(Audio de ce chapitre disponible dans Fuliik Atúuha)
Yéesu nakaan umu habafo mee nakolo
5
17 Funak fucee,
Yéesu nan ngawaare nꞌyaŋ ecee.
*Efarisiita bugo nꞌúpajula fuyuhoum fara Atúuha gápurulo nꞌsísuk saasu peepe sara Gálile nꞌsara Yúde bu Yéruusalem dó,
ngon to ngulakoe.
Sembe Atúuha nson nꞌYéesu mbil nak ájuh ásonten bugan ngukolo to bayaas.
18 Bugan gucee ngútebul mꞌbuyaaju an ájuhut ejow.
Ngucameneen érurool dó nꞌyaŋ yaayu jaram gubaŋool bújooŋoor Yéesu,
19 bare gújuhut mara gayooŋ gaagu guruuruuk.
Ñeer ngukat min gujiŋ fatiya mꞌbumillum baabu,
ngúkabul bo ticee min guwalen buyaaju baabu dan ásonta aahu ammee,
bu to nꞌYéesu nꞌetut bugan gaagu.
20 Nan Yéesu añow mee gáyineniil,
narok ásonta aahu :
« Apaalom,
ubajut ñeer síjunube. »
21 Ñeer úpajula fuyuhoum Atúuha gan to mee bu nꞌefarisiit yaayu ró ngupinoor gurok :
« An buu umu ajele mee Atúuha ?
Ay ájuhe abonket síjunube an,
éeni let Atúuha noonool ? »
22 Yéesu námir mee wan nꞌúyegehiil,
narogiil :
« Waa ucile njipinoor mee ?
23 Jigaanom para :
erok umu habafo mee “Ubajut ñeer síjunube” son erogool “Uyiho ujow”,
waa urege básuum elob ?
24 Bare waaf wanur nicamene jímir :
*Aleeh Anb nayayab baabe nꞌdúniya sembe nꞌAtúuha sara gabonket síjunube sara bugan.
» Nálowulo bu nꞌhabafo mee narogool :
« Uyiho nuŋar buyaajui noot bu síndoi. »
25 To bújooŋoor,
an aahu nayiho fácil ésuk yaayu peepe,
naŋar buyaajuool dan afiihoeen mee min aat nesal Atúuha nu mo ró.
26 Bugo peepe ngujaahali máamak,
ngúsebi.
Ngusal Atúuha ngurok :
« Jaat uñowaañow waaf wan ujamerutaal. »