9. Atúuha nasen buganool guyuhoumool gammee guñen
9. Dieu donne à son peuple ses dix commandements
Guyuhoum Atúuha gammee guñen
1 1 Ñeer Atúuha narok Isirayeel :
2 2 « Injé emmee Acehériit mee Atúuhai hápurenuli mee mꞌmof mara Esípt ban ulakoeen mee nꞌfumiigeelet.
3 3 Jambil unaak Atúuha acee halet ínje.
4 4 Jambil útuuhooro búnaati banooban.
Jambil bayijer bo búnogoor nꞌwanoowan :
wammee fatiya,
wammee nꞌduniya son may wammee mꞌmal mammee dó nꞌetaam yaayu.
5 5 Jambil uyah wo gújuul,
ban may jambil usen wo búsimen banooban.
Injé Acehériit mee ammee Atúuhai,
icamenut búsuupoor.
Nja itetek anooan halaafaam mee bu nꞌguleehool ró jaram loh nꞌgambac gáfaaten káŋ bu nꞌgabaaligen,
dó peepe mara júnube paayiil.
6 6 Bare ínje may emmee Atúuha han nja áriiken mee bugan gacamenaam mee ban ngúkaanum guyuhoumom,
gambacóogambac jaram tíiŋ gambac gakaan mee éwuli.
7 7 Jambil uŋar gajaom núraari.
Injé Acehériit mee ammee Atúuhai be etek anooan hakajen mee gajaom.
8 8 Uwosen funak fara fulako min ujok mara fo fúmbaam.
9 9 Gújagagi peepe gan uñum mee ekaan,
ukaan go dó nꞌgunak gammee futok nu fanur.
10 10 Bare funak fakaan mee futok nꞌgúruba,
fammee fulako,
fo nuñum mee esen Acehériit mee Atúuhai.
Aw nꞌguleehi gumaañen nꞌukoña,
nꞌújagagai umaañen nꞌukoña,
nꞌajawoora ammee síndoi son sikaji,
jambil jikaan gújagagoojagak nꞌfunak faafu.
11 11 N'gunak futok nu fanur Acehériit mee átuuhe fatiya nꞌetaam,
fal faafu son wan dó mee peepe afaak,
náyolo nꞌfunak fakaan mee futok nꞌgúruba.
Yo ecil mee Acehériit mee násoonien funak faafu fara fulako ban nakaan fo foola.
12 12 Ukáanum paayi nꞌjaayi,
mo aw bu gapiyo mꞌmof man Acehériit mee Atúuhai aseni mee.
13 13 Jambil umuk an.
14 14 Jambil ufiihen akoña hara an.
15 15 Jambil úkuet.
16 16 Jambil ubij ukaan apaali aw nꞌgáseedo.
17 17 Jambil ufogo waafóowaaf wara apaali :
yaŋool,
akoñaool,
ájagagaool amaañen nꞌakoña,
eyahaool son efalo'ool. »
Gásebi gara bugara Isirayeel
18 18 Nan bugara Isirayeel búroomiil gujam mee gapapamboora gaagu son baroger gábilleen gaagu,
nguñow bayijer émit yaayu son may emontaañ yan gakooret,
ngúsebi jaram gutelen.
Nguyiho kuhi
19 19 ngurok Móyiis :
« Aw fannai ulob nꞌéli.
Elí bu gáyenteni.
Bare jambil Atúuha alob nꞌéli :
éeni alob nꞌéli bújooŋoor,
éli be ecet. »
20 20 Móyiis narogiil :
« Jambil jísebi waafóowaaf !
Eéni jiñow Atúuha aciguluul,
be émir tuu gáyinenuul gurehe.
Acamencamen jíkaanumool jambil jikaan júnube. »
21 21 Ñeer bugan gaagu nguyiho kuhi,
bare Móyiis déhooro acige gátuul gamooc mee dan Atúuha ammee.