9
Yéesu nabenen arogiil :
« Iroguulee :
Gucee mꞌbuguul gayiho maa maa taahe mat gucet bugo bañowut Jáyiih Atúuha jítiiŋul nꞌsembe ró. »
Yéesu naŋar búnogoor bucee
2 Nan gunak futok nu fanur guwuj mee,
Yéesu naŋar Piyeer,
Saak nꞌSaŋ,
min gujow bu fatiya nꞌemontaañ yárookene.
Nan gom bo mee nooniil,
Yéesu nálowulo aŋar búnogoor bucee fáciliil,
3 wañool nukat bakat nuhiina pararar jaram nak uyij,
ban bahiinaer wo bajut ataasa wañ baabe nꞌdúniya hájuhe ataas wañ jaram uhiina mee.
4 Eliyas bugo mꞌMóyiis ngúpuruliil to,
ngon nelob bugo nꞌYéesu.
5 Ñeer Piyeer naŋar furim narok Yéesu :
« Anafaanóli,
jajak tambi min éli óoni taahe ;
éli bu gayihen síguut sífaajiir.
Yanur bu nꞌaw,
yaayu bu mꞌMóyiis,
éfaaten bu nꞌEliyas. »
6 (Piyeer ámirut wan an nelob mara máfaajiiriil gúsebisebi máamak.)
7 Fumooc nfújool fugubeniil,
furim nfúpurul dó furok :
« Ume ammee aleehom han íbooli mee.
Jíyentenool ! »
8 To bayaas,
ulagenaool ngujegoor banooban,
gubaañut guñow haani an,
éeni let Yéesu déhooro han to mee mꞌbugo.
9 Nan gommee ngawaloúl nꞌemontaañ yaayu,
Yéesu napangiil arogiil jambil gugaan an wan guñow mee káŋ bu nan Aleeh An abil mee gayihoúl dó nꞌgacet mee.
10 Ngujam furimool,
bare ngulako gasonkenoor :
« Waa wommee gayihoúl dó nꞌgacet mee ? »
11 Púr to,
ngusonken Yéesu gurogool :
« Waa ucile úpajula fuyuhoum Atúuha nak gurok Eliyas ho be emundum ábaañul ? »
12 Narogiil :
« Maregen,
Eliyas ho be emundum ábaañul bu gacookoor waaf waawu peepe wáguuhoor mee nubaañ unogoor naŋ min woomeen mee.
Buu nkaane Busafer baabu mburok may Aleeh An be élaam máamak ban bugan be éwugool búsol ?
13 Iroguulee :
Eliyas ajaalojow kum,
ban gukaanookaan wásuumiil mee,
naŋ min Busafer baabu bulob mee moola. »
Yéesu násonten aleeh abaje érus
14 Nan gubaañulo mee bu tan ulagenaool bugaagu gommee,
nguñow gayooŋ gáamak gugongeniil.
Upájula fuyuhoum Atúuha ngon mbúceeŋoor mꞌbugo.
15 Gayooŋ gaagu nan guñow mee Yéesu,
ngujaahali máamak,
ngúteyul be elob nu ho.
16 Ñeer Yéesu nasonkeniil arogiil :
« Waa njon mbúceeŋoor mꞌbugo ? »
17 Amaañen acee narogulool dó nꞌgayooŋ gaagu :
« Aliiga-bugan,
aleehom amaañen niŋarulo bu nꞌaw.
Eseytaane enogenool,
yo ecilool mee ájuhut elob.
18 Tanootan neyihoulool,
yo be etebool ebet nꞌetaam.
Aleeh aahu bu gagofet,
nak akeetoor kababab ban nahay kaŋ.
Ihuoohuoor ulagenai min gukam yo,
bare gújuhut. »
19 Ñeer Yéesu narogiil :
« Buguul gambac gáyinenut.
Káŋ bu néy nibile gáani to mꞌbuguul nimuuyenuul ?
Jiŋarulom aleeh aahu ! »
20 Nguŋarulool ho.
Nan eseytaane yaayu eñow mee Yéesu,
nekaan aleeh aahu nátitiben,
naloh nꞌetaam,
nak aborinkenoor nagofet nu mo ró.
21 Ñeer Yéesu nasonken pay aleeh aahu arogool :
« Kábiriŋ néy nja kaanool mee ?
» Násuupool arogool :
« Kábiriŋ nꞌfuleeheool
22 ban ñameeŋe eseytaane yaayu ebehoobet nꞌsambun mba nu mal bu jamugool.
Eéni újujuh ukaan to waaf,
eniini etey nubonket urandenóli. »
23 Yéesu narogool :
« Nuroge éeni íjuh !
Wanoowan újuhe ukaano bu nꞌan áyinen mee Atúuha. »
24 To bayaas,
pay aleeh aahu narok máamak :
« Anafaanom,
íyinenyinen !
