Yéesu nanogen Yéruusalem
11
Nan Yéesu nꞌulagenaool gucik mee Yéruusalem,
ngon newuj sísuk san guroge mee Betifaase son Betani,
sammee nꞌgabereberef eking yan guroge mee « emontaañ yara uoliiw »,
naboñ gúruba nꞌulagenaool gulohool fácil.
2 Narogiil :
« Jijow bu nꞌésuk yan jijooŋoor mee mee.
Buguul mbúnogen dó be eñow jifalo jakogikok jan an ajiŋerut.
Jíjalul jo jiŋarulom.
3 Eéni an asonkenuul aroguul :
“Waa njon nekaan ?”,
njirogool :
“Acila aahu ahaajo jo,
ban mat piyo ho bu gabaañenúl jo.” »
4 Ñeer ulagenaool gammee gúruba ngujow gútiiŋ,
ngutook jifalo jakogikok tíyaŋ to mꞌbulago,
cik gápeegum yaŋ ecee,
ngujal jo.
5 Gucee nꞌgan to mee ngurogiil :
« Waa njon nekaan ?
Waa ucile njijal jifalo jaaju ? »
6 Ngúsuupiil naŋ min Yéesu alobiil mee.
Ngukahiil nguŋar jo.
7 Ngúŋarul jo bu to nꞌYéesu,
gútiiŋul,
nguŋar újuwoiil gubet jo mꞌbúsol min alako dó.
8 Bugan gameeŋe ngutal újuwoiil mꞌbulago baabu.
Bugaagu ngutal dó muhan máninif man gusaahulo baabu nꞌurager waawu.
9 Galohool mee fácil bugo nꞌgalageniil mee mꞌbúsol nak gukaaw gurok :
« Hosanna !
Mbil Atúuha ásoonien ammee néjool nꞌgajow gara Acehériit mee !
10 Mbil Atúuha ásoonien jáyiih jammee néjool,
Jáyiih jara paayolaal Dawid !
Hosanna !
Usalaal Atúuha bu dó fatiya ! »
11 Ñeer Yéesu nanogen Yéruusalem,
najow bu nꞌyaŋ Atúuha.
Nañeeroor dó jak,
bare tinak ntijon mee,
naŋar ulagenaool gammee guñen nꞌgúruba min gúpur gujow bu Betani.
Yéesu naranka bupok
12 Nan tikahen mee,
ngon népurul Betani,
bacaar mbujok Yéesu.
13 Naŋanden bupok nꞌutoj bo ró,
nacik bo min añow jak teer mbil atook dó mutiñ.
Bare nan acik bo mee,
nañow mara utoj déhooro won dó,
mara let gabuga bo.
14 Narok bo :
« An mat atiñ ñeer mutiñi ñáleb !
» Ulagenaool ngujam min alobe mee.
Yéesu nakam unoomena nꞌyaŋ Atúuha
15 Ngútiiŋ Yéruusalem,
Yéesu nabaañ anogen nꞌyaŋ Atúuha.
Nakam unoomena bugo nꞌunooma peepe gan dó mee,
nabet sitaabul utiha-síkori son sítalum sara unoomena sílaabaan.
16 Akahut haani an nateb múnoomiinaay dó nꞌyaŋ Atúuha.
17 Afaak narogiil :
« Taŋ Atúuha arogut mꞌBusafer baabu :
“Yaŋom bugo be erok yo yaŋ yara éciin yara sísuk saasu peepe” ?
Bare buguul njílowul yo yóoni fúrehoorum úkuu. »
18 Nan unafaan úsimena waawu bugo nꞌúpajula fuyuhoum Atúuha gujam mee gurim gaagu,
ngon neŋes buu ngubile ekaan ngumugool.
Gúsebioosebi mara bawaare'erool bugogor gayooŋ gaagu peepe.
19 Bu gárusa,
Yéesu nꞌulagenaool ngúpur nꞌésuk yaayu.
Sembe sara gáyinen
20 Mꞌbújom,
nan gommee newuj tan bupok baabu bommee,
ulagenaool nguñow bo min buhaye káŋ bu nꞌguraar bo.
21 Piyeer nawosen wabajeen mee,
narok Yéesu :
« Anafaanom,
apa uñeer.
Bupok ban uranka mee buhaye. »
22 Yéesu narogiil :
« Jíyinen Atúuha !
23 Iroguulee :
Maregen éeni an arok emontaañ yaayu :
“Upúr tan ommee nujow uloh nu fal”,
ho bacehoorut dó mꞌbúyegehool,
náyinen wo bu gakaano,
neem maregen wo be ekaan.
24 Yo ecil mee niroguul :
Wanoowan njon néciin Atúuha,
njíyinen mara jibabaj wo jifaak,
neem maregen buguul be ebaj wo.
25 Ban nanoonan njon néciin Atúuha,
éeni jibajoobajoor nꞌan,
jibonkehool.
Mo Paayuul ammee fatiya bu gabonkehuul may síjunubeuul. [
26 Bare éeni jibonkehut gabij mee mꞌbuguul,
Paayuul ammee fatiya mat may abonkehuul síjunubeuul.]a »
Sembe Yéesu béy nsípurulo ?
27 Púr to,
Yéesu nꞌulagenaool ngubaañ bu Yéruusalem.
Nan gútiiŋulo dó mee,
Yéesu nan ngajaoor dó nꞌyaŋ Atúuha.
Ñeer unafaan úsimena waawu,
úpajula fuyuhoum Atúuha bugo nꞌunafaan ésuk yaayu ngújool bu to nu ho,
28 ngusonkenool gurogool :
« Nꞌsembe buu nja ukaan mee waaf waawu ?
Ay aseni so ? »
29 Narogiil :
« Injé may bu gasonkenuul waaf wanur pat.
Eéni jísuupom,
ínje may be egaanuul nꞌsembe buu nja ikaan mee waaf waawu.
30 Iyoo.
Sembe sara gábatiise san Saŋ Bátiis abaj mee,
béy nsípurulo :
NꞌAtúuha teer nꞌan ?
Apa jísuupom ! »
31 Ngújaluloor bo gújaluloor ngurok :
« Eéni urogaal nꞌAtúuha,
ho be erogolaal :
“Waa ucile jíyinenutool ?”
32 Min urogaal nꞌan nsípurulo,
haa...
!
» Ngúsebi mee gayooŋ gaagu gajok mee peepe mara Saŋ Bátiis maregen anabiyoŋ fannaool,
33 ngurok Yéesu :
« Elí úmirut.
» Narogiil :
« Injé may mat igaanuul nꞌsembe buu nja ikaan mee waaf waawu. »