(Audio de ce chapitre disponible dans Fuliik Atúuha)
Saŋ Bátiis nan gawaare
3
Baj bo símit,
Saŋ Bátiisa nápurul,
nak awaare nꞌerampaasa yara mof man guroge mee Yúde.
2 Nak arok :
« Jikahen bakaaneruul bafeegut mee,
mara Jáyiih jara fatiya jicigulocik. »
3 Saŋ ho ammee an aahu han anabiyoŋ aahu Esayi alob mee moola nan arok mee :
« Furim fahahank fápureul mee baabu nꞌerampaasa yaayu furoge :
“Jiyaaso bulago bu nꞌAcehériit mee !
Jítiiguloor ugur waawu min ulagob bu nu ho !” »
4 Gájuwo Saŋ mꞌbufal eñonkome ngucookoori ban fupincenum fara gabaŋ nja akok nꞌfukoŋolool.
Fábangur son múkum mara futaŋaat nja atiñ.
5 Bugara Yéruusalem,
bugara Yúde búroomiil mꞌbugara gapana eraal yan guroge mee Suruden peepe nak gujow gutoogool bo,
6 ngulob síjunubeiil fácil bugan gaagu,
min ñeer Saŋ ábatiiseiil dó nꞌeraal yaayu yara Suruden.
7 Nan Saŋ añow mee mara efarisiit nꞌésadukec gameeŋe gújaeujow be eyab gábatiise nu ho,
narogiil :
« Ulíkib we !
Jirorok mee njibil mee epak ecaf yara Atúuha yammee néjool ?
Ay alobuul yo ?
8 Jikaan majage njiliik mara jílowulowul bakaaneruul !
9 Jambil jilako to nanoonan erok :
“Aburaham ammee paayolaal afaan,
tootook.”
Iroguulee :
Let jiñoñow sílankiin se ?
Atúuha ájuhe álowul so nsóoni guleeh Aburaham.
10 Fúniir ufu to nꞌfubaŋi be esaat guraar ununuk ;
bununuk banooban bubugut mutiñ majajak,
bu gatenkoori mbubeheni nꞌsambun.
11 Injé mꞌmal níbatiiseuul be eliik mara jíwuwug búsol bakaaneruul bajagut mee.
Bare an abil mee éjool mꞌbúsolom aregaam sembe máaamak,
ítiiŋut sah bu gápuren usamataool.
Ho bu gábatiiseuul mꞌbúyeget Baset mee son sambun.
12 Bu gayeken nꞌgañenool gáarik gara ewey bu gáfajuloor emaano yaayu nꞌéful yaayu.
Emaano yaayu,
ho be ebaŋ yo mꞌburugun,
bare éful yaayu,
ho be esow yo nꞌsambun sacehériit. »
13 Funak fucee,
Yéesu nápurul Gálile atook Saŋ bo nꞌgapana eraal yara Suruden be eyab gábatiise.
14 Bare Saŋ asoŋut.
Narogool :
« Injé kum aw ubilaam gábatiise,
aw nújool bu nꞌínje ! »
15 Yéesu násuupool arogool :
« Para usoŋ min ukaanaal mee,
mara mo nubilaale ekaan mimbil útiiŋenaal wan Atúuha acamen mee.
» Ñeer Saŋ nasoŋ.