Ujóol urandenom mara gáyinenom gutoogut ! »
25 Nan Yéesu añow mee gayooŋ gaagu goon ngabeneno,
nayiho arotoor eseytaane yaayu nꞌsembe arok :
« Aw eseytaane yan nja ekaan bugan mat gújuh elob ban nubehiil futiiŋoon,
irogi úpur nꞌaleeh aahu,
ban jambil ubaañ unogen nu ho benen ! »
26 Ñeer eseytaane yaayu néliisen aleeh aahu nꞌsembe,
népur nu ho nꞌsikaaw sáamak ró.
Aleeh aahu nahay kaŋ naŋ eñalen jaram gameeŋe nꞌgan to mee gurok acecet.
27 Bare Yéesu najogool nꞌgañen min aleeh aahu ayiho.
28 Nan Yéesu abaañ mee nan dó nꞌyaŋ yaayu bugo nꞌulagenaool nooniil,
ngusonkenool gurogool :
« Waa ucile éli újuhut ukam eseytaane yaayu ? »
29 Narogiil :
« Siseytaane sammee naŋ yo,
nꞌéciin déhooro nújuhe ukam so. »
Yéesu nalob áruten mara ecehool son gayiho'ool
30 Yéesu nꞌulagenaool ngúpur tan gommee,
ngujow gusaat mof mara Gálile,
bare acamenut an ámir
31 mimbil abajo bu galiigeniil.
Narogiil :
« Aleeh An be ebehi nꞌguñen gara bugan ;
bugo bu jamugool,
bare nꞌfunak fúfaaten fara ecehool,
ho bu gayihoúl dó nꞌgacet mee. »
32 Ulagenaool gujogut gurim gaagu,
bare guhaañiut gasonkenool.
Ulagena Yéesu nguceeŋoor ay mꞌbugo areg mee gupaalool
33 Yéesu nꞌulagenaool ngujow jaram gútiiŋ nꞌésuk yan guroge mee Kaparanaum.
Nan gunogen mee nꞌyaŋ yaayu,
nasonkeniil arogiil :
« Taŋ waa njilakoe búceeŋoor mꞌbulago ? »
34 Ngúnif yemm,
mara nan gommee néjool mꞌbulago,
búceeŋoor ngulakoe be émir ay mꞌbugo areg mee gupaalool.
35 Ñeer Yéesu nalako,
náwoogul ulagenaool gammee guñen nꞌgúruba,
narogiil :
« Eéni babaj an hacamene eloh fácil,
mbil áani ásola mꞌbugan gaagu peepe,
ban may náani ájagagaiil. »
36 Naŋar aleeh acee ayihen nꞌetuhiil afaak,
natebool,
narogiil :
37 « Anooan ayab mee nꞌgajow gúmbaam acee nꞌguleeh ge,
ínje fannaom nayabe.
Ban an ayabaam mee,
let ínje déhooro nayabe,
bare may haboñulaam mee nayabe. »
An afoyut mee ulagena Yéesu, umu mꞌbúsoliil
38 Ñeer Saŋ narok Yéesu :
« Anafaanóli,
uñoñow amaañen acee nak akam siseytaane nꞌgajow giiya.
Bare úfirenoofiren ekaan gújagak naŋ gaagu mara alet nꞌgayooŋolaal. »
39 Narogiil :
« Jambil jífirenool,
mara bajut an habile ekaan nꞌgajow gúmbaam waaf wajaahalie bugan,
afaak nalob kóji ayah nꞌínje.
40 An afoyutolaal mee,
umu nꞌgayooŋolaal.
41 Iroguulee :
anooan ájiiuul mee gagoh gara mal jirem mara min jommee bugan bugara Kirista,
maregen maregen an aahu abehenut,
mara kaan min kaane Atúuha be ecaamool. »
Yéesu natar mara wájuh mee ukaan an nabaj júnube
42 Yéesu nabaañ arok :
« An abil mee ecil jicee mꞌmuleeh me máyinenaam mee min jiloh nꞌjúnube,
an aahu wakoloe nu ho gukogool ekenkereŋ yáamak nꞌekondoor ngubehool nu fal.
43 Eéni may gañeni gucili min uloh nꞌjúnube,
usaat go.
Búnogen mꞌburoŋ bafaagoériit mee nꞌgañen ganur ró yo ekoloe ebaj guñen gúruba nuloh nꞌjahannama nꞌsambun sacehériit. [
44 ]a
45 Eéni may gaahi be ecili min uloh nꞌjúnube,
usaat go.
Búnogen mꞌburoŋ bafaagoériit mee nꞌgaat ganur ró,
yo ekoloe ebaj goot gúruba ban nuloh nꞌjahannama. [
46 ]b
47 Mbil eeno jícili jibili ecil min uloh nꞌjúnube,
úkoosul jo ubehen.
Búnogen nꞌjáyiih Atúuha nꞌjícil janur ró,
yo ekoloe ebaj gúcil gúruba nuloh nꞌjahannama
48 dan bápus bacehériit boom son sambun sacehériit.
49 Maregen maregen,
anooan bu gaseheni nꞌsambun,
naŋ min mutasen musehene mee búsimen.
50 Mutasen waaf wajajak.
Bare éeni gáfir mo gúpur,
waa njibile eŋar njibaañenúl go ?
Jibaj mutasen mꞌbuguul,
ban gásuumaay ngon nꞌetuhooruul. »