2. Uyab gábatiise
2. Sois baptisé
19 19 « Jijow ñeer bu nꞌsísuk saasu peepe sara dúniya, njikaaniil ngóoni ulagenaom, njíbatiiseiil nꞌgajow gara Paam, nꞌAleeh aahu mꞌbúyeget Baset mee.
Fílip nábatiise an háamak hara Ecopi
26 26 Amalayika hara Acehériit mee narok Fílip : « Ujooŋoor ban bunak búpureul mee, nujow nꞌgañeni gárib mꞌbulago bawaay mee bápurulo mee Yéruusalem bu Gaasa. » 27 27 Ñeer Fílip nátiiŋ gayiho.
Nan ammee nejow, naŋanden amaañen acee hara Ecopi. Ho an háamak. Gumumuk fumaañenehool mara ho ayekene fubaj fara áyiih akoña hara Ecopi han guroge mee Kandas. Amaañen aahu ajaalojow éciin Atúuha to Yéruusalem. 28 28 Ho mbóot, nalako nꞌesarehool nan gakaraŋ busafer anabiyoŋ aahu Esayi. 29 29 Búyeget Baset mee mburok Fílip : « Uwaaken jaram utoogen esaret yaayu. » 30 30 Ñeer Fílip natey jaram atoogen yo, najam amaañen aahu hara Ecopi nakaraŋe mee busafer anabiyoŋ aahu Esayi. Narogool : « Ujanjam set wan busafer baabu buroge ? » 31 31 Amaañen aahu narogool : « Buu níjuhe ijam set an bápajulutom wo ? » Narogool ajiŋúl alako to nu ho. 32 32 Ban tan akaraŋe mee, Busafer baabu buroge :
« Nguŋarulool naŋ ésaaja yan gon neŋar bu jamuk ;
naŋ ésaaja yan gon néciik bufal yo,
áŋaabulut butumool haani fáriit.
33 33 Gusuulenoosuulen, ngucafool bacafer balagout.
Ay ájuhe alob mara búbajumool ?
Gúpurenoopuren kum nꞌdúniya. »
34 34 Amaañen aahu nasonken Fílip arogool : « Ubonket ugaanom. Anabiyoŋ aahu mara ay nalobe mee mee dó nꞌgurim gaagu ugu ? Mara ho fannaool, teer mara acee ábuto ? » 35 35 Be ésuupool, Fílip naŋar dó mꞌbusafer baabu min agaanool Furim Fásuum mee fara Yéesu. 36 36 Ngujow gujow, ngútiiŋ tin tabaje mal. Ñeer amaañen aahu narok : « Mal umee. Waa újuhe ucilom mat iyab gábatiise ? » [ 37 37 Fílip narogool : « Eéni gáyineni gútintiiŋ, júhe kaan. » Ñeer amaañen aahu narogool : « Iyínenyinen mara Yéesu Kirista ammee Aleeh Atúuha. »] 38 38 Narok guyihen esaret yaayu. Ho bugo nꞌFílip nguwalo dó nu mal maamu, min Fílip ábatiiseool. 39 39 Nan gúpurulo mee mꞌmal maamu, Búyeget bara Atúuha mbuliimen Fílip. Amaañen aahu ñeer abaañut añowool, bare nafaalen mꞌbulago'ool nꞌgásuumaay ró. 40 40 Fílip náraŋul nꞌésuk yan guroge mee Asidod, nawaare Furim Fásuum mee nꞌsísuk saasu peepe san awuj mee, jaram átiiŋ Sesare.