Elonna ngújool guyah Yéesu gújuul
2
Yéesu, Betuleem nabaji mꞌmof mara Yúde. Gannay gaagu ugu, no áyiih aahu Herod aameen mee nꞌfukow mof maamu. Elonna gakaraŋe mee siwuut saasu gápurulo kuhi ban bunak búpureul mee, ngútiiŋul dó Yéruusalem. 2 Ngusonken gurok : « Ayíih hara Esúiif yaayu hajook mee ebaji uméy ? Elí uñowuloñow ewuut yaayu yoola kábiriŋ ban bunak búpureul mee ; ujaalojow be eyahool gújuul. »3 Nan áyiih aahu Herod ajam mee furim faafu, ho mꞌbuganool bugara Yéruusalem, úyegehiil núguuhoor. 4 Ñeer nahomen unafaan úsimena waawu peepe bugo nꞌúpajula fuyuhoum Atúuha bugara Esúiif yaayu min asonkenil tuu Kirista aahu abil mee ebaji. 5 Ngurogool : « Ho be ebaji Betuleem mꞌmof mara Yúde, mara anabiyoŋ aahu alolob moola arok :
6 “Aw Betuleem, ésuk yara Yúde,
let aw ureg mee nurehoore nꞌsísuk sáamak sara Yúde !
Umír mara an háamak be épurul nꞌaw
habil mee gamat buganom bugara Isirayeel.” »
7 Ñeer Herod naboñ n'etaam guwoogulool elonna yaayu min gugaanool jak nan ewuut yaayu eraŋulo mee. 8 Púr to, naboñiil bu Betuleem, narogiil : « Jijow jítiiŋ, njisonken jak mara aleeh aahu. Nan jibil mee eñowool, njikaanom nímir mimbil ínje may ijow iyahool gújuul.
9 Nan gúyenten mee áyiih aahu gufaak, ngujow. Ngon nejow, ewuut yaayu yan guñowulo mee ban bunak búpureul mee nelohiil fácil. Nan étiiŋ mee tan aleeh aahu ammee, neyiho to fatiya. 10 Nan guñow mee ewuut yaayu, nsúumiil máaamak. 11 Ñeer ngunogen nꞌyaŋ yaayu, nguñow jileeh jaaju bugo n'jawool Mari. Nguyah gújuul min gunaak jileeh jaaju. Ngugubul dan gubaŋ mee fubajiil fareg mee bajak min gúpuren dó ewurus, esantiñaajo son mulusoor gújii jileeh jaaju. 12 Púr to, Atúuha nalobiil nꞌsiyaut jambil gubaañ bu nꞌHerod. Nguŋar bulago bucee min goot bu mꞌmofiil.