10. Atúuha nápajul buganool mara búsimen bara gabonket síjunube
10. Dieu explique à son peuple à propos du sacrifice pour le péché
Búsimen bu mara gabonket síjunube
1-2 Acehériit mee naboñ Móyiis arok bugara Isirayeel :
« Anooan akaan mee júnube banongut min akaan waaf wan Acehériit mee áfiren mee dó nꞌguyuhoumool,
ho be ecaam.
Búsimen bara ásimena háamak aahu
3 3 Eéni ásimena háamak aahu akaane júnube min egor bugan gaagu peepe,
ho be ecaam násimen fujiŋa fabajut gafoj bu nꞌAcehériit mee bu mara gabonket júnubeool.
4 4 Ho be eŋar fujiŋa faafu bu nꞌgayeem gara éguut yara búrehoor nꞌAcehériit mee,
nabaŋ gañenool nꞌfukow fujiŋa faafu nataan fo fácil Acehériit mee.
5 5 Asímena háamak aahu be eŋar fúsim fujiŋa faafu bu dó nꞌéguut yara búrehoor nꞌAcehériit mee
6 6 naŋar fusiigool nagor fúsim faafu,
náliisen ñooño futok nꞌñáruba gábil gáamak gáginden mee tañaao mee fácil Acehériit mee.
7 7 Asímena aahu be eŋar fúsim faafu nalogos úsiin wara fúsimenum tan nja guŋar mee esantiñaajo ngukooten fácil Acehériit mee afaak,
náyuh faŋaño mee fataam fúsimenum fan nja gusow mee búsimen baabu fammee mꞌmúnogenum éguut yaayu.
8 8 Ho bu gápuren usaas fujiŋa faafu peepe :
wagongen mee far fo mꞌmulaw fo,
9 9 nꞌsooh sammee súruba nꞌusaas wagongen so mee,
nꞌwammee nꞌufeef fo,
son may gahaja gareg mee baruuk gara fiiñ fo.
10 10 Wanur waawu nja gúpuren nꞌfujiŋa fara búsimen bara gásuumaay.
Asímena aahu be esow wo peepe jaram reem to nꞌfúsimenum fan nja gusow mee búsimen baabu.
11-12 11-12 Bare waŋaño mee dó nꞌfujiŋa faafu :
gabaŋ fo,
eluu yaayu peepe,
fukow faafu,
goot gaagu,
mulaw maamu son wan dó mee nu far faafu peepe,
ho be eteb wo nápur tan gucong mee bu tin taseset tan nja gúyuh mee butune,
naŋar ujonten nasow jareem reem to mꞌbutune bara baabu búsimen.
Búsimen bara bugara Isirayeel búroomiil
13 13 Eéni bugara Isirayeel búroomiil gukaane júnube banongut min gukaan waaf wan Acehériit mee áfiren mee dó nꞌguyuhoumool,
haani min gunongut mee,
júnube yaayu be egoriil peepe.
14 14 Nan gubil mee émir mara gukankaan júnube,
bugo be ecaam fujiŋa bu mara gabonket júnubeiil,
nguŋar fo bu nꞌéguut yara búrehoor nꞌAcehériit mee.
15 15 Unafaan ésuk yaayu be ebaŋ guñeniil nꞌfukow fujiŋa faafu ngutaan fo fácil Acehériit mee.
16 16 Asímena háamak aahu be eŋar fúsim fujiŋa faafu bu dó nꞌéguut yara búrehoor nꞌAcehériit mee,
17 17 naŋar fusiigool nagor fúsim faafu,
náliisen ñooño futok nꞌñáruba gábil gáamak gáginden mee tañaao mee fácil Acehériit mee.
18 18 Asímena aahu be eŋar fúsim faafu nalogos úsiin wara fúsimenum fammee dáara nꞌéguut yaayu afaak,
náyuh faŋaño mee fataam fúsimenum fan nja gusow mee búsimen baabu,
fammee mꞌmúnogenum éguut yaayu.
19 19 Ho bu gápuren usaas fo peepe nasow wo jaram ureem to nꞌfúsimenum faafu.
20 20 Ho be eŋar fujiŋa faafu nakaan naŋ min nja kaani mee mꞌbúsimen bara gabonket síjunube.
Mee nabil mee gábeesul bugara Isirayeel min Atúuha abonkehiil.
21 21 Ho be eteb fujiŋa faafu nápur tan gucong mee,
nasow fo,
naŋ min abil mee esow faafu fujiŋa fútiyoora.
Dó emmee búsimen bara gabonket júnube bugara ésuk yaayu búroomiil.
Búsimen bara áseef
22 22 Eéni áseef akaane júnube banongut,
min akaan waaf wan Acehériit mee áfiren mee dó nꞌguyuhoumool min abaj júnube,
23 23 nan abil mee émir akankaan júnube,
ho be eŋar fújikal fabajut gafoj,
24 24 nabaŋ gañenool nꞌfukow fo,
nataan fo fácil Acehériit mee tan nja gutaan mee búsimen ban nja gusow mee jaram reem.
Dó emmee búsimen bara gabonket júnube.
25 25 Asímena be eŋar fusiigool nagor fúsim fara búsimen baabu bara júnube,a
nalogos úsiin wara fúsimenum fan nja gusow mee búsimen baabu afaak,
náyuh faŋaño mee fataam fúsimenum faafu.
26 26 Ho be esow to nꞌfúsimenum faafu usaas waawu peepe,
naŋ min nja kaani mee mꞌbúsimen bara gásuumaay.
Mee ásimena aahu abil mee gábeesul áseef aahu min Atúuha abonket júnubeool.
Búsimen bara an acee
27 27 Eéni acee mꞌbugara ésuk yaayu akaane júnube banongut,
min akaan waaf wan Acehériit mee áfiren mee dó nꞌguyuhoumool min abaj júnube,
28 28 nan abil mee émir akankaan júnube,
ho be eŋar ejaameen ekoña yabajut gafoj bu mara júnube yan akaan mee.
29 29 Ho be ebaŋ gañenool nꞌfukow ekaj yaayu,
nataan yo tan nja gutaan mee búsimen ban nja gusow mee jaram reem.
30 30 Asímena aahu be eŋar fusiigool nagor fúsim fara búsimen baabu bara júnube,
nalogos úsiin wara fúsimenum fan nja gusow mee búsimen baabu afaak,
náyuh faŋaño mee peepe fataam fúsimenum faafu.
31 31 Ho bu gápuren usaas yo peepe,
naŋ min nja kaani mee mꞌbúsimen bara gásuumaay,
nasow wo to nꞌfúsimenum faafu min tiiŋo nogen Acehériit mee.
Mee ásimena aahu abil mee gábeesulool min Atúuha abonket júnubeool.
32 32 Eéni acamen,
naŋar ésaaja ekoña yabajut gafoj,
33 33 nabaŋ gañenool nꞌfukow yo nataan yo tan nja gutaan mee búsimen ban nja gusow mee jaram reem.
34 34 Asímena aahu be eŋar fusiigool nagor fúsim fara búsimen baabu bara júnube,
nalogos úsiin wara fúsimenum fan nja gusow mee búsimen baabu afaak,
náyuh faŋaño mee peepe fataam fúsimenum faafu.
35 35 Ho bu gápuren usaas yo peepe,
naŋ min nja kaani mee mꞌbúsimen bara gásuumaay,
nasow wo to nꞌfúsimenum faafu afaak,
nariten wo mꞌbaabu búsimen basowi mee bu nꞌAcehériit mee.
Mee ásimena aahu abil mee gábeesulool min Atúuha abonket júnubeool. »