Wan Yéesu arok mee gáyinen mee gukaan
1. Ulówul bakaaneri núyinen
1. Repens-toi et crois
17 17 Púr to, Yéesu nayiho bu gawaare nak arok : « Jáyiih jara fatiya jicigulocik. Jílowul bakaaneruul ! »
36 36 Funak fucee, Afarisiit acee narok Yéesu ájool acáho yaŋool. Yéesu nan átiiŋ mee, nalako bu fúcaho nayah gacemb naŋ min bugara ésuk yaayu nja gukaan mee. 37 37 Dó nꞌésuk yaayu, mbaj akoña acee han gajaool gukajene. Nan ajam mee Yéesu umu nꞌyaŋ Afarisiit aahu, nájool nꞌjibara ró jipuus ekarabanjo. 38 38 Nayiho búsol Yéesu nahuu. Mufuool mmusot jaram muboojen goot Yéesu. Naŋar walool nátih go afaak, náfoon go, nalogos go ekarabanjio yaayu.
39 39 Afarisiit aahu hawoogulo mee Yéesu bu fúcaho, nan añow mee bakaaner akoña aahu, narok dó mꞌbúyegehool : « Eéni maregen amaañen aahu anabiyoŋ, ho boheen émir akoña aahu hagoreool mee, an buu, ban námir mara akoña aahu dit abonnoor liŋ. » 40 40 Ñeer Yéesu narok afarisiit aahu : « Simoŋ, be elobi waaf wanur. » Narogool : « Iyoo. Aliiga, ulob ! »
41 41 Yéesu narogool : « Babaj umaañen gúruba gaakene an síkori. Atíyaara aahu ukuparu siceme futok (500) naakenool, aahu ukuparu gafan gúruba nꞌguñen (50). 42 42 Bu bacaam, márubaiil gújuhut gucaam. Hacaagiil mee nabonkehiil uneewiil. Ñeer nisonkeni : Ay mꞌbugo abil mee ereg nacamenool ? » 43 43 Simoŋ narogool : « Níyinene, han abonket mee garonto gareg mee bájalako. » Yéesu narogool : « Maregen nulobe. »
44 44 Nálowulo añeer akoña aahu, narok Simoŋ : « Uñoñow akoña aahu ume, nan inogenulo mee nꞌyaŋi, usenutom mal nitaas goohom. Bare ho mꞌmufuool nataase goohom afaak, naŋar walool nátih go. 45 45 Aw ugaabutom, bare ho, kábiriŋ nan inogenulo mee nꞌyaŋi bu maareer, áyolout éfoon goohom. 46 46 Ulogosut fukowom mulusoor, bare ho nalogos goohom ekarabanjo. 47 47 Yo ecil mee nirogi : Síjunubeool sameeŋ mee sibonkehibonket, mara naliige mújalako gacamenool. Bare an habonkehi mee fáriit, gacamenool bu garehoor. » 48 48 Afaak narok akoña aahu : « Ubajut ñeer síjunube. »
49 49 Gan to mee nfúcaho nu ganur nu ho ngurok nꞌúyegehiil : « An buu umu, ahaañi mee gabonket síjunube bugan ? » 50 50 Bare Yéesu nabenen arok akoña aahu : « Gáyineni gupageni. Ujow nꞌgásuumaay ! »