13. Yéesu nábatisei
13. Le baptême de Jésus
Saŋ Bátiis nan gawaare
1 1 Baj bo símit,
Saŋ Bátiis nápurul,a
nak awaare nꞌerampaasa yara mof man guroge mee Yúde.
2 2 Nak arok :
« Jikahen bakaaneruul bafeegut mee,
mara Jáyiih jara fatiya jicigulocik. »
3 3 Saŋ ho ammee an aahu han anabiyoŋ aahu Esai alob mee moola nan arok mee :
« Furim fahahank fápureul mee baabu nꞌerampaasa yaayu furoge :
“Jiyaaso bulago bu nꞌAcehériit mee !
Jítiiguloor ugur waawu min ulago bu nu ho !” »
4 4 Gájuwo Saŋ mꞌbufal eñonkome ngucookoori ban fupincenum fara gabaŋ nja akok nꞌfukoŋolool.
Fábangur son múkum mara futaaŋaat nja atiñ.
5 5 Bugara Yérusaleem,
bugara Yúde búroomiil mꞌbugara gapana eraal yan guroge mee Suruden peepe nak gujow gutoogool bo,
6 6 ngulob síjunubeiil fácil bugan gaagu,
min ñeer Saŋ ábatiseiil dó nꞌeraal yaayu yara Suruden.
7 7 Nan Saŋ añow mee mara efarisiit nꞌésaduke b gameeŋe gújaeujow be eyab gábatise nu ho,
narogiil :
« Ulíkib we !
Jirorok mee njibil mee epak ecaf yara Atúuha yammee néjool ?
Ay alobuul yo ?
8 8 Jikaan majage njiliik mara jílowulowul bakaaneruul !
9 9 Jambil jilako to nanoonan erok :
“Aburaham ammee paayolaal afaan,
tootook.”
Iroguulee :
Let jiñoñow sílankiin se ?
Atúuha ájuhe álowul so nsóoni guleeh Aburaham.
10 10 Fúniir ufu to nꞌfubaŋi be esaat guraar ununuk :
bununuk banooban bubugut mutiñ majajak,
bu gatenkoori mbubeheni nꞌsambun.
11 11 Injé mꞌmal níbatiseuul be eliik mara jíwuwug búsol bakaaneruul bajagut mee.
Bare an abil mee éjool mꞌbúsolom aregaam sembe máaamak,
ítiiŋut sah bu gápuren usamataool.
Ho bu gábatiseuul mꞌbúyeget Baset mee son sambun.
12 12 Bu gayeken nꞌgañenool gáarik gara ewey bu gáfajuloor emaano yaayu nꞌéful yaayu.
Emaano yaayu,
ho be ebaŋ yo mꞌburugun,
bare éful yaayu,
ho be esow yo nꞌsambun sacehériit. »
13 13 Funak fucee,
Yéesu nápurul Gálile atook Saŋ bo nꞌgapana eraal yara Suruden be eyab gábatise.
14 14 Bare Saŋ asoŋut.
Narogool :
« Injé kum aw ubilaam gábatise,
aw nújool bu nꞌínje ! »
15 15 Yéesu násuupool arogool :
« Para usoŋ min ukaanaal mee,
mara mo nubilaale ekaan mimbil útiiŋenaal wan Atúuha acamen mee.
» Ñeer Saŋ nasoŋ.
16 16 Yéesu nan ábatisei mee afaak,
nápurul mꞌmal maamu.
To bújooŋoor,
émit yaayu népeegulo,
nañow Búyeget Atúuhac buwaloúl bu nu ho naŋ élaabaan.
17 17 Furim nfúpurul nꞌémit furok :
« Ume Aleehom han íboolie máaamak :
gásuumaayom peepe nu ho ngooma. »
Yéesu, ésaaja yaayu yara Atúuha
29 29 Fara gajom,
Saŋ nañow Yéesu néjool bu bo nu ho,
narok :
« Esáaja yaayu yara Atúuha uyue,
yápurene mee síjunube sara dúniya.
30 30 Moola nilobuul mee nan irok mee :
“An aahu abil mee éjool búsolom,
naregom máamak mara bala ibaji,
ho bo.”
31 31 Ban ínje fannaom ímireenutool,
bare nijaalojow íbatise mꞌmal mimbil bugara Isirayeel gufaasool. »
32 32 Saŋ nabenen arok :
« Iñoñow Búyeget Baset mee buwaloúl nꞌémit naŋ élaabaan,
mbucin dó nu ho.
33 33 No,
ímireenutool,
bare Atúuha haboñulaam mee íbatise mꞌmal narogandok :
“An aahu han ubil mee eñow Búyeget Baset mee buwaloúl mbucin nu ho,
ho abil mee gábatise mꞌBúyeget Baset mee.”
34 34 Ban ínje Saŋ niñoñow yo,
yo ecil mee ñeer nsehom nirok ho ammee Aleeh Atúuha. »