11. Atúuha nalob wabil mee ebaj ájagagaool
11. Dieu parle de ce qui va arriver à son serviteur
Sílaam sara ájagaga Acehériit mee
1 1 Ay áyinen mee wan ujamaal mee ?
Ay Acehériit mee aliik mee sembeool ?
2 2 Fácil Acehériit mee gabaak ájagagaool gutataf,
nogoor nꞌgajep,
nnogoor may nꞌfuraar fápurulo nꞌetaam yahahay.
Abajut mujak mꞌmúgallo manooman mabil mee ecil núlowulaal gúcilolaal bu nu ho ;
fuyuhoumool fújuhut fúñagul bugan.
3 3 Bugan gaagu ngúñaañulool ban guñeerutool bo sah.
An hara jatiñ ban apulempulen sílaam,
anogoonogoor naŋ an han gúwuge búsol ;
nugoncenaalool ban ukaanutaalool ró.
4 4 Ban sílaamolaal nꞌjatiñolaal natebe kum aroopo ;
bare ujogaaloojok naŋ an han Atúuha atege
ban nasuulenool.
5 5 Tooge síjunubeolaal fanna so sicilool nayab bacooc,
mufeegáahiolaal fanna mo mucilool nabaj fasonj.
Etek yan ubileenaal mee eyab,
nu ho nelohe,
ban neŋarulolaal gásuumaay ;
sisooho'ool so sicilolaal mee nukoloaal.
6 6 Nak uliliooraal bo mee naŋ sísaaja sabajut amaha,
anooan bulago'ool noonool.
Bare Acehériit mee nakankaan min mufeegáahiolaal peepe muloh nu ho.
7 7 Gukaanool gúnuur,
ngúlaamenool,
bare ategut to furim,
naŋ ésaaja yan gon neŋar bu jamuk,
naŋ ésaaja yan gon néciik bufal yo ;
áŋaabulut butumool haani fáriit.
8 8 Ngukaan gañen ngujogool,
ngucafool,
ngumugool.
Dó nꞌgambacool,
ay njok mee min ápureni mee nꞌduniya ?
Ay may njok mee min ategi mee mara síjunube sara buganom ?
9 9 Nguwok fuyaagool dan gufoge mee gálaaj mee,
ngufogool tin tanur nꞌusaanum,
haani min akaanut mee wajagut,
haani min amusut mee abij.
10 10 Acehériit mee acamene ecoocool nꞌsílaam.
Nan ájagagaool asenooro mee naŋ búsimen bara gápuren síjunube afaak,
ho be eñow búbajumool,
nabaak máamak.
Ñeer wan Acehériit mee acamen mee ukaano,
bu gájowum nu ho.
11 11 Nan sílaam san aroopo mee sibil mee gafaago,
ho be eñow maŋantoe maamu,
ban be ésuumool máamak ;
no ñeer nabil mee gámiro.
Ajágagaom hátiliŋ mee be ecil min bugan gameeŋe gútiliŋ,
ban ho bu garoopo síjunubeiil.
12 12 Yo ecil mee ínje be esenool gaŋarool gurehen mꞌbugan búgaamak ;
ho bu gawaajoor mꞌbugara sembe fubaj fan gubohulo mee nꞌulahooriil.
Dó peepe mara nasenooroe min acet,
ban gupinoopin nꞌgayooŋ ukaana kóji,
narooporoopo síjunube sara bugan gameeŋe,
ban nayihoyiho mara bugan gaagu gakaan so mee.