,
ban ngurogool "Aleeh Atúuha".
36 36 Uñoñow ani Elisabet,
ho may haani min afallen mee aŋaŋar búteb ban be ebaj aleeh amaañen.
Ho han gurogeen mee ájuhut sah afaret,
maareer umu nꞌfujennaool fakaan mee futok nu fanur.
37 37 Bajut kum waaf wan Atúuha ájuhut ekaan. »
38 38 Ñeer Mari narok :
« Injé amiigeel Atúuha.
Mbil wan ulob mee nꞌínje peepe ukaano.
» Amalayika aahu ñeer nápurul,
najow.
Yéesu nabaji
1 1 Ganaay gaagu,
fuyuhoum nfúpurul nꞌáyiih hara mof mara Room,
gajaool Sesaar Ogis,
fara epin bugan gaagu peepe bugara jáyiihool.
2 2 Epin bugan gaagu,
étiyaara ekaanikaan nan Kirinius aameen mee ajawulena hara mof mara Siiri.
3 3 Ñeer bugan gaagu peepe anooan nabaañ bu nꞌésugool min gupinool bo.
4 4 Yo ecil mee,
Suseef nemma búbajum Dawid,
nápurul may nꞌésuk yara Nasaret mꞌmof mara Gálile,
najow bu nꞌésuk yara Dawid yan guroge mee Beteleem dó mꞌmof mara Yúde
5 5 mimbil gupinool bo,
ho bugo mꞌMari han apañ mee ammee nꞌfarool dó.
6 6 Ban gommee Beteleem,
Mari funagool nfútiiŋ,
7 7 nabaj aleehool átiyaara,
amaañen.
Naŋar guleeñuun naguubool afaak,
nafiihenool nꞌgaŋant dan nja gusen mee sikaj éful,
mara gurehut dó nꞌgásaag gan nja guwalen mee sijaoora.
Simalayika nsípurul umaha
8 8 Tooge umaha sísaaja ngom bo nꞌgapana ésuk yaayu ngapooy sikooreiil nu fuk.
9 9 Amalayika hara Atúuha nápuruliil bo.
Maŋantoe Atúuha mmugongeniil,
ngúsebi máamak.
10 10 Bare amalayika aahu narogiil :
« Jambil jísebi.
Furim fásuume niŋaruluul ban fo be ekaan gásuumaay gáamak bu mꞌbugan gaagu peepe.
11 11 Nu fuk fe,
apagenauul abajibaj nꞌésuk yara Dawid,
ho ammee Kirista,
Acila aahu.
12 12 Niliiguul múfaasumool :
Buguul be etook jileeh jajooke ebaji njiguubi guleeñuun ban njifiiheni nꞌgaŋant. »
13 13 To bújooŋoor,
gayooŋ gáamak gara simalayika ngútoogul to amalayika átiyaara aahu,
ngon nesal Atúuha gurok :
14 14 « Gasal góoni nꞌAtúuha bu ró fatiya,
gásuumaayool góoni nꞌduniya,
bu mꞌbugan gaagu gan acamen mee. »
15 15 Nan simalayika saasu sibaañ mee bu nꞌémit,
umaha waawu ngurok :
« Ujaal bu Beteleem nuñowaal táh wabaj mee wan Atúuha agaanolaal mee. »
16 16 Ngusommen gujow bu bo,
gútiiŋ ngutook bo Mari bugo nꞌSuseef nꞌaleeh aahu afiiheni mee nꞌgaŋant gaagu.
17 17 Nan guñow mee aleeh aahu,
ngugaan wan amalayika aahu alobuliil mee moola.
18 18 Bugan gaagu peepe gajam mee umaha waawu nelob,
ngujaahali.
19 19 Mari,
ho nabaŋ go mꞌbúyegehool nak apinoor dó.
20 20 Púr to,
umaha waawu ngubaañ bu bo nꞌsikooreiil,
ngulob mújalako Atúuha ngon nesalool min akaaniil mee ngujam ban nguñow wabaj mee.
Wo peepe ukankaan naŋ min amalayika aahu alobiil yo mee.